Пе́снь 1.

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая..

Благода́тную по́мощь Твою́, Го́споди, низпосли́ на́м, воспе́ти уго́дника Твоего́, Варна́ву Гефсима́нскаго, благоче́стия подви́жника и оби́тели Се́ргиевы украше́ние.

Ча́до ми́лости Госпо́дни роди́телем твои́м бы́л еси́, свя́те. Те́мже и лю́ди, о́крест су́щии, ви́дяще сие́, зело́ ра́довахуся, благодаря́ще Бо́га.

А́ще и на́йде на тя́ боле́знь тя́жкая во ю́ности твое́й, о́тче, оба́че десни́цею Госпо́днею охраня́емь, я́ко избра́нник Бо́жий, здра́в яви́лся еси́.

Пе́снь 3.

Ирмо́с: Еди́не Ве́дый челове́ческаго существа́ не́мощь и ми́лостивно в не вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный хра́ме неизрече́нныя сла́вы Твоея́, Человеколю́бче.

Призва́ние ко и́ночеству предзре́ся в тебе́, блаже́нне, еще́ о́троку су́щу, егда́ пе́рвее у гро́ба преподо́бнаго Се́ргия моли́лся еси́.

Жела́ние послужи́ти Бо́гу име́я, о́тче, во оби́тель Святы́я Тро́ицы прише́л еси́, иде́же нача́ло спасе́ния твоего́ положи́.

Ви́дяще любо́вь твою́ к уедине́нному житию́, преподо́бне, и предзря́ще служе́ние твое́ наро́ду Бо́жию, а́вва Анто́ний со ста́рцы посла́ша тя́ во оби́тель Пресвяты́я Богоро́дицы, Гефсима́ния нарица́емую.

Богоро́дичен: О Пресвята́я Де́во, Путеводи́тельнице ве́рных! Ко стези́ покая́ния на́с напра́ви и спаси́ ду́ши на́ша.

Седа́лен, гла́с 2:

Любо́вь Христо́ву ве́лиим смире́нием стяжа́л еси́, преподо́бне о́тче Варна́во, тече́ние живота́ твоего́ Бо́гу вверя́я и при́сно смотре́нию Госпо́дню ра́дуяся.

Богоро́дичен: Ма́ти Бо́жия, благослове́нная Мари́е, лю́ди Твоя́, во ско́рби су́щия, ми́лостию Твое́ю не оста́ви.

Пе́снь 4.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

В ми́ре ско́рбни бу́дете, но дерза́йте, я́ко А́з победи́х ми́р, ре́кл еси́, Го́споди, Твои́м ученико́м. Сего́ ра́ди скорбя́щим уте́шители ди́вныя от избра́нных твои́х да́руеши.

Ско́рби наро́да Бо́жия позна́в, уте́шитель при́сный и ско́рый лю́дем яви́лся еси́, о́тче Варна́во преми́лостиве, те́мже тя́ любо́вию ублажа́ем.

Мно́го боле́зновал еси́ о приходя́щих к тебе́, преподо́бне о́тче, те́мже и си́х призыва́л еси́ непра́вды и прегреше́ния своя́ слеза́ми покая́ния омыва́ти и во вся́цем благоче́стии и чистоте́ пребыва́ти.

Богоро́дичен: Ма́ти Пречи́стая, О́гнь Боже́ственный во чре́ве прии́мшая несказа́нно, непра́вды и прегреше́ния на́ша попали́ благода́тию Сы́на Твоего́.

Пе́снь 5.

Ирмо́с: Тво́й ми́р да́ждь на́м, Сы́не Бо́жий, ино́го бо, ра́зве Тебе́, бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Ева́нгельская словеса́ о до́бром па́стыре в се́рдце твое́м слага́я, преподо́бне, мно́гое попече́ние о приходя́щих к тебе́ име́л еси́ и, я́ко чадолюби́вый оте́ц, си́х утеша́л еси́.

