Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я и воспою́, ра́дуяся, Тоя́ чудеса́.

Припе́в: Святы́й благове́рный вели́кий кня́же Михаи́ле, моли́ Бо́га о на́с.

Кто́ не удиви́тся и кто́ не воспое́т и просла́вит ве́рно пресла́внаго му́ченика Христо́ва Михаи́ла, Христо́ва ра́ди смире́ния презре́вшаго диади́му и ца́рство?

Княже́ние земно́е и ца́рское украше́ние оста́вив, восприя́л еси́ вене́ц из Бо́жия Влады́чни десни́цы и со А́нгелы лику́еши. Моли́ Го́спода за ны́, чту́щия твою́ па́мять.

Заколе́н бы́л еси́ от непра́ведных твои́х уби́йц и вопия́л еси́ Влады́це Христу́: приими́ ду́х мо́й, Влады́ко, на Тя́ бо упова́ние мое́ возложи́х, Го́споди.

Тезоимени́те Вы́шняго воево́ды, Михаи́ле, огнезра́чнаго, с ни́мже умоли́ Христа́ пода́ти ми́р стране́ на́шей и утиши́ти вра́жия стремле́ния.

После́довал еси́ Христу́ и му́це Его́ уподо́бился еси́, преблаже́нне Богоно́сне Михаи́ле, певцы́ твоя́ сохраня́й и гра́д на́ш заступи́ от нахожде́ния иноплеме́нных и от бе́д богоприя́тными твои́ми моли́твами.

Богоро́дичен: Богоро́дице Де́во, ро́ждшая Сло́во, па́че словесе́, Зижди́теля Твоего́, Того́ моли́ за ны́ с си́м блаже́нным Михаи́лом, ве́рно чту́щия Тебе́, Богоро́дице.

Пе́снь 3.

Ирмо́с: Твоя́ песносло́вцы, Богоро́дице, Живы́й и Незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Припе́в: Святи́телю о́тче Арсе́ние, моли́ Бо́га о на́с.

А́ще и челове́к еси́ естество́м, о́тче Арсе́ние, но а́нгельски на земли́ пожи́л еси́, десна́го пути́ от ю́ности е́мся, целому́дрия рачи́тель бы́в, Ду́ха Свята́го честно́е обита́лище, всесвяще́нне, яви́лся еси́.

Я́ко светоза́рно житие́, я́ко зело́ чу́дно, я́ко красни́ тру́дове твои́, я́ко вели́ка благода́ть свы́ше дана́ ти́, му́дре, сего́ ра́ди ве́рно почита́ем тя́, святи́телю Арсе́ние.

Вы́шний Царю́ и Вседержи́телю, моли́твами твоего́ уго́дника жи́знь умири́ все́м, Сло́ве, христиа́ном, посо́бствуй и́м на враги́ ви́димыя и неви́димыя.

И́же к Бо́гу моли́твами твои́ми те́плыми, очи́сти на́с от вся́кия скве́рны и скорбе́й, и боле́зней, и вся́кия ну́жды, святи́телю Арсе́ние, изба́ви.

О Богоблаже́нне о́тче Арсе́ние, а́ще те́лом и преше́л еси́ от на́с, но ду́хом пребыва́я с на́ми, моли́ся за ны́ Христу́ и Пречи́стей Его́ Ма́тери с Ея́ уго́дники Анто́нием и Феодо́сием и спаса́й на́с, чту́щих тя́ сла́вно.

Богоро́дичен: Восхва́лим дне́сь пе́сньми вели́каго па́стыря и учи́теля, Арсе́ния Богому́драго, се́й бо измла́да возлюби́ Христа́ и Пречи́стую Его́ Ма́терь, с Не́юже ны́не мо́лит Христа́ Бо́га поми́ловати ду́ши на́ша.

Седа́лен, гла́с 4:

Вели́кий Христо́в святи́тель да воспое́тся, сто́лп све́тлый, просвеща́яй на́с чуде́с светлостьми́: Богоно́сный о́тче на́ш Арсе́ние, па́стырю и учи́телю земли́ на́шея, Христа́ Бо́га моли́ о па́стве твое́й и о все́х, ве́рою и любо́вию чту́щих святу́ю па́мять твою́.

