Пе́снь 1.

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Иису́су: Отве́рзи устне́ мои́, Го́споди, и просвети́ смы́сл мо́й омраче́нный, разреши́ ю́зу язы́ка моего́, я́ко да све́тле и ра́достне восхвалю́ до́бляго святи́теля Моисе́я, Твоего́ уго́дника.

А́ще и не красно́ приноси́мое тебе́ пе́ние, но от усе́рдия приими́, о́тче, я́коже две́ ца́ты вдови́цы прия́т Христо́с, и не лише́на мя́ сотвори́ твои́х даро́в, и согреше́нием мои́м испроси́ проще́ние твои́ми к Бо́гу моли́твами.

Блага́го Бо́га подража́тель бы́л еси́, преблаже́нне Моисе́е, милосе́рдие к ни́щим и любо́вь нелицеме́рну ко все́м стяжа́в, помина́я и де́лом показу́я рече́нная: возлю́биши и́скренняго твоего́, я́ко са́м себе́.

Богоро́дичен: Всепе́тая Богоро́дице, Я́же Всеми́лостиваго Бо́га ро́ждшая, ду́шу мою́, омраче́нную бесо́вскими прило́ги, просвети́, Всенепоро́чная, и ума́ моего́ я́звы уврачу́й, и заступи́ мя́, я́ко да по достоя́нию сла́влю Тя́.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Го́спода своего́ во́лю сотвори́в, сугу́б тала́нт приобре́л еси́, сего́ ра́ди благи́й о́н слы́шиши гла́с: до́брый ра́бе и ве́рный, вни́ди в ра́дость Го́спода твоего́.

Душе́вную чистоту́ стяжа́в, без нея́же никто́же у́зрит Го́спода, Моисе́е, о́тче на́ш, стра́сти окая́нныя души́ моея́ и сла́сти теле́сныя утоли́ моли́твами твои́ми.

Христу́ Бо́гу производя́щу тя́ на лу́чшая, мирска́я вся́ оплева́л еси́ и, благи́й яре́м на ра́мо взе́м, усе́рдно Тому́ после́довал еси́.

Богоро́дичен: Живо́т ро́ждшая составны́й, Де́во Всенепоро́чная, се́рдца моего́ стру́пы исцели́ хода́тайствы Твои́ми, е́же к Сы́ну Твоему́, Богоблагода́тная.

Седа́лен, гла́с 1.

Разу́мнаго адама́нта, до́бляго святи́теля, Моисе́я дне́сь, ве́рнии, почти́м, све́тло пра́зднующе всечестну́ю па́мять его́, то́й бо моли́твами свои́ми к Бо́гу от свои́х многоцеле́бных моще́й подава́ет на́м неоску́дно исцеле́ния исто́чник, велегла́сно на́с науча́я Христо́ви вопи́ти: прославля́яй святы́х Твои́х, Го́споди, сла́ва Тебе́.

Пе́снь 4.

Ирмо́с: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Зе́льных ра́ди поще́ний, и моли́тв непреста́нных, и чистоты́ серде́чныя всели́ся в тя́ Христо́с, преблаже́нне святи́телю Моисе́е, на Него́же наде́жду всю́ возложи́л еси́.

Земна́я отри́нув, небе́сная насле́довал еси́, от си́лы бо в си́лу восходя́, к преми́рному Ца́рствию пресели́лся еси́, иде́же терпе́ния ра́ди твоего́ угото́вася ти́ вене́ц нетле́нный и ве́чное весе́лие.

Изволе́нием Бо́жиим и избра́нием по́стников сосло́вия па́стырь поставля́ешися и наста́вник, и́же ко спасе́нию, вводя́ ста́до твое́ во огра́ду небе́сную.

Богоро́дичен: И ражда́еши, и де́вствуеши, Де́во Всенепоро́чная, иску́са бо му́жеска не прие́мши, родила́ еси́ Бо́га воплоще́нна, Его́же моли́ о пою́щих Тя́.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Кре́пко вооружи́вся на неви́димыя враги́, я́коже тве́рдый адама́нт, вы́я и́х сокруши́л еси́, го́рдостная шата́ния утоли́л еси́, Го́споду тя́ прославля́ющу.

