Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Высоко́ житие́ име́я и восхожде́нии боже́ственными ве́сь све́тел бы́в, просвеще́ние ми́ испроси́, похваля́ющу честны́я твоя́ по́двиги, и́миже до́бре пожи́в, получи́л еси́, и́хже наде́ялся еси́, блаже́нне Проко́пие.

Мироуха́нная любя́ уче́ния и во чте́нии Святы́х Писа́ний упражня́яся, сласте́й уклони́лся еси́, блаже́нне, смра́дных и безче́стных и облагово́нился еси́, Боже́ственными дарова́ньми удобря́яся.

Дрема́ние ве́ждома от души́, блаже́нне, отгна́л еси́, бдя́ и Бо́гу приединева́яся всено́щными стоя́нии, непрекло́нен ну́ждами есте́ственными, те́мже ко дню́ невече́рнему прише́л еси́.

Богоро́дичен: Я́ко черто́г одушевле́нный Бо́жий и кади́льницу разу́мнаго и светоно́снаго У́гля, приснора́дованную блажи́м Богоро́дицу, зову́ще: ра́дуйся, Хода́таице спасе́ннаго воззва́ния.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Глаго́лом живото́чным внима́я, испи́л еси́ во́ду спасе́ния, возгнуша́вся го́рькаго греха́, и, поя́, глаго́лал еси́ Бо́гу, Проко́пие, я́ко не́сть свя́т, па́че Тебе́, Го́споди.

Ми́лование стяжа́л еси́ христоподо́бно, разда́л еси́ бога́тство тре́бующим, небе́сное бога́тство, хода́тайствующее тебе́, его́же и получи́л еси́, вопия́, Проко́пие: я́ко не́сть свя́т, па́че Тебе́, Го́споди.

Присво́ився Зижди́телю любо́вию боже́ственною, прия́л еси́ небе́сное насле́дие. Дре́ва живо́тнаго получи́ти сподо́бился еси́, блаже́нне, боготворе́нием обожа́яся и поя́, сла́вне, я́ко не́сть свя́т, па́че Тебе́, Го́споди.

Богоро́дичен: Су́щи а́нгел святе́йши, Зижди́теля а́нгелов во Твою́ боку́ носи́ла еси́ и родила́ еси́, Богома́ти, на избавле́ние челове́ком, пою́щим Ти́, я́ко не́сть пречи́сты, ра́зве Тебе́, Влады́чице.

Седа́лен, гла́с 4:

Благоволи́в благи́ми дея́нии, искуси́лся еси́, я́ко зла́то в пещи́, напа́стьми, Проко́пие сла́вне. Те́мже и по сме́рти источа́еши чудеса́ бога́тно, я́ко во́ды, неду́ги уставля́еши, о на́с при́сно моли́ся, я́ко да согреше́ний проще́ние прии́мем.

Богоро́дичен: Чи́стая, Всенепоро́чная, и Неискусому́жная, Я́же еди́на Безле́тнаго Сы́на и Сло́ва Бо́жия в ле́то ро́ждши, Сего́ со святы́ми и честны́ми патриа́рхи, и му́ченики, и проро́ки, преподо́бными моли́ дарова́ти на́м очище́ние и ве́лию ми́лость.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти: сла́ва си́ле Твое́й, Го́споди.

Повеле́ния оте́ческая храня́ невреди́мо, правове́рным смы́слом, ты́ от ю́ности име́л еси́ житие́ чи́сто и ми́лостивен нра́в, досточу́дне.

Ни смуще́ние мирско́е, ни вла́сти держа́ние, ни сла́ва вре́менная твоего́ к Бо́гу раче́ния, Проко́пие, преврати́, но благоволи́л еси́ вои́стинну боже́ственным дея́нием.

Возне́сся боже́ственными поуче́нии вы́ну, врага́ смири́л еси́, исцеле́ния де́тель прия́л еси́, Проко́пие, судо́м пра́ведным вся́ческая Пра́вящаго.

Богоро́дичен: Препе́тая, во́инствы горе́ препе́таго Бо́га родила́ еси́, Челове́ка вои́стинну бы́вша, Его́же за рабы́ Твоя́ моля́щи не преста́й, Присноде́во.

Пе́снь 5.

Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Све́том чи́стым Святы́я Тро́ицы просвеще́н, зако́ном же Сея́ огражде́н, но́щь жите́йскую без претыка́ния преше́л еси́, виде́нии боже́ственными возвыша́яся, блаже́нне, в боже́ственный живо́т всели́лся еси́.

