Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

От Све́та Све́т, Христе́ мо́й, от Отца́ пре́жде ве́к рожде́йся, сы́й в нача́ле со Отце́м и Ду́хом, согреше́ний мра́к души́ моея́ отгна́в, озари́ у́м мо́й, молю́ся, да возмогу́ пе́ти Варлаа́ма, Твоего́ уго́дника.

От ко́рене блага́го блажа́йшая о́трасль прозя́бл еси́, земны́х маловре́меннаго жития́ избе́гл еси́. Те́м, ны́не чистоты́ вене́ц прие́мля, со а́нгелы Христу́ воспева́еши: пои́м Го́сподеви, я́ко просла́вися.

Земна́я и мимотеку́щая, я́ко уме́ты, вмени́в, Христа́ еди́наго приобре́л еси́, Его́же сою́зом любве́ уязви́в ду́шу твою́, и Того́ потща́лся еси́ обрести́ ненасыща́емыя добро́ты.

Богоро́дичен: Услы́ша Е́ва прама́ти: в печа́лех роди́ши ча́да. Ты́ же, чи́стая Де́во, услы́шала еси́: Госпо́дь с Тобо́ю, ра́дуйся! — И ра́дованным гла́сом, Богоневе́сто, печа́ль прама́тере потреби́ла еси́.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

По апо́столу, о́тче, вы́шних ища́, и мудрова́ние име́я е́же к Бо́гу, вся́, я́же на земли́, оста́вил еси́ и па́че естества́ добро́ты сподо́бился еси́.

Све́том Боже́ственным осия́емь о не́м, и пу́ть, к жи́зни веду́щ, позна́л еси́, о́тче на́ш Варлаа́ме, и равноа́нгельнаго ра́ди жития́ чудотво́рец наре́клся еси́.

Зако́ны пита́яся все́х Творца́ и Влады́ки, те́мже и невече́рним облистава́емь Све́том, све́тлое со́лнце яви́лся еси́ и прему́дрости сокро́вищем, ми́р обогаща́я.

Богоро́дичен: Во ины́х жена́х ма́ти, до́ндеже де́ва, не позна́ся, ни ма́ти по рождестве́ де́вствовати сподо́бися, на Тебе́ же, Де́во Богома́ти, обое́ сбы́стся. Те́м весе́лием ду́ха воспева́ю: не́сть непоро́чны, па́че Тебе́, Влады́чице.

Седа́лен, гла́с 8.

Красоты́ мирски́я от млады́х ногте́й, преподо́бне, возненави́дев, еди́наго же Христа́ от се́рдца возлюби́л еси́ и Тому́ все́ю душе́ю прилепи́лся еси́; я́ко безпло́тен, на земли́ пожи́в с пло́тию, сла́ву же мимотеку́щую и бога́тство в ничто́же вмени́в, небе́сное бога́тство восприя́л еси́ и сла́ву ве́чную. Те́мже ублажа́ем свято́е твое́ успе́ние и, в не́м торжеству́юще, вопие́м ти́: богому́дре о́тче на́ш Варлаа́ме, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Богоро́дичен: Я́ко Всенепоро́чная Неве́сто Творца́, я́ко неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́нию мя́ су́ща скве́рное оби́телище и де́моном игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́. Светоно́сная, Нетле́нная, отжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.

Пе́снь 4.

Ирмо́с: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Я́ко в порфи́ру, и виссо́н, и в ца́рскую багряни́цу оде́яся тобо́ю вели́кая Росси́йская земля́: дне́сь у́бо, све́тло торжеству́ющи, весели́тся, Варлаа́ме, име́ющи тя́ в себе́, я́ко неистощи́мое сокро́вище.

Ми́ра любве́ отре́кся, дости́гл еси́ го́рний Иерусали́м, иде́же Христо́с со Отце́м и Ду́хом, и, венце́в от Него́ сподо́бився, со безпло́тными ли́ки пое́ши, прие́мля Его́ сия́ние.

А́ще у́бо, о́тче, те́сный и боле́зненный пу́ть ше́ствовал еси́ в житии́, но оба́че нетле́нную жи́знь насле́довал еси́, отону́дными све́тлостьми бога́тно просвеща́яся, богоблаже́нне Варлаа́ме.

Богоро́дичен: И́стинно Тя́ се́нь свиде́тельствова многоразли́чными о́бразы, я́ве показу́ющи Воплоще́ннаго из Тебе́, Еди́наго Тро́ицы, Пречи́стая, неизме́нно, Богома́ти Влады́чице, и ми́р обнови́вша.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Яре́м Госпо́день от ю́ности, му́дре, взе́м, после́довал еси́ Христу́ скорбьми́ и слеза́ми, преподо́бне, мы́сленно о́ко к Нему́ име́я, до́ндеже и святы́х селе́ний дости́гл еси́, обре́т поко́ище Го́рняго гра́да.

