Пѣ́снь а҃.

І҆рмо́съ: Твоѧ̀ побѣди́тельнаѧ десни́ца, бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Твоѧ̀ ѡ҆свѧще́ннаѧ десни́ца, бг҃олѣ́пнѡ въ крѣ́пости просла́висѧ: та́ бо, преподо́бне, ꙗ҆́кѡ всемогꙋ́щаѧ, благослове́нїемъ и҆меносло́внымъ разрѣша́ла є҆́сть ѿ плѣ́на грѣхо́внагѡ стра́ждꙋщихъ.

Твоѧ̑ многотрꙋ̑днаѧ ра́мена, та́кожде крѣ́постїю бг҃оꙋго́дною просла́вишасѧ: се́ бо ѿ мла́дости твоеѧ̀ взе́мъ на ѻ҆́ныѧ кре́стъ сво́й, съ ни́мже и҆ послѣ́довалъ є҆сѝ за хрⷭ҇то́мъ безро́потнѡ.

Ѿ гдⷭ҇а милосе́рдагѡ стопы̑ твоѧ̑ ю҆́ныѧ сꙋ́ть и҆справлѧ́лисѧ: се́ бо, ꙗ҆́кѡ на крилꙋ̑ вѣ́трєню, ᲂу҆несо́ша тѧ̀ ѿ мїрскі́ѧ сꙋеты̀, дабы̀ на правотѣ̀ покаѧ́нїѧ ста́лъ є҆сѝ ты̀.

Бг҃оро́диченъ: Мт҃и бж҃їѧ, ты̀ и҆ рабѡ́мъ хрⷭ҇тѡ́вымъ, ꙗ҆ви́сѧ мт҃и: ꙗ҆́кѡ и҆́маши дерзнове́нїе ве́лїе за ро́дъ людскі́й гдⷭ҇а ᲂу҆молѧ́ти, ѿ всѧ́кїѧ нꙋ́жды и҆ печа́ли и҆збавлѧ́ти, наипа́че же ѿ поги́бели вѣ́чныѧ спаса́ти.

Пѣ́снь г҃.

І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жьсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й: ѡ҆дꙋшевле́нный хра́ме неизрече́нныѧ сла́вы твоеѧ̀, человѣколю́бче.

Въ пꙋсты́нѣ внꙋ́треннѣй се́рдца твоегѡ̀ сокрꙋше́ннагѡ позна́лъ є҆сѝ не́мощь сꙋщества̀ человѣ́ческагѡ, и҆ та́кѡ воззва́лъ є҆сѝ гдⷭ҇еви: препоѧ́ши мѧ̀ съ высоты̀ си́лою, во є҆́же ѡ҆ грѣсѣ́хъ ю҆́ности моеѧ̀ проси́ти проще́нїѧ: поми́лꙋй мѧ̀, бж҃е, вопи́ти тѝ.

Въ лесꙋ̀ дѣ́вственнѣмъ скве́рнꙋ дꙋшѝ своеѧ̀ ѡ҆мыва́лъ є҆сѝ сле́зъ пото́ками, и҆́миже ѻ҆́чи твоѝ ѿ тлѣтво́рнагѡ зрѣ́нїѧ ѡ҆чища́лъ є҆сѝ, є҆ще́ же и҆ вѣ̑жди твоѧ̑ ᲂу҆де́рживалъ є҆сѝ ѿ нощна́гѡ сна̀ и҆ дрема́нїѧ де́ннагѡ, ᲂу҆стна́ма же и҆ ѧ҆зы́комъ ѿ полноты̀ се́рдца немо́лчнѡ взыва́лъ є҆сѝ: і҆и҃се сладча́йшїй, къ рабꙋ̀ своемꙋ̀ прїидѝ.

