Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Я́ко Бо́жий иера́рх и служи́тель, Вы́шняго престо́лу с ли́ки святы́х на небеси́ предстоя́, моли́ся о на́с, служа́щих богодухнове́нными пе́сньми, предста́ти с тобо́ю, иде́же весе́лие пра́ведных.

Я́ко избра́н Го́сподеви во служе́ние сла́вы Его́ на де́ло Ева́нгелия Христо́ва, о со́бранных на́с в па́мяти твое́й, святи́телю Михаи́ле, моли́ся, да порабо́таем в за́поведех ева́нгельских и прии́мем мзду́ — весе́лие пра́ведных.

Я́ко свеща́, на све́щнице стоя́, све́том твои́х благи́х дея́ний просия́л еси́ дале́че, я́ко и неве́рнии лю́дие твои́м, о́тче, наставле́нием узре́ша све́т боговиде́ния, и ра́дуется страна́, тобо́ю просвеще́нна.

Богоро́дичен: И́стинный Све́т от ложе́сн Твои́х яви́вшая ми́ру, на́с, во тме́ страсте́й ходя́щих, просвети́ и наста́ви на пу́ть, Пу́ть поро́ждшая ро́ду христиа́нскому, Мари́е Богоневе́сто.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Не бе́ ве́ра всажде́на в Росси́и, ниже́ благоче́стие вкорене́но, до́ндеже ты́, святи́телю Михаи́ле, а́ки прему́др де́латель, ляди́ну многобо́жия истреби́в, все́ял еси́ богоразу́мия се́мя доброплодови́тое.

Све́том свы́ше осве́щся, вели́кий Влади́мир, а́ки зарю́ прие́мь тя́, Бо́жий святи́телю, приведе́ во омраче́нную идолослуже́нием Росси́йскую зе́млю, да и та́мо осветя́тся лю́дие твои́м прише́ствием и вразумля́тся и́стинныя ве́ры позна́нием.

Со́лнце Пра́вды — Христо́с Бо́г, а́ки лучу́ светоза́рную яви́ тебе́, Михаи́ле, земли́ Росси́йской, ю́же ты́ просвети́в све́том позна́ния Боже́ственныя ве́ры, и очи́стив ба́нею возрожде́ния, Влады́це приве́л еси́ лю́ди но́вы, обновле́ны до́брым ве́ры испове́данием.

Богоро́дичен: Со́лнце Пра́вды — Христо́с И́стинный Бо́г на́ш, пло́ть заи́мствовав от Тебе́, ми́ру возсия́л е́сть, и тлю́ многобо́жия потреби́ до конца́. Све́та жили́ще, Де́во Мари́е, уны́нием мя́ омраче́нна просвети́, и наста́ви на пу́ть благодея́ния.

Седа́лен, гла́с 8:

Се́чивом Ева́нгельскаго уче́ния посе́кл еси́ и́дольское изва́яние, ка́пища на зе́млю опрове́рг, благоче́стие насади́л еси́, и́мже красу́ющися, гра́д Ки́ев любо́вию зове́т ти́: ра́дуйся, Михаи́ле, архиере́е Росси́и первопресто́льне.

Богоро́дичен: Пою́щих Ти́: ра́дуйся, изба́вльшая ва́рварскаго служе́ния, изми́ рабо́ты чужда́го и сокруши́вши в мы́слех и́долы стра́стныя, насади́ благоразу́мие стра́ха Бо́жия, Ты́ бо еси́ всему́ бла́гу вина́, нача́ток и исполне́ние.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Христо́ва раба́ и благоче́стна строи́теля тебе́, святи́телю, и́долы ощути́вше, рыда́ху го́рце поги́бели своея́, лю́дие же, креще́нием обновле́ннии, веселя́хуся, пра́здник све́тел о Го́споде пра́зднующе.

Тебе́, о́тче, на го́ры Ки́евския прише́дшу, пе́рвейший и́дол Перу́н, низве́ржен, влача́шеся ко́ньми, про́чиим от стра́ха трясу́щимся куми́ром; лю́дие же обновле́ния веселя́хуся о Го́споде, пра́зднующе.

Вся́к по́л и во́зраст люде́й, пре́жде омраче́нных, ко просвеще́нию грядя́ху на реку́ Поча́йню, и бы́сть по́лк безчи́сленный, тебе́ предводи́теля иму́щий, ему́же послужи́в ба́нею креще́ния, к богоразу́мию наста́вил еси́, Михаи́ле, Бо́жий архиере́ю.