Богоро́дичен: Пое́м Тя́, Богоневе́сто, Ма́ти Христа́ Бо́га, сла́вяще рождество́ Твое́ непостижи́мое, и́мже изба́вихомся от ле́сти диа́вола и вся́кия беды́, Богоро́дице Влады́чице, и ве́рно вопие́м: поми́луй на́с, еди́на Всепе́тая.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Припе́в: Святи́телю о́тче Варсоно́фие, моли́ Бо́га о на́с.

Святи́телю о́тче на́ш Варсоно́фие, моли́ся Христу́ Бо́гу, да по достоя́нию возмо́жем принести́ тебе́ пе́ние во хвале́ние и Христа́ просла́вим.

Му́жественне терпя́ от неве́рных, в пле́не сы́й, и смире́ния ра́ди нра́ва в кро́тость преложи́л еси́ неве́рных, и сего́ ра́ди от Бо́га мзду́ восприи́м, святи́телю Варсоно́фие.

Все́х благи́х о́браз бы́л еси́, к Вы́шнему житию́ веду́щ смире́нием и кро́тостью, те́мже и Христо́с па́стыря тя́ лю́дем Свои́м устроя́ет.

И́стиннаго все́х Па́стыря – Христа́, святи́телю Варсоно́фие, моли́ со все́ми освяще́нными ли́ки, да спасе́т лю́ди по вели́цей Его́ ми́лости, и сохране́ни бу́дем от диа́вольских кова́рств, чту́щии тя́.

Воспева́ющих тя́, и при́сно блажа́щих, и па́мять твою́ ве́рно прославля́ющих, святи́телю Варсоно́фие, освяти́ и просла́ви и от напа́стей и бе́д изба́ви.

Богоро́дичен: Под кро́в Тво́й держа́вный с ве́рою прибега́ем, Богоро́дице: покры́й и соблюди́, Госпоже́, моли́твами Твои́ми и спаси́ от бе́д и клеветы́ злы́х челове́к ра́б Твои́х, при́сно пою́щих Тя́.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Припе́в: Преподо́бне о́тче Ефре́ме, моли́ Бо́га о на́с.

Житие́ твое́, о́тче Ефре́ме, чу́дно на земли́ показа́л еси́, вели́кое поще́ние и смире́ние, сего́ ра́ди на Небесе́х жи́знь ве́чную насле́довал еси́. Моли́ спасти́ся от бе́д пою́щим тя́.

Яви́лся еси́ гра́ду Торжку́, Ефре́ме Богоблаже́нне, сто́лп непоколеби́мый, стена́ неруши́мая, вели́кое избавле́ние от бе́д и исто́чник благода́ти неоску́дный, подаю́щий все́м исцеле́ние, притека́ющим к тебе́, преподо́бне.

Любо́вию и ве́рою чту́ще па́мять твою́, приле́жно мо́лим тя́, преподо́бне о́тче Ефре́ме: непреста́нно за ны́ Христа́ Бо́га моли́ вку́пе с Бори́сом и Гле́бом, непра́ведное заколе́ние любве́ ра́ди Бо́жия претерпе́вшими.

Преподо́бне о́тче Ефре́ме, ты́ це́рковь прекра́сну страстоте́рпцем Христо́вым Бори́су и Гле́бу воздви́гл еси́, иде́же и оби́тель и́ноком че́стну соста́вил еси́, моли́ спасти́ся душа́м на́шим.

Ме́сто, е́же сподо́бися прия́ти честны́я мо́щи твоя́, преподо́бне Ефре́ме, освяти́ся и по мно́гим страна́м прославля́емо е́сть, я́ко и́мать вели́каго пред Бо́гом засту́пника.

Богоро́дичен: Я́же все́ми влады́чествующая тва́рьми, лю́дем Твои́м да́руй побе́ду и одоле́ние, непокори́выя враги́ покоря́я, да Тя́ вси́, я́ко Богоро́дицу, велича́ем.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припе́в: Преподо́бне о́тче Арка́дие, моли́ Бо́га о на́с.

Боже́ственным жела́нием уязви́вся, преподо́бне Арка́дие, житие́ непоро́чно проходи́л еси́, до́ндеже, унасле́довал еси́ Ца́рствие Небе́сное.

А́ще и ю́н те́лом, преподо́бне Арка́дие, но многоле́тных житие́м превозше́л еси́, все́ плотско́е мудрова́ние отри́нув, сво́й ра́зум в послуша́ние Христо́во плени́л еси́.

