Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Препоя́ши на́с, Влады́ко Христе́, ору́жием духо́вным на неви́димыя враги́ и научи́, ка́ко подвиза́тися и одоле́ти си́лу и́х, да торже́ственную Тебе́, Бо́гу на́шему, пе́снь в па́мяти уго́дника Твоего́ любо́вию возсыла́ем.

Бо́дростию препоя́сана чре́сла иму́ще, и́ночествующих ли́цы тебе́, о́тче, помина́ют, и ле́тнюю па́мять твою́ в похвалу́ тебе́ соверша́ют, пе́снь Бо́гови возсыла́юще.

Блаже́нство ве́чное воспомяну́в, блаже́нне, тле́нная ми́ра сего́ оста́вил еси́ и А́нгелом совсе́льник да бу́деши, во а́нгельский о́браз обле́клся еси́. Те́м по́стническое житие́ твое́ чте́м, пе́снь Бо́гови возсыла́юще.

Благо́е воздержа́ния и́го возложи́в на ся́, жесто́кое житие́ по́стнических дея́ний стяжа́л еси́, Богому́дре, в не́мже спле́тшися с неви́димым враго́м, победи́л еси́ того́. Те́м сла́вим тя́, пе́снь Бо́гови возсыла́юще.

Богоро́дичен: Простра́нным путе́м на́с ходя́щих и во а́дову про́пасть сла́стию теку́щих, на те́сный пу́ть, к блаже́нному животу́ веду́щий, наста́ви, Богоро́дице: се́ бо, со́браннии раби́ Твои́, в дне́шний де́нь припа́даем к Тебе́, моле́бная возсыла́юще.

Пе́снь 3.

Ирмо́с: Утвержде́й в нача́ле Небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть Свя́т, па́че Тебе́, Еди́не Человеколю́бче.

Утверди́в, о́тче, но́зе твои́ на ка́мени за́поведей Христо́вых, непоколеби́мь пребы́л еси́ от бесо́вских наве́тов, вы́ну хвале́ние поя́ Бо́гу: не́сть Свя́т, па́че Тебе́, Человеколю́бче.

Страсте́й плотски́х разжже́ния ту́чею воздержа́ния угаси́л еси́, ни хле́ба бо, но зе́лие лобо́дное яды́й, пребы́л еси́, пи́щу име́яй па́че сло́во Бо́жие, и сие́ укрепля́ше тя́, преподо́бне.

Гла́д ни во что́ же вмени́л еси́, блаже́нне, на Пита́ющаго пти́цы взира́я, и То́й даде́ тебе́ хле́б не от се́яннаго зе́лия я́сти, и́же бе́ сла́док тебе́, па́че ме́да и со́та.

Чу́дному твоему́ смире́нию удивля́емся, свя́те, я́ко и за лобо́дный хле́б себе́ осужда́л еси́, недосто́йна творя́й и сицево́й пи́щи о не́йже легко́ проше́л еси́ по́стнический пу́ть приско́рбный.

Богоро́дичен: Вознося́щияся горды́нею вы́я на́ша во смире́ние преклони́, Чи́стая Де́во, Ты́ бо еди́на рекла́ еси́: се́ раба́ Госпо́дня, – и ца́рствуеши во ве́ки над все́ми, блажа́щими Тя́ ро́ды.

Седа́лен, гла́с 4:

Вели́ким отце́м ревну́я, кра́йнее возлюби́л еси́ по́стничество, еди́ным бо зе́лием и водо́ю пита́яся, не изнемо́гл еси́ от поста́, но пребы́л еси́ кре́пок, па́че адама́нта. И ны́не воздержа́ния своего́ прие́мь плоды́: мздовоздая́ние от Бо́га. Моли́ся о на́с, преподо́бне, да прии́мем и мы́ мзду́ тобо́ю, я́ко любо́вию блажа́щии па́мять твою́, досточу́дне.

Богоро́дичен: Блажи́м Тя́, ублажи́вшую ро́д челове́ческий, и сла́вим превозше́дшую вся́кое творе́ние, пе́сньми чту́ще безсе́менное зача́тие и несказа́нное Рождество́ Твое́, Мари́е, Ма́ти Де́во Чи́стая.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в, те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Ты́, о́тче, име́яй от Бо́га благода́ть чудотворе́ния, мно́гия напита́л еси́ хле́бом лобо́дным во вре́мя гла́да и, со́ль от пе́пела творя́, ту́не подава́л еси́ приходя́щим. О, сла́ва да́вшему тя́ на́м засту́пника Человеколю́бцу.