Си́рых, боле́знующих и о гресе́х свои́х скорбя́щих во мно́жестве привле́кл еси́, о́тче пресла́вне Варна́во, и си́х сло́вом кро́тким твои́м врачева́л еси́.

Та́йная челове́ков прозрева́л еси́, о́тче преподо́бне, и я́звы грехо́вныя цели́л еси́ да́нною тебе́ благода́тию, та́же, бу́дущая прови́дя, лю́ди ко и́стине направля́л еси́.

Богоро́дичен: Ско́рби и печа́ли челове́ков ве́си, Ма́ти Пресвята́я, те́мже и Небе́сною любо́вию Твое́ю ве́рно сия́ врачу́еши.

Пе́снь 6.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние..

Обы́дет бе́здна беззако́ния Росси́йскую зе́млю, не́сть избавля́яй и мно́зи ве́рнии вменя́тся я́ко о́вцы заколе́ния, оба́че да́ст Госпо́дь кре́пость немощству́ющим и избавле́ние, — проро́чески ре́кл еси́, преподо́бне.

Дни́е гряду́т, егда́ напа́стьми тьмы́ безбо́жия Це́рковь Росси́йская обурева́ема бу́дет, но, Сама́го Христа́ иму́щи Ко́рмчаго, ти́хое приста́нище обря́щет, возсия́вшу со́лнцу ве́ры, — проро́чески утеша́л еси́ ве́рныя, блаже́нне Варна́во.

Гряду́щее губи́тельство Це́ркве Христо́вы предста́нет, — веща́л еси́, о́тче, — ме́рзость и запусте́ние во хра́мех Бо́жиих истоща́тся, го́ре и мра́к в сердца́х люде́й, я́ко ды́м, исче́знут, егда́ ти́и к Бо́гу с покая́нием обратя́тся, зане́ Госпо́дь, Кре́пость немощству́ющих, да́рует и́м избавле́ние.

Богоро́дичен: Це́рковь на́шу во дни́ гоне́ний и страну́ Росси́йскую во дни́ нестрое́ний держа́вою Твое́ю сохрани́ла еси́, Ма́ти Де́во. Сего́ ра́ди и на бу́дущее вре́мя от вра́г ви́димых и неви́димых бу́ди на́м при́сная Засту́пница.

Конда́к, гла́с 2:

Печа́льнику земли́ Росси́йския, преподо́бному Се́ргию, от ю́ности после́довал еси́, свя́те Варна́во, и заве́т ста́рца твоего́, си́це ре́кшаго: та́ко хо́щет Бо́г: сло́вом и хле́бом пита́й а́лчущих, — пои́стине до конца́ испо́лнил еси́. Сего́ ра́ди и ны́не мо́лим тя́, не оста́ви на́с, уте́шительный о́тче, Небе́сною любо́вию твое́ю.

И́кос:

Возлюби́в, преподо́бне, Христо́вы Боже́ственныя за́поведи и возненави́дев ми́ра сего́ наслажде́ние, прише́л еси́ усе́рдно к Тому́ и бы́л еси́ свети́льник, просвеща́я концы́ блиста́нием духо́вным. Те́м припа́дая молю́ тя́: просвети́ мои́ о́чи душе́внеи воспе́ти твоя́ по́двиги, поще́ние, и бде́ние, и сле́зы, боле́зни, и изможде́ние те́ла, блаже́нныя ра́ди бу́дущия жи́зни, ея́же ны́не наслажда́ешися; моли́ непреста́нно о все́х на́с.

Пе́снь 7.

Ирмо́с: Тебе́, у́мную, Богоро́дице, пе́щь разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́ во чре́ве Твое́м всеце́л, хва́льный отце́в Бо́г и препросла́влен.

Ду́хом кро́тости врачу́я душе́вныя неду́ги, преподо́бне, приходя́щия к тебе́ приводи́л еси́ к покая́нию и ева́нгельским за́поведем науча́л еси́.

