Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Твоя́ похвалы́ хотя́щему нача́ти, Ефре́ме, моли́твами свои́ми посли́ ми́ благода́ть Ду́ха, стра́сти души́ и телесе́ очища́ющую и у́м просвеща́ющую, я́ко да, ра́дуяся, воспою́ твоя́ по́двиги, преподо́бне.

Просвеще́нием Трисо́лнечнаго Божества́ озари́вся, прему́дре, свети́льник светоза́рный яви́лся еси́, просвеща́яй ве́рою чту́щих светоно́сную па́мять твою́.

Ве́сь Тро́ицы бы́в жили́ще, та́мо все́ душе́вное жела́ние возложи́л еси́, преподо́бне. Сего́ ра́ди безсме́ртную восприя́л еси́ па́мять и жи́знь неконча́емую.

Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на и пло́тию родила́ еси́: И́же из Отца́ без ма́тере, на́с же ра́ди из Тебе́ без отца́.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Напо́лнив се́рдце свое́ сле́зными пото́ки, преподо́бне Ефре́ме, плодоно́сно вся́ких доброде́телей соде́лал еси́ то́, износя́щее чуде́с твои́х показа́ние, преблаже́нне.

Ны́не, преподо́бне о́тче Ефре́ме, с ли́ки проро́ков, и апо́столов, и му́чеников, преподо́бных же и пра́ведных во све́те Святы́я Тро́ицы соводворя́яся, помина́й ча́д свои́х, ве́рно творя́щих па́мять твою́.

Воздержа́нием кра́йним пло́ть свою́ умертви́л еси́, преподо́бне Ефре́ме. Сего́ ра́ди, Ду́хом Боже́ственным окрили́вся, дости́гл еси́ священнонача́льных служи́телей, иде́же небе́сных Бо́жиих безпло́тных ра́дования.

Богоро́дичен: Неора́нныя ни́вы бразда́ яви́лася еси́, Кла́с живо́тный ро́ждшая и все́м причаща́ющимся безсме́ртию Хода́тая, во святы́х Свята́го и на святы́х Почива́ющаго.

Седа́лен, гла́с 4:

Страстно́е покори́л еси́ плотско́е мудрова́ние и ху́ждшее порабо́тил еси́ лу́чшему, о́тче Ефре́ме пресла́вне, сокруши́л еси́ бесо́вския ко́зни посто́м и возсия́л еси́ в ми́ре, я́ко луча́ со́лнечная, сия́нии твои́х доброде́телей. Сего́ ра́ди тя́ воспева́ем.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Житие́ твое́, о́тче Ефре́ме, чу́дно на земли́ показа́л еси́, вели́кое поще́ние и смире́ние, сего́ ра́ди на небесе́х жи́знь ве́чную насле́довал еси́, моли́ спасти́ся от бе́д пою́щим тя́.

Посто́м и моли́твами те́ло твое́, о́тче Ефре́ме, изнури́л еси́, сего́ ра́ди сподо́бился еси́ ви́дети неизрече́нная блага́я, я́же святы́м угото́вана, с ни́миже, о́тче, о на́с моли́ся.

Ду́ху Пресвято́му хра́м, о́тче, бы́л еси́, и живо́тных во́д река́ наполня́ема, и основа́ние Це́ркве непоколеби́мо, и и́ночествующих утвержде́ние, Ефре́ме преподо́бне.

Богоро́дичен: Покро́в, и заступле́ние, и прибе́жище бу́ди ми́, Де́во, рабу́ Твоему́, и исцели́ мя́, Влады́чице, от безме́рных зо́л мои́х воспева́ти Тя́, Пречи́стая: сла́ва Рождеству́ Твоему́.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Я́ко преоби́дев тле́нная, ве́чная, о́тче, восприя́л еси́ по нело́жному словеси́: проси́те и прии́мете. Те́мже, я́ко проси́л еси́, сия́ по досто́инству прия́л еси́.