Ты́, преподо́бне, моли́твою свое́ю подава́л еси́ лобо́дному хле́бу сла́дость, бы́сть бо сла́док в сне́дь, све́тел и чи́ст, а́ки пшени́чный, со благослове́нием прие́млющим. От о́наго твоего́ благослове́ния пода́ждь и на́м, о́тче свяще́ннейший, я́ко и́мамы тя́ хода́тая ко Христу́ Человеколю́бцу.

Тво́й, о́тче преблаже́нне, лобо́дный хле́б бы́сть сла́док и све́тел со благослове́нием прие́млющим, взе́млющим же о́тай че́рн, а́ки пе́рсть, пока́зовашеся и го́рек. Благослове́нием твои́м благослови́ на́с и пода́ждь от сла́дости твоея́, я́ко седя́й на тра́пезе Небе́сней, Про́хоре сла́вне.

Не о́тай, но ли́к благохвале́ний ве́дуще, душе́вным гла́дом изнемога́ющии, прихо́дим к тебе́, о́тче, в дне́шний де́нь па́мяти твоея́ и мо́лимся: пода́ждь на́м от благода́ти твоея́, да просла́вим о тебе́ Христа́ Человеколю́бца.

Богоро́дичен: Кто́, притека́яй к Тебе́, посра́млен от Тебе́ исхо́дит, Чи́стая Де́во, или́ кто́ прося́й не прие́млет от бла́гости Твоея́, Госпоже́? Е́же и мы́, ве́рующе и испове́дающе, мольбу́ прино́сим Тебе́, Цари́це: да́руй на́м щедро́ты Твоя́, я́ко Блага́я, Блага́го су́щи Роди́тельница.

Пе́снь 5.

Ирмо́с: Вску́ю мя́ отри́нул еси́ от Лица́ Твоего́, Све́те Незаходи́мый? и покры́ла мя́ е́сть чу́ждая тьма́, окая́ннаго. Но обрати́ мя́ и к све́ту за́поведей Твои́х пути́ моя́ напра́ви, молю́ся.

Про́хоре сла́вне, не укосни́ прийти́ и благослове́ния твоего́ сподо́би на́с, я́коже иногда́ все́м подава́л еси́ невозбра́нно, изря́днее же любо́вию сла́вящих тя́ пути́ к за́поведей Госпо́дним напра́ви, мо́лимтися.

Смуща́яй зе́млю и потряса́яй лю́ди, бра́нь наведе́ на ны́ вра́г сопроти́вный, и отсю́ду приспе́ к на́м гла́д душе́вный, но ты́, преблаже́нне, предвари́ ско́ро и моли́твою твое́ю напита́й на́с мы́сленныя пи́щи, и напра́ви пути́ на́ша, мо́лимтися.

Благоутро́бие твое́, свя́те, ви́дяще, мно́зи к тебе́ во вре́мя гла́да прихожда́ху, и́мже хле́б от бы́лий и со́ль от пе́пела, твори́мый рука́ма твои́ма, неоску́дно подава́л еси́. При́зри у́бо и ны́не на ны́ и моли́твою твое́ю да́руй оби́тели на́шей изоби́лие вся́ко, мо́лимтися, о́тче преподо́бне.

Мно́зи, ненави́дящии на́с, воста́ша на ны́ врази́, и́же тща́тся лиши́ти на́с душе́вныя и теле́сныя пи́щи, но ты́ прииди́ к на́м и запрети́ те́м, моли́твою же твое́ю да́руй оби́тели на́шей вся́, я́же на по́льзу, мо́лимтися, Про́хоре преподо́бне.

Богоро́дичен: Вра́г сопроти́вный, зави́дя ста́ду Твоему́, бра́нь дви́жет на ны́ вы́ну, но Ты́, Пречи́стая, я́ко си́льнаго Царя́ Ма́ти, сего́ воспяти́, на́ша же пути́ к за́поведем Госпо́дним напра́ви, мо́лимтися.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся. К Тебе́ бо возопи́х, и услы́ши мя́, Бо́же спасе́ния моего́.

Очи́сти ка́л души́ моея́ моли́твою твое́ю, Про́хоре сла́вне, и согни́вшия стру́пы се́рдца моего́ пла́стырем благода́ти твоея́ исцели́, к тебе́ бо в дне́шний де́нь взыва́ю, я́ко к моли́твеннику спасе́ния моего́.

