Пе́снь 1.

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Космы́ па́мять восхвали́ти, иере́йства красоту́ и испове́дания украше́ние, ра́зум да́ждь ми́, Христе́, да Тебе́ послужи́вша и за Тя́ пострада́вшаго просла́влю.

О́браз па́стырства неуко́рна и́мамы тя́, о́тче Космо́, в де́лании бо се́м изря́ден показа́лся еси́, о́вцы ста́да твоего́ собира́я и уча́, за ни́х же и живо́т сво́й положи́ти не отре́клся еси́.

Сла́вы го́рния прича́стника соде́ла тя́ Госпо́дь, Космо́ му́чениче, зде́ до́бре подвиза́вся за Сло́во Его́, та́мо на Небесе́х венце́м све́тлым венча́ешися.

Богоро́дичен: Му́ченик ли́цы Тя́ основа́ние бы́ти вменя́ют, Де́во, по́двигу си́х. У Креста́ Ти́ стоя́щей, ору́жие про́йде Твою́ непоро́чную ду́шу, Ю́же боже́ственная Любы́ от рождества́ распали́.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Утверди́л еси́ ду́шу твою́ на ка́мени веростоя́тельном, от млады́х ногте́й в пра́вой ве́ре стоя́ти науче́н бы́в, от нея́же и в ста́рости масти́тей не подви́глся еси́, Космо́ прему́дре.

Пасы́й и тружда́яйся я́ко патриа́рси от ю́ности твоея́, Космо́ пресви́тере, пасти́ наро́ды жезло́м свяще́нства призыва́ешися промышле́нием боже́ственным, я́коже дре́вле купиноглаше́нием Моисе́й.

Оте́чества Небе́снаго жела́я, оте́честву земно́му спострада́ти не отве́рглся еси́, о́тче Космо́, но бе́дствий сего́ ча́шу ку́пно пия́ше ве́ру и любо́вь свою́ не оста́вльшим отце́м.

Богоро́дичен: Ю́нице чи́стая, Ма́ти нескве́рная, скве́рну ду́ш на́ших омы́й, отыми́, я́ко вси́ согреша́ем мно́го от не́мощи и произволе́ния, но Ты́, я́ко Блага́я, премене́ния бу́ди Хода́таица.

Седа́лен, гла́с 6:

И́же Авраа́ма на се́чу царе́м укрепля́ше, И́же Нави́нови со́лнцем послу́шавый, Бо́же, Моисе́овы ру́це воздея́ннии на сокруше́ние Амали́ка укрепи́вый, возвы́си и ру́це твои́, в труде́х и моле́ниих состаре́вшии, на сокруше́ние Амали́ковых вну́ков непра́во ходя́щих, и ру́це твои́ в селе́ниих го́рних не и́мут осла́бнути.

Богоро́дичен: Е́ва прама́терь преще́ния пло́д принесе́ на́м, его́же вкуше́нием сме́рти и сра́ма позна́ние обрето́хом, Де́ва же ны́не спасе́ния пло́д израсти́, живота́ и сла́вы вкуше́ние произволя́ющим плодоприне́сши. О се́м торжеству́юще, ка́ко Тя́ Ма́терь не нарече́м все́м живу́щим, Но́выя Жи́зни нача́льную челове́ком.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Распя́таго за ны́ вы́ну в се́рдцы твое́м нося́ па́мятованием непреста́нным, о́тче Космо́, страда́ния путе́м восте́кл еси́ во свята́я нерукотворе́нная, иде́же пре́жде вни́де Христо́с, ве́чныя кро́вы на́м устроя́яй.

Естества́ не́мощь, ниже́ ле́т преутружде́ние к теле́сному упокое́нию сове́тники не избра́л еси́, Космо́ терпели́ве, оба́че ду́ха бо́дростию пло́ти дебельство́ отгоня́я, на де́лание свое́ до ве́чера жи́зни поспеша́ше.

Яви́ся му́ж кре́пок ты́, о́тче, земли́ Сара́товстей благослове́нное прозябе́ние, пра́ведным в ве́ре стоя́нием сто́лп кре́пости ея́ созида́я, да не подви́жится от основа́ния И́стиннаго Живота́.