Про́мысломъ бж҃е́ственнымъ а҆пⷭ҇ла первоверхо́внаго превзоше́лъ є҆сѝ, преподо́бне, ꙗ҆́кѡ не то́чїю въ ста́рости твое́й, но и҆ во дни̑ ю҆́ности твоеѧ̀, ѡ҆бѣтова́нїе хрⷭ҇то́во, петрꙋ̀ да́нное, на тебѣ̀ и҆спо́лнисѧ: и҆ сѐ возложи́ша рꙋ́ки на тѧ̀, и҆ а҆́може не хотѧ́ше ведо́ша тѧ̀, и҆ та́кѡ и҆з̾ пꙋсты́ни твоеѧ̀ на сꙋ́дъ ца́рскїй тѧ̀ предста́виша.

Бг҃оро́диченъ: Вы́нꙋ спаса́еши, дв҃о пречⷭ҇таѧ, всѣ́хъ просѧ́щихъ твоеѧ̀ ми́лости. Доны́нѣ не и҆́мамы ра́звѣ тебє̀ и҆ны́ѧ по́мощи, наде́жды и҆ны́ѧ не и҆́мамы. Никто́же бо то́щь ѿы́де ѿ тебє̀, бцⷣе, николи́же посра́мленъ бы́сть, и҆з̾ молѧ́щихсѧ тебѣ̀ съ вѣ́рою.

Сѣда́ленъ, гла́съ г҃:

Хрⷭ҇то́вою любо́вїю разгоре́сѧ се́рдце твоѐ, преподо́бне ѳео́дѡре, ѿ полноты́ же є҆гѡ̀ возглаго́лалъ є҆сѝ и҆ ᲂу҆сты̀, дх҃омъ ст҃ы́мъ наставлѧ́лъ є҆сѝ вопроша́ющихъ ѡ҆ спасе́нїи дꙋшѝ, стезе́ю пра́вою ᲂу҆че́нїѧ ст҃ы́хъ ѻ҆тє́цъ ше́ствовати, благопокорѧ́тисѧ ста́рцємъ богомꙋ̑дрымъ ᲂу҆вѣщава́лъ є҆сѝ, ѿложи́тисѧ дѣ́лъ сꙋ́етныхъ и҆ по́мыслѡвъ ло́жныхъ назида́лъ є҆сѝ, смиренномꙋ́дреннѣ спаса́тисѧ ѡ҆ гдⷭ҇ѣ благословлѧ́лъ є҆сѝ, и҆ та́кѡ подо́бно свѣти́льникꙋ, во тьмѣ̀ невѣ́дѣнїѧ сѣдѧ́щымъ свѣтѧ́щемꙋ, просїѧ́лъ є҆сѝ. Тѣ́мже моли́сѧ за ны̀ къ цр҃ю̀ нбⷭ҇номꙋ, да просвѣти́мсѧ и҆ мы̀ є҆гѡ̀ благода́тїю.

Сла́ва, и҆ ны́нѣ, бг҃оро́диченъ: Мт҃и бж҃їѧ, застꙋ́пничество твоѐ всеспаси́тельное мі́рꙋ до́льнемꙋ съ небесѐ ꙗ҆влѧ́ющаѧ, не ѡ҆ста́ви на́съ, во грѣсѣ́хъ погиба́ющихъ, не ѿврати́сѧ ѿ на́съ, гдⷭ҇а милосе́рднаго прогнѣвлѧ́ющихъ, є҆го́же молѝ и҆зба́витисѧ на́мъ всѧ́кагѡ недоꙋмѣ́нїѧ и҆ и҆збѣ́гнꙋти дꙋшепа́гꙋбнагѡ заблꙋжде́нїѧ, и҆спросѝ на́мъ ᲂу҆миле́нїе серде́чное и҆ ѡ҆ грѣсѣ́хъ сокрꙋше́нїе, ꙗ҆́кѡ предста́тельница на́ша крѣ́пкаѧ и҆ помо́щница ско́раѧ.

Пѣ́снь д҃.

І҆рмо́съ: Го́рꙋ тѧ̀ бл҃года́тїю бж҃їею прїѡсѣне́ннꙋю, прозорли́выма а҆ввакꙋ́мъ, ᲂу҆смотри́въ ѻ҆чи́ма, и҆з̾ тебє̀ и҆зы́ти і҆и҃левꙋ провозглаша́ше ст҃о́мꙋ во сп҃се́нїе на́ше и҆ ѡ҆бновле́нїе.