Страсте́й отгна́в мглу́ я́ве заря́ми, о́тче, доброде́телей, просвеще́ние Ду́ха в се́рдцы прие́м, Варлаа́ме, и́мже попали́л еси́ вся́ де́монская ополче́ния и по́стническим лико́м причта́лся еси́.

Насажде́н во дво́рех Госпо́дних и в дому́ Бо́га на́шего процве́л еси́. Прие́м небе́сное се́мя, богодухнове́нне, серде́чною браздо́ю кла́с стори́чествующь прине́сл еси́, те́мже обогати́лся еси́ венце́м чуде́с.

Богоро́дичен: Упра́ви у́м мо́й, Влады́чице, тружда́ющийся в пучи́не скорбе́й и потопля́емь наше́ствием тлетво́рных страсте́й, и спаси́, Богоро́дице, к Тебе́ прибега́ющия: ины́я бо Помо́щницы, Чи́стая, ра́зве Тебе́, не зна́ем.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Мо́ре жите́йское, любому́дрием испыта́в и разуме́в су́етно су́що и я́ко вско́ре погиба́ющо, отве́ргл еси́, еди́ному прилепи́лся еси́ Христу́. Его́же ра́ди и тяготу́ дневну́ю поне́сл еси́, о все́х Тому́ восхожде́ния в се́рдцы свое́м полага́я.

Ве́трилом окриля́емь воздержа́ния, и отту́ду дости́гл еси́ в приста́нище благоути́шное, поще́нием пита́я ду́шу твою́, преподо́бне, и све́тлу все́х Творцу́ предста́вил еси́ ю́. Те́мже и Христо́с прия́т ю́, я́ко светоза́рную звезду́, и своея́ сла́вы соприча́стну соде́ла.

А́нгельская во́инства су́щему во пло́ти житию́ твоему́ удиви́шася, о́тче Варлаа́ме, бу́ри бо страсте́й отбе́гл и соверше́ннаго ра́ди жития́, ве́трилом воздержа́ния дости́гл еси́ в благоути́шное приста́нище Христо́во.

Богоро́дичен: Обетша́вшия ны́ го́рьким дре́вле дре́ва вкуше́нием и па́дшия поползнове́нием, Пречи́стая, обнови́ла еси́, Зижди́теля ро́ждши, Сло́во Ипоста́сное, Де́во Ма́ти Влады́чице.

Конда́к, гла́с 8.

Я́коже други́й Илия́, о́тче, до́ждь с небесе́ све́л еси́: о́н у́бо о́гнь сведе́ и царя́ удиви́, ты́ же лю́ди твоя́ возвесели́л еси́ и торжествова́ти устро́ил еси́. Вели́кий бо Но́вград вельми́ тобо́ю хва́лится, име́я мо́щи твоя́ в себе́, его́же сохраня́й от вра́г непоколеби́ма, да зове́м ти́: ра́дуйся, преподо́бне Варлаа́ме, о́тче на́ш.

И́кос:

А́ще и челове́к естество́м бы́л еси́, преподо́бне о́тче, но Вы́шняго Иерусали́ма яви́лся еси́ согра́жданин и, челове́к у́бо естество́м, безпло́тных че́сти сподо́бился еси́. Те́мже и са́мая, зря́ще, чудеса́ похва́льная удивля́ют на́с и науча́ют зва́ти тебе́ такова́я: ра́дуйся, благочести́ва отца́ о́трасле; ра́дуйся, ма́тере благогове́йныя ве́тве; ра́дуйся, смире́ния высото́; ра́дуйся, я́ко к позна́нию Бо́га вся́ приводя́; ра́дуйся, я́ко мно́га чудеса́ о Христе́ сотвори́л еси́; ра́дуйся, целому́дрия сто́лпе, и́мже де́монская свире́пства искорени́шася; ра́дуйся, свети́льниче многосве́тлый; ра́дуйся, я́ко увяди́л еси́ плотска́я мудрова́ния; ра́дуйся, я́ко до́ждь моли́твою све́л еси́ и, па́ки наводне́нию бы́вшу, моли́твою водото́чныя о́блаки востя́гл еси́; ра́дуйся, Вели́каго Нова́града похвала́ и утвержде́ние, его́же и сохрани́ от вра́г непоколеби́ма до конца́, да зове́м ти́: ра́дуйся, преподо́бне Варлаа́ме, о́тче на́ш.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Зе́льным поще́нием, я́ко благово́нною пи́щею, пита́я ду́шу твою́, преподо́бне Варлаа́ме, те́мже и Трисо́лнечному Божеству́ предстоя́, со а́нгелы пое́ши: благослове́н Бо́г оте́ц на́ших.

Облиста́л еси́ я́коже невече́рнее со́лнце, оте́чество твое́ просвеща́я, преподо́бне Варлаа́ме, тмы́ избавля́я страсте́й, и на на́с наве́тующих сове́ты разори́, от вра́г непреткнове́нным бы́ти на́м, пою́щим: благослове́н Бо́г оте́ц на́ших.