Чистото́ю и смире́нием Бо́гу угоди́л еси́ и наста́внику своему́ во все́м повину́лся еси́, с ни́мже моли́ся, преподо́бне Арка́дие, пода́ти на́м ми́р и ве́лию ми́лость.

Измла́да Христу́ после́довав, поще́нием и моли́твами проти́ву ко́знем де́монским вооружи́лся еси́, сего́ ра́ди бы́л еси́ свети́льник, чудесы́ сия́я, Арка́дие, испроси́ оте́честву на́шему ми́р и на враги́ побе́ду.

Жела́нием зе́льным, преблаже́нне Арка́дие, после́довал еси́ Богоно́снаго отца́ Ефре́ма житию́: того́ бо учени́к изря́дный бы́л еси́, с ни́мже моли́ся Го́сподеви поми́ловати ду́ши на́ша.

Богоро́дичен: Пло́тию ро́ждши Безпло́тнаго, Богороди́тельнице Пречи́стая, теле́сных на́с и душе́вных скве́рн омы́й окропле́нием Боже́ственныя благода́ти Сы́на Твоего́.

Конда́к, гла́с 8:

Мно́гими скорбьми́ пу́ть земны́я жи́зни преидо́сте и, дости́гше кра́я у́мнаго жела́ния, в черто́г Боже́ственныя сла́вы всели́стеся, и ны́не, ра́дующеся со все́х Царе́м и Бо́гом, моли́теся, я́ко да и мы́ ва́шего блаже́нства прича́стницы бу́дем, ва́ш собо́р почита́ющии, святи́и покрови́телие Тверски́я страны́.

И́кос:

Восхвали́ти по еди́ному кто́ возмо́жет твоя́ святы́я, о Бо́же? Изочту́ и́х и па́че песка́, но Са́м, Влады́ко Христе́, изчита́яй мно́жество зве́зд и все́м и́м имена́ нарица́яй, приими́ все́х и́х мольбы́ о на́с и яви́ щедро́ты Твоя́ на лю́дех Твои́х. Ве́мы бо, я́ко мно́гое и́мут дерзнове́ние к вели́честву Твоему́ и хода́тайствуют к Тебе́, я́ко при́сно моли́твенницы о душа́х на́ших.

Пе́снь 7.

Ирмо́с: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припе́в: Преподо́бне о́тче Мака́рие, моли́ Бо́га о на́с.

Боже́ственное житие́ на земли́ пожи́в, преподо́бне Мака́рие, Небе́снаго наслажде́ния дости́гл еси́ и ны́не со А́нгелы лику́еши.

В Боже́ственней па́мяти твое́й дне́сь соше́дшеся, воспева́ем твоя́ по́двиги, и боле́зни, и исправле́ния, о́тче преподо́бне Мака́рие.

В простоте́ души́, я́ко А́нгел, пожи́в, блаже́нне Мака́рие, страсте́й разгна́л еси́ душетле́нную пре́лесть Боже́ственною благода́тию.

Ны́нешняго жития́ красо́ты вся́, я́ко уме́ты, вмени́л еси́, да Христа́ приобря́щеши, и сего́ ра́ди до́бре потруди́лся еси́, Мака́рие великоимени́тый.

Ра́ка, иде́же лежи́т честно́е те́ло твое́, преподо́бне Мака́рие, исто́чник содева́ет чуде́с, к не́йже притека́юще, от вся́кия скве́рны страсте́й избавля́емся.

Богоро́дичен: От ложе́сн Твои́х, Пречи́стая, Пра́вды Со́лнце возсия́ и ми́р просвети́, Его́же Боже́ственными заря́ми и мене́ просвети́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припе́в: Преподо́бне о́тче Ни́ле, моли́ Бо́га о на́с.

Смири́лся еси́ Христа́ ра́ди, о́тче Ни́ле, и, кре́ст взе́м, оте́чество и сро́дник оста́вил еси́, отню́дуже в пусты́ню вше́д, и в не́й трудолю́бно подвиза́лся еси́, преподо́бне.

Сна́ твои́м очесе́м не да́л еси́, блаже́нне Ни́ле, ни ве́ждом дрема́ния, до́ндеже сподо́бился еси́ пра́ведных селе́ния, я́же угото́ва Бо́г лю́бящим Его́.

