Пе́снь 1.

Ирмо́с: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пе́снь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися.

А́гнче Бо́жий, О́тчее Сло́во, отве́рзи ми́ устне́ и вразуми́ ми́ смы́сл, да досто́йне воспою́ но́ваго сего́ Твоего́ вене́чника царе́вича Дими́трия, и возопию́ Ти́, я́ко просла́вися.

Благода́ть прия́л еси́ от Бо́га, благоро́дне Дими́трие, я́ко обрести́ся моще́м твои́м це́лым и нетле́нным. Благода́ти ми́ своея́ посли́ ка́плю, да досто́йне воспою́ тя́, и возопию́ Го́сподеви моему́, я́ко просла́вися.

В пра́ведных ли́цех предстоя́ и неизрече́нно добро́ту Влады́чню зря́, благоро́дне Дими́трие, моли́ за ны́ смире́нныя рабы́ своя́, я́ко да твои́ми моли́твами, получи́м вся́ блага́я и поле́зная.

Богоро́дичен: Го́спода моего́ и Бо́га ро́ждши, Ма́ти Безневе́стная, просвети́ моя́ недоуме́нная помышле́ния соплести́ сие́ гру́бое плете́ние и сопривнести́ но́вому сему́ о на́с моле́бнику, и возопи́й Сы́ну Твоему́ и Бо́гу моему́, я́ко просла́вися.

Пе́снь 3.

Ирмо́с: Не му́дростию и бога́тством да хва́лится сме́ртный свои́м, но ве́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́х за́поведей утверди́ мя́, Влады́ко.

Ди́вство на́м Бо́г показа́ в после́дняя на́ша времена́, я́ко мо́щи твоя́ та́цеми о́бразы сия́ют, исцеле́ния подаю́ща все́м приходя́щим к ни́м с ве́рою, и Христу́ вопию́щим: на ка́мени за́поведей Твои́х, утверди́ ны́, Влады́ко.

Е́й, ве́сть Госпо́дь прославля́ти Своя́ уго́дники, и пока́зовати на ни́х си́лу Свою́. Та́коже и на тебе́, благоро́дне Дими́трие, показа́ благода́ть Свою́: мо́щи бо твоя́ такова́я де́йствуют, все́м приходя́щим к ни́м с ве́рою.

Жи́знь твоя́ на земли́, не во мно́зе вре́мени пребы́сть, благоро́дне царе́виче Дими́трие, в Небе́сных же селе́ниих во ве́ки пребыва́еши, и мо́лиши Бо́га за ны́, рабы́ своя́, да получи́м ве́чных и неконча́емых бла́г.

Богоро́дичен: Зловре́дное помышле́ние отжени́ от ума́ моего́, Пречи́стая, и до́брыми вразуме́нии просвети́ убо́гую ду́шу мою́, да не покры́ет мя́ тьма́ грехо́вная и да не сни́ду в ме́сто муче́ния.

Конда́к, гла́с 8:

Свети́ло пресве́тлое яви́ся дне́сь Боже́ственная па́мять твоя́: богодарова́нная ти́ чудеса́, я́ко ре́ки, от вся́ких многоразли́чных неду́г подае́ши исцеле́ние с ве́рою призыва́ющим тя́, созыва́я на́с к похвале́нию прославля́ющаго тя́ Бо́га. Его́же моли́, страстоте́рпче Дими́трие, ми́р ми́рови дарова́ти, от ви́димых и неви́димых вра́г правосла́вныя лю́ди невреди́мы сохрани́ти, да зове́м ти́: ра́дуйся, ты́ бо еси́ утвержде́ние гра́ду на́шему.

Седа́лен, гла́с 8.

