Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Пра́зднующе ны́не па́мять все́х святы́х, в земли́ Тверско́й просия́вших, ве́рою, любо́вию и благоче́стием благоугоди́вших Бо́гу, моли́твеннаго хода́тайства о на́с пред Бо́гом усе́рдно про́сим.

Пе́рваго Патриа́рха Всеросси́йскаго Святе́йшаго Отца́ И́ова, ве́рнии лю́дие, почти́м усе́рдно, я́ко моли́твенника на́шего и предста́теля пред Бо́гом за оте́чество на́ше.

Ра́дуйся, пе́рвый епи́скопе Тверски́я епа́рхии, святи́телю о́тче Симео́не, положи́вый нача́ло духо́внаго правле́ния па́ствы Тверски́я.

Богоро́дичен: Пресвята́я Влады́чице Богоро́дице, помоли́ся за ны́ Бо́гу со все́м собо́ром Тверски́х святы́х, да спасе́т Госпо́дь ду́ши на́ша.

Пе́снь 3.

Ирмо́с: Утвержде́й в нача́ле Небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко нестъ свя́т, па́че Тебе́, Еди́не Человеколю́бче.

Арсе́ние святы́й, святи́телю Христо́в, а́ще и челове́к естество́м, но а́нгельски на земли́ пожи́л еси́, от ю́ности Христа́ возлюби́в, душе́вною чистото́ю сия́я, и́стинным смире́нием украси́лся еси́.

Вельми́ украси́л еси́ престо́л тво́й, святи́телю Арсе́ние, вели́кими бо чудесы́ преспе́л еси́ и житие́м, све́тлым, сего́ ра́ди Вели́кий Бо́г на́ш вельми́ Тя́ просла́ви.

Врача́ изря́дна разли́чно неду́гующим и наставле́ние все́м, прельще́нным злы́м сове́том, Христо́с тя́ дарова́ чудотво́рца земли́ на́шей, святи́телю Арсе́ние. Те́мже тя́ ублажа́ем.

Богоро́дичен: Пресвята́я Де́во, Ты́ на́с спаси́ и не́мощем на́шим бу́ди Спаси́тельница, скорбе́й мно́гих и лю́тых на́с изба́ви, да Тя́ сла́вим, еди́ну Богоро́дицу.

Конда́к, гла́с 4:

На земли́ благоче́стно пожи́вшии, святи́и, в земли́ Тверско́й просия́вшии, и ны́не на Небесе́х со А́нгелы ра́дуетеся и Тро́ицу Святу́ю – Отца́, и Сы́на, и Свята́го Ду́ха во Еди́ном Божестве́ прославля́ете. Мы́ же, земноро́днии, моли́твенно ублажа́юще ва́с и святу́ю па́мять соверша́юще, мо́лим: принеси́те на́ша моли́твы к Небе́сному Престо́лу Го́спода Вседержи́теля, да Ва́шим хода́тайством да́рует ми́р и спасе́ние душа́м на́шим.

И́кос:

А́з е́смь Лоза́, вы́ же ро́ждие, – рече́ Христо́с Свои́м ученико́м. Та́кожде и вы́, святи́и страны́ Тверски́я, яви́стеся ло́зы Христо́вы, благоукраси́вшия Святу́ю Це́рковь Ру́сскую плоды́ ве́ры и благоче́стия, и ны́не подае́те душа́м на́шим ра́дость, ми́р и ве́лию ми́лость.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Незаходи́мое Со́лнце в себе́ стяжа́в, Христа́ Бо́га на́шего, пресла́вный благове́рный вели́кий кня́же Михаи́ле, освяти́ ны́, честну́ю па́мять твою́ почита́ющия.

Я́ко по зако́ну ходи́в, смире́нную му́дрость восприя́л еси́, вели́кий страда́льче, кня́же Михаи́ле, со святы́ми Тро́ице предстоя́, моли́ся очище́ние на́м дарова́ти, тебе́ восхваля́ющим.

Яви́ся дне́сь заступле́ние гра́ду на́шему и лю́дем пречи́стое те́ло твое́ честно́е, е́же прии́мши Це́рковь Бо́жия, весели́т сердца́ пою́щих тя́, Михаи́ле всеблаже́нне.

Богоро́дичен: Засту́пнице скорбя́щих, наде́ждо ненаде́ющихся, Богоро́дице Всепе́тая, моли́ приле́жно изба́витися на́м от бе́д и скорбе́й.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго? Но обрати́ мя́ и к све́ту за́поведей Твои́х пути́ моя́ напра́ви, молю́ся.

Многоско́рбная вели́кая княги́не, преподо́бная А́нно Ка́шинская, чу́дным житие́м твои́м угоди́ла еси́ Христу́ Бо́гу, ны́не ра́дующися, и веселя́щися, и наслажда́ющися ра́йския красоты́ и блаже́нства, моли́ о на́с Христа́ Бо́га на́шего, дарова́ти ми́р стране́ на́шей.

Богому́драя Ксе́ние, ма́ти кня́зя-му́ченика свята́го Михаи́ла Тверска́го, моли́ся с сы́ном твои́м честны́м о на́с ко Го́споду, да умири́т ми́р и спасе́т ду́ши на́ша.

Благове́рная княги́не Новото́ржская Иулиани́е, целому́дрия ра́ди му́ченическую сме́рть прия́ла еси́. Сего́ ра́ди от Христа́ Бо́га нетле́нным и ве́чным венце́м венча́вшися, ны́не с ли́ки му́ченик лику́еши. Моли́ся Христу́ Бо́гу о все́х на́с, ве́рою и любо́вию страда́ния твоя́ почита́ющих.