Ны́не на тебе́ чу́до ве́лие ви́дится и у́жаса испо́лнено: ка́ко по погребе́нии вои́стинну надо́лзе соблюда́ется невреди́мо, блаже́нне, твое́ те́ло, во гро́бе лежа́що, судо́м, и́мже ве́сть Бо́г, прославля́яй тя́.

Блаже́нне Проко́пие, твое́ дерзнове́ние к Бо́гу и любо́вь, ю́же от се́рдца к Тому́ име́ти благоволи́в, и́стинно имени́то же возсия́в пресла́вно, Боже́ственными светлостьми́ просвети́ ве́рных со́нмища.

Богоро́дичен: За ны́ из Тебе́ вопло́щшагося, Де́во Ма́ти, всегда́ моли́, благоче́стно Тя́ блажа́щим изба́витися бе́д, душетле́нных страсте́й и печа́лей и ве́чнующаго пла́мене муче́ния.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Ка́пли сла́дкия иска́павше, блаже́нне, по́т твои́х сла́дость и исцеле́ний сия́ния, на хвалу́ Христа́ Бо́га на́шего.

Во дво́рех Бо́га процве́л еси́, виногра́д многопло́ден прозя́б, и доброде́телей гро́здие Де́лателю душа́м оби́лие пода́в.

Ца́рства Бо́жия возжеле́л еси́, над страстьми́ ца́рствовав, Проко́пие, и, по произволе́нию лу́чшему, ра́дость пра́ведных получи́л еси́.

Богоро́дичен: Избра́нно Бо́гу бы́вши я́ко прекра́сное селе́ние и простра́нное Сему́, Де́во, была́ еси́, и черто́г, и све́щник, и трапе́за.

Конда́к, гла́с 4:

Христа́ ра́ди юро́дством возду́шная мыта́рства на рука́х а́нгельских неприкоснове́нно преше́д, ца́рскаго дости́гл еси́ престо́ла и от Царя́ все́х Христа́ Бо́га да́р прие́м благода́ть исцеле́ний, мно́гими бо чудесы́ твои́ми и зна́мением стра́шным удиви́л еси́ гра́д тво́й Вели́кий У́стюг: лю́дем твои́м ми́лость испроси́, ми́ро от честна́го о́браза Пресвяты́я Богоро́дицы моли́твою изве́л еси́ и неду́жным по́дал еси́ цельбы́. Те́мже мо́лим тя́, чудоно́сче Проко́пие: моли́ Христа́ Бо́га непреста́нно пода́ти грехо́в на́ших проще́ние.

И́кос:

Ка́ко возмогу́ гре́шный и скве́рный а́з душе́ю вку́пе и те́лом исписа́ти во пло́ти су́щее равноа́нгелом житие́ твое́ и пресла́вная чудеса́? А́ще у́бо мно́зи прему́дрии не дости́гнут испове́дати мно́гаго твоего́ терпе́ния, и смире́ния, и те́плыя ко Христу́ любве́, но, оба́че наде́яся на твое́ беззло́бие, о блаже́нне, си́це вопию́ ти: ра́дуйся, пресве́тлая звездо́, от восто́ка доброде́телей возсия́вшая и вселе́нную чудесы́ озари́вшая; ра́дуйся, возненави́девый роди́тельскую любо́вь, Христа́ же еди́наго, над все́ми су́щаго Бо́га, все́м се́рдцем возлюби́вый и Тому́ невозвра́тным жела́нием после́довавый; ра́дуйся, я́ко бу́йственное и юро́дственное, е́же по апо́столу, жи́тельство избра́вый; ра́дуйся, премени́вый тле́нная и настоя́щая наде́ждею бу́дущих бла́г; ра́дуйся, дре́внему И́ову уподо́бивыйся терпе́нием; ра́дуйся, страстоте́рпче Христо́в непобеди́мый, но при́сно победи́вый диа́вола твои́м смире́нием; ра́дуйся, я́ко дре́вний о́н Ла́зарь ни́щий, ны́не почива́еши в не́дрех Авраа́млих; ра́дуйся, и́же по отше́ствии ми́ра сего́ су́щим в беда́х и искуше́ниих гото́в обрета́яйся предста́тель и засту́пник; ра́дуйся, везде́ призыва́ющия тя́ бы́стро предваря́яй, мо́лиши бо Христа́ Бо́га непреста́нно пода́ти грехо́в на́ших проще́ние.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Кре́постию возмо́г Живода́вца, плотско́е удержа́л еси́ жела́ние, пребога́те, и у́м возвы́сил еси́ на небе́сная, поя́ кре́пко: Сы́й благослове́н и препросла́влен.