Ꙗ҆́кѡ на горѣ̀ и҆скꙋше́нїѧ смире́ннѡ предста́лъ є҆сѝ, предъ цари́цею всеси́льною, съ не́ю же до́блественнѡ стѧза́лсѧ є҆сѝ ѡ҆ бꙋ́дꙋщемъ свое́мъ житїѝ. И҆ вѣ́рою и҆́скреннею приклони́лъ є҆сѝ се́рдце є҆ѧ̀ на покаѧ́нїе ѿпꙋсти́ти тѧ̀.

Поще́нїемъ стро́гимъ пло́ть твою̀ дꙋ́хови покорѧ́лъ є҆сѝ, сегѡ̀ ра́ди ᲂу҆тро́ба твоѧ̀ хребтꙋ̀ твоемꙋ̀ прильпѐ, кѡлѣ́на и҆знемого́ста и҆ и҆змѣни́сѧ лицѐ твоѐ. И҆ та́кѡ внѣ́шнїй тво́й человѣ́къ ᲂу҆́мре, а҆ внꙋ́треннїй ѡ҆живѐ и҆ гдⷭ҇еви воззва̀: сла́ва тебѣ̀!

Са́мꙋю дꙋ́шꙋ свою̀ за бли̑жнїѧ твоѧ̑ положи́ти потща́лсѧ є҆сѝ, сло́вꙋ хрⷭ҇то́вꙋ слѣ́дꙋѧ, любо́вїю бо є҆гѡ̀ дыша́ти ста́ша пе́рси твоѧ̑ и҆ се́рдце твоѐ цѣломꙋ́дренное воспламени́лосѧ є҆́сть любо́вїю къ лю́демъ стра́ждꙋщымъ.

Бг҃оро́диченъ: Приснодв҃о пречⷭ҇таѧ, бцⷣе є҆ди́наѧ, молѝ ро́ждшагосѧ и҆з̾ тебє̀ мі́ра спаси́телѧ, цѣломꙋ́дрїѧ ᲂу҆чи́телѧ и҆ всемо́щнаго покрови́телѧ, да ѡ҆чи́ститъ растлѣ̑нныѧ лю́ди и҆ сподо́битъ всѣ́хъ соверше́нныѧ любвѐ.

Пѣ́снь є҃.

І҆рмо́съ: Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.

Непре́станнѡ моли́лсѧ є҆сѝ сп҃си́телю на́шемꙋ, крⷭ҇то́мъ свои́мъ мі́ра концы̀ ѡ҆свѣти́вшемꙋ и҆ бг҃оразꙋ́мїемъ просвѣща́ющемꙋ лю́ди своѧ̑, є҆ще́ же и҆ свѣ́та нетва́рнагѡ ᲂу҆́мнагѡ видѣ́нїѧ вы́нꙋ и҆ска́лъ є҆сѝ. Сегѡ̀ ра́ди воззрѣ́лъ є҆́сть на тѧ̀ хрⷭ҇то́съ и҆ ѡ҆свѧти́лъ є҆́сть тѧ̀ свѣ́томъ и҆́стины.

И҆з̾ пото́ка златострꙋ́йнагѡ бж҃е́ственныѧ премꙋ́дрости че́рпалъ є҆сѝ живо́й воды̀, є҆́юже жа́ждꙋ дꙋхо́внꙋю вопроша́ющымъ тѧ̀ ѡ҆ гдⷭ҇ѣ ᲂу҆толѧ́лъ є҆сѝ, и҆ та́кѡ досто́йнымъ ᲂу҆ченико́мъ златоꙋ́стовымъ и҆ богосло́вомъ и҆́стиннымъ ꙗ҆ви́лсѧ є҆сѝ.