Побежде́н кня́зь по́мыслом лихоима́ния повеле́ всю́ со́ль, моли́твою твое́ю от пе́пела твори́мую, разгра́бити, я́же обраще́нием в пе́пел па́ки горька́ обре́теся во усте́х его́. От таковы́я зло́бы и стра́сти изба́ви мя́, о́тче, я́ко помо́щник спасе́ния моего́.

Покры́ срамота́ лице́ отъе́млющих пи́щу а́лчущим, и́бо ви́дяще претворе́ние со́ли твоея́, о́тче, в пе́пел, со студо́м во́н изсы́паша, но ты́ повеле́л еси́ пове́рженный пе́пел взима́ти, и бы́сть со́ль чиста́ па́ки моли́твою твое́ю, я́ко и пре́жде. Да́руй и мне́ ны́не моли́тву твою́, молю́тися, помо́щниче спасе́ния моего́.

Скры́ти мня́ще сту́д сво́й, повеле́ша со́ль, претвори́вшуюся в пе́пел, изсы́пати в нощи́ во́н, но но́щь вопия́ше, свиде́тельствуя чудеса́ твоя́, па́ки бо преложи́ся пе́пел в со́ль, и повеле́нием твои́м собира́ху тре́бующии, блажа́ще тя́, преподо́бне, засту́пника своего́.

Богоро́дичен: Но́щь мя́ обдержи́т ле́ности, и, во тьме́ отча́яния ходя́й, к мы́сленному бо́дрости не приближа́ются све́ту. Ма́ти Бо́жия, просвети́ ми́ ра́зум, к славосло́вию наставля́я, да пою́ Ти́ вы́ну: ра́дуйся, Свеще́, Боже́ственным пла́менем возжже́нная.

Конда́к, гла́с 2:

Ве́лиим воздержа́нием удруча́я пло́ть свою́, свя́те, лиши́вся пи́щи челове́ческия, зе́лием и траво́ю вме́сто хле́ба, пе́пелом же, а́ки со́лию, пита́лся еси́, чудоде́йственне Про́хоре. Е́же ви́дя, Госпо́дь преложи́ зе́лие во хле́б и пе́пел в со́ль, и́миже ты́ мно́жество гла́дных препита́л еси́, те́м тя́ чте́м и ублажа́ем.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко в цве́тнице, лику́юще, поя́ху: благослове́н еси́, Бо́же оте́ц на́ших.

Бо́жие схожде́ние и стра́шный Су́д воспомяну́в, кня́зь убоя́ся, я́ко озло́би тя́, Про́хоре преподо́бне, не ве́дый свы́ше в тебе́ де́йствуемыя благода́ти, но, прише́д в себе́, воззва́: благослове́н Бо́г оте́ц на́ших.

Бо́жия раба́ позна́в тя́, о́тче, влады́чествуяй ублажа́ше последи́ чудоде́йствия твоя́, и, прие́м тепле́йшую любо́вь к оби́тели многочуде́сней, ка́яшеся лихоима́ния своего́, и, прося́щи о соде́янном зле́ проще́ния, поя́ще: благослове́н Бо́г оте́ц на́ших.

Я́ко и́стинный служи́тель и ра́б незло́биваго А́гнца, Сы́на Бо́жия, незло́бие свое́ показу́я, озло́бившему тя́ проще́ние да́л еси́, блаже́нне, и утверди́л с ни́м сло́во: да еди́н друга́го вло́жит во гро́б, внегда́ изы́ти от те́ла еди́ному от ва́с повели́т Бо́г оте́ц на́ших.

В преподо́бии пожи́в и свя́то жи́знь свою́ упра́вив, к блаже́нной кончи́не дости́гл еси́, свя́те, те́м, ра́достен, к А́нгельским ликостоя́нием взира́я, воззва́л еси́: благослове́н Бо́г оте́ц на́ших.

Богоро́дичен: В преподо́бии пожи́вшим не поревнова́х, но в ле́ности жи́знь мою́ проводи́х, к кончи́не приближа́ющися, к кому́ воззри́ши, душе́ моя́? Еди́ну то́чию иму́щи наде́жду, Богома́терь, воззови́: Влады́чице, помози́ и изба́ви мя́ ве́чнаго осужде́ния.

