Пе́снь 1.

Ирмо́с: Во́ду проше́д я́ко су́шу и еги́петскаго зла́ избежа́в, изра́ильтянин вопия́ше: Избави́телю и Бо́гу на́шему пои́м.

Красу́йся и лику́й, Ру́сь свята́я, Бо́жие благоволе́ние воспомина́юще, в вода́х Днепро́вских на наро́ды на́ша излия́нное, ны́не же, к тысящеле́тней сла́ве боголю́бцев, Паи́сия приведе́ в по́двизе ве́ры преусе́рднаго.

Разверзо́шася небеса́ и благода́ть Иорда́нова излия́ся на на́с, егда́ благове́рный кня́зь Влади́мир приведе́ ко Христу́ пра́отцы на́ша, ны́не отверза́ются врата́ Це́ркве Небе́сныя, да вни́дет в ню́ Паи́сий боголюби́вый моли́тися за на́с ко Го́споду.

А́ще бы не святи́и боголю́бцы моли́твою пла́менною сраспина́лися за на́с: живи́и у́бо попра́ли бы́ша на́с, с ни́ми же ны́не Паи́сий уго́дник но́вый, преклоня́ет коле́на пред Го́сподем, утвержде́ния це́ркве святе́й хода́тайствует, да не подви́жится во ве́ки.

Богоро́дичен: Свята́я святы́х Богоро́дице Де́во, моли́ся приле́жно Сы́ну Твоему́ Христу́ Бо́гу на́шему, да и в гряду́щем тысящеле́тии бла́гости Своея́ утверди́т Ру́сь правосла́вную, до́м Тво́й святы́й, Твои́ми и Паи́сия прехва́льнаго моли́твами.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных и пое́т Тя́ ду́х мо́й.

Уста́ на́ша отверзо́хом к тебе́, о́тче на́ш Паи́сие, смире́нно восхваля́ем по́двиги твоя́, да испро́сиши и на́м стяжа́ния Ду́ха Свята́го во е́же просвети́тися и утверди́тися све́том присносу́щным, его́же изоби́льно стяжа́л еси́, преподо́бне.

Ищя́ смире́ния Христо́ва, обре́л еси́ прему́дрость Уче́ния Его́, и си́це све́ту фаво́рскому приобщи́лся еси́, Паи́сие преподо́бне. Си́м же озари́ и на́с, па́мять твою́ пра́зднующих, да в ве́ре и любви́ ко Го́споду утверди́мся.

Сла́ва Тебе́, Бо́же на́ш, ра́досте на́ша свята́я, ты́сяща ле́т благоде́явшему наро́ду на́шему правосла́вному, на Тя́ упова́ющему. Ны́не же мо́лимтися, и впре́дь не забу́ди достоя́ния Твоего́, Паи́сия смиренному́дреннаго моли́твами.

Я́ко пчела́ люботру́дная, от стра́жи у́тренния до но́щи, в посте́ и моли́тве подвиза́лся еси́, Паи́сие Боголюби́ве, да сокро́вищем некра́домым, Све́том Ева́нгльския и́стины обогати́ши духо́вных ча́д свои́х, прилепи́тися любо́вию ко Го́споду жа́ждущих.

Богоро́дичен: Све́тло сия́ющая звезда́, Све́та Незаходи́маго Ма́ти, во мра́це грехо́внем блужда́ющим пу́ть спасе́ния озари́ла еси́, Богоро́дице, и мно́зех бо в пусты́нях непрохо́дных, пло́ть ду́ху покори́вших, ангелоподо́бных Бо́гу привела́ еси́: с ни́ми же и Паи́сия ди́внаго, Це́ркве Правосла́вныя украше́ние.

Седа́лен, гла́с 8.

Воды́ живы́я в вертогра́де Бо́жия Ма́тере, Ки́ево-Пече́рстей и Горы́ Афо́нския оби́телех испи́л еси́, си́це бо кла́дезь добротолю́бия яви́лся еси́, Паи́сие преподо́бне, и жа́ждущих пра́вды Бо́жия изря́дно напоя́я, любо́вию ко Го́споду воспламени́в и к ре́вности А́нгельскаго жития́ воздви́гл еси́, моли́ Христа́ Бо́га, грехо́в оставле́ние дарова́ти, чту́щим любо́вию па́мять твою́.