От лука́вых бесо́в ла́яния ста́до твое́ сохраня́я, и́стиннаго Па́стыря — Христа́ — и́стинный учени́к бы́л еси́, святи́телю Моисе́е, сего́ ра́ди избра́нием первосвяти́теля Петра́ наме́стник блаже́ннаго святи́теля Иоа́нна в це́ркви Прему́дрости Бо́жия устроя́ешися.

Ми́лостивно наказу́я, о́тче, о Христе́ поруче́нное тебе́ ста́до, упа́сл еси́ на па́житех зако́на живоно́снаго: тобо́ю бо о́браз показа́л еси́, возвеща́я пу́ть ко спасе́нию и е́же от злы́х премене́нию.

Богоро́дичен: На́шего спасе́ния Хода́таица Ты́ яви́лася еси́, Всенепоро́чная, ду́шу мою́ окая́нную изба́ви бесо́вскаго мучи́тельства и пода́ждь прегреше́нием очище́ние: ра́зве бо Тебе́, раби́ Твои́, не и́мамы помо́щницы.

Пе́снь 6.

Ирмо́с: Да не погрузи́т мене́ бу́ря водна́я, ниже́ пожре́т мене́ глубина́, отве́ржен бо е́смь во глубины́ се́рдца морска́го зо́л мои́х. Те́м зову́, я́ко Ио́на: да взы́дет от тли́ зо́л живо́т мо́й к Тебе́, Бо́же.

Зли́и челове́цы приидо́ша ко оби́тели, в не́йже твое́ честно́е те́ло положе́но бы́сть, святи́телю Моисе́е, не ве́дуще, я́ко ты́ заступа́еши ста́до твое́ и по отше́ствии твое́м от жития́ твоего́. Ты́ же, еди́наго коего́ждо и́х, ми́лостивно наказа́в, на пу́ть пра́вый наста́вил еси́.

Почто́ совеща́етеся, зли́и, ка́ко дерзну́сте умы́слити зла́я на оби́тель мою́? — святи́тель Моисе́й глаго́лаше. — Или́ не ве́сте си́лы непобеди́маго воево́ды Госпо́дня, вели́каго арха́нгела Михаи́ла? А́ще не пока́етеся, то́ вси́ зде́ лю́те поги́бнете. — Они́ же, с пла́чем и слеза́ми пока́явшеся тебе́ и ви́девше тя́, моля́щася о ни́х, Бо́гу хвалу́ возсыла́ху.

Ра́зум от Бо́га прии́м, благочести́выя па́че приводя́ к благоразу́мию, нечести́вым же уста́ загражда́я, Моисе́е святи́телю: го́рдостнаго бо епи́скопа, бы́вша во оби́тели твое́й и уничижи́вша тя́, ума́ отъя́тием смири́в, во святи́тельстве непотре́бна сотвори́л еси́.

Богоро́дичен: Святе́йшая херуви́м и серафи́м яви́лася еси́, Пречи́стая, Зижди́теля бо и́х несказа́нно родила́ еси́, не опа́льшися огне́м Божества́, и ны́не блажа́т Тя́ вси́ ро́ди, я́коже прорекла́ еси́, Всепе́тая.

Конда́к, гла́с 3:

Я́ко венце́м пресве́тлым украси́вся дне́сь, вели́кий Новгра́д лику́ет в па́мять па́стыря своего́ и учи́теля, и, я́ко диади́му ца́рскую возложи́вши, честна́я о́на оби́тель све́тло ра́дуется: просла́ви бо тя́ Бо́г, уго́дника Своего́, и прояви́ после́днему ро́ду на́шему цельбоно́сныя мо́щи твоя́, святи́телю Моисе́е, Це́рковь же Бо́жия весели́тся, созыва́ющи и́нок сосло́вие велегла́сно вопи́ти: ра́дуйся, гра́ду твоему́ и оби́тели похвало́ и всея́ Росси́йския страны́ пресве́тлый свети́льниче.

