Пе́снь 1.

Ирмо́с: Су́шу глубороди́тельную зе́млю со́лнце наше́ствова иногда́: я́ко стена́ бо, огусте́ обапо́лы вода́ лю́дем пешомореходя́щим и богоуго́дно пою́щим: пои́м Го́сподеви, сла́вно бо просла́вися.

А́гнче непоро́чный, Бо́жий Сло́ве, отве́рзи моя́ недосто́йная уста́, да возмогу́ воспе́ти святи́теля Ники́ту, Твоего́ уго́дника.

Боле́зньми по́стническими ду́шу просвети́в, преподо́бне, я́ко чи́сту же́ртву Христу́ предста́вил еси́, ра́дуяся, поя́: сла́вно бо просла́вися.

Воздержа́нием те́ло ду́ху порабо́тил еси́, ду́шу же равноа́нгельну сотвори́л еси́. Помина́й ве́рою чту́щия тя́, поя́ Бо́гу: сла́вно бо просла́вися.

Богоро́дичен: Господороди́тельнице Влады́чице Мари́е, моли́, Его́же родила́ еси́, Бо́га и Царя́ на́шего, да ми́лостив бу́дет на́м в де́нь Су́дный.

Пе́снь 3.

Ирмо́с: Непло́дная душе́ и безча́дная, стяжи́ пло́д благосла́вный, веселя́щися, возопи́й: утверди́хся Тобо́ю, Бо́же, не́сть свя́т, не́сть пра́веден, па́че Тебе́, Го́споди.

Де́латель бы́в за́поведей Госпо́дних, непреста́нно в ни́х поуча́яся, о́тче Ники́то, сего́ ра́ди вше́л еси́ в небе́сная, вопия́ ра́достно: не́сть свя́т и не́сть пра́веден, па́че Тебе́, Го́споди.

Егда́, зави́дев тебе́, прелука́вый хотя́ше запя́ти от доброде́телей, сопротивоста́в, преподо́бне, без ве́сти того́ сотвори́л еси́, Христу́ вопия́: не́сть свя́т и не́сть пра́веден, па́че Тебе́, Го́споди.

Житие́м доброде́тельным Бо́гу угоди́л еси́, велиа́ра посрами́в, и Христу́ возопи́л еси́: не́сть свя́т и не́сть пра́веден, па́че Тебе́, Го́споди.

Богоро́дичен: Зачала́ еси́ О́тчее Сло́во Ипоста́сное, Его́же моли́, Богоро́дице, изба́вити от бе́д рабы́ Твоя́, вои́стинну призыва́ющия Тя́.

Седа́лен, гла́с 1:

Я́ко са́д присноцвету́щ, лю́ди твоя́ сотвори́л еси́, сия́ во благоче́стии возрасти́в, умно́жил еси́, и от сего́ ве́рен ра́б и де́латель виногра́да Христо́ва показа́лся еси́, и трудо́м возме́здие досто́йно восприя́л еси́, святи́телю, моли́ Христа́ Бо́га, да спасе́т ду́ши на́ша.

Богоро́дичен: Все́х Творца́, Бо́га же и Соде́теля, Всенепоро́чная Чи́стая, Ду́хом Боже́ственным в ложесна́х Твои́х заче́нши, без истле́ния родила́ еси́. Его́же сла́вяще, Тя́ воспева́ем, Де́во, я́ко пала́ту Царя́ все́х и ми́ра заступле́ние.

Пе́снь 4.

Ирмо́с: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м, благодаря́ще: сла́ва си́ле Твое́й, Го́споди.

Зако́ном оте́ческим после́дуя и си́х житие́ подража́я, непреста́нно Христу́ взыва́л еси́: сла́ва си́ле Твое́й.

Из мла́да Христа́ возлюби́л еси́, сего́ ра́ди я́ко рачи́теля Своего́ возлюби́ тя, к Нему́же вопие́ши: сла́ва си́ле Твое́й.

Исполня́я зако́ны боже́ственныя, преиспо́лнился еси́ дарова́ний боже́ственных, святи́телю Ники́то, ве́рно взыва́еши: сла́ва си́ле Твое́й, Го́споди.