Смиренномꙋ́дрїе спаси́тельное и҆з̾ ла́ѵры столи́чныѧ въ пꙋсты́ню да́льнюю тѧ̀ и҆зведѐ, въ не́й же многоподви́жнически жи́тельствовавъ, дꙋ́хомъ свои́мъ весели́лсѧ є҆сѝ и҆ со́вѣстїю поко́илсѧ. И҆ та́кѡ ѿ си́лы послꙋ́шничества въ си́лꙋ ста́рчества возше́лъ є҆сѝ.

Бг҃оро́диченъ: Ѻ҆би́тель твоѧ̀, бцⷣе, санаѯа́рскаѧ, и҆з̾ запꙋсте́нїѧ и҆ забве́нїѧ кра́йнѧгѡ ѳео́дѡра преподо́бнагѡ смотре́нїемъ и҆ ча́дъ є҆гѡ̀ многочи́сленныхъ и҆ждиве́нїемъ, промысли́тельнѡ вознесе́сѧ на свѣ́щницꙋ церко́внꙋю, ꙗ҆́кѡ свѣти́льникъ, возжже́нный во сла́вꙋ ржⷭ҇тва̀ твоегѡ̀.

Пѣ́снь ѕ҃.

І҆рмо́съ: Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ, ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.

Теча́хꙋ къ тебѣ̀, блаже́нне ѳео́дѡре, ѿ всѣ́хъ концє́въ землѝ рꙋ́сскїѧ лю́дїе. Се́ бо ѡ҆брѣто́ша себѣ̀ ѻ҆тца̀ бг҃омꙋ́драго, дꙋ́хъ ми́ренъ стѧжа́вшаго, немощствꙋ́ющихъ ᲂу҆крѣплѧ́ющаго, заблꙋ́ждшихъ же и҆справлѧ́ющаго.

Сподо́билсѧ є҆сѝ, преподо́бне, ста́ти строи́телемъ пꙋсты́нныѧ ѻ҆би́тели дв҃ы пречⷭ҇тыѧ, є҆ѧ́же ржⷭ҇тво̀ ѿ непло́дныѧ, и҆ ѻ҆́браза влади́мїрскагѡ срѣ́тенїе, и҆ ю҆́жика є҆ѧ̀ вели́кагѡ главы̀ ᲂу҆сѣкнове́нїе благолѣ́пными хра́мами почти́лъ є҆сѝ.

Ꙗ҆́кѡ пчела̀ бг҃омꙋ́драѧ рабо́талъ є҆сѝ, ѳео́дѡре, по всѧ̑ дни̑ живота̀ твоегѡ̀ на бла́го бли́жнѧгѡ, и҆ та́кѡ ще́дрѣ некта́ръ благода́тный, съ цвѣтѡ́въ ра́йскихъ ᲂу҆че́нїѧ ѻ҆тцє́въ ст҃ы́хъ собра́нный, ᲂу҆стна́ма твои́ма медото́чилъ є҆сѝ.

Бг҃оро́диченъ: Да́же доны́нѣ не и҆ссѧка́етъ ѻ҆би́тель твоѧ̀, бцⷣе, твое́ю вы́шнею ми́лостїю, поне́же тобо́ю пꙋтево́дствꙋетсѧ, тебѐ сла́витъ, тебѣ̀ же моли́твеннѡ пое́тъ хвалꙋ̀: сп҃сѝ лю́ди твоѧ̑, приснодѣ́вственнаѧ, ты́ бо крѣ́пость немощствꙋ́ющихъ и҆ и҆справле́нїе.

Конда́къ, гла́съ в҃:

Мі́ра сꙋетꙋ̀ и҆ всѧ̑ ꙗ҆̀же въ не́мъ тлѣ̑ннаѧ ѡ҆ста́вивъ, преподо́бне, въ санаѯа́рскꙋю ѻ҆би́тель всели́лсѧ є҆сѝ, и҆дѣ́же а҆́гг҃льски пожи́въ, мнѡ́гимъ пꙋ́ть бы́лъ є҆сѝ ко спасе́нїю, сегѡ̀ ра́ди и҆ хрⷭ҇то́съ тебѐ да́ромъ разсꙋжде́нїѧ и҆ ᲂу҆чи́тельства ѡ҆богатѝ, тѣ́мже и҆ мы̀ вопїе́мъ тѝ: спаса́й ны̀, ѳео́дѡре, ст҃ы́ми твои́ми моли́твами.

