Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Благослове́нный Бо́же, в ми́р прише́дый, Его́же, кроме́ ино́го, не ча́ем, не посрами́ на́с от ча́яния на́шего, внегда́ призва́ти на́м о и́мени Твое́м и́мя свята́го Твоего́, призыва́вшаго Тя́ во и́стине, Дании́ла.

Возбрани́в се́рдцу твоему́ от вся́каго весе́лия, ничто́же восхоте́л еси́ на земли́, я́ко ра́дование се́рдца твоего́ бя́ху свиде́ния Госпо́дня; я́же да насле́дим и мы́, моли́твы твоя́ с на́шими моли́твами соедини́, блаже́нне.

Возжада́ Го́спода душа́ твоя́, преподо́бне, и не лиши́лся еси́ от жела́ния твоего́: ны́не бо насыща́ешися от пото́ка сла́дости Госпо́дни, во Све́те Его́ узре́в све́т. Го́споди, проба́ви ми́лость Твою́ и на́м, ве́дущим Тя́, моли́твами отца́ на́шего.

Богоро́дичен: И́щущии зла́я мне́ глаго́лют су́етная, врази́ же мои́ укрепля́ются па́че мене́, и умножа́ются ненави́дящии мя́ без пра́вды, сего́ ра́ди се́рдце мое́ смяте́ся толи́ко, я́ко оста́ви мя́ и си́ла моя́. Но, о всеблагомо́щная Цари́це! помози́ ми́, да, спасе́н бы́в Тобо́ю от ни́х, поучу́ся во оправда́ниих Сы́на Твоего́ вы́ну.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Тве́рдым позна́нием Ева́нгельския и́стины име́яй препоя́санны чре́сла твоя́, свиде́тельствовался еси́ бы́ти ве́рен о мно́зех, служи́тель Христо́в, утверди́ и на́с в до́бром по́двизе, придержа́щихся спасе́ния, твои́ми моли́твами, преподо́бне.

Оболки́йся в броня́ пра́вды, я́же о Христе́, име́л еси́ добру́ со́весть, и, прие́м дерзнове́ние к Бо́гу, да приступа́ют и вси́ ве́рнии со дерзнове́нием ко престо́лу благода́ти, тайново́дствовал еси́ и уче́нии, и моли́твами твои́ми, блаже́нне.

Над все́ми благи́ми де́лы восприя́вшу тебе́ щи́т ве́ры, ничто́же возмого́ша стре́лы лука́ваго разжже́нныя, и, шле́м спасе́ния восприя́в, наде́ждно утверди́лся еси́ на ка́мени испове́дания Христо́ва; помяни́ и на́с, смире́нных и коле́блемых, блаже́нне, да обря́щем утеше́ние.

Богоро́дичен: Что́ стужа́еши ми́, душе́ моя́, я́ко оте́ц мо́й и ма́ти моя́ оста́виста мя́? И по сему́ зна́мению, а́ки отринове́н, преврати́хся па́сти, вои́стинну не́си си́ра и отринове́на, и́бо отца́ и́маши Бо́га, ма́терь же — Ро́ждшую Его́. Благоутро́бием Ея́ гряди́ ко Христу́, и Госпо́дь восприи́мет тя́.

Седа́лен, гла́с 2:

Потща́вся себе́ иску́сна поста́вити пред Го́сподем де́лателя непосты́дна, после́довал еси́ блаже́ннаго Па́вла уче́нию, житию́, приве́ту, ве́ре, долготерпе́нию, любви́, терпе́нию. И си́це на вся́кое де́ло благо́е угото́ван, я́ко свети́льник, поста́вился еси́ на све́щнице, да, тобо́ю освеща́еми, мно́зи на пу́ть спасе́ния наста́вятся. Помоли́ся и о на́с, о́тче преподо́бне, да да́ст и на́м Бо́г приити́ в покая́ние и в ра́зум и́стины.