Богоро́дичен: Кади́льнице всезлата́я, Мари́е Всенепоро́чная, Христа́ моли́, Его́же родила́ еси́, изба́витися на́м от бе́д и огня́ ве́чнующаго.

Пе́снь 5.

Ирмо́с: К Тебе́ у́тренюю, все́х Творцу́, преиму́щему вся́к у́м ми́рови: зане́ све́т повеле́ния Твоя́, в ни́хже наста́ви мя́.

Лу́к врага́ сокруши́л еси́, и бра́нь его́ до конца́ разори́л еси́, и соверше́ния доброде́телей, преподо́бне, дости́гл еси́.

Моли́твою возше́л еси́ на небе́сная, иде́же с ли́ки оте́ц пребыва́я, весели́шися. Помина́й, преподо́бне, па́мять твою́ све́тло торжеству́ющия.

Неизрече́нных та́ин Христо́вых служи́тель бы́ти сподо́бился еси́ и, сия́ принося́ Бо́гу, за ми́р приле́жно моли́лся еси́.

Богоро́дичен: Упова́ние и наде́жда на́ша Ты́ еси́, Пречи́стая Влады́чице, спаси́ лю́ди Твоя́, моля́щияся и и́мя Твое́ призыва́ющия.

Пе́снь 6.

Ирмо́с: Бе́здна после́дняя грехо́в обы́де мя́, и исчеза́ет ду́х мо́й, но простры́й, Влады́ко, высо́кую Твою́ мы́шцу, я́ко Петра́, мя, Упра́вителю, спаси́.

Предызбра́н бы́в Боже́ственною благода́тию, во е́же па́ствити ста́до христоимени́то, ты́ же, преподо́бне, я́ко па́стырь и́стинен, приле́жно о ста́де попече́ние име́л еси́.

Разу́мне разсужда́я, ча́да твоя́ и ча́сто наказу́я духо́вными словесы́, да пребу́дут тве́рдо соблюда́юще ве́ру правосла́вную.

Святи́тельства че́стию почте́н, приле́жно моле́ние за лю́ди твоя́ приноси́л еси́: да ми́лостива Бо́га обря́щут в де́нь Су́дный.

Богоро́дичен: Ты́ еси́, Пречи́стая Богоро́дице, прибе́жище на́ше и утвержде́ние, моли́ Сы́на Твоего́ и Бо́га на́шего пода́ти на́м спасе́ние и грехо́в оставле́ние.

Конда́к, гла́с 6.

Архиере́йства са́ном почти́вся и чи́сте Чисте́йшему предстоя́, приле́жно моле́ние за лю́ди твоя́ приноси́л еси́, я́ко и до́ждь моли́твою све́л еси́, овогда́ же и гра́да запале́ния угаси́л еси́. И ны́не, святи́телю Ники́то, моли́ Христа́ Бо́га спасти́ лю́ди твоя́ моля́щияся, да вси́ вопие́м ти́: ра́дуйся, святи́телю о́тче преди́вный.

И́кос:

Кто не почуди́тся, кто́ не просла́вит неизсле́димую и несказа́нную глубину́ милосе́рдия Твоего́, Христе́ Бо́же? Я́ко просла́вил еси́ в после́днем ро́де уго́дника Твоего́, святи́теля Ники́ту, его́же обрето́шася честны́я мо́щи це́лы и неразруши́мы. Ему́же рече́м: егда́ во пло́ти бы́л еси́, преподо́бне, де́лании боже́ственными ду́шу предочи́стил еси́, святи́тельства па́ству восприи́м, сосу́д избра́н Боже́ственнаго Ду́ха показа́лся еси́ и ста́до твое́ до конца́ в ве́ре утверди́л еси́. Те́м ра́дуйся, о́тче преди́вный.

Пе́снь 7.

Ирмо́с: Трие́ о́троцы в пещи́, Тро́ицу прообрази́вше, преще́ние о́гненное попра́ша и, пою́ще, вопия́ху: благослове́н еси́, Бо́же оте́ц на́ших.

Уясня́ют, воспева́юще, а́нгельстии чи́ни па́мять твою́, Ники́то святи́телю, и мы́, земни́и, уми́льно вопие́м: испроси́ на́м оставле́ние согреше́ний и благи́х наслажде́ние.

