Пе́снь 1.

Ирмо́с: Посе́ченный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль; пе́снь же воспева́шеся: Го́сподеви пои́м, сла́вно бо просла́вися.

А́нгела земна́го и Небе́снаго челове́ка, И́ова преподо́бнаго, Волы́нскую похвалу́, досто́йно воспе́ти помози́ ми́, Сло́ве Бо́жий, презира́я моя́ прегреше́ния и подава́я сло́во усто́м мои́м.

Бы́л еси́, Преподо́бне, вои́стинну ми́ру свети́льник пресве́тел, все́м пу́ть спасе́ния показу́яй; те́мже и мне́ бу́ди помо́щник, во е́же просла́вити житие́ твое́ и умиле́ние стяжа́ти.

В дому́ роди́телей твои́х пе́рвее позна́л еси́ Го́спода, И́ове сла́вне, и, о́трок сы́й, ра́зум соверше́н показа́л еси́, егда́ мона́шеское житие́ изво́лил еси́, вся́ же жите́йская прови́дев, Еди́наго Бо́га возлюби́л еси́.

Горе́ о́чи твои́ и ду́шу вознося́, во оби́тели Уго́рництей бра́тию в Богоуго́днем житии́ ско́ро превозше́л еси́, ху́ждша все́х себе́ помышля́я и те́м лу́чший Иису́су явля́яся, ста́рцем же и ю́ным о́браз бы́в прелюбе́знейший.

Сла́ва: До́бре тя́ на диа́волы во́инствовавша помышля́я, Преподо́бне, своея́ стыжду́ся ле́ности и мно́жества грехо́в мои́х ужаса́юся: но твои́ми, свя́те, моли́твами да́руй ми́ жела́ние благо́е, во е́же про́чее вре́мя жития́ моего́ в покая́нии сконча́ти.

И ны́не: Я́ко Бо́жия Ма́ти дерзнове́ние иму́щи к ро́ждшемуся из Тебе́ Единоро́дному Сло́ву, и Отцу́ Собезнача́льному, и Соесте́ственному Ду́ху моля́щи не преста́й от бе́д спасти́, Всенепоро́чная, Тя́, Богоро́дицу, сла́вящия.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Е́сть во мне́, о́тче Преподо́бне, до́браго исправле́ния жела́ние, но искуше́ния ле́ности побежда́ти не навыко́х, увы́ мне́. Оба́че на по́мощь твою́ наде́яся, уны́ния по́мыслы отгоня́ю, на твоя́ же взира́ю сла́вныя по́двиги.

Желе́зо нарече́ся ро́д тво́й, И́ове Преподо́бне, кре́пость души́ твоея́ предуказу́я; в пеще́ре же ка́менне заключи́вся, я́ко зла́то сокрове́но, освяти́л еси́ ме́сто по́двиг твои́х и го́ру Поча́евскую, я́ко сте́ну ме́дяну, проти́ву враго́в Правосла́вия яви́л еси́.

Зело́ углуби́шася помышле́ния твоя́ я́же о Небе́снем Ца́рствии, егда́, еще́ о́трок сы́й, А́нгельский о́браз восприя́л еси́; те́мже и свяще́нник бы́в Бо́гу ве́рен, да́же ны́не моле́ния о лю́дех возно́сиши, И́ове Преподо́бне.

Земля́ Га́лицкая ю́ностию твое́ю сла́вится, и Ду́бенская оби́тель му́жеския по́двиги твоя́ благовеству́ет, оби́тель же Поча́евская ста́ростию твое́ю хва́лится и блаже́нною кончи́ною весели́тся, вся́ же вселе́нная о чудесе́х твои́х ра́дуется и ликовству́ет.

Сла́ва: И́же подае́ши блага́я все́м, моля́щимся тебе́, и мене́ припа́дающа не отри́ни свя́тче, но, покая́ние мое́ зря́, да́ждь ми́ жития́ исправле́ние, ре́вность же вдохни́, е́же подража́ти твои́м Боголюби́вым дея́нием.

И ны́не: Умерщвле́нный мо́й у́м Живо́тным де́йством из Тебе́, Я́вльшимся ми́ру, воздви́гни, Чи́стая, и к жи́зни наста́ви, Я́же сме́рти две́ри разо́ршая Еди́на Рождество́м Твои́м.

Седа́лен, гла́с 8-й.

Дне́сь исполня́ется ра́дости оби́тель Поча́евская, твое́ Боголюби́вое житие́ прославля́ющи; дне́сь христоимени́тии лю́дие ре́вностию спасе́ния просвеща́ются, зря́ще нетле́нием просла́вленныя мо́щи твоя́, преподо́бне; дне́сь грехо́вныя отгоня́ются стра́сти, и по́мыслы покая́ния души́ на́ша объе́млют, в ни́хже утверди́ все́х, пресла́вне, ве́рно почита́ющих па́мять твою́.

