Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Му́ченика Твоего́, Христе́, Дими́трия, пе́ти мне́ жела́ющему, моли́твами его́, я́ко Бла́г, осия́ние Пресвята́го Ду́ха да́руй, да воспою́ све́тло Твоего́ уго́дника торжество́.

Умертви́вшему кре́пость сме́рти подо́бяся, му́чениче Дими́трие, от раба́ заколе́ние претерпе́л еси́ и, пресла́вно в небе́сныя оби́тели всели́вся, трудо́в воздая́ние прия́л еси́, прехва́льне.

Честна́я твоя́ па́мять, му́чениче, освяща́ющи ми́р, приспе́. Ра́дуется же дне́сь пресла́вный гра́д Москва́, твоего́ блага́го получи́в заступле́ния, и, благодаря́, Спа́су вопие́т: препросла́вленный Госпо́дь, я́ко просла́вися.

Богоро́дичен: О Тебе́ ны́не проро́чество соверши́ся, Богороди́тельнице Влады́чице Чи́стая, Его́же бо провозвести́ша высокогла́сно вси́ проро́цы, Того́, Невмести́маго, пресла́вно во чре́ве вмести́ла еси́, во двою́ естеству́ соверше́нна Бо́га же и Челове́ка.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая, Це́рковь, прише́ствием Твои́м, в не́йже утверди́ся мое́ се́рдце.

Егда́ оста́вль земна́го ми́ра те́мность, страда́льчески же обагре́но кро́вию те́ло твое́ скры́в на У́глече, ду́шу в небе́сныя оби́тели, Дими́трие, всели́л еси́, прехва́льне.

Но́щи и тмы́ сы́нове нареко́шася уби́йцы беззако́ннии: я́ко а́гнца бо тя́ непоро́чна, ноже́м сбодо́ша, хода́таи твоему́ венцу́ боже́ственному, Дими́трие, бы́вше.

Исцеле́ния струи́ источа́еши ко гро́бу твоему́, му́чениче Дими́трие, ве́рою притека́ющим, благода́рно же ра́дование подае́ши пою́щим: не́сть свя́та, я́коже Бо́г на́ш.

Богоро́дичен: Мари́е, злата́я кади́льнице, страсте́й мои́х отжени́ смра́д и утверди́ мя́, коле́блема прираже́ньми лука́ваго ратобо́рца.

И́н.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Ю́ношескаго соверше́ннаго цве́та не доспе́в, пожа́лся еси́, непови́нный страда́льче Дими́трие, и ну́ждную сме́рть претерпе́л еси́, того́ ра́ди ны́не лику́еши с ли́ки му́ченическими, предстоя́ у Царя́ и Бо́га все́х.

Сме́рть твоя́ уби́ раба́ твоего́ и уби́йцу, благоро́дне, нарица́вшихся же во твое́ благоро́дное и́мя, та́кожде до конца́ все́х погуби́, ты́ же сме́ртию твое́ю ве́чный живо́т приобре́л еси́.

Лю́тое колеба́ние бы́сть в Росси́йстей земли́ по сме́рти твое́й, благове́рный Дими́трие, от о́нех злы́х и наве́тных челове́к, лжу́щихся и́менем твои́м; Бо́г же моли́тв ра́ди твои́х до конца́ все́х погуби́ и лю́тое колеба́ние от ни́х укроти́.

Богоро́дичен: А́ще Бо́г Тя́ избра́ Себе́ небе́сное селе́ние, Де́во Ма́ти Чи́стая, и кто́ не подиви́тся пресла́вному Рождеству́ Твоему́, и́мже все́х искупи́ от кля́твы зако́нныя? Те́м и а́з молю́ Ти́ ся́: свободи́ и мене́, недосто́йнаго раба́ Твоего́, от кля́твы грехо́вныя.

Седа́лен, гла́с 4.

Наста́, празднолю́бцы, све́тлое торжество́, па́мять сла́вная страстоно́сца Христо́ва, веселя́щи вся́ческая, сия́ющи в ми́ре заря́ми чуде́с. Те́мже непреста́нную благода́ть твои́ми моли́твами у Христа́ испроси́, му́чениче Дими́трие, душа́м на́шим и ве́лию ми́лость.

Сла́ва: Я́ко от младе́нства лише́н еси́ земна́го ца́рства, благоро́дне Дими́трие, и в того́ ме́сто в небе́сное пресели́вся, та́мо сподо́бился еси́ небе́сная блага́я ви́дети, и ны́не я́сно зри́ши Святу́ю Тро́ицу и мо́лишися о держа́ве твои́х сро́дников и за вся́ ве́рныя лю́ди, во е́же бы и́м получи́ти вся́ блага́я и поле́зная.

И ны́не: Де́во Всенепоро́чная, Я́же пресу́щнаго Бо́га ро́ждшая, с му́чеником Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Пе́снь 4.

Ирмо́с: Прише́л еси́ от Де́вы, не хода́тай, ни А́нгел, но Са́м, Го́споди, вопло́щся, и спа́сл еси́ всего́ мя́, челове́ка. Те́м зову́ Ти́: сла́ва си́ле Твое́й, Го́споди.