Ме́сто, е́же сподо́бися прия́ти честны́я мо́щи твоя́, преподо́бне, освяти́ся и по мно́гим страна́м прославля́емо е́сть, я́ко в себе́ мо́щи твоя́ иму́щее.

Исцеле́ния соде́ловают честны́я мо́щи твоя́, Ефре́ме, и отго́нят разли́чныя неду́ги от челове́к, и укрепля́ют у́м и́х восхвали́ти труды́ твоя́, всече́стне.

Богоро́дичен: Христа́ на́м ро́ждшая, Пречи́стая Де́во, Богора́дованная Влады́чице, спаси́ гра́д и лю́ди, на Тя́ упова́ющия, Богоро́дице Всенепоро́чная.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Моли́твами предваря́я к Бо́гу и Тому́ предстоя́ со а́нгелы, за ве́сь ми́р помоли́ся, бра́нь неприя́зненну всю́ду потреби́ти и побе́ду изве́стну да́ти на супоста́ты Благове́рному Импера́тору на́шему.

Гро́б честна́го твоего́ телесе́ показа́л еси́ ве́рным лю́дем душа́м освяще́ние, телесе́м здра́вие и от страсте́й избавле́ние: от твои́х бо моще́й исцеле́ния почерпа́ем.

Глаго́лов и зако́нов Влады́чних испо́лнитель бы́в, испо́лнился еси́, преподо́бне о́тче Ефре́ме, Боже́ственных даро́в. Те́м и чуде́с лучи́ все́м испусти́л еси́.

Богоро́дичен: Изсуши́вшая сады́ безбо́жных люде́й, Пренепоро́чная Де́во, Свои́м Прозябе́нием, прозя́бшую во мне́ зло́бу искорени́, Богоневе́сто.

Конда́к, гла́с 8:

Я́ко богоявле́нная Росси́йская звезда́, дне́сь сия́я чудесы́, яви́лся еси́, преподо́бне о́тче Ефре́ме. Те́м не преста́й моля́ся о ста́де свое́м, сохраня́яй оте́чество твое́, гра́д же и лю́ди, и́же тебе́ ве́рою почита́ющих и к честны́м моще́м твои́м усе́рдно притека́ющих, да велегла́сно тебе́ вопие́м: ра́дуйся, богому́дре Ефре́ме, о́тче на́ш.

И́кос:

Я́ко свети́льник всесве́тлый и во пло́ти а́нгел, яви́лся еси́, преподо́бне, и, я́ко живота́ дре́во ра́йское, ве́рою бы́в возраща́емь, поще́нием и моли́твами свои́ми процве́л еси́. Сего́ ра́ди небе́сную благода́ть прии́м, вра́чь изря́дный боля́щим показа́лся еси́. Исцеля́еши бо телеса́ неду́жных и ду́ши ве́рою притека́ющих к ра́це моще́й твои́х. Те́м, мо́лимся, моли́ся о ста́де свое́м и сохраня́й оте́чество свое́, гра́ждан же и лю́ди, да зове́м ти́: ра́дуйся, преподо́бне Ефре́ме, о́тче на́ш.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Приле́жныя моли́твы, по́двиги же и труды́ твоя́ почита́юще, сла́дости уче́ния твоего́ почерпа́ем, преподо́бне о́тче Ефре́ме, и́мже и научи́л еси́ воспева́ти Триипоста́сное Существо́: оте́ц на́ших Бо́же, благослове́н еси́.

Чу́дно житие́ твое́ и кончи́на безсме́ртна, преподо́бне о́тче Ефре́ме. Сего́ ра́ди тя́ Христо́с свы́ше украси́ венце́м пресве́тлым и чуде́с дея́нием обогати́, и́миже просвеща́еши на́с, науча́я вопи́ти: благослове́н Бо́г оте́ц на́ших.