Пе́снь 4

Ирмо́с: Проро́к Авваку́м у́мныма очи́ма прови́де, Го́споди, Прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

И́ове Преподо́бне, о все́х моли́твенник бу́ди те́плый, твоему́ заступле́нию ве́рующих, свое́ же окаява́ющих житие́ и на Бо́жие милосе́рдие упова́ющих, а́ще и прельще́ньми жития́ сего́ вла́ющихся.

Кто́ от челове́к не подиви́тся долготерпели́вому житию́ твоему́, о́тче, кто́ ли не просла́вит твоея́ о Правосла́вии ре́вности, ты́ бо, я́ко адама́нт кре́пок, еретико́м противоста́л еси́, и и́стинныя ве́ры пропове́дание словесы́ же и писа́ньми все́м препо́дал еси́.

Льва́ рыка́юща и и́щуща поглоти́ти ду́ши спаса́емых моли́твою твое́ю победи́л еси́, о́тче, но и тому́ служа́щия лю́ди в покая́ние приводи́л еси́, та́ти милосе́рдием твои́м постыжда́я и вразумля́я, граби́тели же обличе́ньми устраша́я и вся́ науча́я спаси́тельному покая́нию.

Сла́ва: Мра́к души́ моея́, о́тче, предста́тельством твои́м разсе́й и све́том за́поведей Госпо́дних просвети́ мое́ окая́нное се́рдце, да и а́з, твои́м ученико́м после́дуя, те́х ча́сти лише́н не пребу́ду, твою́ восхваля́я святу́ю па́мять.

И ны́не: Бо́га, из Тебе́ воплоще́ннаго, моли́ непрело́жно, Е́же бе́ пребы́вша и есте́ственно Ра́вна Отцу́, и Ду́ху Сопресто́льна, проще́ние прегреше́ний и ду́ш спасе́ние пою́щим Тя́ ве́рою дарова́ти.

Пе́снь 5.

Ирмо́с: Мра́к души́ моея́ разжени́, Светода́вче Христе́ Бо́же, началоро́дную тьму́ изгна́в бе́здны, и да́руй ми́ све́т повеле́ний Твои́х, Сло́ве, да, у́тренюя, сла́влю Тя́.

На́ш еси́ вои́стинну предста́тель и чудотво́рец пресве́тлый, взыва́ше Диони́сий, обреты́й мо́щи твоя́, тле́нию неприча́стны. Мы́ же, сия́ лобыза́юще, вопие́м: на́ших скве́рн не возгнуша́йся, уго́дниче Бо́жий, но твои́ми моли́твами сия́ очи́сти.

Оправда́нием Бо́жиим от ю́ности, о́тче, науча́емь, суеты́ жите́йския уклони́тися кре́пко возжела́л еси́, безмо́лвие же возлюби́л еси́: оба́че веле́нию Христо́ву не противля́яся, притека́ющия к тебе́ Пра́вому испове́данию и Ева́нгельскому житию́ науча́л еси́.

Предста́тель яви́лся еси́ и по преставле́нии твое́м стра́ждущим и скорбя́щим челове́ком: та́ко бо тя́ ви́деша лю́дие, из гро́ба твоего́ исходя́ща и со А́нгелы посреде́ це́ркве моля́щася. О, чу́до пресла́вное вои́стинну! О, ра́дость ве́рным и утвержде́ние!

Рачи́тель бы́в Небе́снаго Ца́рствия, о свое́м та́мо вхожде́нии известву́ешися и кроме́ боле́зни и стра́ха пресе́льник явля́ешися лу́чшия жи́зни, бра́тии же твоея́ учи́тель и упова́ние.

Сла́ва: Сопу́тник житию́ моему́ бу́ди, о́тче И́ове, моли́твою твое́ю огражда́й многомяте́жную мою́ ду́шу и введи́ ю́ в Небе́сное Ца́рство, твои́ми умиле́нную по́двиги, Христу́ же покая́нныя принося́щую сле́зы.

И ны́не: Тя́ сте́ну иму́ще и предста́тельством Твои́м соблюда́еми, Твое́ю Боже́ственною сла́вою хва́лящеся, Тя́ блажи́м: Ты́ бо, Всечи́стая, душа́м на́шим источа́еши весе́лие и ра́дование.

Пе́снь 6.