Я́ко цве́т прекра́сен процве́л еси́, во оте́чествии свое́м, благоро́дне Дими́трие, и́маши бо мо́щи своя́, пребыва́юща во святе́м хра́ме и лежа́ща в честне́й ра́це, я́коже рече́ся, це́лы и невреди́мы, я́ко кри́ни благоуха́нни, и я́ко ши́пки доброво́нни, обонева́ют все́х, приходя́щих к ни́м с ве́рою, и удивля́ют зря́щия на ни́х, и вопию́щия: сла́ва Бо́гу, прославля́ющему Своя́ уго́дники.

Богоро́дичен: Богоблагода́тная Ма́ти, Благода́теля моего́ ро́ждши, благода́тную ми́ пода́ждь мы́сль, да облагода́чуся Твое́ю благода́тию, да не заблужу́ся в пути́ про́пастныя, да изба́влюся от се́ти лука́ваго борца́ и па́ки да не погря́зну в ти́не ка́ла грехо́внаго, да не бу́ду му́чен в гее́нне о́гнене, да воспева́ю Тя́, Влады́чице.

Пе́снь 4.

Ирмо́с: Слы́ша дре́вле Авваку́м, Христе́, чу́дный Тво́й слу́х и стра́хом взыва́ше: от ю́га Бо́г прии́дет и Святы́й от горы́ приосене́нныя ча́щи спасти́ пома́занныя. Сла́ва си́ле Твое́й, Го́споди.

Земля́ Ру́сская вся́ хва́лится тобо́ю, благоро́дне Дими́трие, я́ко ца́рствующий гра́д Москва́, име́ет в себе́ мо́щи твоя́, я́ко не́кое сокро́вище дра́го, обогаща́ющее ве́рныя лю́ди, вопию́щия Христу́: сла́ва си́ле Твое́й, Го́споди.

И́же повеле́нием царя́, ца́рству тезоимени́та, пренесе́ни бы́ша честны́я твоя́ мо́щи от гра́да У́глеча в ца́рствующий гра́д Москву́, я́ко не́кое бога́тство вели́ко. Тогда́ вси́ лю́дие возра́довашася, и воспе́ша Христу́: сла́ва си́ле Твое́й, Го́споди.

И́стинствоваша чудеса́ от пра́ведных моще́й твои́х в прихо́д честна́го и́х пренесе́ния: мно́зи неду́жнии от неду́г свои́х исцелева́хуся и здра́ви быва́ху, и, ра́дующеся, в до́мы своя́ отхожда́ху, и Христу́ пою́ще: сла́ва си́ле Твое́й, Го́споди.

Богоро́дичен: Ко́рмчию, Ма́ти, все́х ро́ждшая, Христа́ и Бо́га моего́, упра́ви ми́ душе́вный мо́й кора́бль приити́ ко приста́нищу спасе́ния и получи́ти пу́ть покая́ния, да не потопле́н бу́ду в бе́здне грехо́в мои́х.

Пе́снь 5.

Ирмо́с: Све́т Тво́й незаходи́мый возсия́й, Христе́, в сердца́ ве́рно пою́щих Тя́, ми́р подава́яй на́м па́че ума́; те́м, от но́щи неве́дения ко дню́ Све́том Твои́м теку́ще, славосло́вим Тя́, Человеколю́бче.

Любо́вию притека́ющих к ра́це моще́й твои́х и любе́зно целу́ющих я́, благоро́дне Дими́трие, пода́ждь душа́м спасе́ние и телесе́м здра́вие и изба́ви лю́тых бе́д и обстоя́ний свои́ми к Бо́гу моли́твами.

Моли́тв ра́ди твои́х, я́же к Бо́гу, благоро́дне Дими́трие, лю́тое колеба́ние в Ру́сстей земли́ укроти́ся, от злы́х и растле́нных умы́ челове́к, хотя́щих зде́ вре́менныя сла́вы наслади́тися, презре́вше, я́ко во о́ном ве́це, ве́чне и́мут му́читися.

Недове́домый Бо́г недове́домыми Свои́ми судьба́ми содева́ет, и уго́ждших Свои́х прославля́ет. Та́коже и на тебе́, благоро́дне Дими́трие, недове́домым Свои́м смотре́нием сотвори́, сицевы́м да́ром мо́щи твоя́ обогати́.

