Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть: препросла́вленный Госпо́дь сла́вно бо просла́вися.

Высо́ко житие́ име́я и восхожде́нии Боже́ственными ве́сь све́тел бы́в, просвеще́ние ми́ испроси́, восхваля́ющу твоя́ честны́я по́двиги, и́миже до́бре пожи́в, улучи́л еси́, Мстисла́ве, и́хже наде́ялся еси́.

Мироуха́нная любя́ уче́ния и во чте́нии Свяще́нных Писа́ний упражня́яся, сласте́й уклони́лся еси́, блаже́нне, смра́дных и безче́стных и облагово́нился еси́, Боже́ственными добро́тами украша́емь.

Дрема́ние о́чию от души́, блаже́нне, отгна́л еси́, бдя́ и Бо́гови приединева́яся всено́щными стоя́нии, не преклоне́н ну́ждами естества́: те́мже ко дню́ невече́рнему дости́гл еси́.

Богоро́дичен: Я́ко черто́г одушевле́н Бо́жий и кади́льницу мы́сленнаго и светоно́снаго У́гля, при́сно Благода́тную ублажа́ем Богоро́дицу, зову́ще: ра́дуйся, Хода́таице спаси́тельнаго воскресе́ния.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся́ ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Глаго́лом живото́чным внима́я, испи́л еси́ во́ду спасе́ния, возгнуша́вся го́рькаго греха́, и, поя́, глаго́лал еси́ Бо́гови, Мстисла́ве, я́ко не́сть свя́та, па́че Тебе́, Го́споди.

Ми́лование стяжа́л еси́ христоподража́тельно, разда́л еси́ бога́тство тре́бующим, Небе́сное бога́тство, хода́тайствующее тебе́, е́же и получи́л еси́, поя́, Мстисла́ве, я́ко не́сть свя́та, па́че Тебе́, Го́споди.

Присво́ився Зижди́телю любо́вию Боже́ственною, прия́л еси́ Небе́сное насле́дие, дре́ва живо́тнаго получи́ти сподо́бился еси́, блаже́нне, Боготворе́нием обожа́яся и поя́, сла́вне, я́ко не́сть свя́та, па́че Тебе́, Го́споди.

Богоро́дичен: Несеко́мую го́ру Тя́ дре́вле Авваку́м прови́де, Всенепоро́чная, из нея́же Бо́г яви́ся и на́с, истле́вшия, обнови́л е́сть.

Седа́лен, гла́с 4.

Благоволи́в благи́ми дея́нии, искуси́лся еси́, я́ко зла́то в пещи́, напа́стьми, Мстисла́ве сла́вне. Те́мже и по сме́рти источа́еши чудеса́ бога́тно, я́ко во́ды, неду́ги уставля́еши, о на́с при́сно моли́ся, я́ко да согреше́ний проще́ние прии́мем.

Богоро́дичен: Чи́стая, Всенепоро́чная и Неискусому́жная, Я́же еди́на Безле́тнаго Сы́на и Сло́ва Бо́жия в ле́то ро́ждши, Сего́ с Богому́дрым кня́зем Гео́ргием и со все́ми святы́ми моли́ дарова́ти на́м очище́ние и ве́лию ми́лость.

Пе́снь 4.

Ирмо́с: Прише́л еси́ от Де́вы не хода́тай, ни А́нгел, но Са́м, Го́споди, вопло́щся, и спа́сл еси́ всего́ мя́, челове́ка. Те́м зову́ Ти́: сла́ва си́ле Твое́й, Го́споди.

Повеле́ния оте́ческая храня́ невреди́мо правове́рным смы́слом, ты́ от ю́ности име́л еси́ житие́ чи́сто и ми́лостивен нра́в, досточу́дне.

Ни смуще́ние мирско́е, ни вла́сти держа́ние, ни сла́ва вре́менная твоего́ к Бо́гу раче́ния, кня́же Мстисла́ве, преврати́, но благоволи́л еси́ вои́стинну Боже́ственным дея́ниям.

Возне́сся, Боже́ственными поуче́нии вы́ну врага́ смири́л еси́, исцеле́ния де́тель прия́л еси́, Мстисла́ве, судо́м пра́ведным вся́ческая пра́вящаго.

Богоро́дичен: Препе́тая во́инствы, горе́ Препе́таго Бо́га родила́ еси́, Челове́ка вои́стинну бы́вша, Его́же за рабы́ Твоя́ моля́щи не преста́й, Присноде́во.

Пе́снь 5.

Ирмо́с: Просвеще́ние во тьме́ лежа́щих, спасе́ние отча́янных, Христе́, Спа́се мо́й, к Тебе́ у́тренюю, Царю́ ми́ра, просвети́ мя́ сия́нием Твои́м, ино́го бо, ра́зве Тебе́, бо́га не зна́ю.