Ирмо́с: Ио́ну в ки́те, Го́споди, еди́наго всели́л еси́, мене́ же свя́зана мре́жами вра́жиими, я́ко от тли́ о́наго спаси́.

Тве́рдое упова́ние на предста́тельство твое́ возлага́ю, преподо́бне, и ве́рою молю́ся: да́ждь ми́ страсте́й лю́тых одоле́ние, сме́рти же непреста́нную па́мять и блаже́нства жела́ние гряду́щаго ве́ка.

Утвержда́ется тобо́ю, Преподо́бне, Свята́я Це́рковь, е́ресь же вся́кая посрамля́ется, обличе́ние иму́щи твоя́ многоцеле́бныя мо́щи, и жития́ твоего́ столе́тняго труды́, и боле́зни, и сле́зы, и по́ст, и пло́ти от косте́й отпаде́ние.

Фарао́на мы́сленнаго побежда́ше И́ов преподо́бный, послуша́нию всегда́ прилежа́ и обурева́емым на по́мощь приходи́ти не отрица́яся: и та́ко три́ оби́тели уче́нием свои́м просвети́в и по́двиги мно́гими просла́вив, веселя́ше Спа́са все́х, Человеколю́бца.

Христо́ву смире́нию подража́ше И́ов, егда́ нача́льство я́ко служе́ние все́м прия́т и, игу́мен сы́й, в тя́жких слу́жбах подвиза́шеся, бра́тии же бя́ше о́браз кро́тости, и трудолю́бия пра́вило, и о моли́тве при́сное напомина́ние.

Сла́ва: От скве́рных изба́ви мя́ страсте́й твои́ми моли́твами, те́х одоле́ние мне́ подава́я Боже́ственныя по́мощи при́сным призыва́нием, и на себе́ ненаде́янием, и бра́та моего́ неосужде́нием.

И ны́не: Вознесла́ еси́ всеи́стинно па́дшее челове́ческое существо́ во зра́це Боже́ственном, и Отца́ в ра́венстве ви́димаго Сы́на неизме́ннаго, Богома́ти, без Се́мене во чре́ве поноси́вши.

Конда́к, гла́с 4-й.

Яви́лся еси́ и́стинныя ве́ры сто́лп, Ева́нгельских же за́поведей ревни́тель, горды́ни обличе́ние, смире́нным же предста́тель и науче́ние: те́мже и ублажа́ющым тя́ грехо́в отпуще́ние испроси́ и оби́тель твою́ невреди́му сохрани́, И́ове о́тче на́ш, Многострада́льному подо́бный.

И́кос.

Отве́рзи уста́ твоя́, пеще́ро ка́менная, и рцы́ на́м, колькра́ты то́ки сле́з И́овлих омочи́лася еси́, ка́ко того́ воздыха́ния твои́х сте́н не расторго́ша, ка́ко Све́т Боже́ственный тебе́ не сожже́, ка́ко А́нгели бде́нным по́двигом И́овлим диви́шася, те́ми бо освяти́ся земля́ Га́лицкая и Волы́нская; мы́ же, сия́ вся́ помышля́юще, слеза́ми умиле́ния о́чи на́ши исполня́ем: е́сть бо преподо́бный И́ов уго́дник ди́вный, Многострада́льному подо́бный.

Пе́снь 7

Ирмо́с: На по́ле Деи́ре иногда́ мучи́тель пе́щь поста́ви на муче́ние Богоно́сных, в не́йже три́ о́троки песносло́вяху Еди́наго Бо́га, тро́ично воспева́ху, глаго́люще: отце́в Бо́же, благослове́н еси́.

Лю́ди правосла́вныя, тя́ блажа́щия, преподо́бне И́ове, укрепи́ на враги́ и о Це́ркви ми́рная глаго́ли в се́рдце и́х, все́м единомы́слие испроси́ у Бо́га, и дру́г ко дру́гу любо́вь, и о Правосла́вии ре́вность.

Ча́шу жития́ Твоего́ пи́ти, Го́споди, не могу́ а́з, окая́нный, боя́знию скорбе́й обурева́емь и страсте́й сплета́емь те́рнием, оба́че молю́ся: И́ова, Твоего́ уго́дника, моли́твами поми́луй мя́ и помози́ ми́ грехо́вную отрясти́ ле́ность.

Широ́кий пу́ть, поги́бель души́ преднося́щий, возненави́дев, И́ове Преподо́бне, в те́сней пеще́ре заключи́лся еси́ и те́снаго пути́ жи́зни в нача́льстве твое́м не уклони́лся еси́, де́нь и но́щь в моли́тве и труде́х пребыва́я и науче́ние здра́вое все́м приходя́щим к тебе́ подава́я.