Богоро́дичен: В со́бственный вертогра́д вше́д, в Тя́, Пресвята́я Де́во, восприя́т Себе́ пло́ть от Тебе́, со благоуха́нием Божества́ соедине́нную, Сы́н Тво́й, Сло́во, и бы́сть Богочелове́к. Моли́ Его́ бла́гость, да всели́тся и в на́с, творя́ сердца́ на́ша благоуха́ние Бо́гови в спаса́емых, да бу́дем и мы́ воня́ живо́тная в живо́т.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Услажда́я ду́шу твою́ слова́ми зако́на Госпо́дня, не удержа́л стремле́ния твоего́ к благоче́стию, но, и́мже о́бразом жела́ет еле́нь на исто́чники водны́я, бы́стро те́кл еси́, вопия́: си́це жела́ет душа́ моя́ к Тебе́, Бо́же. Ча́сти с тобо́ю име́ти и на́м, твои́м ча́дом, моли́ся, о́тче на́ш Дании́ле.

Чистото́ю и любо́вию бы́л еси́, я́ко хле́б, сла́док Го́сподеви, ходя́ бо досто́йне Бо́гу во вся́ком угожде́нии, досто́йно жи́тельствовал еси́ благовествова́нию Христо́ву, да и мы́ во вся́ком де́ле бла́зе преуспе́ем, предста́тельствуй твои́ми моли́твами, о́тче на́ш преподо́бне.

Ви́ждь, уго́дниче Христо́в, смире́ние на́ше, я́ко возвели́чися вра́г, ища́й поги́бели на́шея, сего́ ра́ди и ро́в изры́, и ископа́ и́; ты́ помоли́ся, да Госпо́дь разори́т сове́т его́, и впаде́т в я́му, ю́же соде́ла.

Богоро́дичен: Не́сть ми́ ослабле́ния, зане́ не сотвори́х во́ли Сы́на Твоего́ и не сохрани́х повеле́ний Его́, и ны́не приклони́ ми́ у́хо Твое́ в покая́нии, тре́бующему бла́гости, Ма́ти Бо́жия, да не осу́дит мя́ Судия́ Пра́ведный в преиспо́дних земли́: на Тя́ бо упова́ю, о Предста́тельнице моя́!

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Весели́лся еси́ о ре́кших ти́: в до́м Госпо́день по́йдем, иде́же, благочи́нно предстоя́, воздава́л еси́ Вы́шнему моли́твы твоя́ за вся́ челове́ки, я́же и мно́го можа́ху, я́ко пра́веднаго. Поспешеству́й о́ными и на́м, огражда́я на́с от губи́теля, ловя́щаго ду́ши на́ша, блаже́нне.

Жи́в ве́рою Иису́с Христо́вою, не свои́х си́ иска́в, но я́же Христа́ Иису́са, пости́гнул еси́ в житие́ на небесе́х, иде́же водворя́яся со Христо́м, помина́й на́с, да и мы́, теку́ще, пости́гнем, о́тче на́ш Дании́ле.

Жела́ние име́яй соедини́тися с Го́сподем, рабо́тал еси́ Ему́ во и́стине и все́м се́рдцем твои́м и, си́це прилепля́яся Го́сподеви, еди́н ду́х бы́л еси́ с Го́сподем, дне́сь же лице́м к лицу́ зря́ Его́, покажи́ на́с прича́стники Боже́ственнаго лицезре́ния, приснопа́мятне.

Богоро́дичен: Бо́же Спаси́телю мо́й! коли́ко е́сть дне́й раба́ Твоего́? когда́ уте́шиши мя́? и сотвори́ши ми́ от гоня́щих мя́ су́д? Се́ бо, обыше́дше, обыдо́ша мя́ и́же искони́ человекоуби́йцы врази́, на мя́ вся́ помышле́ния и́х на зло́. Удержи́ и́х стремле́ние, сокруши́ че́люсти, да, прии́м от ни́х свобо́ду, сохраню́ за́поведи Твоя́, Тя́ с Ро́ждшею при́сно велича́я.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Серде́чную возлюби́в пра́вость, ми́р име́л еси́ и святы́ню со все́ми, те́м ублажи́вся, узре́л еси́ Бо́га, Его́же Све́т присносу́щный да возсия́ет и на́м, помоли́ся, преподо́бне.

