Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

И́же пресла́вную па́мять пра́зднующих святи́теля Твоего́ Варсоно́фия, Сло́во Бо́жие Единоро́дное, слове́сную же́ртву принести́ к Тебе́ сподо́би на́с и уго́дника Твоего́ ве́рно восхвали́ти пода́ждь на́м.

Святи́телю о́тче на́ш Варсоно́фие, моли́ся Христу́ Бо́гу, да по достоя́нию возмо́жем принести́ тебе́ пе́ние во хвале́ние и Христа́ просла́вим.

Неусы́пными моли́твами твои́ми, свя́те, стра́стныя на́ша неду́ги уврачу́й, душе́вныя на́ша боле́зни исцели́ и прегреше́ний оставле́ние у Христа́ на́м испроси́.

Богоро́дичен: Прииди́те, де́вы и ма́тери, воспо́йте Пречи́стей Бо́жии Ма́тери гла́с Гаврии́ла арха́нгела: ра́дуйся, Обра́дованная, ра́досте всего́ ми́ра, и ра́достию Твое́ю обра́дуй ду́ши все́х, пою́щих Тя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Царе́вым повеле́нием пе́рвую оби́тель прекра́сну в новопросвеще́нном гра́де Каза́ни воздви́гл еси́ и в то́й многотру́дне подви́глся еси́, и мно́гих ду́ши ко Христу́ приве́л еси́.

Ви́дехом и почуди́хомся, па́че же стра́хом и ра́достию бы́хом одержи́ми, це́лы бо и неразруши́мы обрето́шася честны́я твоя́ мо́щи, святи́телю Варсоно́фие, и вси́ единогла́сно возопие́м: сла́ва Христу́ Бо́гу.

Ча́емаго, е́же в бу́дущем ве́це, наслажде́ния, преподо́бне, дости́гл еси́, и ны́не во све́те Святы́я Тро́ицы лику́еши поя́ со а́нгелы: Свя́т еси́, Го́споди.

Богоро́дичен: Ублажи́м Бо́жию Ма́терь боже́ственными пе́сньми: иде́же бо сла́вится Преблагослове́нная Богоро́дица, та́мо де́моном стра́шное исчезнове́ние, христиа́ном же кре́пость и утвержде́ние.

Седа́лен, гла́с 4

От земли́ Воззва́вый ва́с к ве́чным оби́телем соблюда́ет и по сме́рти телеса́ ва́ша, отцы́ преподо́бнии: вы́ бо в целому́дрии и чистоте́ житие́ по́жили есте́, Гу́рие богому́дре и Варсоно́фие преди́вне. Того́ ра́ди любо́вию почита́ем святу́ю па́мять ва́шу и мо́лим: моли́те Христа́ Бо́га спасти́ся на́м.

Богоро́дичен: Егда́ хощу́ предста́ти пред лице́м Созда́теля моего́ в де́нь пра́веднаго Суда́ Его́, тогда́, Влады́чице, предста́ни ми́ и му́ки изба́ви мя́ ве́чныя, моли́тву сотвори́вши о упова́ющем на Тя́, Свята́я Богоро́дице, да не сни́ду во а́д, но да спасу́ся Твои́м заступле́нием.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Патриа́рха Авраа́ма до́блесть восприи́м, святи́телю Варсоно́фие, а́лчныя кормя́ и жа́дныя напая́я, и не иму́щим неску́дна тре́бования подава́я, душе́вным и теле́сным хле́бом кормя́ вся́ приходя́щия и вруче́нное тебе́ ста́до.

Му́жественне терпя́ от неве́рных, в пле́не сы́й, и смире́ния ра́ди нра́ва в кро́тость преложи́л еси́ неве́рных, и сего́ ра́ди от Бо́га мзду́ восприи́м, святи́телю Варсоно́фие.

Пресла́вными чудотворе́нии от Бо́га одарова́ни бы́ша святи́и чудотво́рцы, исцеля́юще неду́ги и отгоня́юще де́моны, моли́те изба́витися на́м от бе́д ва́шими моли́твами.

