Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Доброде́тели святи́теля Твоего́ хвала́ми воспе́ти, а́ки мо́ре тече́нием преплы́ти; устремля́ющася мя́ упра́ви, Христе́, молю́ся, и, у́м от бу́рных жития́ сего́ по́мыслов ути́шив, спаси́, пе́снь Тебе́, Бо́гу моему́, воспева́юща.

Гру́б сы́й и несмы́слен, но любо́вию к тебе́ влеко́мь, дерза́ю па́мять твою́, Си́моне, иера́рше Христо́в, восхвали́ти, ты́ же моли́твами твои́ми мне́ посо́бствуй и наста́ви мя́ ны́не о тебе́ Влады́це моему́ пе́снь Бо́гу воспева́ти.

Житие́ твое́, преподо́бне, чту́ще, кто́ не почуди́тся, ви́дя ре́вность твою́ к подража́нию пе́рвым отце́м Пече́рским? Те́мже и а́з, удивля́яся, смире́нно о тебе́ Бо́гу моему́ пе́ние возсыла́ю.

Прие́мь а́нгельский о́браз в благоле́пной Пече́рской Ла́вре, прия́л еси́ и а́нгельское житие́, после́дуя Анто́нию вели́кому и Феодо́сию чу́дному, с ни́миже ны́не живы́й, ра́дуешися, непреста́нно пе́снь Бо́гу воспева́я.

Богоро́дичен: Премени́х о́браз, но де́л мои́х не премени́х, Ма́ти Бо́жия, благода́тию из Тебе́ Ро́ждшагося спа́сшая ро́д челове́ческий, по благода́ти Твое́й спаси́ мя́, о Тебе́, Влады́чице мое́й, пе́ние Бо́гу возсыла́юща.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

А́ки зве́зды небе́сныя, просия́ша доброде́тели твоя́, о́тче, и́хже луча́ми и на́с озари́, во тме́ страсте́й ходя́щих, да о тебе́ небе́снаго кру́га Творцу́ воспое́м: сла́ва Ти́, Еди́не Человеколю́бче.

Све́та невече́рняго хотя́ прича́стник бы́ти, ми́ра тле́нных удали́лся еси́ и, а́нгельский о́браз восприе́мь, а́нгельски приноси́л еси́ Бо́гу хвале́ние, зовы́й: сла́ва Ти́, Еди́не Человеколю́бче.

Просия́вшим вели́ким отце́м — Анто́нию и Феодо́сию Пече́рским — ревну́я, а́ки све́тлая звезда́, просия́л еси́ в жи́зни се́й, преподо́бне, смире́нием и чистото́ю. И́мже удивля́ющеся, пое́м: сла́ва Тебе́, Еди́не Человеколю́бче.

Послуша́ние твое́, блаже́нне, бы́сть, а́ки зерца́ло, посреде́ собо́ра бра́тий, и си́м наипа́че прибли́жился еси́ бы́вшему послушли́ву да́же до сме́рти Иису́су. Ему́же ны́не живе́ши посреде́ гра́ждан небе́сных и пое́ши: сла́ва Ти́, Еди́не Человеколю́бче.

Богоро́дичен: За́поведи Го́спода моего́ слы́шу, но та́ преслу́шаю; Ты́ же, Чи́стая Де́во, ре́кшая: се́ Раба́ Госпо́дня, — сотвори́ мя́ раба́ послушли́ва, да сла́влю Тя́, Еди́ну Человеколюби́вую Ма́терь.

Седа́лен, гла́с 8:

Ле́ствицу доброде́телей обре́т, возше́л еси́ на го́ру безстра́стия и, узре́в пре́лесть ми́ра сего́, любостра́стнаго ца́рствия, во мгнове́нии о́ка преходя́щаго, отре́клся еси́, ни мироде́ржцу, но Еди́ному Царю́ веко́в поклони́лся еси́, те́м тя́ пе́сньми почита́ем, Си́моне, о́тче преблаже́нне.

