Пе́снь 1.

Ирмо́с: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

Похва́лим, ве́рнии, пресла́вную и честну́ю дво́ицу, прехва́льных му́ченик Рома́на и Дави́да, и́миже Христо́с просвети́ всю́ страну́ Ру́сскую.

Дарова́вшему си́м да́р благода́ти исцеле́ния, стра́сти и неду́ги исцеля́ти, Влады́це Христу́ воспои́м Спа́су и Изба́вителю на́шему, я́ко просла́вися.

Я́коже рече́ Христо́с: ве́руяй в Мя́, дела́, я́же А́з творю́, и то́й сотвори́т, и бо́льша си́х. Сия́ прие́мша, святи́и му́ченицы, боля́щия исцеля́ете и ду́хи бесо́вския отго́ните.

Богоро́дичен: Честне́йшую херуви́м и сла́внейшую серафи́м, ро́ждшую на земли́ Бо́га Сло́ва, чистоты́ хра́м душе́вный, Богоро́дицу Мари́ю ве́рно восхва́лим.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Честны́м пренесе́нием теле́с ва́ших, сла́внии, просла́вися честна́я Це́рковь, иму́щая в себе́ благода́ти сокро́вище неоску́дное и пречу́дное.

Святы́я ра́ки ва́ши честны́я иму́щи в себе́ да́ры благода́тныя, пресла́вная телеса́ ва́ша, святи́и му́ченицы Бори́се и Гле́бе, врачи́ неду́жным.

Све́тел вои́стину и прече́стен Вышегра́д, превы́ше бо все́х градо́в превознесе́ся, имы́й в себе́ честну́ю це́рковь, в ню́же пренесе́ни бы́ша би́сери многоце́ннии.

Богоро́дичен: Утверди́, Де́во, помышле́ние мое́ и у́м мо́й пла́вающий утиши́, Ко́рмчию бо родила́ еси́ и Очи́стника собла́зном на́шим.

Седа́лен, гла́с 8:

Христо́вы уве́девше за́поведи благи́я, Того́ возлюби́вше, страстоно́сцы сла́внии, о убие́нии телесе́ неради́сте, ду́ши же прекра́сныя в ру́це Христу́ преда́сте: о́в, копие́м пробода́емь, веселя́щеся, други́й же, я́ко а́гня, без ми́лости закала́емь, сего́ ра́ди прия́ша да́р исцеле́ния, му́ченицы самобра́тнии, моли́те Христа́ Бо́га грехо́в оставле́ние дарова́ти чту́щим любо́вию святу́ю па́мять ва́шу.

Пе́снь 4.

Ирмо́с: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Бра́тие прекра́снии, ра́дуйтеся, я́ко венцы́ жела́емыя от Бо́га прие́мше и сего́ ра́ди оста́вльше всю́ сла́ву тле́ющую, да Христа́ приобря́щете еди́наго, Би́сера безце́ннаго.

Христо́вы уве́девше за́поведи Боже́ственныя и Тому́ после́дующе, — воста́нет бо, — рече́, — бра́т на бра́та, — сего́ ра́ди прия́сте ну́ждную сме́рть, я́ко а́гнцы закала́еми.

Прободе́нному на Кресте́ копие́м тебе́ ра́ди после́дуя стопа́м, А́гнцу Бо́жию, сла́вный страда́льче, уби́йцам не проти́влься, Бори́се чу́дный, во́ине до́блий.

Богоро́дичен: Ра́дуйся, душе́вная Це́рковь и руно́ пречи́стое богоро́сное, воды́ живы́я исто́чниче неистека́ющий, Влады́чице, запечатле́нный де́вством, рабы́ Своя́ сохрани́ от все́х зо́л.

Пе́снь 5.

Ирмо́с: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны́, Го́споди ра́зве Тебе́ ино́го не ве́мы, и́мя Твое́ имену́ем.

Я́ко А́гнец беззло́бив, не рету́я же, ни вопия́, Сы́н Бо́жий веде́ся на сме́рть. Вы́ же, Сему́ после́дующе, не от врага́, но от сро́дника убие́ни бы́сте.

Во́зрастом и ю́ностию о любви́ преле́стней небрего́сте, святи́и, Христо́вы за́поведи исполня́юще, ве́чную жи́знь приобрето́сте.

Вторы́й Солу́нь ра́дуется — в стране́ Ру́сстей Вышегра́д сла́вный, име́я в себе́ благода́ть сла́вну пренесе́нием теле́с ва́ших.

Богоро́дичен: Уврачу́й, Пречи́стая Влады́чице, ду́шу мою́, молвы́ же и напа́сти бесо́вския прогоня́щи, Врача́ бо страсте́м родила́ еси́ и Творца́ все́х.

Пе́снь 6.

Ирмо́с: Я́ко во́ды морски́я, Человеколю́бче, волна́ми жите́йскими обурева́юся, те́мже, я́ко Ио́на, та́ко вопию́ Ти́: возведи́ от тли́ живо́т мо́й, Благоутро́бне Го́споди.

Вся́ко ме́сто освяти́ся и и́же в неду́зех исцелева́ются посеще́нием ва́шим, врачи́ пресла́внии, слепи́и прозира́ют, хро́мии хо́дят, слу́цыи простира́ются.

Во всю́ зе́млю изыдо́ша веща́ния апо́стольская, ва́шими же чуде́с исцеле́нии вселе́нная испо́лнися, ве́рным бо источа́ете здра́вие оби́льно, сла́внии.