Све́том чи́стым Святы́я Тро́ицы просвеще́н, зако́ном же Сея́ огражде́н, но́щь жите́йскую без претыка́ния преше́л еси́, виде́нии Боже́ственными возвыша́яся, Богому́дре, в Боже́ственный живо́т всели́лся еси́.

Ны́не на тебе́ чу́до ве́лие ви́дится и у́жаса испо́лнено, я́ко по погребе́нии вои́стинну надо́лзе соблюда́ется невреди́мо, блаже́нне, твое́ те́ло, во гро́бе лежа́щее, судо́м, и́мже ве́сть Бо́г, прославля́яй тя́.

Блаже́нне кня́же Мстисла́ве, твое́ дерзнове́ние к Бо́гу и любо́вь, ю́же от се́рдца, к Тому́ име́ти благоволи́в, и́стинно имени́то же возсия́в пресла́вно, Боже́ственными светлостьми́ просвети́ ве́рных со́нмища.

Богоро́дичен: За ны́ из Тебе́ вопло́щшагося, Де́во Ма́ти, всегда́ моли́, благоче́стно Тя́ блажа́щим, изба́витися бе́д, душетле́нных страсте́й, и печа́лей, и ве́чнующаго пла́мене муче́ния.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Ка́пли сла́дкия иска́паше, блаже́нне, по́т твои́х сла́дость и исцеле́ний сия́ния на похвалу́ Христа́, Бо́га на́шего.

Во дво́рех Бо́га процве́л еси́, виногра́д многопло́ден прозя́б и доброде́телей гро́здие, Де́лателю душа́м оби́лие пода́в.

Ца́рства Бо́жия возжеле́л еси́, над страстьми́ ца́рствовав, кня́же Мстисла́ве, и по произволе́нию лу́чшему ра́дость пра́ведных получи́л еси́.

Богоро́дичен: Избра́нно Бо́гу бы́вши я́ко прекра́сное селе́ние и простра́нное, Сему́, Де́во, была́ еси́ и черто́г, и све́щник, и трапе́за.

Конда́к, гла́с 8:

Многому́дренно пожи́в в княже́нии твое́м в вели́ком Но́ве гра́де се́м, благове́рный кня́же Мстисла́ве, пло́д благи́й Бо́гови в жи́зни се́й бы́л еси́, присноцвету́щ доброде́тельми, того́ ра́ди получи́л еси́ жи́знь ве́чную на Небесе́х, те́ло же твое́ нетле́нием просла́влено бы́сть на земли́. Мы́ же, предстоя́ще ико́не твое́й, любо́вию вопие́м ти́: ра́дуйся, утвержде́ние гра́ду на́шему.

И́кос:

Всечестну́ю па́мять почти́м уго́дника Христо́ва, вели́каго кня́зя Мстисла́ва, нарече́ннаго по осмодне́вному зако́ну Госпо́дню но́выя благода́ти Гео́ргия, оте́ческою диади́мою от ю́ности укра́шенна, хра́браго во́ина на супоста́ты и вла́стеля благоути́шна, и ра́достныя глаго́лы от се́рдца воззове́м к нему́, си́це реку́ще: ра́дуйся, я́ко из млады́х ногте́й Бо́га возлюби́в; ра́дуйся, я́ко за́поведей Его́ нело́жный храни́тель. Ра́дуйся, изба́вивый Но́в гра́д от нахожде́ния инове́рных язы́к; ра́дуйся, нело́жный прави́телю оте́ческих преда́ний. Ра́дуйся, благоче́стия сто́лпе, непоколеби́м вра́жиими прило́ги; ра́дуйся, бе́дным утеше́ние и засту́пниче. Ра́дуйся, я́ко сподо́бился еси́ восприя́ти вене́ц пресве́тел и исто́чник исцеле́ний; ра́дуйся, пресла́вный кня́же Мстисла́ве, кня́зем росси́йским похвало́. Ра́дуйся, утвержде́ние гра́ду на́шему.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть. Христо́с же простре́ Богочести́вым отроко́м ро́су духо́вную, Сы́й благослове́н и препросла́влен.

Кре́постию возмо́г Живода́вца, плотско́е удержа́л еси́ жела́ние, пребога́то, и у́м возвы́сил еси́ на Небе́сная, поя́ кре́пко: Сы́й благослове́н и препросла́влен.

Са́м ся́ благоро́ден сотвори́в, благоро́дны нра́вы стяжа́л еси́ умо́м це́лым, поуче́нием же упражня́яся Богодохнове́нных писа́ний, все́ жела́ние твое́ к Бо́гу Всеви́дцу, блаже́нне, возложи́л еси́.