Сла́ва, и ны́не: Я́ко спасе́ния наде́жду и Помо́щницу в ну́ждах иму́ще Тя́, Богоневе́стная Де́во, вра́жиих нахожде́ний не убои́мся, но о Тебе́ дерза́ем, Ты́ бо еси́ кре́пость на́ша и утвержде́ние.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Ты́, преподо́бне, ве́дением и дея́нием к све́ту мы́сленному прибли́жився, све́тел житие́м показа́лся еси́, и́мже мно́зи наставля́еми, сла́вляху Бо́га, глаго́люще: си́ле Твое́й сла́ва, Человеколю́бче.

Слу́х дея́ний твои́х, о́тче, про́йде в разли́чныя страны́, и мно́зи жела́ху тя́ предводи́теля и наста́вника себе́ име́ти, я́ко да, наста́вльшеся тобо́ю, просла́вят Отца́ Небе́снаго, И́же просла́ви тя́ сицево́ю благода́тию.

Па́че ине́х Це́рковь Влади́мирская ускори́ призва́ти тя́, блаже́нне, я́ко да ю́, мятя́щуюся, твои́м прише́ствием возвесели́ши и упасе́ши жезло́м твоего́ правле́ния.

Предсрета́ют тя́ и Су́ждальстии гра́ждане, ли́ки духо́вных пе́сней составля́юще, и, ра́дующеся, возво́дят на престо́л архиере́йский, на́ньже возше́д, бы́л еси́ тому́ до́брый па́стырь.

Богоро́дичен: До́браго Па́стыря су́щи Ма́ти, слове́сныя Твоя́ о́вцы, мы́сленным волко́м распуже́нныя, собери́ и Сама́, Влады́чице, на́с упаси́, да нектому́ а́дский во́лк дерза́ет ста́ду Твоему́ прибли́житися.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Тебе́, Си́моне, я́коже о́ному люби́мому ученику́ Своему́ Си́мону, вручи́л е́сть па́стырей Нача́льник Иису́с ове́ц па́ству, ю́же прие́мь, до́бре наста́вил еси́ к высоте́ небе́сной; к не́йже и моя́ пути́ напра́ви, молю́тися.

От ю́ности возлюби́л еси́ все́х Влады́ку, от Него́же за любо́вное воздая́ние прия́л еси́ честно́ю Его́ Кро́вию искупле́нныя о́вцы пасти́. Того́жде Влады́ки овча́ и а́з е́смь, воззри́ на мя́, святи́телю Си́моне, и пути́ моя́ напра́ви, молю́тися.

Па́стырская свире́ль уче́ний твои́х, о́тче, увеселя́ше слове́сныя о́вцы, и нектому́ предпочита́ху тле́нныя пи́щи, духо́вным пита́ющеся зла́ком; а́лчуща мя́ твои́м уче́нием напита́й и пути́ моя́ напра́ви, молю́тися.

Жезло́м правле́ния до́бре управля́л еси́ вруче́нное тебе́ ста́до, о́браз те́м себе́ сама́го подая́, его́же, отча́сти напи́санный, и а́з чту́, но не могу́ тому́ ревнова́ти. Ты́, па́стырю до́брый, да бу́ду подража́тель того́, пути́ моя́ напра́ви моли́твами твои́ми.

Богоро́дичен: Онебеси́вшая земноро́дных существо́ пресвяты́м Рождество́м Твои́м, Де́во Мари́е, у́м на́ш, по земны́х су́етствиях пле́жущ, возведи́ к го́рним, и к иска́нию о́ных, мо́лимтися, пути́ на́ша напра́ви.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Благода́тию Ду́ха Свята́го освяще́н, я́ко священнотаи́нник ве́рен, престо́лу Бо́жию на земли́, Си́моне, в преподо́бии и пра́вде послужи́л еси́, тебе́ ны́не, с ве́рными рабы́ в ра́дости Го́спода твоего́ живу́щу, молю́ся: бу́ди ми́ моли́твенник к Бо́гу о спасе́нии мое́м.

