Акафистник

Помочь сайту
·
·
·
·

Канон святым преподобным отцам Зосиме, Савватию и Герману Соловецким (на пренесение мощей)

Память: 30 (17) апреля, 21 (8) августа, 21 (8) августа, 12 августа (30 июля), 21 (8) августа, 21 (8) августа, 21 (8) августа, 10 октября (27 сентября)

Глас 2.

Припев: Преподóбнии отцы́ Зоси́мо, Савва́тие и Ге́рмане, моли́те Бóга о на́с.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Просвеще́нием Трисо́лнечнаго Божества́ озари́вшеся, прему́дрии, свети́ла яви́стеся осиява́юща всю́ду: те́м и на́с, страстьми́ омраче́нных, просвеще́нием благода́ти озари́ти помоли́теся и су́щаго получи́ти спасе́ния.

Све́том Боже́ственныя благода́ти просвеща́еми, Зоси́мо, Савва́тие и Ге́рмане преблаже́ннии, ве́рно светоно́сную ва́шу па́мять торжеству́ющих просвети́те и от тьмы́ грехо́вныя моли́твами ва́шими, преподо́бнии, изба́вите.

Ду́ху Свято́му хра́ми, прему́дрии, бы́сте, и к Нему́ все́ духо́вное жела́ние обрати́сте, и сего́ ра́ди кро́тких зе́млю насле́довасте. Те́мже бу́рю страсте́й на́ших укроти́те, преподо́бнии, да в тишине́ боже́ственней песносло́вим ва́ша по́двиги.

Богоро́дичен: Лю́тыми страсте́й наве́ты обурева́емь е́смь, Отрокови́це, и прило́ги грехо́вными погружа́емь; к Твоему́ еди́ному ти́хому и невла́емому приста́нищу любо́вию прибега́ю, Всепе́тая: уще́дривши спаси́ мя́, Присноде́во.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся́ ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Высото́ю смире́ния украша́еми, Зоси́мо, Савва́тие и Ге́рмане преподо́бнии, все́ жела́ние ко Влады́це своему́ простро́сте, я́ростная же движе́ния на враги́ вооружи́сте, со изря́дными де́лы свои́ми, посто́м и моли́твами.

Пло́тей свои́х воста́ния кре́пким поще́нием, преподо́бнии, умертви́вше, оби́телище бы́сте Влады́чне; Его́же умоли́те изба́витися скорбе́й и мучи́тельства страсте́й с ве́рою притека́ющим к ва́м, преблаже́ннии.

Иму́ща споспешеству́ющу боже́ственную си́лу, исцеле́ния безчи́сленная источа́ют мо́щи ва́ша, Зоси́мо, Савва́тие и Ге́рмане преподо́бнии: отгоня́ют от челове́к боле́зни теле́сныя и душе́вныя стра́сти врачу́ют по́двиги ва́шими, всечестни́и.

Богоро́дичен: Тружда́ет мя́ бу́ря грехо́вная и возмуще́ние безме́стных помышле́ний: умилосе́рдися, Всенепоро́чная, и ру́ку ми́ по́мощи я́ко ми́лостива простри́, да спасе́н велича́ю Тя́.

Седа́лен, гла́с 4:

Жите́йское мо́ре воздержа́нием безбе́дно преплы́сте и ко приста́нищу мы́сленному безстра́стия, ра́дующеся, доидо́сте, преподо́бнии отцы́ на́ши Зоси́мо, Савва́тие и Ге́рмане, богому́дрии и преблаже́ннии; моли́те Христа́ Бо́га, спасти́ся душа́м на́шим.

Пе́снь 4.

Ирмо́с: Прише́л еси́ от Де́вы не хода́тай, ни а́нгел, но Са́м, Го́споди, вопло́щся и спа́сл еси́ всего́ мя́ челове́ка. Те́м зову́ Ти́: сла́ва си́ле Твое́й, Го́споди.

Умо́м и душе́ю предочи́стившеся, преподо́бнии, пре́лесть душепа́губную всеконе́чне от себе́ отверго́сте и, чу́вства своя́ к нему́тней тишине́ упра́вивше, во ото́к морски́й, прему́дрии, всели́стеся, воспева́юще: сла́ва си́ле Твое́й, Го́споди.

Зако́ном Писа́ния Свяще́ннаго и ра́зуму святы́х поуча́ющеся, Зоси́мо, Савва́тие и Ге́рмане преподо́бнии, вся́кия доброде́тели о́бразу навыко́сте, му́дрей пчеле́ подо́бящеся, и прия́телище изря́дно Ду́ху Свято́му, прему́дрии, бы́сте, воспева́юще: сла́ва си́ле Твое́й, Го́споди.

Вся́ческими, преподо́бнии, светя́щеся чудоде́йствы и боже́ственною озаря́еми благода́тию, все́м позна́стеся сокро́вище исцеле́ний неистощи́мо, страсте́й отгоня́ете омраче́ние и вра́жия низлага́ете ополче́ния, воспева́юще: сла́ва си́ле Твое́й, Го́споди.