Богоро́дичен: Иса́иа сла́вы Твоея́ гряду́щия, Де́во, предзре́нием ужасе́ся, зна́мение спребыва́ния Боже́ственнаго лю́дем Сию́ полага́ет, я́ко николи́же си́це бы́сть в челове́цех, е́же се́й Де́вы ражда́ющия чревоноше́ния пло́д несказу́ема Бо́га яви́.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Маккаве́и свяще́ннейшии кро́тость и стра́х для Еди́наго Бо́га сохра́ньше, на гу́бящия Изра́иля до́бле вооружи́шася, и́хже о́бразом и ты́, о́тче, сту́дныя разврати́тели ненаказу́емы зре́ти не восхоте́в, ве́рныя на противуста́ние си́м сподвига́ше.

У́з утесне́ние темни́чных у́зами благове́стия свя́зана не сотвори́т несвобо́дна, но́сит бо в се́рдцы и во усте́х ми́ру всему́ необъиме́нное Сло́во.

Че́сти нетле́нныя иере́йства свята́го чре́во бо́гом иму́щим не уступи́, а́ще и суему́дрию своему́ о́бщника тя́ сотвори́ти жела́ху, безу́мнии, оба́че растли́ти не возмого́ша тверде́йшаго испове́дника.

Богоро́дичен: Елисаве́тино сла́дкое проглаго́лание сбы́стся, и́мже благословля́ше Тя́, Го́спода Ма́терь и́стинную, и ны́не се́ вси́ ро́ди челове́честии блажи́м Тя́, я́ко херуви́м сла́внейшую.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Не́сть премене́ния в ве́це гряду́щем душа́м боголю́бцев, Ка́мене ве́ры, Христа́, не подви́жутся, Его́же пред челове́ки испове́даша на земли́, Того́ обрета́ют пред а́нгелы небе́сное испове́дание, в ню́дуже дости́гнути поспеши́л еси́, о́тче, от ве́ка сего́ преме́ннаго.

Искуша́еми, я́ко зла́то в горни́ле, сребро́ чи́стое принесо́стеся, святи́и, в сокро́вищницы небе́сныя, с ни́миже и до́брый Косма́ ны́не тала́нт причте́, и́же в души́ свое́й испове́данием приумно́жи.

Космо́, о́тче свяще́ннейше, ты́ побе́дныя му́ченик ли́ки свое́ю побе́дою дости́гл еси́, е́же е́сть ве́ра твоя́, е́юже утвержда́шеся, помози́ на́м, грехо́м побежда́емым, да не всу́е на ны́ и́мя Христо́во нарица́ется.

Богоро́дичен: А́нгелом пе́нии Тя́ велича́ющим челове́цы сподража́ти тща́тся, а́ще и гре́шни есмы́, немощно́е на́ше славосло́вие от серде́ц возноси́мое не пре́зри.

Конда́к, гла́с 2:

О́тче, отце́в украше́ние, вои́стинну житие́ твое́ украси́ся, Космо́, и́стинной ве́ре после́дованием, и да́же до сме́рти испове́данием ея́.

И́кос:

Тя́, о́тче, моли́твенника земли́ на́шея позна́хом, ея́же и порожде́ние бы́л еси́, тобо́ю ны́не украша́ется и о тебе́ ра́дуется, я́ко души́ твоея́ красоту́ Госпо́дь на све́щнице церко́вном утверди́, да све́т испове́дания твоего́ на ны́, ча́да твоя́, возсия́ет, и мра́к уны́ния дале́че отжене́т от серде́ц благоче́стно почита́ющих по́двиги и дела́ твоя́, и́хже ра́ди с любо́вию вопие́м ти́: Ра́дуйся, о́тче Космо́, иере́е и му́чениче хва́льный!

Пе́снь 7.

Ирмо́с: Не послужи́ша тва́ри, богому́дрии па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Цве́ты доброде́телей нося́ще, отсе́ле го́рних садо́в уха́ние предвосхи́тил еси́, в си́х же ны́не я́ко кри́н благоуха́нный, при́сно ра́достию цвете́ши неизглаго́ланною.