Ве́рою во Христа́ дела́, я́же О́н сотвори́, и ты́ сотвори́л еси́, умно́жив иногда́ хле́бы, блаже́нне, зане́ ми́лостив и сострада́телен бы́в, а́лчущия пита́л еси́, и ны́не милосе́рдуй о наро́дех, предстоя́щих и и́щущих Го́спода, да не лиша́тся вся́каго бла́га.

Кро́тких зе́млю и смире́нных благода́ть насле́довал еси́, го́рдости и тщесла́вия вся́чески удаля́яся, и бы́вшу ти́ восприе́мником ча́д вели́каго кня́зя, я́ко и́стинный учени́к Иису́са Христа́ к бога́тству не прилага́л еси́ се́рдца, но во́льною нището́ю благоугожда́л еси́ пред Ни́м во вся́ дни́ живота́ твоего́, о́тче на́ш Дании́ле.

Богоро́дичен: Сы́н Тво́й, Влады́чице, прише́д, не́мощи на́ша понесе́ и печа́ли преложи́ на ра́дость: Жениху́ бо прису́щу все́м ра́доватися досто́ит, и никому́же пла́кати, сея́ ра́дости плоды́ вкуша́ют ве́рующия в Него́. О́ная чрез печа́ль ве́ка сего́ да не во́змется от на́с, исто́ргни небреже́ние от серде́ц на́ших, Ма́ти Бо́га Вы́шняго.

Конда́к, гла́с 1:

От позна́ния себе́ прише́д в позна́ние Бо́га и благоче́стием к Нему́ восприи́м нача́ло чу́вства вну́тренняго, ра́зум сво́й плени́л в послуша́ние ве́ры; те́м и, по́двигом до́брым подвиза́вся, дости́гнул еси́ в ме́ру во́зраста соверше́нна исполне́ния Христо́ва, я́ко Бо́жие тяжа́ние, Бо́жие зда́ние, де́лал еси́ бра́шно, не ги́блющее, но бра́шно, пребыва́ющее в живо́т ве́чный. Да бу́дут единоду́шно вси́ насажде́ние Госпо́дне в сла́ву, моли́, блаже́нне, Еди́наго Человеколю́бца Бо́га.

И́кос:

Сла́вен еси́ вои́стинну, и тебе́ похвала́ не от челове́к, но от Бо́га, челове́к бо бы́в, по челове́ку не ходи́л еси́, но, я́ко слуга́ Христо́в, не ду́ха ми́ра сего́ прие́м, но Ду́ха, И́же от Бо́га; не соизво́лил еси́ о я́стии, или́ питии́, или́ оде́жде язы́ков попече́нию, благоволи́в же па́че иска́ти Ца́рствия Бо́жия и пра́вды Его́, вше́л еси́ в живо́т ве́чный, и на́м во е́же насле́дити о́ный, моли́, блаже́нне, Еди́наго Человеколю́бца Бо́га.

Пе́снь 7.

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Всегда́ имы́й па́мять Христо́вых пресвяты́х страсте́й, в ту́южде мы́сль вооружа́лся еси́ изволе́нием, во е́же после́довати стопа́м Его́. И на́м па́мять сию́ в се́рдце и во уме́ на́шем водруже́нну име́ти, моли́ пострада́вшаго за ны́ Христа́, о́тче Дании́ле.

Христо́с пре́дан, я́звен и му́чен бы́сть за беззако́ние на́ше. Ты́, приобща́яся Христо́вым страсте́м, всегда́ ме́ртвость Го́спода Иису́са в те́ле свое́м носи́л еси́, и ны́не, просла́вився с Ни́м, умертви́ на́ши стра́сти, свя́те, твои́ми моли́твами.

Христо́с воста́ за оправда́ние на́ше, да ве́ра на́ша и упова́ние бу́дет на Бо́га, сия́ обоя́, а́ки ко́тву, име́в души́, тве́рду же и изве́стну, пресели́лся еси́, иде́же и Предте́ча о на́с вни́де Иису́с, да та́мо и мы́ предста́нем Ему́ в ра́дости, помяни́ на́с, блаже́нне Дании́ле.