И́кос:

Я́ко из мра́чна о́блака пресве́тлая звезда́ возсия́, та́ко ны́не от вели́каго Новагра́да небе́снаго Ца́рствия граждани́н произы́де, вели́кий Моисе́й, и все́х озари́ чуде́с луча́ми, и́же с ве́рою приходя́щих к цельбоно́сному его́ гро́бу и любе́зно целу́ющих ра́ку моще́й его́, ю́же и мы́, обстоя́ще, дне́сь серде́чною любо́вию ве́рно возопии́м: ра́дуйся, я́ко от мла́дости Бо́гу порабо́тал еси́; ра́дуйся, я́ко мирска́я вся́ оплева́л еси́; ра́дуйся, я́ко Христо́в яре́м на ра́мо взе́м, усе́рдно Тому́ после́довал еси́; ра́дуйся, я́ко вруче́нное тебе́ ста́до до́бре упа́сл еси́; ра́дуйся, я́ко престо́лом наме́стник бы́в блаже́ннаго Иоа́нна, того́ стопа́м после́довал еси́; ра́дуйся, Прему́дрости Бо́жия престо́л украси́вый; ра́дуйся, чудесы́ гра́д сво́й озари́вый; ра́дуйся, ни́щих и а́лчущих пита́телю; ра́дуйся, сирота́м печа́льным и вдови́цам утеше́ние; ра́дуйся, я́ко спа́сл еси́ му́жа, от потопле́ния водна́го погря́знути уже́ хотя́ща; ра́дуйся, я́ко того́же сохрани́л еси́ от иноплеме́нных разбо́йник; ра́дуйся, засту́пниче гра́ду твоему́ и все́м, живу́щим в не́м, и моли́твенниче те́плый ко Влады́це Христу́ Бо́гу; ра́дуйся, па́стырю до́брый, во все́м подража́яй Влады́це твоему́, Его́же моли́ о чту́щих святу́ю па́мять твою́, да вси́ в весе́лии се́рдца вопие́м ти́: ра́дуйся, святи́телю Моисе́е, вели́кому Новугра́ду похвало́ и всея́ Росси́йския земли́ пресве́тлый свети́льниче.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Терпе́ния ра́ди твоего́ и му́жества возлюби́ тя́ И́же над все́ми су́щий Бо́г и чудесы́ обогати́л тя́ е́сть, пою́ща: препе́тый Го́споди, Бо́же оте́ц, благослове́н еси́.

Устроя́ет тя́ Госпо́дь Це́ркви Своея́ архиере́я, слове́сным овца́м па́стыря всеизря́дна, ты́ же, прему́дре Моисе́е, святи́тельства па́ству прии́м, в бо́льшия по́двиги вда́лся еси́, Христо́ви поя́: препе́тый Го́споди, Бо́же оте́ц, благослове́н еси́.

Уже́ погря́знути хотя́ше во глубине́ во́дней, его́же ты́, святи́телю, а́бие от потопле́ния спа́сл еси́, под ру́це подъе́мля и держа́, до́ндеже па́ки прия́ша его́ в ладию́. Та́кожде и мене́, погря́знути хотя́ща в ти́не беззако́ний мои́х, спаси́, и соблюди́, и умоли́ Влады́ку Христа́, да прии́мет мя́ в ве́чныя жи́зненныя кро́вы, пою́ща: препе́тый Го́споди, Бо́же оте́ц, благослове́н еси́.

Богоро́дичен: Фарисе́йскаго бу́яго киче́ния ненави́дети ми́ сотвори́, Богоро́дице, и мытаре́ву смире́нию поревнова́ти сподо́би, умоли́, Его́же родила́ еси́, Христа́, да просвети́т ду́шу мою́ омраче́нную и лю́таго паде́ния изба́вит, я́ко да во явле́нии сла́влю Тя́, Всенепоро́чная, Сы́ну Твоему́ вопия́: препе́тый Го́споди, Бо́же оте́ц, благослове́н еси́.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Хра́м Свято́му Ду́ху, святи́телю Моисе́е, сотвори́л, и са́м во оби́тель Тому́ бы́л еси́, те́мже и на́с моли́твами твои́ми селе́ния Ему́ соде́лай и от вся́ких напа́стей и озлобле́ния изба́ви, я́ко да пое́м в ра́дости се́рдца: благослови́те, вся́ дела́ Госпо́дня, Го́спода.