Пе́снь 8.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Седмогла́внаго зми́я закла́в копие́м по́стнических дея́ний и к прия́тию венца́ гото́вяся, с ра́достию взыва́л еси́, Про́хоре: лю́дие, Творца́ и Изба́вителя Го́спода по́йте и превозноси́те во ве́ки.

Блаже́нную кончи́ну твою́, преподо́бне, от посла́ния твоего́ услы́шав, кня́зь оста́ви во́ев и спе́шно прите́кл к тебе́, да благослове́ния твоего́ сподо́бится, и не лиши́ся, его́же жела́ше, прие́м твое́ благослове́ние, воспе́т: лю́дие, превозноси́те Христа́ во ве́ки.

Я́ко пре́жде в моли́твах простира́л еси́, преподо́бне, свои́ ру́це, та́ко при кончи́не, все́м да́в целова́ние, горе́ сотвори́в воздея́ние руку́ свое́ю, испусти́л еси́ ду́х сво́й, и вси́ воспе́ша: лю́дие, сла́вите засту́пника своего́ во ве́ки.

Весе́лое отше́ствие твое́ к сожи́тию Небе́сным, весе́лаго испо́лни все́х пла́ча, вси́ бо рыда́ху: ни́щии – пита́теля, си́роты – отца́, мы́ же в дне́шний де́нь, успе́ние твое́ сла́вяще, о́тче, зове́м: лю́дие, превозноси́те Христа́ во ве́ки.

Богоро́дичен: Весе́лия на́шего Вину́ и Ра́дость все́х преподо́бных Ро́ждшая, ра́дости ве́чныя Твои́м хода́тайством сподо́би мя́, Ма́ти Бо́жия, и сподо́би сла́вити Твое́ благоутро́бие во ве́ки.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с Те́м Тя́, Богоро́дицу, А́нгелов и челове́к чинонача́лия велича́ют.

Удиви́ся вся́к, помина́яй житие́ твое́, о́тче, я́ко в те́ле живы́й, А́нгелом по́стническими дея́нии уподо́бился еси́, те́мже тя́ вси́, Про́хоре, велича́ют.

Ни́ща ду́хом тя́ су́ща, преподо́бне, не устыде́ся нося́й диади́му рука́ма свои́ма во гро́б положи́ти, и мы́, ны́не помина́юще успе́ние твое́, ублажа́ем тя́, его́же и А́нгельстии ли́цы в Го́рних селе́ниих ублажа́ют.

Тя́, в жи́зни се́й кре́ст на ра́му нося́щаго, кня́зь на плещу́ в пеще́ру понести́ не устыде́ся, и́же те́плыми слеза́ми облия́ше гро́б тво́й, ка́яся, я́ко озло́би тя́ пре́жде, но обое́ испра́ви твои́м благослове́нием, его́же и на́с сподо́би, я́ко от любве́ пе́сньми тя́ велича́ем.

Сла́ва Тебе́, Тро́ице Пресвята́я, О́тче, и Сы́не, и Ду́ше, Еди́ный Бо́же, Ты́ бо бла́гостию Свое́ю дае́ши сла́ву ве́чную лю́бящим Тя́ от се́рдца, ея́же и на́с сподо́би мольба́ми преподо́бнаго Про́хора и прича́стия святы́х, иде́же ли́ки и́х вы́ну Тя́ велича́ют.

Богоро́дичен: Сла́ва Тебе́, Ма́ти Бо́жия, ве́рных рабо́в еди́но прибе́жище, еди́но упова́ние, еди́на наде́жда и спасе́ние ро́да христиа́нскаго, те́м по до́лгу Тя́ вси́ велича́ем.

Свети́лен:

Ми́ра тле́нная оста́вль, к преми́рным те́сным путе́м дости́гл еси́ и, с ли́ки преподо́бных Безнача́льному Све́ту предстоя́, моли́, я́ко име́яй дерзнове́ние в ну́ждах посо́бствовати, о умире́нии ми́ра и о лю́дех правосла́вных, па́мять твою́ сла́вящих.

Богоро́дичен: Предста́тельнице Святе́й Тро́ице, волну́ющимся в пучи́не жите́йских страсте́й в по́мощь ско́ро предста́ни и ти́хими благосе́рдия Твоего́ волна́ми, доведи́ в блаже́нное приста́нище, я́ко ско́рая Помо́щница все́м, и́мя Твое́ сла́вящим.