І҆́косъ:

Па́мѧть сме́ртнꙋю ѡ҆брѣ́тъ, ꙗ҆́кѡ жемчꙋ́жинꙋ многоцѣ́ннꙋю, ѡ҆ста́вилъ є҆сѝ и҆мѣ́нїе своѐ ве́лїе. Многоподви́жническое проводи́лъ є҆сѝ и҆ многоско́рбное житїѐ, гонє́нїѧ ѿ мїролю́бцєвъ терпѣ́въ и҆ ᲂу҆корє́нїѧ. Во ѻ҆би́тели же санаѯа́рстѣй водвори́лсѧ є҆сѝ, ꙗ҆́кѡ на водѣ̀ ᲂу҆покое́нїѧ. И҆дѣ́же є҆диномы́слєнныѧ себѣ̀ собра́въ ᲂу҆ченикѝ, благоꙋспѣ́шнѡ рꙋково́дствовалъ є҆сѝ и҆̀хъ, спаса́ѧ во хрⷭ҇тѣ̀, и҆ въ црⷭ҇твїе нбⷭ҇ное къ престо́лꙋ бж҃їю приводѧ̀, ꙗ҆́коже младе́нцы неѕлѡ́бивыѧ, и҆ ꙗ҆́кѡ зла́то въ горни́лѣ ѡ҆чи́щєнныѧ, и҆ ꙗ҆́коже волна̀ ᲂу҆бѣлє́нныѧ. Тѣ́мже ѻ҆би́тель твоѧ̀ честна́ѧ, ст҃ы́ми моща́ми твои́ми ны́нѣ свѣ́тлѡ красꙋ́ющисѧ, сликовствꙋ́ющи съ мона́хѡвъ мно́жествомъ, велегла́снѡ пое́тъ тѝ: ра́дꙋйсѧ, ѻ҆́ч҃е на́шъ преподо́бне и҆ ста́рче ѳео́дѡре.

Пѣ́снь з҃.

І҆рмо́съ: Тебѐ ᲂу҆́мнꙋю, бцⷣе, пе́щь, разсмотрѧ́емъ вѣ́рнїи: ꙗ҆́кѡ же бо ѻ҆́троки сп҃сѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ, и҆ препросла́вленъ.

Бж҃їимъ произволе́нїемъ и҆з̾ забве́нїѧ возроди́лъ є҆сѝ въ землѝ рѡссі́йстѣй ста́рчество благода́тное, и҆ мнѡ́гаѧ ѕлострада̑нїѧ претерпѣ́лъ є҆сѝ ѿ невѣ́дꙋщихъ сегѡ̀ благослове́ннагѡ и҆ всѣ́ми ѻ҆тца́ми ст҃ы́ми и҆спы́таннагѡ ца́рскагѡ пꙋтѝ спасе́нїѧ.

Плоды̀ дѡ́брыѧ спаси́тельнагѡ послꙋ́шанїѧ ѻ҆тцꙋ̀ своемꙋ̀ благода́тномꙋ стѧжева́ли сꙋ́ть ᲂу҆ченицы̀ и҆ ᲂу҆чени́цы твоѝ и҆́скреннїи, свѧ́тѡ и҆ цѣломꙋ́дреннѡ живꙋ́щїи, смиренномꙋ́дрїемъ свои́мъ и҆ мꙋ́жественнымъ скорбе́й терпѣ́нїемъ тебѣ̀ подража́ющїи.