Богоро́дичен: Из утро́бы Твоея́, Чи́стая Отрокови́це, возсия́в Боже́ственное Со́лнце, су́щия во тьме́ многобо́жия просвети́ и в се́ни сме́ртней седя́щия, Влады́чице, осия́, Ему́же воспева́юще зове́м: сла́ва си́ле Твое́й, Го́споди.

Пе́снь 5.

Ирмо́с: Просвеще́ние во тьме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя́ сия́нием Твои́м, ино́го бо, ра́зве Тебе́, бо́га не зна́ю.

Те́сный пу́ть простра́нному предпоче́тше, во ото́це морсте́м вся́ческая утесне́ния ра́достию претерпева́ли есте́, преподо́бнии, боже́ственными же поуче́нии ду́ши своя́ очища́юще, на добро́ту Бо́жию неизглаго́ланную при́сно взира́ли есте́, преблаже́ннии.

Незло́биви, и кро́тцы, и ми́лостиви бы́сте, преподо́бнии, вся́ зло́бы и стре́лы вра́жия до конца́ погу́бльше; те́мже, благода́ть от Бо́га свы́ше прие́мше, ми́лостивно на́с посеща́йте, любо́вию святу́ю па́мять ва́шу почита́ющих.

Я́ко вели́кое со́лнце, вели́чием по́двиг ва́ших возсия́сте на́м, Зоси́мо, Савва́тие и Ге́рмане преподо́бнии, земны́я осиява́юще концы́ и вся́ просвеща́юще све́том богоразу́мия. Те́мже мо́лим вы́: просвети́те на́ш ра́зум, отцы́ преблаже́ннии.

Богоро́дичен: От мно́жества востаю́щих на ны́ в боле́зни исчезе́ живо́т на́ш, погрязо́хом в про́пасти безчи́сленных согреше́ний. Спаси́ ны́, Влады́чице, и возведи́ я́ко ми́лостива, Всенепоро́чная, Тебе́ бо и́мамы Еди́ну Предста́тельницу непобеди́му, раби́ Твои́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Ева́нгельски, преподо́бнии, Христа́ возлю́бльше, ми́ра отврати́стеся, в непроходи́мыя же и в пусты́я ото́ки заше́дше, Еди́ному Влады́це своему́ прилепи́стеся, от Него́же и трудо́м воздая́ние прие́мше, животу́ ве́чному я́ве причасти́стеся, за пою́щия вы́ моли́теся.

Богому́дрыми по́мыслы преудобри́вшеся, преподо́бнии, и вся́, я́же на земли́ льстя́щая, я́ко уме́ты вмени́вше, к нестаре́ющему преста́вистеся блаже́нству. Ны́не с ли́ки во све́те безпло́тных си́л о Бо́зе при́сно сликовству́ете, преблаже́ннии.

Стра́нна и пресла́вна, преподо́бнии, о Бо́зе содева́юще чудеса́, все́м, и́же в мо́ри пла́вающим и зле́ стра́ждущим, призыва́еми ско́ро предстае́те, от бе́д избавля́юще; и на́с, бе́дствующих лю́те и напа́стьми одержи́мых, ми́лостивно предста́вше спаса́йте, преблаже́ннии.

Богоро́дичен: Греха́ тя́жкое бре́мя, е́же отяготе́ на мне́, Пречи́стая, облегчи́: Ты́ бо еси́ Предста́тельница гре́шником пресла́вная, Изба́вителя и Спа́са ро́ждши земны́м.

Конда́к, гла́с 2:

Христо́вою любо́вию уязви́вшеся, преподо́бнии, и Того́ кре́ст на ра́мо взе́мше, понесли́ есте́, боже́ственне вооружи́вшеся на неви́димыя враги́ и, непреста́нныя моли́твы я́ко копие́ в рука́х иму́ще, кре́пко победи́ли есте́ бесо́вская ополче́ния; благода́ть Госпо́дню прие́мше цели́ти неду́ги ду́ш и теле́с притека́ющих ко святы́м моще́м ва́шим, чуде́с лучи́ испуща́ете всю́ду. Те́м зове́м ва́м: ра́дуйтеся, преподо́бнии отцы́ на́ши Зоси́мо, Савва́тие и Ге́рмане, мона́хом украше́ние.

Пе́снь 7.

Ирмо́с: о́бразу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

В моли́твах бо́дренное, и в поще́ниих кре́пкое, и терпе́ние во искуше́ниих неосла́бное, ума́ чистото́ю, преподо́бнии, показа́сте, земли́ бо и земны́х досто́йно отсту́пльше, Небе́сное обрето́сте наслажде́ние, воспева́юще: благослове́н Бо́г оте́ц на́ших.