Богоро́дичен: Свята́я Мари́е, Ма́ти Бо́га Вы́шняго, мы́ еще́ в се́м ми́ре, во зле́ лежа́щем, есмы́ и сего́ ра́ди вне́ стои́м, хотя́ще вни́ти вну́трь черто́га небе́снаго. По отше́ствии на́шем от те́ла благоволи́ на́м ви́дети неизрече́нную красоту́ Сы́на Твоего́.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Присво́ився Христу́ чрез ве́ру, преподо́бне, не повину́лся еси́ пло́ти, но, распя́в ю́ со страстьми́ и похотьми́ и к до́брым дела́м устреми́вся, собо́ю и ины́х учи́л еси́ Христу́ вопи́ти: Тя́ превозно́сим во вся́ ве́ки.

Ходи́в ду́хом, плоды́ духо́вныя вкуша́я, блаже́нне, и си́х наслажда́яся, неукло́нно взира́л еси́ на Нача́льника ве́ры и Соверши́теля Иису́са, те́м и благода́рственно к Нему́ взыва́л еси́: Тя́ превозно́сим во вся́ ве́ки.

Упова́нием объе́мь благода́ть Бо́жию, за основа́ние о́наго положи́в заслу́ги Христо́вы и богоуго́дно управля́я жи́знь твою́ творе́нием добра́, Христу́ ра́достно воспева́л еси́: Тя́ превозно́сим во вся́ ве́ки.

Богоро́дичен: Тобо́ю, Пресвята́я Де́во, И́же во о́бразе Бо́жии Сы́й к на́м прии́де, и, де́лав дела́ посла́вшаго Его́, у́мре гре́х на́ших ра́ди, и воста́ в тре́тий де́нь, по Писа́нием, Тя́ показа́в Предста́тельницу о на́с, превознося́щих Его́ во вся́ ве́ки.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Единоро́дному Сы́ну, су́щему в ло́не О́тчи, послужи́л еси́, сего́ ра́ди почте́ тя́ Оте́ц Небе́сный, оби́тель у тебе́ сотвори́в с Ни́м и Пресвяты́м Ду́хом, и ны́не у́бо предстоя́ Единосу́щней Тро́ице, све́том твои́х моли́тв разжени́ мра́к страсте́й от серде́ц на́ших, преподо́бне.

Мзда́ твоя́ мно́га на небесе́х, я́ко возлюби́л еси́ мно́го, мно́гими скорбьми́ восходя́ к Бо́гу, к Нему́же и прибли́жився, призира́й на лю́ди, тре́бующия от Бо́га ми́лости, блаже́нне.

О́тче блаже́нне Дании́ле! Се́ твое́ оте́чество, в не́мже воспита́лся еси́. Се́ оби́тель твоя́, в не́йже преподо́бно пожи́в, многотру́дным твои́м те́лом свя́то почива́еши. А мы́, твои́ ча́да, к тебе́ приве́ржены есмы́: не отступа́й от гра́да, и от на́с, я́ко твое́й ча́сти, и от призыва́ющих и́мя твое́, поле́зная все́м хода́тайствуя у Всеми́лостиваго Спа́са Христа́.

Богоро́дичен: А́ще мно́го мо́жет моли́тва пра́веднаго поспешеству́ема, Ты́, святе́йша су́щи всея́ тва́ри, я́ко Ма́терь Бо́гу, несравне́нно мо́жеши. При́зри на ны́ с преподо́бным Дании́лом и испроси́ Благочести́вейшему Самоде́ржцу на́шему и всему́ насле́дию Его́ вся́ блага́я от Бо́га: се́ бо мы́ к Тебе́ по Бо́зе, я́ко еди́ной наде́жде, прибега́я, во все́х напа́стех ра́дости и утеше́ния от Тебе́ упова́ем.

Свети́лен:

Человеколю́бием подража́я Тови́ту, погребе́нию стра́нных прилежа́л еси́, о́тче Дании́ле. Попецы́ся и о на́ших душа́х, мо́лим тя́, преподо́бне, да не бу́дут в попра́ние велиа́ру, и́щущему поглоти́ти и низвести́ в бе́здну поги́бели, иде́же никто́же испове́стся Бо́гу на́шему.