Пе́снь 1.

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, Тому́ Еди́ному пои́м, я́ко просла́вися.

Щедро́ты Твоя́ призыва́ем, Го́споди, да досто́йно пе́ние принесе́м уго́днику Твоему́, святи́телю Ники́те, Тя́ воспева́юще, я́ко просла́вися.

Ше́ствие твое́ до́бре сконча́л еси́ и на небеса́ возше́л еси́, престо́лу Влады́чню предстоя́, со а́нгелы Того́ воспева́еши, я́ко просла́вися.

Что́ шу́м пра́зднующих быва́ет и лю́дие све́тло торжеству́ют? Дне́сь бо обрето́шася честны́я мо́щи святи́теля Ники́ты, и вси́ ра́достно вопию́т Христу́, я́ко просла́вися.

Богоро́дичен: Цари́цу и Влады́чицу Тя́ имену́ем, Де́во, под кро́в Тво́й прибега́юще и по́мощи от Тебе́ прося́ще, Сы́ну Твоему́ воспева́юще, я́ко просла́вися.

Пе́снь 3.

Ирмо́с: Утверди́ся ве́рою Христо́ва Це́рковь, и́бо непреста́нно пе́сньми вопие́т, пою́щи: Свя́т еси́, Го́споди, и Тя́ пое́т ду́х мо́й.

От земны́х не́др восприе́млем, я́ко да́р освяще́н, честны́я мо́щи твоя́, святи́телю, и от си́х освяще́ние прие́млем, Христа́ воспева́юще: Свя́т еси́, Го́споди, спаса́яй ду́ши на́ша.

Хра́м Свята́го Ду́ха от ю́ности бы́л еси́, о́тче, сего́ ра́ди и по сме́рти соблюде́ся те́ло твое́ нетле́нно, и, сие́ ра́достно лобыза́юще, вопие́м Христу́: Свя́т еси́, Го́споди, спаса́яй ду́ши на́ша.

Фарисе́йское тщесла́вие отри́нувше, со смире́нием и ра́достию целу́ем честны́я твоя́ мо́щи, святи́телю Ники́то, Христу́ вопию́ще: Свя́т еси́, Го́споди, спаса́яй ду́ши на́ша.

Богоро́дичен: Укра́шена ря́снами чистоты́, Пречи́стая Отрокови́це, благослове́нная Влады́чице, Предста́тельнице ро́да на́шего.

Седа́лен, гла́с 1:

Я́ко са́д присноцвету́щ, лю́ди твоя́ сотвори́л еси́, сия́ во благоче́стии возрасти́в, умно́жил еси́, и от сего́ ве́рен ра́б и де́латель виногра́да Христо́ва показа́лся еси́, и трудо́м возме́здие досто́йно восприя́л еси́, святи́телю, моли́ Христа́ Бо́га, да спасе́т ду́ши на́ша.

Богоро́дичен: Все́х Творца́, Бо́га же и Соде́теля, Всенепоро́чная Чи́стая, Ду́хом Боже́ственным в ложесна́х Твои́х заче́нши, без истле́ния родила́ еси́. Его́же сла́вяще, Тя́ воспева́ем, Де́во, я́ко пала́ту Царя́ все́х и ми́ра заступле́ние.

Пе́снь 4.

Ирмо́с: Плотско́е прише́ствие Твое́, Христе́, уверя́я, проро́к Авваку́м взыва́ше: сла́ва си́ле Твое́й, Го́споди.

Тя́ моли́твенника непосты́дна ко Влады́це стяжа́хом, святи́телю, моли́ о воспева́ющих па́мять твою́, изба́вити в бу́дущем Суде́ ве́чнующаго осужде́ния.

Све́тлыми сия́ньми провозсия́вшия честны́я твоя́ мо́щи от мно́гих бо ле́т бы́ша сокрове́ны, ны́не же, я́ко заря́ пресве́тла, просвеща́ют и освяща́ют пою́щия тя́.

Ра́дость, и весе́лие, и ра́дование неизрече́нно твоему́ ста́ду, святи́телю, показа́ся обре́тение честны́х моще́й твои́х, в не́же испроси́ на́м оставле́ние грехо́в и вели́кую ми́лость.