Са́мъ, семе́йныхъ ᲂу҆́зъ чꙋ́ждый, не гнꙋша́лсѧ є҆сѝ, ѳео́дѡре бг҃омꙋ́дре, хрⷭ҇та̀ ра́ди ѻ҆те́чески рꙋково́дствовати притека́ющихъ къ тебѣ̀ въ печа́лехъ свои́хъ ᲂу҆бо́гихъ и҆ бога́тыхъ мꙋже́й съ жена́ми и҆ ча́дами, и҆́хже недꙋ́ги дꙋшє́вныѧ и҆ тѣлє́сныѧ дꙋхо́внѡ врачева́лъ є҆сѝ.

Бг҃оро́диченъ: Мт҃и бж҃їѧ влⷣчице нбⷭ҇наѧ, лю́демъ стра́ждꙋщымъ покро́ве благода́тный, скоропослꙋ́шнице, цѣли́тельнице и҆ блага́ѧ врата́рнице, моли́сѧ ко хрⷭ҇тꙋ̀ за ны̀, недостѡ́йныѧ, да поми́лꙋетъ рабы̀ своѧ̑ безѿвѣ̑тныѧ.

Пѣ́снь и҃.

І҆рмо́съ: Въ пещѝ ѻ҆́троцы і҆и҃лєвы, ꙗ҆́коже въ горни́лѣ добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.

Дꙋховни́чество соверше́нное, во хрⷭ҇та̀ ѡ҆блече́нное, пресла́внѡ ꙗ҆ви́лъ є҆сѝ, похвало̀ ста́рчествꙋ и҆́стинномꙋ, ѻ҆́ч҃е санаѯа́рскїй и҆ чꙋдотво́рче. На тебѣ́ бо си́лꙋ свою̀ неизрече́ннꙋю гдⷭ҇ь ꙗ҆вѝ, преди́внѡ соверша́ющꙋюсѧ въ человѣ́честѣй не́мощи.

Дꙋшепопечи́тельствомъ па́стырскимъ, не щадѧ̀ живота̀ своегѡ̀ и҆ волкѡ́въ мы́сленныхъ не бѣ́гаѧ, бг҃оꙋго́днѡ подвиза́лсѧ є҆сѝ и҆ та́кѡ ѡ҆ спасе́нїи ста́да слове́снагѡ, смотре́нїю твоемꙋ̀ ввѣ́реннагѡ, досто́йнѡ трꙋди́лсѧ є҆сѝ.

Въ наго́рнѣй про́повѣди хрⷭ҇то́вѣ подо́бнїи тебѣ̀, ѳео́дѡре преподо́бне, ѡ҆ гдⷭ҇ѣ дѣ́латели сꙋ́ть ᲂу҆блажа́лисѧ и҆ ми́лѡсти неизглагѡ́ланныѧ нелѣ́ностнѡ потрꙋди́вшымсѧ нело́жнѡ ѡ҆бѣтова́лисѧ.

Бг҃оро́диченъ: Вы́нꙋ ѿ клеветы̀ и҆збавлѧ́еши, приснодв҃о и҆́стиннаѧ, рабы̑ твоѧ̑ и҆́скрєннїѧ. И҆̀хже хода́тайствомъ свои́мъ всемо́щнымъ ко гдⷭ҇ꙋ ѿ ра́бства грѣхо́внагѡ свобожда́еши и҆ просвѣща́еши ѻ҆чеса̀ и҆́хъ дꙋхѡ́вныѧ и҆ сердца̀ мы́слєнныѧ.

Пѣ́снь ѳ҃.

І҆рмо́съ: Ѡ҆́бразъ чⷭ҇тагѡ ржⷭ҇тва̀ твоегѡ̀, ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ пе́щь, да тѧ̀, бцⷣе, непреста́ннѡ велича́емъ.

Съ кро́тостїю терпѣ́лъ є҆сѝ, преподо́бне ѳео́дѡре: ѿ ды́ма пе́щнагѡ ᲂу҆горе́нїе, ѿ мра́за стꙋжа́нїе, ѿ гла́да и҆ жа́жды томле́нїе и҆ без̾исхо́дное темни́чное заточе́нїе. По вре́мени же ᲂу҆тѣ́шенъ бы́сть гдⷭ҇омъ и҆ и҆зба́вленъ бы́сть лю́тыхъ си́хъ.