Богоро́дичен: Отрокови́це Чи́стая, Деви́це Ма́ти Госпо́дня, не оста́ви мя́ ту́не, принося́щаго Ти́ ма́лыя сия́ ка́пли от недосто́йных усте́н мои́х, но приими́, я́ко о́ноя убо́гия вдовы́ две́ ца́те.

Пе́снь 6.

Ирмо́с: Ве́сь от страсте́й безме́рных содержу́ся и ки́том зо́л снизпадо́х, но возведи́ из нетле́ния мя́, Бо́же, я́коже пре́жде Ио́ну, и ве́рою безстра́стие ми́ да́руй, я́ко да во гла́се хвале́ния и спасе́ния ду́хом пожру́ Ти́.

Пренесе́нию моще́й твои́х, зело́ возра́довася са́м ца́рь, и архиере́й вели́кий, и вси́ моско́встии наро́ди ра́достно срето́ша я́, и вну́трь самого́ ца́рствующаго гра́да Москвы́ несо́ша, и положи́ша я́, в честне́м хра́ме, я́же и ны́не зря́тся.

Ре́вностию Боже́ственною одержи́м бы́сть сро́дник тво́й, и́же и ца́рь бы́сть над все́ю Русси́ею, ему́же зва́ние – лице́ Бо́жие, приходя́ к ра́це моще́й твои́х, и целу́я и́х любе́зно, и отходя́ благода́рно и ра́достно, сла́ву и хвалу́ Бо́гу возсыла́я.

Сове́т о́нех злы́х и лука́вых челове́к, хотя́щих насле́довати оте́чество твое́, благоро́дне Дими́трие, и се́сти на престо́ле ца́рствия твоего́, Бо́г же моли́тв ра́ди твои́х разори́, и до конца́ все́х погуби́, и я́ко пра́х разве́я.

Богоро́дичен: Ты́ еси́ прибе́жище, Ты́ и утвержде́ние, Ты́ Помо́щница ро́ду христиа́нскому, Ма́ти Бо́га Вы́шняго. Те́м и а́з, убо́гий и недосто́йный, молю́тися: помози́ и мне́, недосто́йному, во глубине́ зо́л мои́х лежа́щему, да не сведе́н бу́ду во о́гнь гее́ннский.

Конда́к, гла́с 4.

Я́ко пресве́тлая звезда́, яви́лся еси́ дне́сь, в ца́рствующем гра́де Москве́, благове́рне царе́виче Дими́трие, сия́я пра́ведными свои́ми мощми́. К ни́мже притека́юще исцеле́ния да́р прие́млем, и глаго́лем: ра́дуйся, всекра́сне душе́ю, благоро́дне Дими́трие, я́ко прия́л еси́ от Бо́га ве́лий се́й да́р, и вене́ц нетле́нный.

И́кос:

Прииди́те вси́ ве́рнии, соше́дшеся, восхва́лим но́ваго сего́ предста́теля и моле́бника о на́с к Бо́гу, ца́рскую сию́ о́трасль, благове́рнаго царе́вича Дими́трия, и возопие́м к нему́ си́це, глаго́люще: ра́дуйся, но́вый вене́чниче, благове́рный царе́виче Дими́трие, я́ко предстои́ши Све́ту Трисо́лнечному, насыща́яся от Него́ Боже́ственнаго светосия́ния, и мо́лишися о держа́ве сро́дник твои́х, о е́же бы е́й ненаве́тне бы́ти от все́х злы́х, находя́щих на ню́. Ра́дуйся, я́ко мо́щи твоя́, толи́цеми дарми́ от Бо́га обогаще́ны су́ть, и просвеща́ют все́х приходя́щих к ни́м с ве́рою. Ра́дуйся, я́ко моли́тв ра́ди твои́х, укроти́ Бо́г лю́тое колеба́ние во все́й Ру́сстей земли́ от о́нех злы́х и лука́вых челове́к, нарица́ющихся и́менем твои́м во лжу́, и смуща́ющих держа́ву ца́рствия твоего́. Ра́дуйся, всему́ оте́честву своему́ похвала́ и утвержде́ние и ца́рствующему гра́ду Москве́ кра́сное удобре́ние. Ра́дуйся, я́ко прия́л еси́ от Бо́га вели́к се́й да́р и вене́ц нетле́нный.