Сла́ва: Еди́ною в ле́то исхожда́л еси́ из ке́ллии твоея́, о́тче Паи́сие, обзира́л еси́ селе́ние ученико́в твои́х, е́здя, обзира́я и назна́менуя коего́ждо и́х ке́ллию со́лнцу заходя́щу, и со слеза́ми моли́лся еси́, вруча́я и́х Бо́гу и глаго́ля: Го́споди, огради́ сие́ ма́лое ста́до, и сохрани́ е́ от волко́в губя́щих е́.

Богоро́дичен: Я́ко Престо́л Царе́в и Свети́льник огне́м Божества́ сия́ющий ве́дуще Тя́, Де́во Чи́стая, и Две́рь, Е́юже Госпо́дь в ми́р вни́де и ве́сь ро́д челове́ческий обожи́, Его́же порфи́рою креще́ния облагода́тствовани бе́хом, да сы́нове све́та бу́дем. Те́мже Всепе́тая, венца́ тысящеле́тняго благоволе́ния Бо́жия, на́с сподо́бльшая, моли́ спасти́ся душа́м на́шим.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Ты́ вои́стинну по́стников похвала́ показа́лся еси́, кре́пость Правосла́вия и свети́ло вселе́нней незаходи́мое, де́вства и воздержа́ния ме́рило, Паи́сие преподо́бне, моли́ Христа́ Бо́га утверди́ти ми́р и братолю́бие в наро́дех на́ших.

А́нгельскаго жития́ ревни́тель вои́стинну яви́лся еси́, преподо́бне, ду́шу и те́ло от страсте́й очи́стив, смире́нием же и любо́вию себе́ украси́в, Ду́ха Свята́го жили́ще досто́йное яви́лся еси́, не премолчи́ и о на́с мольбу́ принести́ ко Го́споду.

Я́корь спасе́ния, наде́жду на Го́спода возложи́в, служе́ние игу́менское в оби́тели Ня́мецкой прия́в, попече́ние о Секу́льстей бра́тии не оста́вил еси́, преподо́бне Паи́сие, кро́тостию и нестяжа́нием си́х обогаща́я, ра́дуяся о Го́споде.

Богоро́дичен: Ру́це Твоя́ Ма́терния к Сы́ну Своему́ просте́рши, во глубине́ зо́л сластьми́ плотски́ми и похотьми́ жите́йскими погружа́емых, Твои́м милосе́рдием изведи́ на́с, Пречи́стая Де́во, да Тя́ непреста́нно велича́ем.

Пе́снь 5.

Ирмо́с: У́тренююще вопие́м Ти́, Го́споди, спаси́ ны, Ты́ бо еси́ Бо́г на́ш, ра́зве Тебе́ ино́го не зна́ем.

Учи́теля и наста́вника, и отца́ чадолюби́ва возведе́ тя десни́ца Бо́жия в земле́ Молда́встей и Букови́нстей, всеблаже́нне Паи́сие, иде́же пустыннолю́бцы, за свято́е правосла́вие в зе́млях на́ших лати́няны и бусурма́ны гони́ми бы́ша, спаса́хуся, любо́вию твое́ю согрева́еми.

Сне́га беле́йшую порфи́ру чистоты́ и огня́ тепле́йшу любо́вь ко Го́споду и бли́жним свои́м стяжа́л еси́, богоблаже́нне, и я́ко пти́ца птенцо́в свои́х, и́ноков Руси́, Букови́ны, Унгровла́хии, Се́рбии и Болга́рии, теплото́ю Ду́ха Свята́го в свято́е бра́тство возгрева́л еси́, па́стырю преди́вный.

И́же све́тлую твою́ па́мять соверша́ющии, спаси́тельныя благода́ти си́лу испроси́, преподо́бне: слепы́м све́т душе́вный, глухи́м слы́шание богому́дренное, хромы́м хожде́ние целому́дренное, и все́м с ве́рою к тебе́ притека́ющым, вся́ я́же ко спасе́нию потре́бная да́руй.

Богоро́дичен: Вся́ ро́ды земли́ Росси́йския ублажа́ют Тя́, Засту́пнице усе́рдная ро́да Христиа́нскаго, николи́же бо оста́вила еси́ на́с, мно́гим испыта́нием пове́рженных бы́вших, еще́ и венце́м тысящеле́тняго покро́ва Твоего́ венча́вшая на́с.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся: к Тебе́ бо возопи́х, и услы́ши мя́, Бо́же спасе́ния моего́.

Полта́вския земли́ па́стыря до́браго пло́д Богоизбра́нный яви́лся еси́, Паи́сие достохва́льне, я́коже Предте́ча иногда́, и сего́ А́нгельскому житию́ поревнова́в, моли́твою со слеза́ми мно́гия к покая́нию приве́л еси́, и́миже Це́рковь Правосла́вная утеша́ется, чту́ще па́мять твою́ приле́жно.

