Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀, фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Ра́зꙋмомъ бж҃е́ственнымъ ѡ҆заре́нъ, бг҃омꙋ́дрыхъ дарѡ́въ сподо́билсѧ є҆сѝ, дꙋхѡ́въ различе́нїѧ и҆ сло́ва бж҃їѧ разꙋмѣ́нїѧ, тѣ́мже вои́стиннꙋ є҆сѝ да́рꙋ бж҃е́ственномꙋ тезоимени́тъ.

Оу҆вѣ́дѣвый, ꙗ҆́кѡ лю́дїе сра́мнѡ живꙋ́тъ, и҆ ви́дѣвый, ꙗ҆́кѡ неꙋгото́вани ᲂу҆мира́ютъ, возжела́лъ є҆сѝ всѣ́мъ житїе́мъ свои́мъ себѐ ѡ҆пла́кати и҆ по всѧ̑ дни̑ мы́сленнѣ ᲂу҆мира́ти, да бг҃ꙋ ᲂу҆го́денъ бꙋ́деши.

Разсꙋди́лъ є҆сѝ, бг҃омꙋ́дре, ꙗ҆́кѡ лꙋ́чше є҆́сть тѣле́снѣ а҆лка́ти и҆ жа́ждати, дꙋхо́внѡ же ᲂу҆тѣша́тисѧ дх҃омъ ст҃ы́мъ, и҆ въ де́брѣхъ лесѡ́въ помо́рскихъ ке́ллїю пꙋсты́ннꙋю ѡ҆брѣ́лъ є҆сѝ.

Бг҃оро́диченъ: Мі́ра бѣ́гаѧ, мїролю́бцєвъ ѕлоко́зненныхъ ме́сти не и҆збѣжа́лъ є҆сѝ, чꙋ́домъ то́чїю не бы́лъ и҆́ми ᲂу҆мерщвле́нъ. Спасе́нъ же бы́сть взбра́нною воево́дою, хранѧ́щею и҆збра̑нныѧ своѧ̑. Взыва́лъ бо є҆сѝ къ не́й: въ ско́рбехъ спаси́ мѧ̀.

Пѣ́снь г҃.

І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.

Оу҆клони́всѧ ѿ ѕла̀, блаже́нне, ѿ ды́шꙋщихъ на тѧ̀ ᲂу҆бі́йствомъ и҆ ѕло́бою, вои́стиннꙋ сотвори́лъ є҆сѝ бла́го, хрⷭ҇то́вꙋ бо за́повѣдь и҆спо́лнилъ є҆сѝ.

Де́монскꙋю ѕло́бꙋ посрами́лъ є҆сѝ неѕло́бїемъ свои́мъ, пꙋстыннолю́бче, се́ бо въ площа́нскꙋю ѻ҆би́тель ᲂу҆дали́всѧ и҆ па́ки въ леснꙋ́ю ча́щꙋ всели́всѧ, ᲂу҆тверди́лсѧ є҆сѝ въ спаси́тельнѣмъ смиренномꙋ́дрїи.

Гдⷭ҇ь, и҆спытꙋ́ѧй ра̑бъ свои́хъ, въ жите́йстѣмъ мо́рѣ восхотѣ̀ и҆скꙋси́ти ѿше́льника, ꙗ҆́кѡ зла́то въ горни́лѣ ѡ҆чища́ѧ тѧ̀ ѿ спѧ́щихъ страсте́й и҆ ᲂу҆мꙋдрѧ́ѧ ꙗ҆́кѡ и҆збра́нника своего̀, па́стырѧ бꙋ́дꙋщаго и҆ ко́рмчаго.

Бг҃оро́диченъ: Моли́лсѧ є҆сѝ мт҃ри бж҃їей, ѡ҆жида́ѧ сꙋда̀ цр҃и́цы: и҆з̾ темни́цы черто́гѡвъ ца́рскихъ и҆зведи́ мѧ цѣ́ла, въ черто́гъ же бра́чный твоегѡ̀ сн҃а введѝ ѡ҆бнища́вшꙋю мою̀ дꙋ́шꙋ.