Сло́во Твое́ испо́лнися, Человеколю́бче, е́же рече́ ученико́м Свои́м: гра́д бо не укры́ется, верху́ горы́ стоя́. И се́ бо Вышегра́д просвеща́ет всю́ зе́млю Ру́сскую явле́нием святы́х Твои́х, Го́споди.

Богоро́дичен: Всепе́тая Де́во, све́тлый о́блаче, прожени́ мра́к души́ моея́, Я́же Со́лнце пра́ведное ро́ждшая, и наста́ви мя́ на стезю́ живо́тную мольба́ми Свои́ми, Пренепоро́чная.

Конда́к, гла́с 4.

Яви́ся дне́сь в стране́ Ру́сстей благода́ть исцеле́ния все́м, к ва́м, блаже́ннии, приходя́щим и вопию́щим: ра́дуйтеся, засту́пницы те́плии.

И́кос:

Новоявле́нных му́ченик пресла́вная па́мять дне́сь Ру́сстей земли́ све́тло возсия́, све́тлы бо яви́стеся зве́зды от Бо́га, чудесы́ облиста́юще, и́хже в па́мять Госпо́дь все́м ве́рным подае́т исцеле́ние и в темни́це избавле́ние. Те́мже и мы́, немощни́и, прииди́те, воспои́м сия́, да восприи́мем здра́вие, просвеща́ете бо слепы́я и неду́жныя исцеля́ете, засту́пницы те́плии.

Пе́снь 7.

Ирмо́с: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Вра́жия исчеза́ют полцы́, и пога́нская телеса́ по́стлана быва́ют под но́ги во́инов на́ших, призыва́ющих имена́ святы́я ва́ша, му́ченицы Христо́ви.

Пресла́вно просла́вися вся́ко ме́сто и страна́, в ни́хже созда́ни бы́ша честны́я це́ркви все́ми ве́рными, о и́мени ва́шем, сла́внии Христо́ви му́ченицы.

Кто́ не диви́тся зе́млен ва́шему целому́дрию, цари́ и кня́зи, судии́ же и вси́ ве́рнии, ва́ша чудеса́ пресла́вная ви́дяще, неисце́льныя бо стра́сти исцеля́ете вопию́щим: благослове́н Бо́г оте́ц на́ших.

Богоро́дичен: Пречи́стая Влады́чице, Влады́ку все́х ро́ждшая, влады́чества мя́ зла́го свободи́в, наста́ви на пу́ть живо́тный, Благослове́нная Богоро́дице Прера́дованная.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Помо́щники в ско́рбех, и в напа́стех, и беда́х, и в темни́це избавле́ние, и на бра́ни заступле́ние ва́шим посеще́нием от Бо́га прие́млем, призыва́юще ва́с, хра́брии, бра́тие прекра́снии.

Исцеля́ете стра́сти, и бе́сы прого́ните, и напа́сти разоря́ете все́м, сла́вящим пресла́вно свято́е пренесе́ние теле́с ва́ших, всехва́льнии му́ченицы Христо́ви, засту́пницы гра́ду на́шему.

О, блаже́нная, свята́я вои́стину, дво́ице преди́вная! Вы́ кня́зи князе́м, хра́бри же Христо́ви му́ченицы, о на́с те́плии моли́твенницы, вы́ бо обрета́етеся вско́ре, от бе́д избавля́юще.

Богоро́дичен: Омраче́ние души́ моея́ прожени́, Всечи́стая Де́во, неразу́мия се́рдце мое́ просвети́ и у́м мо́й озари́, ро́ждшая Вели́каго сове́та А́нгела, Иису́са Человеколю́бца, Бо́га же и Челове́ка, во обое́м соверше́на.

Пе́снь 9.

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, О́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Благослове́н Госпо́дь Бо́г все́х, страну́ же и вся́ лю́ди защища́я, чту́щих ва́ши ра́ки, сла́внии, в честне́й це́ркви, в ню́же принесе́ни бы́сте свята́я телеса́ ва́ша сла́вная, Рома́не и Дави́де.

Боже́ственною ре́вностию распала́еми, о че́сти земне́й и вла́сти небрего́сте, Христо́вы за́поведи соблюда́юще Боже́ственныя, те́мнаго кня́зя попра́ли есте́, святи́и.

Благослове́н Госпо́дь, Бо́г Изра́илев, венча́вый дво́ицу пречестну́ю, в стране́ Ру́сстей уго́дников Свои́х, и́миже посети́ на́с, Светода́вче, свы́ше, умоле́н быва́я си́ми о на́с, Спа́се на́ш.

Богоро́дичен: Благослове́н, Госпоже́, Пло́д Твоего́ чре́ва, призва́вый на́с из тмы́ и се́ни сме́ртныя и освяти́вый Себе́ лю́ди избра́нны. Сего́ моли́, Пречи́стая Влады́чице, рабо́м Свои́м побе́ды дарова́ти на враги́ проти́вныя.

Свети́лен.

Прииди́те, приступи́те, ве́рнии, в Боже́ственную це́рковь пресла́вных му́ченик Рома́на и Дави́да, и́же оста́виша сла́ву вре́менную и возлюби́ша сла́ву безконе́чную и в не́й лику́ют с небе́сными чи́нми. Моли́те о на́с, честну́ю ва́шу па́мять пра́зднующих.