Отве́рзи уста́ на́ша, Го́споди, и испо́лни я́ наи́тием Ду́ха Свята́го, да Твоего́ уго́дника достохва́льно высоту́ добротолю́бия воспое́м, ю́же в вене́ц тысящеле́тней сла́вы святы́х оте́ц на́ших, а́ки кри́н неувяда́емый впле́тши, Тя́ Го́спода Сла́вы просла́вим.

Да пи́щи небе́сныя прича́стник бу́деши, сластолю́бия теле́снаго отве́рглся еси́, преподо́бне, и николи́же пра́зден ви́ден бы́л еси́, в усте́х же моли́тву Иису́сову вы́ну творя́, си́це бо чистоту́ души́ и те́ла а́нгельски соблю́л еси́.

Богоро́дичен: Во́лнами жите́йскими обурева́еми и во страсте́х грехо́вных погружа́еми, под покро́в Тво́й пребега́ем, Ма́ти Бо́жия, потщи́ся помощи́ на́м, рабо́м Твои́м, и ко приста́нищу благооти́шному наста́ви, любо́вию Тя́ ублажа́ющих.

Конда́к к прославле́нию, гла́с 8:

Избра́нный и́ноческаго жития́ ревни́телю, я́ко пчела́ многотру́дная, писа́ньми оте́ческими ду́ши на́ша снабди́л еси́, коего́ждо наставля́я на пу́ть спасе́ния, сего́ ра́ди зове́м ти́: ра́дуйся, Паи́сие прему́дре, ста́рчества духо́внаго в стране́ на́шей возроди́телю.

И́кос:

Земна́го а́нгела и святы́м Це́ркве Небе́сныя сожи́теля, Паи́сия Боголюби́ваго соше́дшеся похва́лим, ве́рнии, его́же десни́ца Бо́жия воздви́же в наро́де на́шем, егда́ лати́няны в преде́лех десны́я страны́ Приднепро́вия злочести́вую у́нию насажда́ху: ве́си и гра́ды, лю́дие и оби́тели правосла́внии опустоша́ху, да воструби́т трубо́ю добротолю́бия в зе́млех Букови́нстей и Молда́встей, и собере́т разсе́янии пустыннолю́бцы наро́дов христиа́нских и си́це опло́т правосла́внаго бра́тства в оби́телех мно́гих учреди́т. Те́мже зове́м ему́: ра́дуйся, Паи́сие о́тче на́ш, Це́ркве Правосла́вныя свети́ло лучеза́рное.

Пе́снь 7.

Ирмо́с: От иуде́и доше́дше о́троцы, в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Егда́ Христо́вым жела́нием уязви́ся се́рдце твое́, Сему́ невозвра́тным по́мыслом после́довал еси́, преподо́бне, сего́ ра́ди Ду́х Святы́й добротолю́бия списа́теля и пра́вила мона́шескаго жития́ начерта́ния вложи́ в уста́ твоя́. Те́мже, Уте́шителя Небе́снаго умоли́, да очи́стит ду́ши на́ша от вся́кия скве́рны.

Хода́тай всеусе́рднейший бу́ди о на́с ко Го́споду, Паи́сие преподо́бне, да не отврати́т Лица́ Своего́ от на́с, егда́ изнемога́ют ду́ши на́ша в го́рестех жите́йских, но десни́цею Свое́ю утверди́т сердца́ и хоте́ния на́ша к де́ланию за́поведей Его́.

Свы́ше на́с назира́я, всеблаже́нне, твои́ми моли́твами от вся́ких бе́д, скорбе́й и клеветы́ челове́ческия сохрани́, в добротолю́бии укрепи́ и пону́ди вни́ти, а́може ничто́же скве́рно вхо́дит в Ца́рствие Небе́сное, да прича́стницы Боже́ственныя Сла́вы бу́дем.

Все́х любо́вию чту́щих тя́, заступле́ния твоего́ не лиши́, уго́дниче Христо́в Паи́сие, но ели́ко мо́щно предста́тельствуй все́м и посо́бствуй в беда́х и напа́стех, да не постыди́мся пред и́щущими на́м зла́я, тя́ бо те́плаго предста́теля и засту́пника в неможе́нии и́мамы.