Сѣда́ленъ, гла́съ г҃:

Хрⷭ҇то́вою любо́вїю разгоре́сѧ се́рдце твоѐ, преподо́бне ѳео́дѡре, ѿ полноты́ же є҆гѡ̀ возглаго́лалъ є҆сѝ и҆ ᲂу҆сты̀, дх҃омъ ст҃ы́мъ наставлѧ́лъ є҆сѝ вопроша́ющихъ ѡ҆ спасе́нїи дꙋшѝ, стезе́ю пра́вою ᲂу҆че́нїѧ ст҃ы́хъ ѻ҆тє́цъ ше́ствовати, благопокорѧ́тисѧ ста́рцємъ богомꙋ̑дрымъ ᲂу҆вѣщава́лъ є҆сѝ, ѿложи́тисѧ дѣ́лъ сꙋ́етныхъ и҆ по́мыслѡвъ ло́жныхъ назида́лъ є҆сѝ, смиренномꙋ́дреннѣ спаса́тисѧ ѡ҆ гдⷭ҇ѣ благословлѧ́лъ є҆сѝ, и҆ та́кѡ подо́бно свѣти́льникꙋ, во тьмѣ̀ невѣ́дѣнїѧ сѣдѧ́щымъ свѣтѧ́щемꙋ, просїѧ́лъ є҆сѝ. Тѣ́мже моли́сѧ за ны̀ къ цр҃ю̀ нбⷭ҇номꙋ, да просвѣти́мсѧ и҆ мы̀ є҆гѡ̀ благода́тїю.

Сла́ва, и҆ ны́нѣ, бг҃оро́диченъ: Мт҃и бж҃їѧ, застꙋ́пничество твоѐ всеспаси́тельное мі́рꙋ до́льнемꙋ съ небесѐ ꙗ҆влѧ́ющаѧ, не ѡ҆ста́ви на́съ, во грѣсѣ́хъ погиба́ющихъ, не ѿврати́сѧ ѿ на́съ, гдⷭ҇а милосе́рднаго прогнѣвлѧ́ющихъ, є҆го́же молѝ и҆зба́витисѧ на́мъ всѧ́кагѡ недоꙋмѣ́нїѧ и҆ и҆збѣ́гнꙋти дꙋшепа́гꙋбнагѡ заблꙋжде́нїѧ, и҆спросѝ на́мъ ᲂу҆миле́нїе серде́чное и҆ ѡ҆ грѣсѣ́хъ сокрꙋше́нїе, ꙗ҆́кѡ предста́тельница на́ша крѣ́пкаѧ и҆ помо́щница ско́раѧ.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щьсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и.

Ви́дѣвши тѧ̀ всерѡссі́йскаѧ і҆мператрі́ца и҆ словеса̀ твоѧ̑ слы́шавши, растворє́нныѧ благода́тїю, разꙋмѣ̀ не своего̀ ᲂу҆жѐ во́ина, но раба̀ і҆и҃съ хрⷭ҇то́ва, и҆ всели́ тѧ, ꙗ҆́кѡ да́ръ бж҃їй, въ сла́внꙋю не́вскꙋю ла́ѵрꙋ.

Воста́нїе пло́ти сокрꙋше́нїемъ серде́чнымъ препобѣди́лъ є҆сѝ, ѻ҆́гнь же бѣсо́вскїй тѣле́снагѡ разжже́нїѧ ᲂу҆гаси́лъ є҆сѝ пото́ками сле́зъ, и҆́миже потреби́сѧ въ тебѣ̀ всѧ́кое страсте́й те́рнїе.

Зерца́ломъ благода́тнагѡ ѡ҆сїѧ́нїѧ бж҃е́ственныѧ сла́вы ꙗ҆ви́лсѧ є҆сѝ, сами́мъ гдⷭ҇емъ пред̾ѡчище́нный до́брый дѣ́лателю вїногра́да є҆гѡ̀. Къ тебѣ́ бо ста́ша прибѣга́ти дꙋхо́внѡ а҆́лчꙋщїи и҆ жа́ждꙋщїи.