Я́ко на боже́ственную доброде́телей ле́ствицу воздержа́нием, о́тче, возше́д, у́мными очесы́ Христа́ Царя́ ви́дел еси́, оби́льною десни́цею по числу́ доброде́телей, Варлаа́ме, дарова́ния даю́ща от души́ вопию́щим: благослове́н Бо́г оте́ц на́ших.

Дрема́ния отню́д и сна́ твои́м очесе́м не да́л еси́, до́ндеже возме́здие от Христа́ трудо́в обре́л еси́, наслажде́ние небе́снаго Ца́рствия, е́же угото́ва от ве́ры пою́щим: благослове́н Бо́г оте́ц на́ших.

Богоро́дичен: Обновля́ются в Тебе́ естества́ зако́ны: па́че естества́ бо естество́м Непостижи́маго, Де́во, Бо́га Емману́ила пресла́вно, Чи́стая, родила́ еси́ в на́ше ве́рных обновле́ние.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Слеза́ми твои́ми, о́тче Варлаа́ме, умыва́яся, житие́ проше́л еси́, и те́ми мно́жества де́монов потопи́л еси́, ве́рных же мы́сли возвесели́л еси́, пою́щих: вся́ дела́ Го́спода по́йте и превозноси́те Его́ во ве́ки.

Уязви́лся еси́ боже́ственным жела́нием, всеблаже́нне, те́мже и непоро́чное и пра́ведное житие́ проходя́, до́ндеже дости́гл еси́ ца́рскаго престо́ла, отону́дными светлостьми́ осия́я пою́щия: вся́ дела́ Го́спода по́йте и превозноси́те Его́ во ве́ки.

К Све́ту незаходи́мому, сла́вне, взя́лся еси́, наслажде́ние же земны́х веще́й оплева́в вы́шняго ра́ди наслажде́ния, па́че воздержа́нию поревнова́л еси́ и страсте́й пла́мень потща́лся еси́ угаси́ти слеза́ми твои́х исто́чник, Варлаа́ме, вопия́: вся́ дела́ Го́спода по́йте и превозноси́те Его́ во ве́ки.

Богоро́дичен: Распя́тие и погребе́ние, И́же от Тебе́ небра́чно, Де́во, произы́де, претерпе́в на́с ра́ди муче́ние, Его́же страсте́м ревну́я, преподо́бный Варлаа́м крестови́дно муче́ния поще́нием Тому́, Чи́стая, после́дова.

Пе́снь 9.

Ирмо́с: Я́же пре́жде со́лнца Свети́льника Бо́га возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

Пожи́в на земли́ равноа́нгельно, равноа́нгельну обре́л еси́ све́тлость, моли́ непреста́нно Изба́вителя, Варлаа́ме, о творя́щих благоче́стно па́мять твою́, о преблаже́нне, мона́шествующих похвало́.

У́зкий и приско́рбный ше́ствовав пу́ть, о́тче Варлаа́ме, и теле́сне у́бо преста́вился еси́, ду́хом же жи́в, предстои́ши Бо́гу. Но я́ко име́я дерзнове́ние, Ему́же в житии́ рабо́тал еси́, моли́ спасти́ ду́ши на́ша.

Исцеле́ний яви́лся еси́ струя́ оби́льная, многомяте́жнаго пла́мене у́глие страсте́й угаси́л еси́. У́м бо тво́й неокра́ден, преподо́бне о́тче, соблю́л еси́ и, я́ко кре́пок, Варлаа́ме, побежда́еши искуси́теля.

Богоро́дичен: Еди́на иму́щи дерзнове́ние, Влады́чице, за ве́сь ми́р Сы́ну Твоему́ моли́ся, не помина́я безчи́сленных собла́зн на́ших, и покры́й лю́ди, вопию́щия Ти́ умиле́нным гла́сом: спаси́, Чи́стая Богоро́дице, тебе́ досто́йно велича́ющия.

Свети́лен.

Восто́ка восто́ков, разу́мнаго Со́лнца, Христа́, светоза́рная луча́ возсия́, и свети́льник многосве́тлый, пусты́нное воспита́ние и чистоты́ кра́сная оби́тель, Христо́вы добро́ты я́сно зря́, Его́же сия́ньми у́м тво́й озари́л еси́. Те́мже тя́ свети́льника стяжа́вше, о́тче на́ш Варлаа́ме, мо́лим тя́ в ми́ре сохране́нным бы́ти па́мять твою́ почита́ющим.

Богоро́дичен: Неизрече́ннаго чревоноше́ния была́ еси́, Всенепоро́чная Неве́ста, и я́ко су́щи честне́йший хра́м, Богоро́дице: Све́т бо преве́чный в Тя́ всели́ся, и родила́ еси́ Бо́га Сло́ва. Пою́ще Твое́ Рождество́, велича́ем досто́йно, Всенепоро́чная Отрокови́це.