Фарао́на мы́сленнаго победи́л еси́, от Христа́ дерзнове́ние прии́м, и ве́лие ра́дование святы́м а́нгелом сотвори́л еси́, поя́: оте́ц на́ших Бо́же, благослове́н еси́.

Херуви́му подо́бяся, легко́ на высоту́ возше́л еси́ и ны́не со безпло́тными водворя́ешися, Христу́ вопия́: оте́ц на́ших Бо́же, благослове́н еси́.

Богоро́дичен: От утро́бы Твоея́ про́йде у́мное, Богоро́дице, Со́лнце, Сего́ моли́, я́ко Сы́на Твоего́ и Го́спода, пода́ти на́м скорбе́й разреше́ние и боле́зней облегче́ние, да ра́достно от души́ вопие́м Христу́: отце́в на́ших Бо́же, благослове́н еси́.

Пе́снь 8.

Ирмо́с: Веще́ственнаго огня́ пла́мень невеще́ственным увяди́ша богозри́мии о́троцы и поя́ху: благослови́те, вся́ дела́ Госпо́дня, Го́спода.

Лю́дем Росси́йским, испроси́, Ники́то святи́телю, ми́р, здра́вие, спасе́ние и на враги́ одоле́ние, да в ра́дости душе́вней возопие́м: благослови́те, вся́ дела́ Госпо́дня, Го́спода.

Чу́вственныя стра́сти победи́в, чистото́ю, я́ко со́лнце, возсия́л еси́, чи́сто житие́ до конца́ сохрани́л еси́ и Бо́гу те́м угоди́л еси́. Ему́же вопие́м: благослови́те, вся́ дела́ Госпо́дня, Го́спода.

Шу́м пра́зднующих слы́шати, святи́телю, сподо́бился еси́: шу́ияго стоя́ния изба́ви мя́ и страсте́й треволне́ния и к приста́нищу покая́ния наста́ви мя́, да тя́ сла́влю во вся́ ве́ки.

Богоро́дичен: Ще́драго и человеколюби́ваго Бо́га роди́ти, Богоро́дице, сподо́билася еси́, Того́ моли́, Неискусобра́чная Отрокови́це, низпосла́ти на́м, ве́рным, ве́лию ми́лость.

Пе́снь 9.

Ирмо́с: В зако́не се́ни и писа́ний о́браз ви́дим, ве́рнии: вся́к му́жеский по́л, ложесна́ разверза́я, свя́т Бо́гу. Те́м перворожде́нное Сло́во Отца́ Безнача́льна, Сы́на, первородя́щася Ма́терию неискусому́жно, велича́ем.

Мо́ре жите́йское преплы́в воздержа́нием, дости́гл еси́ широты́ ра́йския, иде́же со а́нгелы при́сно весели́шися.

Ра́ка моще́й твои́х, святи́телю, дража́йши сапфи́ра показа́ся, чудотвори́ва бо бе́ и исцеле́ния источа́ющи. Ея́же облобыза́юще с ве́рою, приходя́щии ра́достно от души́ вопию́т: со́н че́стен пред Го́сподем сме́рть преподо́бных Его́.

Крестоно́сно предстои́ши престо́лу Вседержи́теля, сла́вою осиява́емь Све́та Присносу́щнаго. Моли́ся, Ники́то святи́телю, о чту́щих ве́рно па́мять твою́.

Богоро́дичен: Лу́к сокруши́ся лука́ваго одоле́нием Сы́на Твоего́ и Бо́га на́шего, чу́дна побе́да, Богоро́дице, и ди́вно одоле́ние соде́яся, Влады́чице, во спасе́ние ду́ш на́ших.

Свети́лен:

Плотска́я мудрова́ния ду́ху повину́л еси́ и, я́ко зла́то, огне́м искуси́вся, прия́телище бы́л еси́ Ду́ху Пресвято́му, о́тче Ники́то святи́телю.

Богоро́дичен: Тя́ пе́сньми ублажа́ем, Де́во, Бо́га бо роди́вши, на руку́ носи́ла еси́, Того́ моли́ за ду́ши на́ша.