Бг҃оро́диченъ: Твоѧ̀, бцⷣе, препобѣди́тельнаѧ десни́ца дѣ́вствꙋющихъ ѿ помраче́нїѧ ѡ҆гражда́етъ, безчи́нства пло́ти ᲂу҆тиша́етъ, вѣнце́мъ нетлѣ́нїѧ цѣломꙋ́дренныхъ ᲂу҆краша́етъ.

Пѣ́снь є҃.

І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀ ѿ но́щи невѣ́дѣнїѧ приведе́нїе и҆́мамы.

Проси́лъ є҆сѝ въ моли́твахъ твои́хъ і҆и҃са сло́во бж҃їе, да просвѣти́тъ ᲂу҆́мъ тво́й разꙋмѣ́ти писа́нїе, дабы̀ всѣ̑мъ во спасе́нїе трꙋжда́ющымсѧ предлага́ти дꙋшеполе́зное наставле́нїе, грѣхми́ же ѡ҆бременє́ннымъ подава́ти рѣше́нїе благода́тное.

Златоꙋ́стовымъ сло́вомъ ѿ гдⷭ҇а і҆и҃са вразꙋмле́нный и҆ наста́вленный, дарова́нїемъ дꙋхо́внагѡ разсꙋжде́нїѧ и҆ ᲂу҆чи́тельства ѿ дх҃а ст҃а ѡ҆благода́тствованный, ѡ҆кормлѧ́лъ є҆сѝ люде́й мно́жество, ка́кѡ бг҃ꙋ ᲂу҆годи́ти и҆́щꙋщихъ.

Внима́нїѧ ца́рскагѡ бѣ́гаѧ и҆ за́висти бра́тскїѧ, наипа́че же и҆ща̀ сꙋро́вагѡ и҆ ᲂу҆добоспаси́тельнагѡ житїѧ̀, пресели́лсѧ є҆сѝ въ пꙋсты́ню саро́вскꙋю, є҆ѧ́же мона́си сла́вилисѧ сꙋ́ть подви́жничествомъ свои́мъ и҆ свѧ́тостїю.

Бг҃оро́диченъ: За любо́вь твою̀ соверше́ннꙋю, ѳео́дѡре, блаже́ннымъ и҆збра́нникомъ свои́мъ ꙗ҆ви́ тѧ̀ мт҃рь бж҃їѧ, се́ бо водвори́лсѧ є҆сѝ со ᲂу҆ченики̑ твои́ми въ пꙋ́стынь разоре́ннꙋю, ржⷭ҇твꙋ̀ пречⷭ҇тыѧ посвѧще́ннꙋю, и҆ є҆ѧ́же ра́ди славле́нїѧ возроди́лъ є҆сѝ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Просїѧ́лъ є҆сѝ во ѻ҆би́тели санаѯа́рстѣй сїѧ́нїемъ сла́вы благода́тнагѡ ста́рчества, наставлѧ́ѧ, врачꙋ́ѧ, ᲂу҆тѣша́ѧ и҆ ᲂу҆крѣплѧ́ѧ бг҃омꙋ́дрымъ сло́вомъ и҆ совѣ́томъ свои́мъ всѣ́хъ сѣ́мѡ притека́ющихъ.

Сы́нꙋ даві́довꙋ храмозда́тельствомъ ᲂу҆подо́билсѧ є҆сѝ, премꙋ́дре, въ ѡ҆снова́нїе же це́ркве ржⷭ҇тва̀ бцⷣы зла́то моли́твъ свои́хъ и҆ ка́мєни драгоцѣ̑нныѧ благослове́нїѧ бж҃їѧ положи́лъ є҆сѝ.