Го́рнее Ца́рство, Вы́шний гра́д, Бо́жий ра́й, пра́ведных наслажде́ние и пи́щу несоде́янную, бога́тство некра́домое, Све́т невече́рний, обрести́ сподо́бился еси́, кня́же Мстисла́ве блаже́нне.

Песносло́вивша тя́ богому́дренно по Христо́ве Це́ркве, Боже́ственная преда́ния и оте́ческий уста́в прие́м, Вели́кий Но́в гра́д соде́ржит, поя́: благослове́н Бо́г оте́ц на́ших.

Богоро́дичен: Его́же родила́ еси́, Влады́чице, при́сно моли́ от рабо́ты изба́вити мя́ страсте́й, и осужде́ния, и стужа́ющаго ми́ лю́таго окамене́ния, и оскорбля́ющаго, Чи́стая, одержа́ния, Богора́дованная.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

О́гнь помышля́я стра́шный, пред Престо́лом Христо́вым хотя́ще изы́ти, умиле́нием се́рдца те́плы пролива́еши пото́ки сле́зныя, погаша́я те́ми страсте́й пе́щь, Мстисла́ве Богому́дре.

Любо́вию предложи́л еси́ твою́, му́дре, к Бо́гу ду́шу и к Тому́ прилепи́лся еси́, вопия́ пе́сненно: Христе́ мо́й, Ты́ ны́не мя́ изба́ви страсте́й смертоно́сных во ве́ки.

Терпе́нием пожда́тель и се́рдцем смире́н ты́ ви́ден бы́л еси́, ми́лостив прося́щим, обы́чай при́сно бла́г име́я и нра́в доброде́тельный, всече́стне, в ни́хже до́бре пожи́в, чуде́с то́чиши благода́ть.

Тобо́ю, Богоблаже́нне кня́же Гео́ргие, вели́кий Но́в гра́д вельми́ хва́лится, в не́м бо благочести́во пожи́л еси́, спасе́ние соде́лав, Тро́ицу чти́ти научи́л еси́ во Еди́ном Божестве́, и покланя́тися То́й, и благослови́ти во ве́ки.

Богоро́дичен: Ада́мов Соде́тель от крове́й Твои́х чи́стых зи́ждется и млеко́м пита́ется, пита́яй вся́ко дыха́ние, Де́во Богоро́дице. Те́м, я́ко Ма́терь Тя́ Бо́жию, велича́ем.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Ви́дети жела́я сла́ву Бо́га на́шего, доброде́тельми Богоразуми́я себе́ удобри́л еси́ и, свещу́ нося́, вше́л еси́ во све́тлый черто́г, со А́нгелы живы́й, ясне́е наслажда́яся Божества́.

Я́ко у́треннее со́лнце, возсия́ дне́сь твоего́ от земли́ преставле́ния де́нь, су́щия во мра́це сердца́ просвеща́я: ты́ бо све́та и дне́ яви́лся еси́ вои́стинну сы́н, Богому́дре кня́же Гео́ргие, сего́ ра́ди тя́ почита́ем.

Му́дростию украша́яся и ра́зумом просвеща́яся, смире́нием се́рдца красу́яся, высото́ю жития́, досточу́дне, в разу́мныя вше́л еси́ дво́ры, иде́же на́с помяни́, чту́щих тя́, блаже́нне и досточу́дне кня́же Мстисла́ве.

Я́коже со́лнце блиста́я, зари́ испуща́еши чуде́с, просвеща́я все́х сердца́, твоего́ сла́внаго успе́ния па́мять творя́щих ве́рно, треблаже́нне и Богому́дре кня́же Мстисла́ве.

Богоро́дичен: Не́бо ро́ждши, А́нно, но́вое – Мари́ю, Е́юже возсия́ Сла́вы Со́лнце, дне́сь от земли́ к Небе́сным прехо́диши, Христу́ моля́щися о спасе́нии ду́ш на́ших.

Свети́лен.

Влады́чню Престо́лу ны́не с пра́ведными ли́ки предстоя́, Богому́дре Мстисла́ве, моли́тися не преста́й дарова́ти побе́ды на сопроти́вныя вся́, и междоусо́бныя бра́ни укроти́ти, и ми́р ми́рови устро́ити, и спасти́ ду́ши на́ша.

Богоро́дичен: Щедро́ты Твоя́, Бо́же, на лю́ди Твоя́ низпосли́ моли́твами Пречи́стыя Твоея́ Ма́тере и все́х святы́х и ра́ди уго́дника Твоего́ блаже́ннаго кня́зя Мстисла́ва да́руй на́м ве́лию ми́лость.