Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Отве́рзи ми́ устне́ благода́тию Твоего́ Божества́, Христе́, и, озари́в, просвети́ ду́шу же и се́рдце несумне́нною ве́рою воспе́ти обре́тение честны́х моще́й святи́теля Твоего́ Алекси́я.

От у́ст недосто́йных, и от се́рдца нечи́ста, и от недости́жнаго ума́ на́шего приими́ ма́лое хвале́ние, святи́телю Алекси́е, воспе́ти обре́тение честны́х моще́й твои́х.

Тро́ицу Ли́цы, Еди́ницу же Существо́м пропове́дал еси́, святи́телю, и от Тоя́ незави́стныя да́ры прия́л еси́, и исцеле́ния разли́чная подава́еши ве́рою приходя́щим к ра́це моще́й твои́х.

Богоро́дичен: Язы́ков ча́яние дре́вле Тобо́ю дарова́ся, Пречи́стая Богоро́дице: Ты́ бо Христа́ родила́ еси́, от ро́ва прегреше́ний возводя́ща во тлю́ попо́лзшияся и от бе́д избавля́юща Тя́ велича́ющия.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Смиреному́дрия нра́вом и о́браза кро́тостию А́нгельскому житию́ подо́бяся, нескве́рно и непоро́чно те́ло твое́ соблю́л еси́, преосвяще́нный о́тче, святи́телю Алекси́е.

Я́ко звезда́ многосве́тлаго со́лнца, от гро́ба возсия́ша, от мно́гих ле́т сокрове́ны, честны́я мо́щи святи́теля Алекси́я, чуде́с лучи́ испуща́юще и исцеле́ния все́м подаю́ще.

Ра́достию у́бо возра́довашася вси́ моско́встии наро́ди, архиере́й вели́кий со святи́тели, и христолюби́вии кня́зи, и церко́вное все́ совокупле́ние, егда́ обрето́шася честны́я твоя́ мо́щи, ничи́мже вреди́мы, святи́телю Алекси́е.

Богоро́дичен: Ро́ждшая Све́т всему́ ми́ру, просвети́ на́ша помышле́ния, Пречи́стая Влады́чице, и неразу́мия мглу́ дале́че отжени́, еди́на Богоблаже́нная.

И́н.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Мо́лим тя́, святи́телю, моли́ о хва́лящих тя́ и притека́ющих любо́вию к честны́м моще́м твои́м, е́же получи́ти грехо́в проще́ние и бе́д свобожде́ние.

Просла́ви тя́ Госпо́дь, святи́телю Алекси́е, мно́га бо ле́та те́ло твое́, земле́ю покрове́но, соблюде́ нетле́нно, точа́щее чудеса́ прося́щим тя́ те́пле.

Прояви́ Госпо́дь мо́щи твоя́ и, я́ко свети́льник све́тел, поста́ви я́ не под спу́дом, но на све́щнице, да све́тят сия́нием чуде́с притека́ющим ти́ с ве́рою.

Богоро́дичен: Приво́дим Тебе́ в моли́тву ми́лостивную Хода́таицу, ро́ждшую Тя́ пло́тию, Христе́ Бо́же на́ш, Ея́же моли́твами, Ще́дре, ми́р Тво́й умири́.

Седа́лен, гла́с 1:

Па́мять обре́тения честны́х моще́й твои́х наста́ на́м све́тло празднество́, пречу́дный святи́телю Христо́в, Алекси́е прехва́льне, в ню́же чуде́с благода́ть прия́л еси́ от все́х Царя́, Христа́ Бо́га, разли́чныя неду́ги от челове́к отгони́ти, и от у́з избавля́ти, и оби́димых от лю́т изыма́ти. Те́мже зове́м: изба́ви на́с от вра́г на́ших.