Пче́лъ ро́й на мѣ́сто го́рнее ѻ҆лтарѧ̀ бꙋ́дꙋщагѡ возсѣ́лъ є҆сѝ, зна́менꙋѧ во ѻ҆би́тели твое́й, преподо́бне, мона́хѡвъ ᲂу҆множе́нїе и҆ па́че со́тъ ме́да сладча́йшїѧ блгⷣти бж҃е́ственныѧ на ню̀ и҆злїѧ́нїе.

Бг҃оро́диченъ: Ꙗ҆́кѡ пчели́ный ро́й цари́цею и҆ ма́терїю свое́ю ѡ҆кормлѧ́етсѧ, та́кѡ и҆ ѻ҆би́тель санаѯа́рскаѧ и҆́мать мт҃рїю свое́ю цр҃и́цꙋ нбⷭ҇нꙋю, є҆́юже пꙋтево́дствꙋетсѧ, ю҆́же сла́витъ, є҆́йже моли́твеннѡ пое́тъ хвалꙋ̀.

Конда́къ, гла́съ в҃:

Мі́ра сꙋетꙋ̀ и҆ всѧ̑ ꙗ҆̀же въ не́мъ тлѣ̑ннаѧ ѡ҆ста́вивъ, преподо́бне, въ санаѯа́рскꙋю ѻ҆би́тель всели́лсѧ є҆сѝ, и҆дѣ́же а҆́гг҃льски пожи́въ, мнѡ́гимъ пꙋ́ть бы́лъ є҆сѝ ко спасе́нїю, сегѡ̀ ра́ди и҆ хрⷭ҇то́съ тебѐ да́ромъ разсꙋжде́нїѧ и҆ ᲂу҆чи́тельства ѡ҆богатѝ, тѣ́мже и҆ мы̀ вопїе́мъ тѝ: спаса́й ны̀, ѳео́дѡре, ст҃ы́ми твои́ми моли́твами.

І҆́косъ:

Па́мѧть сме́ртнꙋю ѡ҆брѣ́тъ, ꙗ҆́кѡ жемчꙋ́жинꙋ многоцѣ́ннꙋю, ѡ҆ста́вилъ є҆сѝ и҆мѣ́нїе своѐ ве́лїе. Многоподви́жническое проводи́лъ є҆сѝ и҆ многоско́рбное житїѐ, гонє́нїѧ ѿ мїролю́бцєвъ терпѣ́въ и҆ ᲂу҆корє́нїѧ. Во ѻ҆би́тели же санаѯа́рстѣй водвори́лсѧ є҆сѝ, ꙗ҆́кѡ на водѣ̀ ᲂу҆покое́нїѧ. И҆дѣ́же є҆диномы́слєнныѧ себѣ̀ собра́въ ᲂу҆ченикѝ, благоꙋспѣ́шнѡ рꙋково́дствовалъ є҆сѝ и҆̀хъ, спаса́ѧ во хрⷭ҇тѣ̀, и҆ въ црⷭ҇твїе нбⷭ҇ное къ престо́лꙋ бж҃їю приводѧ̀, ꙗ҆́коже младе́нцы неѕлѡ́бивыѧ, и҆ ꙗ҆́кѡ зла́то въ горни́лѣ ѡ҆чи́щєнныѧ, и҆ ꙗ҆́коже волна̀ ᲂу҆бѣлє́нныѧ. Тѣ́мже ѻ҆би́тель твоѧ̀ честна́ѧ, ст҃ы́ми моща́ми твои́ми ны́нѣ свѣ́тлѡ красꙋ́ющисѧ, сликовствꙋ́ющи съ мона́хѡвъ мно́жествомъ, велегла́снѡ пое́тъ тѝ: ра́дꙋйсѧ, ѻ҆́ч҃е на́шъ преподо́бне и҆ ста́рче ѳео́дѡре.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть; хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Свѧ́тѡ и҆ непоро́чнѡ ѡ҆кормлѧ́лъ є҆сѝ люде́й мно́жество мїрски́хъ и҆ мона́шествꙋющихъ, ꙗ҆́кѡ къ ста́рцꙋ дꙋхоно́сномꙋ къ тебѣ̀ прибѣга́ющихъ и҆ во всѣ́хъ нꙋ́ждахъ свои́хъ ѿ тебє̀ дꙋхо́внѡ вспомоществꙋ́емыхъ.