Богоро́дичен: Я́ко Ма́ти все́х живу́щих разуме́ем Тя́, Пречи́стая Богоро́дице, и Светоно́сную Две́рь, Е́юже про́йде Све́т И́стинный, Христо́с Бо́г на́ш, разори́вый Кресто́м Свои́м сме́рть, Его́же приле́жно моли́, Чи́стая, покая́ния две́рь отве́рзти на́м, вои́стинну Тя́ ублажа́ющим.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Ты́сяща ле́т, я́ко де́нь вчера́шний, во́ньже Святы́м Креще́нием облагода́тствовал еси́ ро́ды на́ша, всеще́дре Го́споди, ны́не же на́ша Свята́я Це́рковь всера́достно воздвиза́ет Ти́ моли́твенника но́ваго, Паи́сия достоблаже́ннаго, его́же моли́твами спаси́ от бе́д наро́ды на́ша.

Избра́ тя Госпо́дь во святы́х изря́дна и в по́стницех преподо́бна, Боголюби́ве Паи́сие, те́мже ны́не ду́х тво́й весели́тся со все́ми святы́ми в земли́ Росси́йстей просия́вшими в ра́дости Го́спода твоего́, Его́же моли́ дарова́ти Це́рквам единомы́слие ве́ры, да не ума́лится любо́вь Христо́ва во испове́дующих Пресвято́е И́мя Его́.

Ху́дость песносло́вия на́шего не отри́ни, Го́споди, но я́ко кади́ло благово́нное, приими́ пе́снь усте́н на́ших, и пода́ждь сердца́м на́шым вдохнове́ние и уму́ просвеще́ние, да досто́йно воспое́м уго́дника Твоего́ Паи́сия, моли́твенника приле́жна о наро́де на́шем.

Богоро́дичен: Спаси́ на́с моли́твами Твои́ми, Пресвята́я Де́во, Богоизбра́нная Отрокови́це, Созда́теля бо все́х была́ еси́ Боже́ственный Хра́м и Пала́та, в Не́йже всели́ся Вы́шний и обложи́ся пло́тию, да сози́ждет Це́рковь Святу́ю во спасе́ние на́ше и обоже́ние.

Пе́снь 9.

Ирмо́с: Ужасе́ся о се́м Не́бо и земли́ удиви́шася концы́, я́ко Бо́г яви́ся челове́ком пло́тски, и Чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.

Весели́тся о тебе́ оби́тель Ня́мецкая, храня́щая святи́и мо́щи твоя́, и Драгоми́рская и Секу́льская учи́теля своего́ тя почита́ют. Земля́ же Полта́вская и оби́тели Днепро́вския, я́коже и Гора́ Афо́нская по́двигом твои́м утеша́ются, иму́ще тя́ моли́твенника преди́вна, Паи́сие Богоблаже́нне.

Обнови́ся я́ко о́рля ю́ность твоя́, егда́ от земны́х к небе́сным возше́л еси́, преподо́бне, иде́же Христу́ Бо́гу предстои́ши, ра́дующеся. Того́ не преста́й моли́ти о ро́де на́шем и о благостоя́нии Це́ркве Святы́я, ублажа́ющей па́мять твою́ с любо́вию.

Изво́лиша мно́зи с тобо́ю жи́ти, блаже́нне, ми́ра сего́ препобеди́вше сла́дость и твоему́ началообра́зному поревнова́вше житию́. Да́руй у́бо и на́м к небе́сней сла́ве твое́й приобщи́тися, да наслади́мся с тобо́ю сия́нием Триипоста́снаго Божества́.

Богоро́дичен: Хва́лим Тя́, благослови́м Тя́, и покланя́емся Ти́, Засту́пнице ро́да христиа́нскаго, проро́ком сбытие́, апо́столом ра́дость, челове́ком утвержде́ние, святи́телем сла́во и преподо́бным похвало́. Бу́ди и на́м покро́в и засту́пница, да соверши́м хожде́ние на́ше пред Го́сподем непосты́дно.

Свети́лен:

Я́ко свети́льник све́та, ду́шу твою́ сия́ньми доброде́телей украси́в, нетле́нный вене́ц от Бо́га прия́л еси́, всеблаже́нне, и ны́не со А́нгелы престо́лу А́гнца Бо́жия предстоя́ще, моли́ся у́бо ко Го́споду, пода́ти на́м ве́лию ми́лость.

Богоро́дичен: Ма́терь Тя́ Бо́жию све́мы вси́ Де́ву вои́стинну, и по рождестве́ яви́вшуюся, любо́вию прибега́ющии к твое́й бла́гости: Тебе́ бо и́мамы гре́шнии предста́тельство, Тебе́ стяжа́хом в напа́стех спасе́ния еди́ну всенепоро́чную.