Сла́ва: Ще́др бы́л еси́ ни́щим, ка́ющимся же ми́лостив и науче́ния тре́бующим учи́тель кро́ток, Боже́ственныя же му́дрости люби́тель и Ева́нгельских за́поведей пропове́дник, кни́г же Боже́ственных изда́тель и е́реси безбоя́зненный обличи́тель.

И ны́не: Мари́ю Пречи́стую и Всесвяту́ю восхва́лим: То́ю бо благода́ть на́м источа́ется па́че ума́ даро́в, я́ко от пото́ка Боже́ственныя бла́гости, Ю́же благочести́вым по́мыслом ны́не ублажа́ем.

Пе́снь 8.

Ирмо́с: Покрыва́яй вода́ми превы́спренная Своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь тва́рь, я́ко Соде́телю все́х во ве́ки.

Е́дущим и иду́щим во оби́тель твою́ безчи́сленным лю́дем, ко твои́м же моще́м припа́дающим, бу́ди дарова́ний духо́вных пода́тель, теле́сных же боле́зней цели́тель и пред Спа́сом те́плый о все́х предста́тель, И́ове, земли́ Волы́нския сла́во и украше́ние.

Ю́ноша те́лом, но ста́рец умо́м в нача́ле мона́шескаго жития́ твоего́ бы́л еси́, о́тче: соста́ревся же пло́тию, ю́ношескую бо́дрость в труде́х явля́л еси́, земли́ копа́нием и древе́с насажде́нием о́браз все́м смиренному́дрия подава́я.

Явле́ние твое́ со А́нгелы вку́пе смире́нную де́ву ужаса́ше, здра́вие же ученику́ твоему́ подава́ше и вся́ лю́ди на славосло́вие Бо́гови воздвиза́ше, И́стинную же утвержда́ше в ни́х ве́ру и ерети́ческая отрева́ше нападе́ния.

Сла́ва: Фимиа́мом моли́тв твои́х и мене́ облагоуха́й, И́ове пресла́вне, мои́х грехо́в злосмра́дие те́м отгоня́я и упова́ние на Го́спода вселя́я в мою́ смра́дную ду́шу, да благода́тию Бо́жиею очища́емь, воспою́ твое́, преблаже́нне, кре́пкое заступле́ние.

И ны́не: Богороди́тельнице Всечи́стая, души́ моея́ я́звы и грехо́вныя стру́пы очи́сти, исто́чником омыва́ющи су́щим из ре́бр Сы́на Твоего́, и поте́кшими из те́х, очища́ющи, струя́ми: к Тебе́ прибега́ю и Тя́ призыва́ю, Богоблагода́тную.

Пе́снь 9.

Ирмо́с: Благослове́н Госпо́дь, Бо́г Изра́илев, воздви́гнувый ро́г спасе́ния на́м в дому́ Дави́дове, о́трока Своего́ в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Иссо́пом благода́ти Бо́жия окропи́ сердца́ на́ша, И́ове Преподо́бне, твои́м святы́м моще́м покланя́ющихся, да твоея́ ре́вности о ве́ре причасти́вшеся, ко исполне́нию за́поведей Христо́вых до́бре потщи́мся.

Псало́мски взыва́ти к Бо́гу на земли́ не престава́л еси́, и де́вства твоего́ сосу́д соблю́л еси́: те́мже на Небеси́ ра́йския воспева́еши ны́не пе́сни со А́нгелы и все́ми святы́ми, лю́ди же, на земли́ трудя́щыяся, от Вы́шних назира́еши.

О, коли́ка жития́ твоего́ нетле́нная красота́, о, коли́ка по сме́рти твое́й чудеса́ и исцеле́ния! Се́ бо земна́я оста́вив, вои́стинну стори́цею Небе́сная бла́га еще́ в житии́, па́че же во гряду́щем, по глаго́лу Христо́ву стяжа́л еси́.

Сла́ва: О, коли́ко грехо́в на́ших мно́жество! Но сия́ превосхо́дит твои́х моли́тв кре́пость, и́хже не лиши́ на́с, о́тче Преподо́бне И́ове, дру́же Христо́в и святы́х все́х соприча́стниче, церко́вный сто́лпе и о душа́х челове́ческих предста́телю тепле́йший.

И ны́не: Зачала́ еси́, Де́во, без се́мене, вся́ческая созда́вшаго Сло́во Бо́жие, кроме́ хоте́ний плотски́х, и без истле́ния родила́ еси́, без боле́зней ма́терних. Те́м Тя́, Богоро́дицу, и язы́ком, и се́рдцем испове́дающе, велича́ем.