Бы́ша ᲂу҆ченицы̀ и҆ ᲂу҆чени́цы твоѝ, дѣ́вствꙋющїи, ꙗ҆́кѡ бра́тїѧ и҆ се́стры є҆диноꙋтро́бнїи, ѻ҆тца̀ тѧ̀ и҆мꙋ́щїи, кро́тостїю и҆ смире́нїемъ тебѣ̀ подража́ющїи, въ согла́сїи и҆ є҆динодꙋ́шїи живꙋ́щїи.

И҆ мꙋ́жїе съ жена́ми и҆ ча́дами бы́ша къ тебѣ̀ любо́вїю по бз҃ѣ привѧ́зани, поели́кꙋ въ ско́рбехъ свои́хъ и҆ недоꙋмѣ́нїѧхъ вы́нꙋ полꙋча́ли сꙋ́ть цѣльбꙋ̀ и҆ наставлє́нїѧ, и҆́хже и҆спо́лнити тщи́лисѧ сꙋ́ть съ ра́достїю.

Бг҃оро́диченъ: Бцⷣе пречⷭ҇таѧ, за сн҃а твоего̀ бж҃е́ственнаго скорбе́й неизглаго́ланныхъ ѻ҆рꙋ̑дїѧ пронзо́ша дꙋ́шꙋ твою̀, моли́сѧ же за ны̀ распе́ншемꙋсѧ сп҃си́телю на́шемꙋ, да и҆зба́витъ на́съ мꙋ́ки а҆́дскїѧ.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.

Восхотѣ̀ пастыренача́льникъ хрⷭ҇то́съ ста́рчество твоѐ свѧще́нствомъ ѡ҆богати́ти, да въ ѻ҆лтарѣ̀ є҆гѡ̀ ст҃ѣ́мъ свѧ́тѡ послꙋ́жиши и҆ та́инствомъ покаѧ́нїѧ сꙋпроти́въ человѣкоꙋбі́йцы дре́внѧгѡ преѡрꙋжи́шисѧ.

Ꙗ҆́коже и҆ ѻ҆те́цъ мно́жества, вѣ́рꙋ и҆ любы̀ совершє́нныѧ показа́лъ є҆сѝ, ѳео́дѡре, сло́вомъ и҆ дѣ́ломъ па́стырское попече́нїе ѡ҆ ста́дѣ хрⷭ҇то́вомъ ꙗ҆ви́лъ є҆сѝ, и҆ дꙋ́шꙋ свою̀ за бли̑жнїѧ твоѧ̑ положи́лъ є҆сѝ.

Є҆ще́ же и҆згна́нїе за пра́вдꙋ претерпѣ́лъ є҆сѝ, ꙗ҆́кѡ дх҃омъ ст҃ы́мъ води́мый прⷪ҇ро́къ и҆ вѣ́рный послѣ́дователь хрⷭ҇то́въ. Се́ бо воево́дꙋ нечести́ваго, ꙗ҆́кѡ во́лка хи́щнаго по до́лгꙋ ста́рчества ѡ҆бличи́лъ є҆сѝ.

Бг҃оро́диченъ: Мт҃рь бж҃їѧ, со́лнце пра́вды ро́ждшаѧ, и҆́мже просвѣти́лисѧ сꙋ́ть бога́тїи лю́дстїи. Ты́ же и҆здре́вле и҆̀хъ въ гоне́нїѧхъ и҆ мꙋче́нїѧхъ ᲂу҆крѣплѧ́еши, ѿ клеветны́хъ и҆ ло́жныхъ ѡ҆пра́вдываеши.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ; тѣ́мъ всепѣ́тꙋю бцⷣꙋ велича́емъ.