Безпоро́чнагѡ ра́ди предъ гдⷭ҇омъ хожде́нїѧ твоегѡ̀ и҆ па́стырства ре́вностнагѡ до гро́ба терпѣ́лъ є҆сѝ ѕлосло́вїе и҆ клеветꙋ̀, и҆̀хже во мно́жествѣ воздвиза́ша на тѧ̀ лю́тїи де́мони и҆ лю́дїе ѕлочести́вїи, не терпѧ́щїи слꙋже́нїѧ твоегѡ̀ бг҃ꙋ є҆ди́номꙋ.

Мно́гажды ꙗ҆влѧ́лъ є҆́сть мздовоздаѧ́тель пра́ведный посме́ртнꙋю сла́вꙋ твою̀, ѳео́дѡре, и҆ благолѣ́пнꙋю ѻ҆би́тель небе́снꙋю дарова́лъ є҆́сть тебѣ̀ со ᲂу҆ченики̑. Ѿню́дꙋже по́мощїю свое́ю моли́твенною по́мнѧщымъ тѧ̀ и҆ ѡ҆ гдⷭ҇ѣ лю́бѧщымъ не закоснѝ.

Бг҃оро́диченъ: Прест҃а́ѧ бцⷣе, ᲂу҆блажа́ютъ тѧ̀, пречⷭ҇таѧ, восхвалѧ́ютъ, приснодв҃ственнаѧ, почита́ютъ, пребл҃гослове́ннаѧ, всѝ ро́ди трⷪ҇цѣ ст҃ѣ́й вѣ́рныхъ безчи́сленнїи, и҆̀хже спаса́ла є҆сѝ и҆ вы́нꙋ спаса́еши. Не пре́зри и҆ на́съ, немощны́хъ, подъ кро́въ ѻ҆би́телей твои́хъ прибѣга́ющихъ.

Свѣти́ленъ:

По́двигомъ ста́рчества подвиза́всѧ, просїѧ́лъ є҆сѝ въ землѝ рѡссі́йстѣй, ꙗ҆́кѡ свѣти́льникъ бж҃е́ственныѧ благода́ти, возжже́нный въ пꙋ́стыни санаѯа́рстѣй, и҆дѣ́же, ѡ҆свѧще́нный ѳео́дѡре, до́брѣ пасе́ши мона́хѡвъ мно́жество и҆ всю̀ ꙗ҆́же ѡ҆ хрⷭ҇тѣ̀ па́ствꙋ.

Свѣ́томъ трисїѧ́ннагѡ бж҃ества̀ ѡ҆сїѧ́нъ бы́сть, богомꙋ́дре ѻ҆́ч҃е на́шъ ѳео́дѡре, и҆ ѻ҆гне́мъ любвѐ бж҃е́ственныѧ бы́сть ѡ҆пале́нъ, и҆́миже грѣхо́вный мра́къ разсѣва́етсѧ и҆ потреблѧ́етсѧ тимѣ́нїе ѕлы́хъ дѣ́лъ.

Сла́ва, и҆ ны́нѣ, бг҃оро́диченъ: Дв҃о прест҃а́ѧ, сн҃а бж҃їѧ, є҆диноро́днаго пло́тїю ро́ждшаѧ, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ; на́шегѡ ра́ди спасе́нїѧ съ нб҃съ сше́дшаго и҆ воплоти́вшагосѧ на́съ ра́ди человѣ̑къ. Є҆го́же молѝ, приснодв҃о, дх҃а ст҃а́гѡ благода́тїю ѡ҆сїѧ́ти ѻ҆би́тель сїю̀, и҆збра́нникомъ твои́мъ санаѯа́рскимъ, ѻ҆тце́мъ на́шимъ преподо́бнымъ ѳео́дѡромъ посвѧще́ннꙋю всесла́вномꙋ ржⷭ҇твꙋ̀ твоемꙋ̀.