Богоро́дичен: К Преблаже́нней Де́ве и Богоро́дице, о преподо́бнии, припади́те и моли́твы простри́те, да умо́лит Сы́на Своего́, Христа́ Бо́га на́шего, пода́ти Христолюби́вому наро́ду на́шему здра́вие и на враги́ побе́ду.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Му́драя уче́ния все́м показа́л еси́ и душе́вное естество́ чи́сто стяжа́л еси́, презира́я пло́ть, прехо́дит бо: и сего́ ра́ди со а́нгелы престо́лу Влады́чню предстои́ши, святи́телю, моля́ Христа́ Бо́га спасти́ся на́м.

Воспева́ющих тя́ и при́сно блажа́щих, и па́мять твою́ ве́рно прославля́ющих, святи́телю Варсоно́фие, освяти́ и просла́ви, и от напа́стей и бе́д изба́ви.

Боже́ственным манове́нием, о́тче, плотско́е жела́ние отри́нув, и после́довал еси́ любо́вию зову́щему тя́ Христу́, блаже́нне Варсоно́фие, святи́телю всече́стне.

Богоро́дичен: Правове́рно чту́щия Тя́ лю́ди и ико́не Твое́й святе́й любе́зно покланя́ющияся, о Бо́жия Ма́ти, спаси́ и от клеветы́ злы́х челове́к изба́ви.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Ки́ими похвала́ми возмо́жем тебе́ похвали́ти, преподо́бне святи́телю Варсоно́фие? По преставле́нии бо твое́м це́лы и нетле́нны обрето́шася цельбоно́сныя твоя́ мо́щи.

Вся́ сотво́ршаго, и всю́ вселе́нную кормя́щаго Сы́на Бо́жия и а́нгельскаго Царя́ Преве́чнаго, Спа́са Христа́ умоли́, святи́телю Варсоно́фие, да пода́ст лю́дем здра́вие, и земны́я плоды́ умно́жит, и грехи́ отпу́стит.

И́стиннаго все́х Па́стыря Христа́, святи́телю Варсоно́фие, моли́ со все́ми освяще́нными ли́ки, да спасе́т лю́ди по вели́цей Его́ ми́лости, и сохране́ни бу́дем от диа́вольских кова́рств, чту́щии тя́.

Богоро́дичен: Боже́ственней Твое́й покланя́емся ико́не, Богоро́дице, прося́ще от Тебе́ вели́кия ми́лости: да́руй, Влады́чице, согреше́ний оставле́ние рабо́м Твои́м, еди́на Благослове́нная.

Конда́к, гла́с 6:

Воздержа́нием те́ло ду́ху порабо́тив, ду́шу же равноа́нгельну сотвори́л еси́, сего́ ра́ди святи́тельства са́ном поче́тся, чи́сте Чисте́йшему предстои́ши. Моли́ Христа́ Бо́га, святи́телю, спасти́ лю́ди твоя́, свя́те, да вси́ вопие́м ти́: ра́дуйся, о́тче преподо́бне Варсоно́фие, гра́ду на́шему Каза́ни похвала́ и утвержде́ние.

И́кос:

Пе́рвый до́му духо́внаго соста́витель и пе́рвый мона́хом наста́вник бы́л еси́, пе́рвый трудополо́жником о́браз и учи́тель бы́л еси́, в новопросвеще́нном гра́де Каза́ни мона́хи наставля́я, и мирски́я поуча́я, и неве́рныя приводя́ во Христо́ву ве́ру, и все́м бы́л еси́ са́м о́браз и учи́тель неле́стен. И сла́вному во граде́х Тфе́ри святи́тель поставля́ешися, уча́ и наказу́я пути́ Госпо́дню. Последи́ же манове́нием Бо́жиим в потружде́ние свое́ во оби́тель Спа́сову вселя́ешися и труды́ к трудо́м прилага́еши, до́ндеже ве́стник, с небе́с соше́д, пое́млет ду́шу твою́ во оби́тели Ца́рства небе́снаго, иде́же ны́не весели́шися с ли́ки святы́х. Мы́ же, лю́дие твои́, вопие́м ти́: ра́дуйся, преподо́бне о́тче Варсоно́фие, гра́ду на́шему Каза́ни похвала́ и утвержде́ние.

Пе́снь 7.

Ирмо́с: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.