Богоро́дичен: Вси́ ро́ди блажа́т Тя́, Мари́е Всецари́це, и мы́, пе́сньми блажа́ще, изображе́нному на ико́не лицу́ Твоему́ покланя́емся, пра́здник све́тел в па́мяти святи́теля Твоего́ пра́зднующе.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Бо́жиим све́том осве́щшися, новокреще́ннии лю́дие, вопия́ху с тобо́ю, Михаи́ле: Христе́ Бо́же, да́ждь Тебе́ еди́наго ве́дети, Сло́ва Бо́жия, от мра́ка идолобе́сия на́с изыма́ющаго.

Падо́ша Иерихо́нския сте́ны, Иису́сом Нави́ном киво́ту обноси́му, падо́ша и и́доли, со кресто́м тебе́, святи́телю, предгряду́щу, лю́дие же прославля́ху Сло́во Бо́жие, Тя́, Христе́, от мра́ка неве́рия челове́ки изыма́ющаго.

Красу́ется гра́д Ки́ев до дне́сь, ри́зою креще́ния оде́ян от тебе́, святи́телю, и но́сит, а́ки гри́вну зла́ту, на вы́и честно́е Ева́нгелие Христо́во, е́же мы́ лобыза́юще, прославля́ем Сло́ва Бо́жия, от тмы́ грехо́вныя на́с изыма́юща.

Богоро́дичен: Красу́емся вси́ добро́тою Твое́ю, Мари́е Богоневе́сто, красна́ бо еси́ вои́стинну, и красоты́ Твоея́ вожделе́в Вы́шний, пло́ть от Тебе́ заи́мствова, и Челове́к бы́в, Тебе́ ра́ди, Чи́стая Де́во, обожи́ на́с, во тлю́ па́дших.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Идолобе́сия смра́дное, а́ки Моисе́й, жезло́м сла́ное, кресто́м пресе́кл еси́ мо́ре, святи́телю Михаи́ле, и лю́ди, омы́в боговиде́ния водо́ю, приве́л еси́ в приста́нище, пою́щия: сла́ва Тебе́, Христе́ Многоми́лостиве.

И́же пе́рвее блудя́щая Росси́йская земля́, не утвержде́на, ны́не тобо́ю, святи́телю Михаи́ле, наста́влена, прии́де к богове́дению, и прие́мши пе́рстень усыновле́ния, весели́тся, зову́щи: сла́ва Тебе́, Христе́ мо́й, Многоми́лостиве.

Свире́пеющия неве́рием лю́ди укроти́в в Росси́йстей земли́ и яре́м повинове́ния Це́ркви возложи́в на ня́, приве́л еси́, Михаи́ле, мно́гия де́латели в виногра́д Небе́снаго Влады́ки. Сотвори́ и на́с, свя́те, поне́ во единонадеся́тый ча́с де́латели, да прии́мем мзду́ с после́дними.

Богоро́дичен: Свире́пеющия во мне́ стра́сти укроти́, и яре́м смире́ния возложи́ на мя́, Богоро́дице, да в то́м порабо́таю про́чее вре́мя, и обря́щу ми́лость в де́нь Су́дный.

Конда́к, гла́с 2:

Моисе́й вторы́й Росси́и яви́лся еси́, о́тче, пренесы́й мы́сленный виногра́д от еги́петскаго идолослуже́ния, в зе́млю, проро́чествием предуве́дену, о не́йже подобообра́зно рещи́: бу́дет утвержде́ние ве́ры на земли́, и на версе́х го́р Ки́евских превознесе́тся па́че Лива́на пло́д, пита́ющ ми́ра всего́; от него́же вкуси́вше, ублажа́ем тя́, Михаи́ле, Бо́жий святи́телю.

И́кос:

Расточе́нныя лю́ди собра́в во еди́н богове́дения ра́зум и креще́нием омы́в неве́дения ве́тхость земли́ Росси́йския, просвети́л еси́ Кресто́м, и научи́в сла́вити Пресвяту́ю Тро́ицу, Отца́ и Сы́на и Ду́ха Пресвята́го, соедини́л еси́ разу́мное ста́до Христу́ Бо́гу. Ему́же до дне́сь ве́рою неподви́жно стоя́щи, взыва́ет: изба́ви от вся́каго зла́го обстоя́ния гра́д и лю́ди, тя́ ублажа́ющия, Михаи́ле, Бо́жий святи́телю.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Хладода́тельною благода́ти от тебе́, святи́телю, Росси́я омове́на водо́ю, чешуи́ разу́мных оче́с изба́вися во святе́й купе́ли, и позна́вши Еди́наго Созда́теля своего́, и ве́рою зове́т: благослове́н Бо́г оте́ц на́ших.