Пе́снь 7.

Ирмо́с: О́бразу служи́ти мусики́йскому согла́сию созыва́ющу лю́ди, от пе́сней сио́нских пою́ще оте́чески, о́троцы Дави́довы мучи́телево разори́ша злочести́вое веле́ние и пла́мень в ро́су преложи́ша, пе́снь воспева́юще: превозноси́мый отце́в и на́ш Бо́же, благослове́н еси́.

Удивля́ются вси́ ру́сстии наро́ди, зря́ще мо́щи твоя́, толи́кою сла́вою от Бо́га просла́влены, и такова́я де́йствуют исцеле́ния, подаю́ща все́м приходя́щим к ни́м с ве́рою и Христу́ вопию́щим: благослове́н Бо́г оте́ц на́ших.

Фимиа́м благово́нен обонева́ет челове́ком чу́вства, та́коже и твоя́ пра́ведныя мо́щи, благоро́дне, облагоуха́ют на́с, а́ки не́коим обоня́нием сла́дким, и благода́ть свою́ подаю́т на́м, приходя́щим к ни́м с ве́рою, и Христу́ вопию́щим: благослове́н Бо́г оте́ц на́ших.

Храни́т Госпо́дь ца́рствующий гра́д Москву́, пребыва́емых ра́ди в не́м чудотво́рных твои́х моще́й, благоро́дне царе́виче Дими́трие. Сего́ ра́ди ра́дуются лю́дие, и веселя́тся, и вопию́т Христу́: благослове́н Бо́г оте́ц на́ших.

От благочести́ваго ца́рскаго ко́рене, от благода́тнаго зва́ния рожде́н еси́, благоро́дне Дими́трие, и я́ко пе́рвенец яви́ся в ро́де свое́м, и ны́не хва́лятся тобо́ю сро́дницы твои́, ви́дяще бо тя́ я́ко просла́влена от Бо́га, Ему́же пое́м: благослове́н Бо́г оте́ц на́ших.

Богоро́дичен: Цари́ца Небе́сная, Небе́снаго Царя́ ро́ждши и на руку́ Свое́ю поне́сши, воцари́ у́м мо́й над злы́ми мои́ми помышле́ньми, да не по́йдет душа́ моя́ в зла́я и па́губная ме́ста, но да возопию́ Сы́ну Твоему́ и Бо́гу моему́: благослове́н Бо́г оте́ц на́ших.

Пе́снь 8.

Ирмо́с: Чу́да преесте́ственнаго показа́ о́браз огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное рождество́. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки.

Честна́я ра́ка моще́й твои́х, благоро́дне, па́че зла́та и сапфи́ра сия́ет. К не́й бо притека́юще, ца́рие и кня́зи, и святи́телие и мно́гое правосла́вное христиа́нство, благода́тное осене́ние от моще́й твои́х прие́млют и пою́т: вся́ дела́ Госпо́дня, Го́спода по́йте и превозноси́те Его́ во ве́ки.

Шу́м пою́щих красе́н быва́ет, во святы́х хра́мех, па́че же иде́же лежа́т ны́не пра́ведныя твоя́ мо́щи, в де́нь честна́го и́х пренесе́ния. Ца́рь же и архиере́й вели́кий, со свяще́нными собо́ры, све́тло пра́зднуют, и вси́ лю́дие сра́дуются, и веселя́тся, и пою́т: вся́ дела́ Госпо́дня, Го́спода по́йте, и превозноси́те Его́ во ве́ки.