Отве́рзи на́м ра́йский вхо́д моли́твами твои́ми, святи́телю Моисе́е, и не пре́зри на́с в ско́рбех мно́зех, тебе́ бо засту́пника гра́ду твоему́ живу́щии в не́м, и́мамы, я́ко да в ра́дости се́рдца пое́м: благослови́те, вся́ дела́ Госпо́дня, Го́спода.

Царю́ Небе́сному Влады́це и Бо́гу моля́ся, гряду́щаго ку́плю де́яти от потопле́ния и от разбо́йник спа́сл еси́, по́мощь име́я и заступле́ние Бо́жия Ма́тере. То́й бо не ве́дяше, кто́ е́сть спаса́яй его́, до́ндеже ты́, святи́телю Моисе́е, яви́вся ему́ в то́нце сне́, сказа́л еси́, я́ко тобо́ю сотвори́ Бо́г избавле́ние ему́, и запове́дал еси́ сотвори́ти покро́в на честне́й ра́це твое́й. О́н же в ра́дости повеле́нная тобо́ю сотвори́, поя́ Го́сподеви: благослови́те, вся́ дела́ Госпо́дня, Го́спода.

Богоро́дичен: Чи́стая и Сла́вная Влады́чице, Ма́ти Бо́га Вы́шняго, щедро́ты низпосли́ на́м от неистощи́мых сокро́вищ Твои́х и пода́ждь в ну́ждах терпе́ние, да в весе́лии пое́м: благослови́те, вся́ дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Ше́ствовати на́с сотвори́ во сле́д сохрани́вших за́поведи Бо́га на́шего, и спаси́ моли́твами твои́ми, святи́телю Моисе́е, па́стырю и учи́телю на́ш, от все́х зо́л, находя́щих на ны́, и наста́ви на пу́ть живота́, моля́ся о на́с Человеколю́бцу Бо́гу и Спа́су ду́ш на́ших.

Ще́драго Человеколю́бца Бо́га моли́ о на́с, па́стырю на́ш до́брый, тезоимени́тый Богови́дцу, святи́телю Моисе́е: и́мать бо послу́шати Ма́тере Своея́, Засту́пницы гра́да на́шего, и твои́х пречестны́х моле́ний и поми́лует на́с.

Ле́гко, я́коже оре́л крило́ма, на небе́сную высоту́ дости́гл еси́ и терпе́ния и чи́стаго ра́ди жития́ твоего́ по́честь прия́л еси́ от Мздовоздая́теля, и ны́не Госпо́дь яви́ на́м цельбоно́сныя мо́щи твоя́, точа́щия исцеле́ния с ве́рою приходя́щим. Те́мже мо́лим тя́, святи́телю Моисе́е: помяни́ на́с, и́же ве́рою чту́щих тя́ и достодо́лжно ублажа́ющих тя́.

Богоро́дичен: Из пречи́стых ложе́сн Твои́х про́йде у́мное Со́лнце, Богоро́дице, просвеща́я и́же во тме́ седя́щих, омраче́нныя неве́дением, и приводя́ к све́ту богоразу́мия, страда́вшим Его́ ра́ди нетле́нныя венцы́ подава́я и ве́чное ра́дование. Его́же моли́ о на́с, Влады́чице, не лиши́ти на́с десна́го стоя́ния в ча́с испыта́ния, да Тя́ вси́ велича́ем.

Свети́лен:

Ско́ро предвари́, святи́телю Моисе́е, ве́рным побо́рниче, и Христа́ Бо́га умоли́ покори́ти под но́зе Импера́тору на́шему иноплеме́нныя язы́ки, да навы́кнут сла́вити Святу́ю Тро́ицу; на́с же, чту́щих твою́ святу́ю па́мять, спаса́й от вся́каго зла́.