Богоро́дичен: Гаврии́лу веща́вшу Тебе́, Де́во, — ра́дуйся, — со гла́сом воплоща́шеся все́х Влады́ка в Тебе́, святе́м киво́те, я́коже рече́ пра́ведный Дави́д, яви́лася еси́ ши́ршая Небе́с, поноси́вши Зижди́теля Твоего́: сла́ва Все́льшемуся в Тя́; сла́ва Проше́дшему из Тебе́; сла́ва Свободи́вшему на́с Рождество́м Твои́м.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Благода́рственныя пе́сни принесе́м Христу́ Бо́гу на́шему, такова́го святи́теля дарова́вшему Це́ркви Свое́й, пречестно́е удобре́ние и гра́ду Москве́ вели́кое утвержде́ние.

Я́ко Ааро́н незло́бием, Ду́ха благода́тию, сла́вне, в ри́зу свы́ше обле́клся еси́ преподо́бия и пра́вды и, предстоя́ престо́лу Христо́ву, моли́ о на́с непреста́нно, святи́телю Алекси́е.

Я́ко луча́ светоза́рнаго со́лнца, от гро́ба на́м взы́де, святи́телю, озаря́я все́х, ве́рою почита́ющих обре́тение честны́х моще́й твои́х, Богоблаже́нне Алекси́е.

Богоро́дичен: Ра́дости на́м хода́таица яви́лася еси́, я́ко прие́мши исполне́ние всего́ Божества́, Всенепоро́чная. Те́м вси́, — ра́дуйся, — А́нгелово велегла́сно зове́м, Богора́дованная.

И́н.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Те́плый предста́телю бе́дствующих и моля́щихся ско́рый услы́шателю, о́тче на́ш, святи́телю Алекси́е, изба́ви от вся́ких напа́стей вся́, призыва́ющия тя́.

Свети́льниче всесве́тлый, просия́вый доброде́тельми твои́ми, озари́ сердца́ на́ша, омраче́нная прило́ги льсти́ваго, и разжени́ тму́ страсте́й при́сно борю́щих ны́.

Пра́зднующим све́тло па́мять твою́, оте́честву на́шему и лю́дем ми́р у Христа́ испроси́ и изба́ви от междоусо́бныя бра́ни и наше́ствий проти́вных.

Богоро́дичен: Пала́та прекра́сная и престо́л Всецаря́ Христа́ показа́лася еси́: честне́йшая бо еси́ вои́стинну все́х тва́рей, Богома́ти, Предста́тельница и покро́в ду́ш на́ших.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Благода́тию Боже́ственнаго Ду́ха моли́тва твоя́ поспешеству́ема: егда́ у́бо це́рковь паде́ся, образо́в, и́же в не́й, святы́х ничи́мже вреди́, я́ко ни пра́ху прикосну́тися и́м, та́ко и ны́не сохраня́й гра́д тво́й от сопроти́вных вра́г.

Все́м христиа́ном в беда́х помо́щник и гра́ду Москве́ ве́лий засту́пник, неду́гующим вра́чь безме́здный, и су́щим в ну́ждах и ско́рбех гото́вейший уте́шитель, и хода́тай те́плый ко все́х Царю́, Христу́ Бо́гу.

На земли́ положе́но бы́сть честно́е те́ло твое́, святи́телю Алекси́е, ду́х же возлете́ на Небеса́, со апо́столы же и святи́тели и со А́нгелы ликовству́я, Святе́й Тро́ице предстои́ши: моли́ся приле́жно за гра́д и лю́ди твоя́, свя́те.

Богоро́дичен: Та́йны Твоея́ глубина́, Пречи́стая Богоро́дице, А́нгельския чи́ны удивля́ет, и честна́я Твоя́ ико́на бе́сы смуща́ет и прогоня́ет, мы́ же покланя́ем Ти́ ся́, ве́дуще Тя́, Бо́жию Ма́терь.

И́н.

Ирмо́с: От но́щи неве́дения Богове́дением просвети́вый концы́, просвети́ мя́ у́тром человеколю́бия Твоего́, Го́споди.

Блиста́ньми чуде́с твои́х, Богому́дре, це́рковь твою́ озари́ и лю́ди возвесели́, Христа́ моля́ да́ти все́м на́м грехо́в проще́ние.