Вє́лїѧ ѕлострада̑нїѧ претерпѣ́лъ є҆сѝ въ солове́цтѣмъ и҆згна́нїи, по всѧ̑ дни̑ тѣле́снѣ ᲂу҆мира́лъ и҆ въ соверше́нное и҆знеможе́нїе приходи́лъ, дꙋ́хомъ же бо́дрствовалъ, ѡ҆ хрⷭ҇тѣ̀ весели́лсѧ и҆ благодꙋ́шествовалъ є҆сѝ.

Со сла́вою возврати́лсѧ є҆сѝ въ ѻ҆би́тель свою̀ санаѯа́рскꙋю, и҆дѣ́же бесѣ́дою дꙋхо́вною ᲂу҆тѣша́лъ є҆сѝ безчи́слєнныѧ своѧ̑ ᲂу҆ченикѝ, за ни́хже па́ки и҆ па́ки напа́дки и҆ притѣснє́нїѧ терпѣ́лъ є҆сѝ.

Скорбьмѝ мно́гими восше́лъ є҆сѝ въ го́рнїй сїѡ́нъ, и҆дѣ́же въ сла́вѣ ве́лїей во ѻ҆би́тели небе́снѣй пребыва́еши, и҆̀же во хрⷭ҇тѣ̀ ча́дъ твои́хъ мно́жество та́мѡ поко́иши и҆ трⷪ҇цꙋ ст҃ꙋ́ю велегла́снѡ сла́виши.

Бг҃оро́диченъ: Влⷣчце, ᲂу҆слы́ши моли̑твы ра̑бъ твои́хъ, и҆ и҆зба́ви ны̀ ѿ всѧ́кїѧ нꙋ́жды и҆ печа́ли. Во ѻ҆би́тели, и҆́мени твоемꙋ̀ всесла́вномꙋ посвѧще́нной, приходѧ́щихъ благословѝ и҆ всю̀ во хрⷭ҇тѣ̀ бра́тїю спасѝ.

Свѣти́ленъ:

По́двигомъ ста́рчества подвиза́всѧ, просїѧ́лъ є҆сѝ въ землѝ рѡссі́йстѣй, ꙗ҆́кѡ свѣти́льникъ бж҃е́ственныѧ благода́ти, возжже́нный въ пꙋ́стыни санаѯа́рстѣй, и҆дѣ́же, ѡ҆свѧще́нный ѳео́дѡре, до́брѣ пасе́ши мона́хѡвъ мно́жество и҆ всю̀ ꙗ҆́же ѡ҆ хрⷭ҇тѣ̀ па́ствꙋ.

Свѣ́томъ трисїѧ́ннагѡ бж҃ества̀ ѡ҆сїѧ́нъ бы́сть, богомꙋ́дре ѻ҆́ч҃е на́шъ ѳео́дѡре, и҆ ѻ҆гне́мъ любвѐ бж҃е́ственныѧ бы́сть ѡ҆пале́нъ, и҆́миже грѣхо́вный мра́къ разсѣва́етсѧ и҆ потреблѧ́етсѧ тимѣ́нїе ѕлы́хъ дѣ́лъ.

Сла́ва, и҆ ны́нѣ, бг҃оро́диченъ: Дв҃о прест҃а́ѧ, сн҃а бж҃їѧ, є҆диноро́днаго пло́тїю ро́ждшаѧ, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ; на́шегѡ ра́ди спасе́нїѧ съ нб҃съ сше́дшаго и҆ воплоти́вшагосѧ на́съ ра́ди человѣ̑къ. Є҆го́же молѝ, приснодв҃о, дх҃а ст҃а́гѡ благода́тїю ѡ҆сїѧ́ти ѻ҆би́тель сїю̀, и҆збра́нникомъ твои́мъ санаѯа́рскимъ, ѻ҆тце́мъ на́шимъ преподо́бнымъ ѳео́дѡромъ посвѧще́ннꙋю всесла́вномꙋ ржⷭ҇твꙋ̀ твоемꙋ̀.