Словесе́м твои́м и наставле́нием после́дующе, преподо́бне о́тче Варна́во, ве́рнии лю́дие Оте́чества твоего́ ми́р мно́г стяжава́ху и та́ко житие́ свое́ во сла́ву Бо́жию устроя́ху.

Да́ром врачева́ния обогати́ тя́ Госпо́дь, преподо́бне о́тче Варна́во, те́мже и сло́вом твои́м смире́нным во сла́ву Бо́жию неду́жныя цели́л еси́.

Богоро́дичен: Боле́зни на́ша душе́вныя и теле́сныя заступле́нием Твои́м уврачу́й, Пречи́стая, и от сме́рти духо́вныя изба́ви на́с.

Пе́снь 8.

Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Ве́ра кре́пкая, любы́ нелицеме́рная и упова́ние тве́рдое чисте́е зла́та блеща́хуся в тебе́, преподо́бне о́тче. Сего́ ра́ди от Бо́га да́р разсужде́ния и прозре́ния прия́ти сподо́бился еси́. Те́мже мно́зи, взыску́ющий во́лю Бо́жию, к тебе́ притека́ху.

Печа́льник и наста́вник бы́л еси́, преподо́бне о́тче, не то́чию про́стым, но и во вла́сти су́щим. Те́мже и Вели́каго Госуда́ря Всеросси́йскаго в ке́ллии твое́й духо́вне утеша́л еси́, гряду́щая страда́ния и сме́рть му́ченическую того́ предузрева́я.

Пома́заннику Бо́жию проре́кл еси́, преподо́бне Варна́во, претерпе́ти страда́ния во сла́ву Бо́жию: то́й бо яви́ся же́ртва за грехи́ на́ша, посрамле́ние губи́телей земли́ Росси́йския и сла́ва Це́ркве.

Пе́снь 9.

Ирмо́с: О́браз чи́стаго Рождества́ Твоего́ огнепали́мая купина́ показа́ неопа́льная, и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Веле́ние ста́рца, е́же пита́ти ча́да Бо́жия хле́бом и сло́вом, да́же до часа́ сме́ртнаго со тща́нием соблюда́я, во́лю Бо́жию испо́лнил еси́, о́тче Варна́во. Те́мже и сподо́бися у олтаря́ ми́рне ду́х тво́й Го́споду преда́ти.

За́поведь Христо́ву, — да лю́бите дру́г дру́га, — потща́лся еси́ испо́лнити до конца́, преподо́бне Варна́во, и сего́ ра́ди в черто́ги Небе́сныя я́ко возлю́бленный и благослове́нный Бо́гом возше́л еси́.

Живя́ во сла́ву Бо́жию, моли́твою я́ко Серафи́м, дея́нием я́ко Херуви́м, служе́нием же я́ко А́нгел бы́л еси́, преподо́бне о́тче Варна́во. Сего́ ра́ди и ны́не с ли́ки Небе́сными Бо́га ра́достне прославля́еши.

Богоро́дичен: Строи́теля оби́тели И́верския, преподо́бнаго Варна́ву, хода́тая пред Тобо́ю и́мамы, Пречи́стая Ма́ти Де́во, с ни́мже сподо́би и на́с досто́йно взыва́ти Тебе́: ра́дуйся, Блага́я Врата́рнице, две́ри ра́йския ве́рным отверза́ющая.

Свети́лен:

Свети́льника ве́ры и о́браз благоче́стия яви́л еси́ на́м, Го́споди, Варна́ву преподо́бнаго. Се́й бо, пра́ведно пожи́в, мно́гия лю́ди к покая́нию приведе́ и све́том ева́нгельским просвети́. Его́же моли́твами, Христе́ Бо́же, да́руй на́м ве́лию ми́лость.

Богоро́дичен: Просвети́ на́с све́том Сы́на Твоего́, благослове́нная Влады́чице, к не́мощем на́шим милосе́рдна бу́ди, про́чее вре́мя живота́ на́шего в ми́ре и покая́нии сподо́би сконча́ти и на Стра́шнем Суди́щи Христо́ве Хода́таица неотсту́пна яви́ся.