Яви́лся еси́ гра́ду на́шему, Ефре́ме богоблаже́нне, сто́лп непоколеби́м, стена́ неруши́мая, вели́кое избавле́ние от бе́д и исто́чник благода́ти неоску́дный, подаю́щи все́м исцеле́ние, зову́щим при́сно: оте́ц на́ших Бо́же, благослове́н еси́.

Богоро́дичен: Без се́мене О́тчею во́лею заче́нши Творца́ все́х, Христа́ Бо́га, неизрече́нно родила́ еси́, Его́же моли́, я́ко дерзнове́ние иму́щи к Нему́, да ны́ спасе́т, вопию́щих Ему́: Бо́же, благослове́н еси́.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Любо́вию и ве́рою чту́ще па́мять твою́, приле́жно мо́лим тя́, преподо́бне о́тче Ефре́ме: непреста́нно за ны́ Христа́ Бо́га моли́ вку́пе с Рома́ном и Дави́дом, непра́ведное заколе́ние любве́ ра́ди Бо́жия претерпе́вшими, и́мже и хра́м че́стен воздви́гл еси́ во сла́ву Христа́ Бо́га, поя́ при́сно: вся́ дела́ Госпо́дня, Го́спода по́йте и превозноси́те Его́ во ве́ки.

Лику́ют на небесе́х чи́нове а́нгельстии, блаже́нне Ефре́ме, и ве́рных собо́ри на земли́ твою́ па́мять похваля́ют, пою́ще: благослови́те, вся́ дела́ Госпо́дня, Го́спода.

Помоли́ся Христу́ Бо́гу, всеблаже́нне Ефре́ме, о приходя́щих к тебе́ с ве́рою и хотя́щих от тебе́ почерпсти́ исцеле́ния неоску́днаго и благода́ти, пою́щих: благослови́те, вся́ дела́ Госпо́дня, Го́спода.

Богоро́дичен: Из пречи́стаго Твоего́ чре́ва, Богома́ти Влады́чице, небе́снаго дождя́ Ка́пля на́м ука́ну на омове́ние скве́рн душе́вных, на здра́вие телесе́м и на прогна́ние лука́вых духо́в. Те́мже Тя́ блажи́м, Чи́стую, во ве́ки.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

На земли́, я́ко а́нгел, пожи́л еси́ пло́тию и, я́ко безпло́тен, безпло́тныя враги́ под но́зе свои́ покори́л еси́, чистоту́ стяжа́в посто́м и моли́твами. Те́м ны́не со а́нгелы на небесе́х све́тло лику́я, за ны́ Христо́ви помоли́ся.

Ны́не вхо́дят во святы́й хра́м се́й ца́рие и кня́зи, бога́тии же и убо́зии, и́же вси́, припа́дающе к честны́м моще́м твои́м, про́сят от тебе́ получи́ти здра́вие телесе́м и спасе́ние душа́м твои́ми к Бо́гу моли́твами.

Ны́не у́бо помоли́ся Го́споду, всечу́дне Ефре́ме, я́ко да прикоснове́нием свяще́нных моще́й твои́х слепи́и восприи́мут прозре́ние, хроми́и хожде́ние и неду́жнии вси́ здра́вие и исцеле́ние твои́ми к Бо́гу моли́твами.

Богоро́дичен: Я́же все́ми влады́чествующая тва́рьми, лю́дем Твои́м да́руй побе́ду и одоле́ние, непокори́выя враги́ покоря́я под но́зе Ве́рному Импера́тору на́шему, да Тя́ вси́ я́ко Богоро́дицу велича́ем.

Свети́лен:

Мирска́го пристра́стия, я́ко от скве́рны, уклони́вся, а́лчбою и жа́ждою пло́ть свою́ увяди́л еси́, о́тче. Те́м небе́сною сла́вою со а́нгелы обогати́лся еси́, с ни́миже непреста́нно моли́ о на́с Христа́ Бо́га, преподо́бне Ефре́ме.