Богоро́дичен: Правосла́вною ве́рою и любо́вию притека́ющих Ти́ и со стра́хом пою́щих Тя́ моле́бный гла́с услы́ши, Влады́чице.

Пе́снь 5.

Ирмо́с: У́тренююще, Сло́ве, в сла́ву Твою́ и хвалу́, восхваля́ем непреста́нно о́браз Креста́ Твоего́, его́же да́л еси́ на́м ору́жие в по́мощь.

Умиле́ния исто́чник мне́ испроси́, в честне́м твое́м торжестве́, святи́телю Ники́то, да отмы́ю скве́рну души́ моея́ и покая́ние моли́твами твои́ми обря́щу на по́мощь ору́жие.

Нова́града бы́в первосвяти́тель и́стинен, облагово́ни на́ша чу́вства душе́вная, да моли́твы твоя́ предста́виши на́м на по́мощь ору́жие.

Мно́жеством искуше́ний содержи́мь е́смь, на тя́ наде́жду возлага́ю, святи́телю Ники́то, да предста́виши ми́ моли́тву твою́ на по́мощь ору́жие.

Богоро́дичен: Ле́ствица прообража́ше Тя́ патриа́рха Иа́кова, Всенепоро́чная Влады́чице, Бо́жие схожде́ние на́м я́ве сказу́ющи.

Пе́снь 6.

Ирмо́с: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти́: из смертоно́сныя глубины́ возведи́ мя.

Кре́пость и утвержде́ние испроси́ оте́честву на́шему, святи́телю Ники́то: да моли́твами твои́ми христиа́нский ро́д в тишине́ пребу́дет, воспева́ющий тя́, я́ко те́пла засту́пника.

Изба́витися ста́ду твоему́ вся́каго озлобле́ния и ско́рби моли́ся, святи́телю Ники́то: ты́ бо еси́ наде́жда непосты́дна, упова́ние изве́стно и стена́ необори́мая.

И на́м, пою́щим и сла́вящим твою́ па́мять, испроси́, святи́телю Ники́то, грехо́в разреше́ние, суда́ и му́ки избавле́ние и Ца́рствия небе́снаго сподо́битися.

Богоро́дичен: Земноро́дных естество́ на не́бо Тобо́ю взы́де, пала́та бо Царе́ва обрела́ся еси́, Богоро́дице, те́мже согла́сно воспева́ем Тя́.

Конда́к, гла́с 6.

Архиере́йства са́ном почти́вся и чи́сте Чисте́йшему предстоя́, приле́жно моле́ние за лю́ди твоя́ приноси́л еси́, я́ко и до́ждь моли́твою све́л еси́, овогда́ же и гра́да запале́ния угаси́л еси́. И ны́не, святи́телю Ники́то, моли́ Христа́ Бо́га спасти́ лю́ди твоя́ моля́щияся, да вси́ вопие́м ти́: ра́дуйся, святи́телю о́тче преди́вный.

И́кос:

Кто не почуди́тся, кто́ не просла́вит неизсле́димую и несказа́нную глубину́ милосе́рдия Твоего́, Христе́ Бо́же? Я́ко просла́вил еси́ в после́днем ро́де уго́дника Твоего́, святи́теля Ники́ту, его́же обрето́шася честны́я мо́щи це́лы и неразруши́мы. Ему́же рече́м: егда́ во пло́ти бы́л еси́, преподо́бне, де́лании боже́ственными ду́шу предочи́стил еси́, святи́тельства па́ству восприи́м, сосу́д избра́н Боже́ственнаго Ду́ха показа́лся еси́ и ста́до твое́ до конца́ в ве́ре утверди́л еси́. Те́м ра́дуйся, о́тче преди́вный.

Пе́снь 7.

Ирмо́с: Пе́щь о́троцы огнепа́льну дре́вле росоточа́щу показа́ша, еди́наго Бо́га воспева́юще и глаго́люще: превозноси́мый отце́в Бо́г и препросла́влен.