Са́м неблагоро́ден сотвори́вся, благоро́дны нра́вы стяжа́л еси́ умо́м це́лым, поуче́нием же упражня́яся Богодохнове́нных писа́ний, все́ жела́ние твое́ к Бо́гу Всеви́дцу, блаже́нне, возложи́л еси́.

Го́рнее Ца́рство, вы́шний гра́д, Бо́жий ра́й, пра́ведных наслажде́ние и пи́щу несоде́янную, бога́тство некра́домое, Све́т невече́рний, обрести́ сподо́бился еси́, блаже́нне Проко́пие.

Богоро́дичен: Его́же породила́ еси́, Влады́чице, при́сно моли́, от рабо́ты изба́вити мя́ страсте́й, и осужде́ния, и стужа́ющаго ми́ лю́таго окамене́ния, и оскорбля́ющаго, Чи́стая, одержа́ния, Богора́дованная.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

О́гнь помышля́я стра́шный, пред престо́лом Христо́вым хотя́щ изы́ти, умиле́нием се́рдца те́плы пролива́еши пото́ки сле́зныя, погаша́я те́ми страсте́й пе́щь, Проко́пие богому́дре.

Любо́вию предложи́л еси́ твою́, му́дре, к Бо́гу ду́шу и к Тому́ прилепи́лся еси́, вопия́ пе́сненно: Христе́ мо́й, Ты́ ны́не мя́ изба́ви страсте́й смертоно́сных во ве́ки.

Терпе́нием пожда́тель и се́рдцем смире́н, ты́ ви́ден бы́л еси́, ми́лостив тре́бующим, обы́чай при́сно бла́г име́я и нра́в доброде́тельный, всече́стне, в ни́хже до́бре пожи́в, чуде́с то́чиши благода́ть.

Богоро́дичен: Ада́мов Соде́тель от крове́й Твои́х чи́стых зи́ждется и млеко́м пита́ется, пита́яй вся́ко дыха́ние, Де́во Богоро́дице. Те́м я́ко Ма́терь Тя́ Бо́жию прославля́ем.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Ви́дети жела́я сла́ву Бо́га на́шего, доброде́тельми богоразу́мия себе́ удобри́л еси́ и, свещу́ нося́, вше́л еси́ во све́тлый черто́г, со а́нгелы живы́й ясне́е наслажда́яся Божества́.

Я́ко у́треннее со́лнце, взы́де па́мять твоя́, су́щия во мра́це сердца́ просвеща́ющи: ты́ бо све́та и дне́ яви́лся еси́ вои́стинну сы́н, богому́дре Проко́пие, сего́ ра́ди тя́ почита́ем.

Му́дростию украша́яся и ра́зумом просвеща́яся, смире́нием се́рдца красу́яся, высото́ю жития́, досточу́дне, в разу́мныя дворы́ вше́л еси́, иде́же на́с помяни́, чту́щих тя́, блаже́нне Проко́пие.

Богоро́дичен: Све́та жили́ще, вся́ озари́вшаго, и се́нь ви́дена была́ еси́, Богоблагода́тная, мо́ст и ле́ствица, на высоту́ земны́я возводя́щи, Де́во, те́м Тя́ ублажа́ем и ве́рно велича́ем.

Свети́лен.

Удали́лся еси́, бе́гая мирска́го сожи́тельства, и Христу́, су́щему над все́ми Бо́гу на́шему, непоро́чным житие́м благоугоди́л еси́, всеблаже́нне Проко́пие. Его́же и ны́не моли́ о на́с, рабе́х твои́х, ве́рою пра́зднующих всечестну́ю па́мять твою́.

Богоро́дичен: Прему́дрость ипоста́сную, Сло́во О́тчее присносу́щное, врача́ челове́ком Христа́ ро́ждшая, Де́во Пречи́стая, я́звы и стру́пы се́рдца моего́ исцели́, лю́тыя и многовре́менныя, и страстна́я взыгра́ния утиши́ пло́ти моея́.