Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Боже́ственными светоли́тии му́ченицы облива́еми, светоно́сный се́й и све́тлый пра́здник ва́ш всегда́ благоче́стно хва́лящия, страсте́й мглы́ изба́вите.

Сло́во Бо́жие, вопло́щся, ва́с показа́, всеблагосла́вныя па́стыри, Того́ возвести́ти Божество́ заблу́ждшим, преподо́бнии, и неве́дением бе́дствующим.

Во́д животво́рных Ду́ха исполня́еми, иста́явшия зно́ем лю́тым безбо́жия напои́сте и к воде́, сла́внии, спасе́ния наста́висте.

Богоро́дичен: Разреши́ся пра́отцев, Чи́стая, запреще́ние, па́че ума́ Рождество́м Твои́м, Пречи́стая, и пе́рвый восприя́ша рая́ вхо́д, велегла́сно восхваля́юще Тя́.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Огне́м Боже́ственным у́м разже́г, Васи́лие всему́дре, я́коже па́стырь изря́днейший, ве́щь безбо́жия попали́л еси́.

Ду́ха све́том су́щия во тме́ лю́тых, сла́вне, к просвеще́нию привле́кл еси́ свята́го креще́ния.

Стези́ твоя́ к Бо́гу испра́вишася, Васи́лие, вся́ от преле́стнаго пути́ благода́тию к богоразу́мию обрати́ша.

Богоро́дичен: Избавля́ющаго челове́ки от наси́лия вра́жия, родила́ еси́ си́льнаго Го́спода, Пречи́стая Де́во Всепе́тая.

Седа́лен, гла́с 3.

Ми́ром пома́зания освяти́вшеся, па́стырие яви́стеся лю́дем богому́дрым, и, я́ко а́гнцы чи́сти, поже́ршеся, принесо́стеся Сло́ву Началопа́стырю, поже́ршемуся, я́ко овча́ти, му́ченицы всехва́льнии и свети́льницы всеми́рнии. Те́мже торжеству́ем вси́ любо́вию боже́ственную па́мять ва́шу.

Богоро́дичен: Я́ко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже, я́ко вину́ Тя до́брых блажа́ще при́сно, со а́нгелом вопие́м Ти́: ра́дуйся, Благода́тная.

Крестобогоро́дичен: Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Кресте́, ма́терски пла́чущи, глаго́лаше: что́ Тебе́ воздаде́ евре́йский беззако́нный собо́р и неблагода́рный, и́же мно́гих и вели́ких Твои́х, Сы́не Мо́й, даро́в наслади́выйся? Пою́ Твое́ Боже́ственное снизхожде́ние.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Свяще́ннейших му́ченик ли́к да пое́тся, свяще́нства благода́тию и муче́ния озаря́емь, и пое́т, веселя́ся: сла́ва си́ле Твое́й, Го́споди.

Богоно́снии ко́рмчии Це́ркве, Ефре́м и Агафодо́р, Васи́лий и Капи́тон, Ефе́рий, Евге́ний и боже́ственный Елпи́дий, Ду́хом Святы́м яви́шася.

Научи́вшеся боже́ственным, отцы́ боже́ственнии, лю́ди в преподо́бии и пра́вде и́стинно упасо́сте и коне́ц блаже́нный муче́нием прия́сте.

Уме́ршии неве́рием уме́ршаго воста́нием получи́ша жи́знь ве́чную, тобо́ю ве́ровавше Христу́ Бо́гу на́шему, му́чениче свяще́ннейший Васи́лие.

Богоро́дичен: Умерщвле́нныя оживи́ла еси́ челове́ки, Жи́знь ипоста́сную ро́ждши, Де́во, па́че вся́кия мы́сли, Христа́, Бо́га на́шего, Челове́ка за милосе́рдие бы́вша.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Ча́шу честна́го муче́ния испи́сте, и́мя Госпо́дне, богоно́снии отцы́, ве́рно призыва́юще.

Еди́н, ме́ртвым вдыха́яй воскресе́ние, моли́твою твое́ю уме́ршаго, Васи́лие, воздвиза́ет, уясня́я твое́ пропове́дание.

Равноче́стна Отцу́ Сы́на пропове́дающе, многобо́жное мучи́тельство идолонеи́стовства, отцы́, отгна́сте.

Богоро́дичен: Блаже́ни су́ть лю́дие, ве́дущии Тя́, Всенепоро́чная, Влады́ки все́х Ма́терь и любо́вию ублажа́ющии Тя́.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Похвала́ми Агафодо́ра же, и Евге́ния, и Васи́лия вели́каго, и му́драго Елпи́дия увенча́ем, иера́рхи и до́блия су́щия му́ченики.

Зако́нными воспита́нии ду́ха, всему́дрии, беззако́ннующим зако́ны спаси́тельныя предложи́вше, благоче́стия к просвеще́нию ты́я привлеко́сте.