Зе́льным воздержа́нием те́ло умертви́л еси́, ду́шу же просвети́л еси́ и равноа́нгельну сотвори́л еси́, Бо́гу вопия́: отце́в на́ших Бо́же, благослове́н еси́.

Жезло́м па́стырским, святи́телю, до́бре лю́ди твоя́ упа́сл еси́, от ни́хже я́ко ве́рен па́стырь Христу́ возопи́л еси́: отце́в на́ших Бо́же, благослове́н еси́.

Егда́ ся́деши суди́ти вся́ческая на престо́ле сла́вы Твоея́, тогда́ пощади́ рабы́ Твоя́, Влады́ко, моли́твами уго́дника Твоего́, святи́теля Ники́ты, да вси́ уми́льно вопие́м Ти́: отце́в на́ших Бо́же, благослове́н еси́.

Богоро́дичен: Добро́та честны́х и святы́х а́нгел, ра́дование челове́ков Ты́ еси́, Де́во Богоро́дице, Ты́ мя к жи́зни наста́ви, Сы́ну Твоему́ вопию́ща: отце́в на́ших Бо́же, благослове́н еси́.

Пе́снь 8.

Ирмо́с: В пещи́ о́троки подража́юще, духо́вную ро́су прие́мшии, ве́рою зове́м: благослови́те, дела́ Госпо́дня, Го́спода.

Го́споду просла́вльшу уго́дника Своего́ святи́теля Ники́ту, мно́гим бо ле́том преше́дшим сокрове́ны бы́ша честны́я его́ мо́щи, ны́не же вси́, я́ве зря́ще, согла́сно воспева́ют: благослови́те, дела́ Госпо́дня, Го́спода.

Уви́дехом и почуди́хомся, па́че же стра́хом и ра́достию объя́ти бы́хом, я́ко по толи́цех ле́тех обрето́шася честны́я мо́щи святи́теля Ники́ты це́лы и неразруши́мы, и вси́ единогла́сно возопи́хом: благослови́те, дела́ Госпо́дня, Го́спода.

Бо́жиим манове́нием после́днему ро́ду явле́ны бы́ша честны́я мо́щи святи́теля Ники́ты, си́м у́бо прикаса́ющиися, освяще́ние прие́млем, Христа́ воспева́юще во ве́ки.

Богоро́дичен: Ада́ма но́ваго родила́ еси́, пре́жде Ада́ма бы́вшаго, Сего́ моли́, Богоро́дице, да спасе́т ду́ши на́ша.

Пе́снь 9.

Ирмо́с: Па́че естества́ Ма́терь и по естеству́ Де́ву, еди́ну в жена́х Благослове́нную, пе́сньми, ве́рнии, Богоро́дицу велича́ем.

Львы́ укроти́ Дании́л дре́вле, ты́ же, святи́телю Ники́то, неви́димаго врага́, зия́ющаго на тя́, че́люсти сокруши́л еси́ и без ве́сти того́ сотвори́л еси́ моли́твами твои́ми.

Кре́пкою твое́ю моли́твою, святи́телю, я́звы души́ моея́ исцели́, и находя́щих искуше́ний изба́ви мя́, молю́ся, и се́рдца моего́ напра́ви стезю́ на Бо́жия за́поведи пресве́тлыя, да тя́ непреста́нно велича́ю.

Разжени́ мно́жество зо́л мои́х, святи́телю, богоприя́тными твои́ми моли́твами, одожди́ ми ка́пли покая́ния: бою́ся бо та́мошняго суди́ща, в не́мже Судия́ хо́щет суди́ти всему́ ми́ру.

Богоро́дичен: Милосе́рдие на рабы́ Твоя́, Чи́стая, простри́, при́сно моля́щия Тя́, стра́шныя му́ки избавля́ющи моли́твами Твои́ми.

Свети́лен:

Плотска́я мудрова́ния ду́ху повину́л еси́ и, я́ко зла́то, огне́м искуси́вся, прия́телище бы́л еси́ Ду́ху Пресвято́му, о́тче Ники́то святи́телю.

Богоро́дичен: Тя́ пе́сньми ублажа́ем, Де́во, Бо́га бо роди́вши, на руку́ носи́ла еси́, Того́ моли́ за ду́ши на́ша.