Все́х благи́х о́браз бы́л еси́, к вы́шнему житию́ веду́щь смире́нием и кро́тостию. Те́мже и Христо́с па́стыря тя́ лю́дем Свои́м устроя́ет, пою́щим: благослове́н Бо́г оте́ц на́ших.

Не преста́й, Варсоно́фие, моля́ся о духо́вных твои́х ча́дех, и́хже духо́вным уче́нием породи́л еси́, да пое́м: благослове́н Бо́г оте́ц на́ших.

И́же твою́ пресла́вную па́мять пра́зднующим, святи́телю Варсоно́фие, моли́ изба́витися все́м от разли́чных бе́д и напа́стей, да вси́ зове́м: благослове́н Бо́г оте́ц на́ших.

Богоро́дичен: Вопло́щся от пречи́стых Твои́х ложе́сн Бо́жие Сло́во, Де́во Пречи́стая, все́х к богоразу́мию наста́ви, да пое́м Ему́: благослове́н Бо́г оте́ц на́ших.

Пе́снь 8.

Ирмо́с: На горе́ святе́й просла́вльшася, и в купине́ огне́м Присноде́вы, Моисе́ови та́йну я́вльшаго, Го́спода по́йте и превозноси́те во вся́ ве́ки.

Любому́дрства душе́внаго не премо́же теле́сная твоя́ боле́знь, о́тче: о Бо́зе бо ре́вность восприи́м, в ничто́же вменя́еши мимоходя́щую ско́рбь, Того́ ра́ди ве́чныя боле́зни избе́гл еси́.

Боле́ у́бо боле́знию боле́зненне, да мимотече́ши су́етных боле́зней, и ны́не на небесе́х со а́нгельскими ли́ки предстои́ши Святе́й Тро́ице, зовы́й: вся́ дела́ Госпо́дня Го́спода по́йте и превозноси́те Его́ во ве́ки.

Я́ко бо ино́ю пи́щею пита́яся, зе́льным поще́нием и всено́щным стоя́нием изнуря́я пло́ть твою́, поя́ непреста́нно: вся́ дела́ Госпо́дня Го́спода по́йте и превозноси́те Его́ во ве́ки.

Богоро́дичен: Пречи́стая Богоро́дице, приими́ недосто́йную моли́тву мою́ и сохрани́ мя́ от клеветы́ злы́х челове́ков и от напра́сныя сме́рти, и да́руй мне́ пре́жде конца́ покая́ние.

Пе́снь 9.

Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Пра́зднующим све́тло па́мять обре́тения честны́х моще́й твои́х, лю́дем на́шим ми́р испроси́ и усо́бныя бра́ни укроти́, и изба́ви на́с от нахожде́ния пога́ных, и клеветнико́в че́люсти сокруши́.

Свобо́ден тво́й у́м от страсте́й соблю́д, и сосу́д освяще́н Ду́ху Пресвято́му бы́л еси́, и Христа́ прии́м в се́рдцы твое́м, и чудотво́рец яви́лся еси́, прогоня́я де́моны. Сего́ ра́ди мо́лим тя́ изба́витися на́м от сете́й и́х твои́ми, свя́те, моли́твами.

Царю́ си́л вы́шних, Христе́, кре́постию десни́цы Твоея́, покори́ враги́ нечести́выя, и лю́ди Твоя́ спаси́, и земны́я плоды́ умно́жи.

Богоро́дичен: На моле́ние мое́ умилосе́рдися и ра́дость ми́ в печа́ли ме́сто да́руй, Влады́чице, и от клеветы́ злы́х челове́к изба́ви мя́, да пою́ Ти́: ра́дуйся, Обра́дованная, с Тобо́ю Госпо́дь.

Свети́лен.

Егда́ у́бо честны́я ва́ша и святы́я мо́щи нетле́нны обрето́шася, тогда́ благоуха́ние от гробо́в ва́ших изноша́шеся, исцеля́ющее неду́ги и отгоня́ющее ду́хи лука́выя.

Богоро́дичен: Вознеси́, Богоро́дице, ро́г Це́ркви, и наро́ду на́шему пода́ждь на враги́ одоле́ние и кре́пость, и це́рковь, Чи́стая, утверди́, и лю́ди Твоя́ поми́луй, да Тя́ вся́к язы́к христиа́нский велича́ет.