Пло́д духо́вный и же́ртву непоро́чную, житие́ свое́, преподо́бнии, Влады́це принесо́сте, в воздержа́нии бо вся́цем пожи́сте, от Него́же и по́чести трудо́м я́ко подвигополо́жницы восприе́мше, де́йствуете пресла́вная чудеса́, воспева́юще: благослове́н Бо́г оте́ц на́ших.

Страстьми́ коле́блющихся и бу́рею грехо́вною, преподо́бнии, погружа́емых, я́ко вели́кое к Бо́гу дерзнове́ние иму́ще, руково́дствуйте и всегда́, прему́дрии, сохраня́йте почита́ющих ва́с благоче́стно, я́ко да воспева́ем: благослове́н Бо́г оте́ц на́ших.

Богоро́дичен: Изба́ви на́с от напа́стей и скорбе́й, и печа́лей разли́чных, и иноплеме́нных наше́ствия, и междоусо́бныя бра́ни, Влады́чице Всепе́тая, я́ко да Тя́ сла́вим и Сы́ну Твоему́ взыва́ем: благослове́н Бо́г оте́ц на́ших.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

В пребыва́лища при́сно живу́щая всели́стеся, преподо́бнии, нетле́нных бла́г наслажда́ющеся и Трисо́лнечныя све́тлости исполня́ющеся. На́с, призыва́ющих вы́, те́плым предста́тельством ва́шим от все́х лю́тых спаса́йте, пою́щих: благослови́те, вся́ дела́ Госпо́дня, Го́спода.

На́м, любо́вию почита́ющим ва́с и честно́е ва́ше соверша́ющим торжество́, Христо́вы уго́дницы Зоси́мо, Савва́тие и Ге́рмане, преподо́бнии отцы́, согреше́нием испроси́те оставле́ние, и страсте́й премене́ние, и Боже́ственнаго све́та осия́ние, пою́щим: благослови́те, вся́ дела́ Госпо́дня, Го́спода.

Тро́ичен: О Пребезнача́льное естество́ и Триипоста́сное еди́нство, о́тче и Сы́не и Ду́ше Пресвяты́й, приими́ о на́с моли́твенники Твоя́ преподо́бныя уго́дники и пода́ждь прегреше́нием разреше́ние, и житию́ исправле́ние, и злы́х отчужде́ние, и сподо́би ны́ в ми́ре воспева́ти Твою́ держа́ву: благослови́те, вся́ дела́ Госпо́дня, Го́спода.

Богоро́дичен: Я́ко Еди́на ро́ждшая безсе́менным рождество́м Христа́ Бо́га, Ма́ти Безневе́стная Чи́стая, Сего́ ми́лостива сотвори́, Влады́чице, спасти́ рабы́ Твоя́ от наси́лия и мучи́тельства вра́жия, вопию́щия Христу́ Сы́ну Твоему́: благослови́те, вся́ дела́ Госпо́дня, Го́спода.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Вы́спрь к Бо́гу иму́ще мы́сль, Зоси́мо, Савва́тие и Ге́рмане преподо́бнии, земна́я оста́вльше, Небе́сная восприя́сте, Бо́гу и Спа́су ва́с вельми́ просла́вльшу, трудо́в ра́ди ва́ших и воздержа́ния неосла́бнаго. Сего́ ра́ди почита́ем ва́с, преблаже́ннии.

и́хже бла́г, преподо́бнии, получи́сте и Небе́сныя сла́вы, ея́же от Бо́га сподо́бистеся, и Ему́же вы́ну предстоя́ще, моли́теся и на́м неотлуче́нным бы́ти, мо́лим вы́, ра́достию и боже́ственною любо́вию почита́ющим по́двиги ва́ша, всечестни́и.

О боже́ственнии и богому́дрии отцы́ Зоси́мо, Савва́тие и Ге́рмане! Ми́рови ми́р от Бо́га низпосла́тися испроси́те, Це́рквам соедине́ние, святе́й оби́тели ва́шей утвержде́ние и все́м правосла́вным христиа́ном предста́тельство и спасе́ние, преблаже́ннии.

Богоро́дичен: Пощади́ мя́, Христе́ Спа́се, пощади́ моли́твами Ро́ждшия Тя́, и все́х святы́х Твои́х, егда́ ся́деши суди́ти дело́м мои́м, беззако́ния и грехи́ моя́ пре́зри, я́ко Еди́н безгре́шен. Ми́р же пода́ждь и спасе́ние воспева́ющим Тя́, Ми́лостиве Бо́же и Человеколю́бче.

Свети́лен:

Мирска́го пристра́стия, я́ко скве́рны уклони́вшеся и а́лчбою пло́ть умертви́вше, блаже́ннии, Небе́сною сла́вою со а́нгелы обогати́стеся, те́мже непреста́нно о на́с моли́те Христа́ Бо́га, преподо́бнии отцы́ на́ши Зоси́мо, Савва́тие и Ге́рмане.

Yandex Metrika