Сугу́баго зва́ния, святи́телю, я́ко сугу́быя на ся́ труды́ прие́мый, сподо́бился еси́: па́стырским бо прилежа́ дело́м, и́ноческих по́двигов никогда́же оставля́л еси́; те́мже в по́чести сугу́бей ны́не живы́й, моли́ о мне́, да не лишу́ся спасе́ния моего́.

При́сно помина́я, преподо́бне, отце́в Пече́рских труды́, навы́кл еси́ те́м подража́ти, и́мже купнонра́вен и единому́др показа́вся, препосла́лся еси́ от ху́ждшаго к лу́чшему, я́ко да сугу́бым украси́шися венце́м.

Дея́нием Госпо́дних за́поведей умертви́л еси́ пло́ть твою́, но благода́тию Бо́жиею оживи́л еси́ ду́шу твою́. Ве́дением же духо́вную ле́ствицу обре́т, восте́кл еси́ возвыше́нием у́мным к Бо́гу, Ему́же предстоя́, моли́ся о пою́щих тя́, Си́моне блаже́нне.

Богоро́дичен: Дея́ние ле́ностию, ве́дение же омраче́нием страсте́й погуби́х, и ни еди́наго же не имы́й, сугу́баго бою́ся осужде́ния, оба́че к Тебе́, Богороди́тельнице, прибега́ю, я́ко си́льна и многомо́щна, обоя́ испра́ви и бу́ди Помо́щница спасе́ния моего́.

Конда́к, гла́с 2:

Святи́тельства оде́ждою, а́ще и досто́йне оде́ялся еси́, оба́че те́м не вознося́ся, жела́л еси́ па́че сме́тием пред враты́ Ла́вры Пече́рския поврещи́ся, смиренному́дре Си́моне. Те́мже, не а́ки сме́тие, вра́т вне́, но, я́ко сокро́вище, вну́трь святы́я пеще́ры положе́н бы́ти сподо́бился еси́, и ны́не на небеси́ Го́сподеви предстоя́, моли́ся о на́с, чту́щих тя́.

Пе́снь 7.

Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Бо́жия благода́ть де́йствоваше в тебе́, святи́телю, исхожда́ху бо вы́ну от у́ст твои́х струи́ святы́х уче́ний, напая́ющия сердца́ лени́вых, и́же твои́м окропле́нием произне́сше доброде́телей плоды́, зва́ху: благослове́н Бо́г оте́ц на́ших.

Се́ял еси́ се́мя сло́ва Бо́жия в вертогра́де па́ствы своея́, насажда́я кри́н чистоты́, а́ки стебло́ Лива́ново, моли́тву, милосе́рдие к бли́жним, а́ки ма́слину, а́ки кипари́с, помышле́ния вы́ну о Бо́зе: я́же бо са́м твори́л еси́, сия́ и и́нех нака́зовал еси́ твори́ти.

До́бре написа́в на скрижа́лех се́рдца твоего́ доброде́тели оте́ц Пече́рских, не скры́л еси́ те́х под спу́дом жите́йския молвы́, о́тче, но, ре́вностию дви́жимь, ве́сь у́м сво́й обрати́л еси́ о́ных жития́ на по́льзу и́нем написа́ти, я́же и мы́ чту́ще, зове́м: благослове́н Бо́г оте́ц на́ших.

А́ки разу́мная пчела́ мы́сленныя цве́ты, жития́ преподо́бных собра́в, пода́л еси́ та́, а́ки со́т сла́дкий, по тебе́ живу́щим, и́миже мы́ услажда́юще ду́ши на́ша, с тобо́ю, Си́моне, пое́м: благослове́н Бо́г оте́ц на́ших.

Богоро́дичен: Стра́стнаго вкуси́в со́та, и́мам се́рдце и устне́, го́рести испо́лнены; Ты́, Влады́чице, Сладча́йшаго ро́ждшая Иису́са, благода́тию Твое́ю услади́ ду́шу мою́, да воспою́: ра́дуйся, сла́дости святы́я Служи́тельнице и благослове́ние оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Седмогла́внаго зми́я седми́цею дарова́ний духо́вных сте́рл еси́ главу́, о́тче, и, уя́звлен, трепе́щет до ны́не и́мене твоего́, е́же в дне́шний де́нь мы́ помина́юще, о тебе́ зове́м: лю́дие, превозноси́те Христа́ во ве́ки.