Еди́ною челове́цы умира́ют, а́ще ду́шу без поро́ка соблюду́т, посему́ те́ло убива́ющих не боя́тися Сло́во Бо́жие глаго́лет, и сему́ Косма́ му́ченик бы́сть послу́шатель ве́рнейший.

Враги́ челове́ку дома́шния его́ зло́ба ми́ра сего́ содева́ет, си́це и тебе́, о́тче, го́рькое напое́ние от руку́ бли́жних и зна́емых твои́х прия́ти Госпо́дь попусти́, е́же ты́ испи́л еси́ терпеливоду́шне.

Богоро́дичен: У́тро ми́рови возсия́ но́вое в Рождестве́ Твое́м, Преблага́я, о́чи слепы́м просвеща́ющее, и ра́дости серде́чныя исполня́ющее, я́ко взы́де Со́лнце Пра́вды Христо́с Бо́г, и не за́йдет во ве́к, ниже́ помрачи́тися и́мать.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Кла́сы спе́лыя ру́це твои́ пожина́ша, егда́ зе́млю, от нея́же я́ко вся́к челове́к изы́де, возде́ловаше, и се́ я́ко кла́с златы́й душа́ твоя́ восхище́на бы́сть в жи́тницу Христо́ву, и я́ко хле́бное приноше́ние на алта́рь возложи́ся.

Ра́дость печа́ли насле́дует в путе́х непоро́чных, и весе́лия де́нь но́щи обстоя́ний и тя́гот, та́же и ско́рби и ра́ны полу́нощи жития́ твоего́, о́тче Космо́, дне́м несконча́емым преидо́ша в оби́телех Све́та.

А́ще и подвиго́шася а́довы врата́ на Це́рковь Христо́ву, мня́ще вотще́ в земли́ на́шей потреби́ти Ю́, не поколеба́шеся до́блий Косма́ иере́й от Ка́мене Ве́ры, и утверди́ ны вопи́ти: отце́в и на́ш Бо́же, благослове́н еси́.

Богоро́дичен: Ше́дше, наро́ди, Горе́ святе́й Бо́жией поклони́мся, от Нея́же Спасе́ние на́м нерукосе́чно изы́де и ми́р Собо́ю испо́лни, Христо́с Бо́г, отце́в и на́ш Бо́же, благослове́н еси́.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ева́нгельски на земли́ пожи́ти сподо́би тя́ Христо́с Госпо́дь, о́тче Космо́ му́дре, ле́ствицею за́поведей Его́ на Не́бо восхо́д сотвори́ти, нището́ю духо́вною основа́ние положи́в, ра́достию в поноше́ниих наверши́л еси́ блаже́нства.

Но́ваго страстоте́рпца от со́нма ве́лия святы́х сро́дник на́ших прославля́ем тя́, о́тче, обрето́х бо Госпо́дь тя́ ве́рна во все́х де́лех твои́х, я́же в Дому́ Его́ я́ко до́брый слуга́ творя́ше, живо́т сво́й о ча́дех церко́вных полага́юще.

Изба́ви моли́твами твои́ми, о́тче Космо́, ча́да твоя́ от вся́кия лю́тости противобо́рца и Ца́рствия Бо́жия ны́ доведи́, моля́щияся тебе́ те́пле, да возмо́жем ловле́ния лука́ваго избе́гнути и коне́чнаго осужде́ния предста́тельством твои́м.

Богоро́дичен: Е́же соде́яхом зла́я, не помяни́ на́м, Блага́я су́щи, егда́ душа́ на́ша разлуча́тися бу́дет настоя́щаго сего́ жития́, не возгнуша́тися мо́лим Тя́ на́шего недосто́инства, а́ще и мно́го согреша́ем вси́, бу́ди на́м, Ма́ти, Засту́пница.

Свети́лен:

Све́тлости жития́ твоего́ поучи́тися душа́ми и умы́ подвиза́ющеся, просвеще́ния очесе́м на́шим серде́чным взыску́ем и коллу́рием моли́тв твои́х исцеле́ния.

Богоро́дичен: Све́тлую Царе́ву Пала́ту и Черто́г Присносу́щнаго Све́та Тя́ ве́мы, Де́во Пресве́тлая, и отку́ду серафи́мския о́чи обря́щем, во е́же воззре́ти к Тебе́.