Сла́вному гра́ду Ки́еву, по креще́нии веселя́щуся, скве́рнии и́доли, в ни́хже пе́рвейший Перу́н, влачи́ми, рыда́ху го́рце. Отту́ду лю́дие, позна́вше свое́ пе́рвое заблужде́ние, с тобо́ю, Михаи́ле, возопи́ша: благослове́н Бо́г оте́ц на́ших.

Зла́т пе́рстень но́выя благода́ти, архиере́е Михаи́ле, вложи́в Росси́и на ру́ку, обручи́л еси́ неве́сту чи́сту Христо́ви, от сего́ язы́ка Це́рковь. Я́же и до дне́сь, духо́вне веселя́щися, зове́т: благослове́н Бо́г оте́ц на́ших.

Богоро́дичен: Зла́т пе́рстень имену́ем Тя́, Де́во Чи́стая, укра́шен, а́ки драгоце́нным адама́нтом, приедине́нием Божества́ пло́ти, Христу́ от Тебе́ заи́мствованней, те́м любо́вию зове́м: благослове́нна Ты́ еди́на, неле́поту естества́ на́шего преукраси́вшая.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Из пла́мене и́дольския ле́сти изъе́м, прему́дре, Росси́йскую зе́млю, росо́ю креще́ния прохлади́л еси́, и не́сть уже́ пали́ма развраще́нием на пе́рвая, превознося́щи Христа́, и тебе́, па́стыря своего́, ублажа́ющи во ве́ки.

Вся́ до́бре разчини́в, я́же о лю́дех новоизбра́нных, поста́вил еси́ па́стыри и учи́тели по гра́дех, и те́м новоизбра́нное ста́до испоручи́в, са́м отше́л еси́, па́стырей Нача́льнику Христу́ Бо́гу сца́рствовати во ве́ки.

Мно́г пла́чь и рыда́ние гра́ду Ки́еву, твои́м, о́тче, отше́ствием к Бо́гу сотвори́ся, но Вы́шний Иерусали́м, прие́мля тя́ в не́дра своя́, возра́довася, иде́же живы́й, не забу́ди ста́да твоего́ и моли́, да с тобо́ю всели́тся во ве́ки.

Богоро́дичен: Мно́гое весе́лие творю́ злы́ми де́лы бесо́м и ра́дость, храни́телю же моему́ печа́ль отвсю́ду. О, Чи́стая Мари́е, Ма́ти Христа́ Бо́га! наста́ви мя́ на покая́ние, да бу́дет о́нем пла́чь, а́нгелу же моему́ ра́дость, и мне́ с ни́м во ве́ки.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Я́ко фи́никс, процве́л еси́, о́тче, в дому́ Бо́жии, и плоды́ — нетле́ние моще́й твои́х, все́м яви́л еси́, отсю́ду у́бо, мы́, уразуме́вше, я́ко предстои́ши Христу́, тя́ пе́сньми велича́ем.

Я́ко благово́нный кипари́с, мо́щи твоя́, святи́телю, благоуха́ют, и наслажда́ют покланя́ющихся ра́це твое́й, и́хже всегда́ испо́лни благоуха́ния твои́х моли́тв, да твою́ па́мять пе́сньми ве́рно прославля́ют.

Ли́к святи́телей Росси́йских и любопра́зднственных собо́ри, усе́рдно стецы́теся ко святе́й ра́це первосвяти́теля ва́шего, па́стырие — первонача́льнаго па́стыря, лю́дие же — отца́ своего́ пе́сньми почти́те, вси́ ку́пно па́мять его́ ублажа́юще.

Богоро́дичен: Вся́ тва́рь песносло́вит Тя́, Де́во, я́ко проше́дшую вся́ небе́сная врата́ и ста́вшую одесну́ю огнезра́чнаго престо́ла Вы́шняго. Одесну́ю Сы́на Твоего́ ста́ти и на́с сподо́би, я́ко пе́сньми, Ро́ждшагося из Тебе́, и Тя́ велича́ем.

Свети́лен:

Царе́ви все́х предстои́ши, святи́телю Михаи́ле, и благослове́нием венча́ется ве́рх тво́й от Вы́шняго десни́цы. Простри́ ру́ку твою́ и благослови́ на́с, я́коже не́коего на пресви́терство восходя́ща: не у́мерл бо еси́, но во ве́ки живе́ши. Те́мже па́мять твою́ пе́сньми пое́т Росси́йская Це́рковь, в не́йже и мы́ сла́вим.

Богоро́дичен: Царя́ веко́в Ма́ти, Цари́це и Влады́чице, над страстьми́ покажи́ царе́й певцы́ Твоя́, се́ бо приво́дим Ти́ в моли́тву чу́днаго Михаи́ла, иера́рха, в его́же па́мяти пра́зднующе, Тебе́ велича́ем.