Любо́вию к Пречи́стей Бо́жией Ма́тери и отце́м Пече́рским мне́лся еси́ отстоя́ти те́лом то́кмо, ду́хом же пребыва́л еси́ с ни́ми и подража́л житию́ и́х, те́м любо́вию твое́ю посети́ на́с и моли́, да превозно́сим Христа́ во ве́ки.

Пои́стине, я́коже Си́мон люби́тель Сама́го Христа́ бы́сть те́плейший, та́ко и ты́, Си́моне иера́рше, к Богоро́дице и Ея́ оби́тели показа́лся еси́ усе́рдный ревни́тель и и́хже люби́л еси́, с те́ми ны́не живе́ши во ве́ки.

Сла́ву и че́сть свою́ с уме́тами Пече́рскаго монастыря́ не сравня́я, жела́л еси́, о́тче: лу́чше тебе́ еди́н де́нь а́ки сме́тию в дому́ та́мо Бо́жия Ма́тере примета́тися, не́жели ты́сящу ле́т сла́вимь бы́ти на престо́ле. О, чу́днаго твоего́ смире́ния, те́м ублажа́ем тя́ во ве́ки.

Богоро́дичен: Твои́м посо́бием, Чи́стая, приидо́х к сопребыва́нию оте́ц Пече́рских, но от невнима́ния зре́нием вспя́ть уклони́хся, и влече́т мя́ вра́г в ми́р на пе́рвая па́ки. Ма́ти Бо́жия, убеди́ мя́ зде́ приседе́ти и спасе́нию своему́ внима́ти, да не, испа́д, поги́бну во ве́ки.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Удивля́емся свято́му житию́ твоему́, Си́моне преблаже́нне, прославля́ем по́двиги твоя́, чти́м и па́мять твою́, ю́же ны́не со а́нгелы велича́ем.

Ни́жняя оста́вль, отше́л еси́ к Вы́шним, те́ло же твое́ по жела́нию принесе́но от престо́ла твоего́ в пеще́ру и показу́ет, любо́вь коли́ку име́л еси́ к сему́ ме́сту, на не́мже вси́ тя́ велича́ем.

Ра́дуется пеще́ра, содержа́щи мо́щи твоя́, святи́телю, и созыва́ет и́ночествующих и празднолю́бных собо́ры, да похва́льными пе́сньми па́мять твою́ вси́, собра́вшиися в дне́шний де́нь, велича́ют.

Отше́л еси́ са́м чу́вственне, но неотсту́пне с на́ми па́мять твоя́ пребыва́ет: се́ бо де́ти твои́, любо́вию к тебе́ горя́ще, при́сно тя́ помина́ем и велича́ем.

Богоро́дичен: Неотсту́пне с на́ми су́щи, Пресвята́я Де́во, собра́вшияся в па́мять ве́рнаго Твоего́ раба́ лю́ди укрепи́, ле́ность отжени́ и ра́зум просвети́, да бо́дренно Тя́ и Сы́на Твоего́ вси́ велича́ем.

Свети́лен:

Богому́драго отца́, словеса́ прему́дра написа́вша, восхва́лим: честна́я бо его́ писа́ния су́ть а́ки роса́ у́тренняя, со́т сла́дкий, хле́б живо́тный, некта́р небе́сный, исто́чник воды́ живы́я, от него́же пия́й сла́дости духо́вныя исполня́ется и па́мять твою́ прославля́ет, Си́моне блаже́ннейший.

Сла́ва, и ны́не: Исто́чник недове́домый, и́же превы́ше небе́с, воды́ живы́я произве́дши, Де́во, напо́й мя́, жа́ждущаго ми́лости Твоея́, да, прохлажде́н, сла́влю Тя́.