Моли́ о на́с Всесвяту́ю Тро́ицу, святи́телю Алекси́е, я́ко да низпо́слет на́м благода́ть Свою́, хва́лящим тя́ любо́вию.

Всечестна́я ра́ка твоя́, святи́телю Алекси́е, чудеса́ то́чит приходя́щим ве́рно и прося́щим подае́т цельбу́ оби́льно.

Богоро́дичен: Еди́наго от Тро́ицы воплоще́ннаго Бо́га и́стинно родила́ еси́, Его́же моли́ от бе́д изба́витися рабо́м Твои́м.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Христо́вою си́лою обле́клся еси́, Алекси́е прему́дре, и священноде́тель и́стинен показа́лся еси́, Бо́жиим сия́нием просвети́вся, я́ко от окри́на, честны́я твоея́ ра́ки исцеле́ния разли́чна неоску́дно подае́ши пра́зднующим ве́рно честны́х твои́х моще́й обре́тение.

Вседе́тельнаго Ду́ха пресве́тлыми луча́ми осия́емь при́сно, от разли́чных искуше́ний, и бе́д, и скорбе́й, обдержа́щих на́с, я́ко Христо́в уго́дник, о́тче, изба́ви рабы́ твоя́, светоно́сное твое́ торжество́ всегда́ соверша́ющих ве́рно, святи́телю Алекси́е.

Я́сно пропове́дал еси́ еди́нство Тро́ицы, и нему́дрых сердца́ в ра́зум приве́л еси́, и ро́ждшему Сло́во сопресто́льно Богоразу́мием и́стинным ра́вно славосло́вив. Те́м, в Небе́сных селе́ниих водворя́яся, от бе́д на́с избавля́й.

Богоро́дичен: Ро́ждшая сия́ние сла́вы О́тчи, Де́во Богоро́дице Всепе́тая, просвети́ ду́ши пою́щих Тя́: Твое́ю бо благода́тию нетле́нны сохранены́ бы́ша честны́я мо́щи святи́теля Алекси́я, разли́чная дарова́ния источа́юща ве́рою чту́щим па́мять его́.

И́н.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Преосвяще́нне Алекси́е, красото́ церко́вная, архиере́ев благоле́пие, равностоя́телю же святы́х а́нгел, моли́ о хва́лящих тя́ и испроси́ получи́ти все́м грехо́в оставле́ние.

Преблаже́нне святи́телю Алекси́е, моли́ся приле́жно за гра́д и лю́ди твоя́, и обдержа́щия ско́рби премени́, и грехо́в проще́ние и го́рняго весе́лия насле́дие испроси́.

По́двиг твои́х труда́ми прия́л еси́ Боже́ственная дарова́ния: честны́я бо твоя́ мо́щи в шестьдеся́тное ле́то обрето́шася нетле́нны, исцеле́ния разли́чная подаю́щия.

Богоро́дичен: Припа́дающе, мо́лим Тя́ приле́жно, всеми́лостивая Влады́чице: моли́ из Тебе́ Ро́ждшагося изба́вити ны́ лю́тыя ско́рби, и ва́рварскаго преще́ния, и вся́каго наве́та вра́жия.

Конда́к, гла́с 8:

Я́ко со́лнце незаходи́мое, от гро́ба возсия́ на́м от мно́г ле́т сокрове́нны честны́я твоя́ мо́щи нетле́нны, святи́телю Алекси́е, тобо́ю благода́ть прие́млем: всю́ бо страну́ сию́ и вся́ ны́ чудесы́ и добро́тою обогаща́еши, де́йством благода́ти, да пое́м ти́: ра́дуйся, о́тче, свети́ло Росси́и.