Дре́вних и вели́ких отце́в, в посте́ просия́вших, житию́ подо́бися, преподо́бне, в пусты́ню всели́лся еси́ и та́мо в поще́ниих мно́га ле́та пребы́л еси́, Ни́ле, о́тче на́ш.

Ме́сто освяти́ся, на не́мже честны́я мо́щи твоя́ положи́шася, преподо́бне Ни́ле, и по мно́гим страна́м прославля́емо е́сть, я́ко в себе́ мо́щи твоя́ иму́щее.

Ны́не пусты́ня весе́лием красу́ется, иму́щи мо́щи твоя́ в себе́, о́тче Ни́ле, ученицы́ же твои́, о па́мяти твое́й ра́дующеся, Творцу́ вопию́т: Го́спода воспева́йте, дела́, и превозноси́те Его́ во вся́ ве́ки.

Богоро́дичен: Неду́гующаго душе́ю и те́лом исцели́, Влады́чице, раба́ Твоего́, моли́твами блаже́ннаго Ни́ла, Тебе́ бо Предста́тельницу вси́, су́щии в печа́лех, стяжа́хом, я́ко ро́ждшую Спасе́ние на́ше.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная, Богоро́дице, Чи́стая Присноде́во.

Припе́в: Свята́я благове́рная княги́не Ксе́ние, моли́ Бо́га о на́с.

Лива́н ли го́ру нарече́м тя́, Богому́драя Ксе́ние, или́ Фисо́н реку́, добре́йши бо сапфи́ра и ка́мения честна́го – блаже́ннаго Михаи́ла, ро́ждшую, и́же и мо́лится о на́с ко Го́споду.

Припе́в: Свята́я благове́рная княги́не Ксе́ние, моли́ Бо́га о на́с.

От Богому́дрыя Ксе́нии роди́лся еси́, блаже́нне Михаи́ле, с не́юже тя́ блажи́м, страда́льче прехва́льне, спаси́ гра́д и лю́ди, пою́щия тя́.

Припе́в: Свята́я благове́рная княги́не Иулиани́е, моли́ Бо́га о на́с.

Красото́ю страда́ний уподо́билася еси́ Безпло́тным, Богому́драя Иулиани́е, Прекра́сному Жениху́ Христу́ уневе́стилася еси́, с Ни́мже предстоя́, моли́ спасти́ся душа́м на́шим.

Припе́в: Свята́я благове́рная княги́не Иулиани́е, моли́ Бо́га о на́с.

Воспое́м дне́сь Благоде́теля все́х Бо́га, просла́вльшаго в Росси́и Иулиани́ю Богому́друю, да моли́твами ея́ пода́ст душа́м на́шим грехо́в оставле́ние и ве́лию ми́лость.

Припе́в: Вси́ святи́и Тверски́я страны́, моли́те Бо́га о на́с.

Святе́йшии Христо́вы иера́рси и честни́и преподо́бных собо́ри, со все́ми святы́ми о все́х на́с Человеколю́бца Бо́га моли́те, мо́лим вы́.

Богоро́дичен: Пречи́стая Де́во, похвало́ му́чеников, и преподо́бных, и пра́ведных, и все́х святы́х, от вся́каго мучи́тельства лука́ваго изми́ мя́, молю́ся.

Свети́лен:

Прииди́те дне́сь, собо́ри Росси́йстии, и ви́дите, я́ко су́д без вины́ прие́млет вели́кий му́ченик Михаи́л, я́ко а́гнец беззло́бив, заколе́н бы́сть от окая́ннаго Кавгады́я, и пове́ржено бы́сть те́ло его́ на земли́, и ники́мже врежде́но бы́сть. И се́й у́бо венча́ся, то́йже без па́мяти поги́бе, и се́й в ми́ре сла́вим е́сть, о́н же в гее́нне му́чится, се́й же Христа́ Бо́га мо́лит о душа́х на́ших.

Сла́ва, и ны́не: Блажи́м Тя́, Богоро́дице Де́во, и сла́вим Тя́ ве́рнии по до́лгу, гра́д непоколеби́мый, сте́ну необори́мую, тве́рдую Предста́тельницу и прибе́жище ду́ш на́ших.