Ще́дрый Госпо́дь на́ш и Бо́г, ва́ших ра́ди к Нему́ моли́тв, ще́дрит и ми́лует на́с, и подае́т на́м вся́ блага́я и поле́зная. Те́м ра́дуемся и весели́мся, и хвалу́ Ему́, Творцу́ своему́ воздае́м, и пое́м: вся́ дела́ Госпо́дня, Го́спода по́йте, и превозноси́те Его́ во ве́ки.

Я́ко свеща́ све́тла, непоро́чная твоя́ душа́ Го́сподеви предста́, и пото́м во угото́ванное е́й ме́сто несе́на бы́сть, иде́же О́н Са́м всеви́дящее о́ко, ве́сть, Ему́же ны́не пое́м и славосло́вим: вся́ дела́ Госпо́дня, Го́спода по́йте, и превозноси́те Его́ во ве́ки.

Богоро́дичен: Из ложе́сн Твои́х неизрече́нно про́йде Сы́н Тво́й и Бо́г на́ш, Пречи́стая Де́во Влады́чице, и рождество́м Свои́м ве́сь ро́д челове́ч от идолослуже́ния свободи́. Те́м и а́з, убо́гий и недосто́йный ра́б Тво́й, молю́ Ти́ ся́, я́ко да Твои́ми к Нему́ ма́терними моли́твами свободи́т и мене́ от удержа́ннаго греха́ моего́.

Пе́снь 9.

Ирмо́с: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Те́сное и недоуме́тельное ума́ моего́ приими́, благоро́дне, а́ще неле́по и гру́бо счини́х ти́ сия́ ма́лыя пе́сни, но свои́м предста́тельством я́же к Бо́гу преудо́брено сотвори́ е́ и па́ки во благо́е почти́ е́.

А́ще па́ки и недосто́йными устна́ми сия́ ма́лыя краегране́сия приноша́ем к тебе́, благоро́дне: но честны́я твоя́ мо́щи вельми́ похваля́ем и Христа́ Бо́га на́шего велича́ем, да́вшаго ти́ такову́ю благода́ть и си́лу.

Во дни́ на́ша яви́ Госпо́дь благода́ть Свою́ во все́й вели́цей Росси́и, я́ко мо́щи твоя́ сицевы́м да́ром от Него́ почте́ны су́ть, те́м вси́ лю́дие пою́т и велича́ют, и удивля́ются, и сла́вят Го́спода.

А́ще Бо́г тя́ просла́ви на небеси́ и на земли́, благоро́дне Дими́трие, мы́ же, гру́бии, ка́ко не воспое́м и не похва́лим сего́ вели́чия Бо́жия, сбы́вшагося на тебе́, благоро́дне. Те́м ра́дуйся и весели́ся, предстоя́ Ему́, Невече́рнему Све́ту.

Богоро́дичен: С боле́зненною душе́ю и с сокруше́нным се́рдцем вопию́ Ти́, Влады́чице: бу́ди ми́ Помо́щница в де́нь стра́шнаго о́наго испыта́ния Сы́на Твоего́ и Бо́га моего́, егда́ бу́дет суди́ти живы́м и ме́ртвым и возда́ти кому́ждо по дело́м на́шим.

Свети́лен:

Спрославля́ет тя́ вся́ ру́сская земля́, и восхваля́ет тя́ ца́рствующий гра́д Москва́, я́ко от ца́рскаго ко́рене произше́л еси́, и к Самому́ Царю́ царе́м возше́л еси́, и и́маши к Нему́ дерзнове́ние. Те́м вы́ну моли́ Его́ дарова́ти на́м ве́лию ми́лость.

Сла́ва, и ны́не: Уста́в рождества́ Твоего́ удивля́ет и ужаса́ет все́х, Де́во Ма́ти Чи́стая, па́че бо ума́ и сло́ва родила́ еси́ Све́та Преве́чнаго, Христа́, просвети́вшаго ве́сь ми́р рождество́м Свои́м.