И́кос:

Похва́лим ны́не святи́теля пе́сньми, Росси́йскаго па́стыря и учи́теля, и благоче́стно притеце́м к ра́це моще́й его́, и почерпе́м дарова́ния, я́ко от исто́чника исцеле́ний. Ю́же обстоя́ще ны́не, ра́достно весели́мся и, усе́рдно обше́дше, светоно́сными пе́сньми просла́вим, глаго́люще: чудотво́рче святи́телю Алекси́е, чудесы́ обогаща́й все́х на́с соде́янием благода́ти, да пое́м ти́: ра́дуйся, о́тче, свети́ло Росси́и.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

От светоно́сныя десни́цы прие́м благода́ть чуде́с, ве́рою прося́щим, о́тче, исцеле́ния разли́чная подава́еши, святи́телю Христо́в Алекси́е, благоче́стно пою́щим: благослове́н Бо́г оте́ц на́ших.

Гро́б, иде́же положе́но бы́сть честно́е те́ло твое́, сокруше́н бы́сть от мно́гаго ка́мения, егда́ распаде́ся це́рковь, моще́м же твои́м ника́коже прикосну́ся. И́хже мы́ зря́ще, неизрече́нно светя́щихся, ра́достно зове́м: благослове́н Бо́г оте́ц на́ших.

В Трие́х Ипоста́сех Богонача́льных, держа́ву Отца́, равноде́тельна Сы́на и Ду́ха богосло́вил еси́, и То́й тя́ просла́ви, и засту́пника тя́ показа́ на́м, зову́щим ти́: изба́ви на́с, свя́те, от все́х зо́л, находя́щих на ны́.

Богоро́дичен: Тя́ Засту́пницу, Чи́стая Богоро́дице, стяжа́хом, и на Тя́ вси́ наде́жду возложи́хом, и к Тебе́ прибега́ем: спаси́ на́с, Всенепоро́чная, и изба́ви моли́твами Твои́ми от обдержа́щия ско́рби и мяте́жа и лю́тых напа́стей и бе́д.

И́н.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Орга́н духо́вный бы́л еси́, о́тче святи́телю Алекси́е, у́мно дви́жимь благода́тию, при́сно бряца́л еси́, поя́: оте́ц на́ших Бо́же, благослове́н еси́.

На земли́, я́ко со́лнце, сия́еши чудесы́, о́тче блаже́нне, на Небесе́х же венцено́сец, ра́дуяся, пое́ши: оте́ц на́ших Бо́же, благослове́н еси́.

Благода́тию Ду́ха честны́я мо́щи святи́теля Алекси́я разли́чныя цельбы́ подаю́т ве́рою пою́щим: оте́ц на́ших Бо́же, благослове́н еси́.

Богоро́дичен: Теле́сныя сла́бости и душе́вныя неду́ги, Богороди́тельнице, любо́вию приходя́щих к кро́ву Твоему́ исцели́, врача́ Христа́ на́м ро́ждшая.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

На Небесе́х чи́ни А́нгельстии лику́ют, и на земли́ ве́рных собо́ри све́тло пра́зднуют обре́тение честна́го твоего́ телесе́, святи́телю Алекси́е, пе́сньми сла́вяще Христа́ во ве́ки.

Вонми́ и услы́ши глаго́лы на́ша, святи́телю Христо́в Алекси́е, и спаси́ Святе́йшаго Патриа́рха на́шего, гра́д же и лю́ди изми́ от вся́каго зла́, пою́щия и превознося́щия Христа́ во ве́ки вся́.

Единонача́льная Тро́ица, все́ми влады́чествующая, И́же тобо́ю воспева́емая, си́м одари́ тя́ манове́нием Боже́ственным, це́ло и нетле́нно свяще́нное твое́ те́ло сохрани́, сла́вящих бо Ю́ прославля́ет во ве́ки.

Богоро́дичен: Не умолчи́м никогда́же велича́ти и глаго́лати заступле́ние Твое́, е́же твори́ши, утиша́ющи мяте́ж, прибега́ющим к покро́ву Твоему́, Богома́ти, и наде́жду тве́рду иму́щим Тя́ во ве́ки.

И́н.

Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Потщи́ся, свя́те, изба́вити ны́ от напа́стей и скорбе́й мно́гих, обдержа́щих ны́, плотски́х и душе́вных, да, ра́дующеся, пое́м Христа́ во вся́ ве́ки.