Богоро́дичен: Блажи́м Тя́, Богоро́дице Де́во, Ты́ бо мо́лишися о на́с Сы́ну Твоему́, Христу́ Бо́гу на́шему, во спасе́нии ду́ш и́мя Твое́ призыва́ющих.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Мо́лим ва́с, святи́телие Христо́вы Тверски́я страны́: Ака́кие, Фео́доре, Феокти́сте и Арсе́ние и вси́ Тверсти́и святи́телие и чудотво́рцы, да ва́шими святы́ми моли́твами пода́ст Госпо́дь ми́ру умире́ние.

С ва́ми да помо́лятся и святи́тели первопресто́льнаго гра́да Москвы́, Пе́тр, Алекси́й и Киприа́н, и Каза́нстии чудотво́рцы, святи́и Варсоно́фии́, Ге́рман и Гу́рий, с Моисе́ем Новгоро́дским о спасе́нии ду́ш на́ших.

Святи́телю о́тче Ти́хоне, Воро́нежский и Задо́нский чудотво́рче, ты́ в Твери́ подвиза́лся еси́ на по́прищи просвеще́ния и учи́тельства в духо́вной шко́ле и в управле́нии Успе́нским О́трочим монастыре́м; во святи́тельстве же написа́л еси́ тру́д: Духо́вное сокро́вище, от ми́ра собира́емое. Све́том Богопозна́ния просвети́ и на́ша сердца́.

Богоро́дичен: В моли́твах Твои́х неусы́пную моли́твенницу, Влады́чице, и в предста́тельстве непрело́жное упова́ние ве́мы Тя́, Богоро́дице. Те́мже мо́лим Тя́: спаси́ от бе́д любо́вию чту́щих Тя́.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Тверска́я похвало́: Арсе́ние святи́телю, Михаи́ле му́чениче и А́нно, гра́да Ка́шина сокро́вище, с Иулиани́ею – цве́том целому́дрия, о на́с Христа́ Бо́га моли́те.

Преподо́бнии Ни́ле Столобе́нский и Мака́рие Каля́зинский, чудотво́рцы пресла́внии, помина́йте чту́щих ва́шу святу́ю па́мять и моли́те Бо́га о на́с.

О́тче Ефре́ме, гра́да Торжка́ просвети́телю, со ученико́м твои́м Арка́дием, моли́те Бо́га пода́ти ми́р всему́ Правосла́вию и душа́м на́шим ве́лию и бога́тую ми́лость.

Богоро́дичен: Не и́мамы ины́я по́мощи, ра́зве Тебе́, Цари́це Небе́сная, Ты́ на́м помози́ и изба́ви от находя́щих на ны́ бе́д и скорбе́й и от печа́лей мно́гих, обурева́ющих ны́.

Пе́снь 8.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Свя́тче Паи́сие, постри́жениче преподо́бнаго Мака́рия, Каля́зинскаго чудотво́рца, а́нгельскому житию́ ревну́я, духо́вному отцу́ твоему́ подража́тель бы́в, многотру́дное житие́ яви́л еси́, и, чуде́с дарова́ние от Бо́га прия́в, преподо́бне, моли́ Христа́ Бо́га спасти́ся душа́м на́шим.

Преподо́бнии отцы́: Анто́ние Краснохо́лмский, Некта́рие Бе́жецкий и Арсе́ние Новогру́дский и про́чии преподо́бнии всея́ Тверски́я страны́, вы́ есте́ сла́во и украше́ние святе́й Це́ркве Тверско́й.

Преподо́бнии отцы́ и ма́тери, ве́домии и неве́домии ми́ру, в земли́ Тверско́й подвиза́вшиися и житие́м ва́шим Бо́гу благоугоди́вшии, моли́те Бо́га о душа́х на́ших.

Богоро́дичен: Богоро́дице Де́во, упова́ние христиа́ном, сохрани́ гра́ды и ве́си Тверски́я страны́, и Це́рковь святу́ю в ми́ре соблюди́, и лю́ди правосла́вныя, на Тя́ упова́ющия, спаси́.

Пе́снь 9.

Ирмо́с: Ужасе́ся о се́м Не́бо и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.

Все́м святы́м, земноро́дным сро́дником на́шим, в земли́ Тверско́й подвиза́вшимся, мо́лимся усе́рдно: да моли́твами и́х пода́ст Госпо́дь ми́р душа́м на́шим.

О вси́ святи́и земли́ Тверски́я, уго́дницы Бо́жии, Ду́ха Свята́го сосу́ди честни́и бы́вше, благода́ть Боже́ственную восприя́сте, непреста́нно моли́те о воспева́ющих и чту́щих святу́ю па́мять ва́шу.

Тро́ичен: Отца́, и Сы́на, и Свята́го Ду́ха, Святу́ю Тро́ицу во Еди́нице чти́м, и покланя́емся, и со умиле́нием про́сим: да моли́твами все́х Тверски́х святы́х сохрани́т Бо́г ми́р от вся́каго зла́.

Богоро́дичен: Не то́кмо земноро́дных, но и Небе́сных си́л яви́лася еси́ Честне́йшая Херуви́м и Сла́внейшая без сравне́ния Серафи́м, Пречи́стая Де́во Богоро́дице, Бо́га бо родила́ еси́, Неискусобра́чная. Того́ моли́ единомы́слие, ми́р и благостоя́ние ти́хое святе́й Це́ркви Правосла́вней дарова́ти, во спасе́ние ду́ш на́ших.

Свети́лен:

Све́т Тво́й, Христе́ Бо́же, возсия́ пра́ведникам, я́ко со́лнце незаходи́мое, просвеща́ющее Тверску́ю Це́рковь, прославля́емую святы́ми Твои́ми. Тя́ бо сла́вяще, чти́м и святы́я Твоя́, моля́щияся за ны́.