Яви́стеся от разли́чных гра́д овча́та, еди́нех же люде́й па́стырие и Боже́ственнаго гра́да насле́дницы, в не́мже обита́ют Бо́гу угоди́вшии му́ченицы.

Богоро́дичен: Зако́на Тя́ се́ни, проро́ков же гада́ния прообража́ху, Де́во, неизрече́нным сло́вом Рождество́ име́вшую, спаса́ющее ми́р, Всенепоро́чная.

Конда́к, гла́с 2.

Светоно́сный де́нь наста́ па́стырей, епи́скопствовавших све́тло в Херсо́не, и́хже воспева́ем пра́здник, пострада́вших за Христо́вы о́вцы. Священному́ченицы, моли́те Пастыренача́льника Христа́ и на́с причести́ десна́го ове́ц стоя́ния, да вопие́м ва́м: ра́дуйтеся, свяще́ннии отцы́, за Христа́ кро́вь свою́ излия́вшии.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Ра́дуяся, вше́л еси́, о́тче Капи́тоне, в пе́щь, пребы́л же еси́ неопали́мь, я́коже о́троцы трие́, неве́рныя изыма́я огня́ бу́дущаго, ве́ровавшия боже́ственным твои́м чудесе́м.

Не устраши́вся, не убоя́вся повеле́ния, о́тче свяще́нный Капи́тоне, в свяще́нную ри́зу обле́клся еси́, в не́йже у́глие о́гненное нося́, блаже́нне.

Пу́ть загради́л еси́ неразу́мия боже́ственными словесы́ твои́ми, ра́зум благоче́стия все́м вложи́в, во глубину́ попо́лзшимся идолонеи́стовства, священноде́телю Капи́тоне богоприя́тне.

Богоро́дичен: Созда́вый руко́ю Е́ву, Сло́во Бо́жие, Отрокови́це, назда́ти вся́ восхоте́в, из чре́ва Твоего́ зи́ждется, нача́ло прие́мля, Отцу́ и Ду́ху сопресто́льный.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Умертви́вше боле́зньми пло́ть, жи́знь безсме́ртную исхода́таисте, отцы́ преподо́бнии, все́м, ме́ртвым бого́м служа́щим, и́же и, спа́сшеся, с ва́ми при́сно зову́т: благослови́те, вся́ дела́ Госпо́дня, Го́спода.

Согла́сно Евге́ния, ве́рнии, и Агафодо́ра, Ефре́ма и Елпи́дия с Ефе́рием воспои́м, Васи́лия же и Капи́тона, я́ко низложи́тели врага́ и иера́рхи Христо́вы, Ему́же вопие́м: вся́ дела́, благослови́те Госпо́дня Го́спода.

Возвесели́л еси́ лю́ди, о́тче Ефре́ме, твои́ми уче́ньми и ны́не преше́л еси́ к невече́рнему сия́нию и к весе́лию присносу́щному, твои́х трудо́в воздая́ния прие́мля и взыва́я: вся́ дела́, благослови́те Госпо́дня Го́спода.

Пожи́в, всеблаже́нне Васи́лие, на земли́, я́ко а́нгел, над страстьми́ плотски́ми ты́ ца́рствовал еси́ благода́тию и преше́л еси́ к Ца́рством небе́сным, Христу́ Царю́ предстоя́ и взыва́я: благослови́те, вся́ дела́ Госпо́дня, Го́спода.

Богоро́дичен: Ви́ден бы́сть я́ко челове́к из Тебе́ ражда́емь Пресу́щественный, сугу́б естество́м, Пречи́стая, де́йствы, и хоте́нии, и́мже уподо́бися, изво́лив явля́яся, Ему́же вопие́м: вся́ дела́, благослови́те Госпо́дня Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Священному́чеников святы́х свяще́нную соверша́юще па́мять, пе́сньми свяще́нными, прииди́те вси́, велегла́сно те́х почти́м, о на́с моля́щияся Всеще́дрому Бо́гу на́шему.

Яви́стеся, я́ко честно́е ка́мение, по земли́ от безбо́жных, му́ченицы, влачи́ми, боже́ственнии, и пре́лести утвержде́ния си́лою Бо́жиею сокруша́юще: сего́ ра́ди досто́йно ублажа́етеся.

Дне́сь гра́д Херсо́н ва́шу па́мять пра́зднует: сему́ бо яви́стеся столпи́, и боже́ственна забра́ла, и утвержде́ния, па́стырие, и учи́телие, и моли́твенницы, богоблаже́ннии.

Уже́ лико́м а́нгельским ли́к оте́ц сочи́слился: со Евге́нием Ефре́м и Капи́тон, Елпи́дий же и Ефе́рий, и Васи́лий сла́вный, и богому́дрый Агафодо́р.

Богоро́дичен: Нося́щи Христа́ на объя́тиих, руко́ю нося́щаго вся́, Богоблагода́тная Отрокови́ца, дивя́щися, вопия́ше, глаго́лющи: ка́ко и Сы́на познава́ю Тя́ и Творца́ Моего́ непостижи́маго?