Призыва́ющия тя́, о́тче, изба́ви вся́каго зла́ и лю́тых нахожде́ний и от напра́сныя сме́рти исхити́ пою́щия Христа́ во вся́ ве́ки.

Ма́нием Боже́ственным разли́чныя цельбы́ подаю́т честны́я твоя́ мо́щи, святи́телю, прося́щим тя́ усе́рдно и Христа́ пою́щим во вся́ ве́ки.

Богоро́дичен: Ро́ждшая Еди́наго от Тро́ицы, моли́ти не преста́й, Богоро́дице, изба́витися на́м от бе́д, пою́щим и превознося́щим Его́ во ве́ки.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и, Тя́ ублажа́ем.

Со апо́столы и святи́тели Влады́чню престо́лу и с ли́ки А́нгельскими предстоя́, моли́ изба́вити на́с от печа́лей, находя́щих на ны́: я́ко бо о́гнь, паля́щь и разжиза́ющ, лю́тый пла́мень, обходя́щий на́с, от него́же изба́ви ны́, святи́телю Алекси́е прему́дре, да тя́ ублажа́ем.

Яви́ся звезде́ подо́бно, светоно́сивей подо́бие о́браза твоего́, духо́вными луча́ми просвеща́я сердца́ ве́рных, богоразу́мия же све́том лучи́ чуде́с испуща́еши и исцеле́ния подава́еши, святи́телю, пра́зднующим любо́вию обре́тение честны́х моще́й твои́х.

В Трие́х Богонача́льных Ипоста́сех Еди́н сы́й Бо́г, сла́вимый всегда́ и ца́рство име́я непреме́нно, всемо́щною Твое́ю десни́цею шата́ния вра́г нечести́вых, и братоуби́йц вы́и низве́рзи под но́зе во́инству на́шему.

Богоро́дичен: Ро́ди вси́ Тя́ ублажа́ют ны́не, Пречи́стая Богоро́дице, и вся́к гра́д и страна́, ору́жие, и заступле́ние, и забра́ло Тя́ иму́ще, хва́лятся Тобо́ю, я́ко кре́пость и́х ро́ждшую, Влады́ку все́х, Христа́ Бо́га, си́лу иму́щаго непобеди́мую.

И́н.

Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Поми́луй ны́, смире́нныя рабы́ твоя́, святи́телю Алекси́е, и от тмы́ скорбе́й изми́ и пла́мене искуше́ний исхити́, ве́рно к тебе́ притека́ющия.

Я́ко звезда́ светоза́рная, на Небесе́х водворя́яся, с ли́ки святы́х А́нгел моли́ся о хва́лящих тя́ и притека́ющих к ра́це честны́х моще́й твои́х.

Архиере́ев украше́ние, мона́хов удобре́ние, все́х ве́рных прописа́ние, Це́ркве изря́дный па́стырь и учи́тель ты́ еси́, Алекси́е преосвяще́нне.

Богоро́дичен: Безсе́менно ро́ждшая пло́тию Ипоста́сное Сло́во Пребезнача́льнаго Отца́, моли́ся Ему́, Богоро́дице Всепе́тая, спасти́ ду́ши пою́щих Тя́.

Свети́лен:

Прииди́те вси́, ди́внаго и сла́внаго в чудесе́х, вели́каго святи́теля Алекси́я пе́сньми свяще́нными похва́лим, Росси́йскаго свети́льника и учи́теля, и А́нгельским чино́м ссе́льника, и моли́твенника те́пла ко Го́споду о чту́щих па́мять его́.

Сла́ва, и ны́не: По Бо́зе упова́ние на́ше иму́ще на Тя́, Пречи́стая Богоро́дице, мо́лим Ти́ ся́: моли́ся о на́с ко из Тебе́ Ро́ждшемуся невре́дны на́с да́же до конца́ сохрани́ти, прири́щущих к покро́ву Твоему́.