Кро́вию страда́ния тле́ннаго смра́да избежа́в, богому́дре, вме́сто земна́го — небе́снаго Ца́рствия насле́дник бы́л еси́, страстоте́рпче, те́м вси́, чту́ще, тя́ ублажа́ем.

А́нгельскаго селе́ния во дво́рех пребыва́еши и в Росси́йстей земли́ благода́ть источа́еши к ра́це моще́й твои́х любо́вию припа́дающим, страда́льче, и вопию́щим: сла́ва си́ле Твое́й, Го́споди.

Две́ри небе́сныя све́тло отверзо́шася, прие́мше тя́, му́чениче, и Це́рковь тя́ ны́не име́ет, ликовству́ющи со избра́нными, пою́щи Бо́гу: си́ле Твое́й сла́ва, Человеколю́бче.

Богоро́дичен: Свяще́ннии провозвести́ша дре́вле гла́си чревоноше́ния Твоего́ глубину́, и́хже сбытие́ ви́дяще, Чи́стая, пое́м: си́ле Твое́й сла́ва, Влады́чице.

И́н.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Вме́сто земны́я высоты́, небе́сную дости́гл еси́, благоро́дне Дими́трие, и ны́не с пра́ведными ли́ки водворя́ешися, и пое́ши, и сла́виши Бо́га, Ему́же пое́м: си́ле Твое́й сла́ва, Человеколю́бче.

Удиви́ Бо́г все́х Свои́х чудотворе́нием, я́ко посла́ на раба́ твоего́ уби́йцу не́коего врага́ и отме́тника пра́выя на́шея ве́ры, наре́кшагося тезоиме́нством твои́м, да све́ржет уби́йцу твоего́ с престо́ла ца́рска, е́же и бы́сть.

Ца́рь царе́й и Госпо́дь господе́й дарова́ тебе́ вме́сто земна́го ца́рства — Небе́сное, рабу́ же твоему́ и уби́йце даде́ зде́ зло́е отмще́ние, во о́ном же ве́це по лука́вству сугу́бая муче́ния, я́коже Са́м, вся́ ве́дый, ве́сть.

Богоро́дичен: Ада́мова дщи́ и вну́ка Ты́ была́ еси́, Влады́чице, от него́же ве́сь ро́д челове́чь произы́де, Ты́ же все́х Живо́т породила́ еси́ — Христа́ Бо́га на́шего, Его́же моли́, да спасе́т ду́ши на́ша, я́ко Бла́г и Человеколю́бец.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Му́чениче Дими́трие, я́ко звезда́ пресве́тлая, в Росси́йстей земли́ возсия́л еси́, Це́рковь Христо́ву све́том богоразу́мия озари́в, тму́ же от нея́ отгна́в неве́дения, просвети́л еси́ ту́ пресла́вных чуде́с явле́нием.

Име́я к Бо́гу дерзнове́ние, боже́ственное твое́ торжество́, му́чениче, творя́щия и честно́е твое́ страда́ние ве́рою чи́стою хва́лящия помина́й, преблаже́нне, и от бу́ри, и бе́д, и напа́стей спаса́й.

Ты́, я́ко кри́н благоцвету́щ, тече́нием кро́ве твоея́ показа́лся еси́, блаже́нне, и, гро́зд мы́сленный виногра́да Христо́ва, благово́нием чуде́с ми́р облагоуха́л еси́, ве́рою тя́, му́чениче, сла́вящия.

Богоро́дичен: Но́во я́ко Младе́нца на́м Преве́чное Сло́во родила́ еси́, двема́ во́лема и де́йствы су́ща сугу́ба, я́ко Челове́ка ку́пно же и Бо́га, Всенепоро́чная.

И́н.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Рожде́ние твое́ от ца́рскаго ко́рене бы́сть, убие́ние же твое́ от ра́бскаго зва́ния случи́ся, ты́ же, страда́льче Дими́трие, си́м не повреди́лся еси́, но и па́че от земна́го ца́рствия в небе́сное пресели́лся еси́.

Е́й, вои́стинну рече́ся, я́ко пра́ведник и по сме́рти жи́в бу́дет, та́кожде и ты́, непови́нный страда́льче Дими́трие, и по сме́рти твое́й жи́в и ца́рствуеши со все́ми святы́ми во Ца́рствии небе́снем.

Ве́лия ра́дость сотвори́ся по все́й Росси́йстей земли́, я́ко Бо́г моли́твами твои́ми погуби́ вся́ враги́ и наве́тники челове́ки, смуща́ющия держа́ву сро́дник твои́х, о ни́хже ны́не мо́лишися дарова́ти и́м ве́лию ми́лость.

Богоро́дичен: Из Тебе́ Бо́г произы́де и спасе́ние дарова́ всему́ ро́ду челове́чу. Те́мже и а́з, недосто́йный ра́б Тво́й, молю́ Ти́ ся́, Пречи́стая: спасе́ние ми́ да́руй, я́ко да пою́ Тя́ и велича́ю, Де́во Всепе́тая.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Разже́гся за́вистию, ра́б уби́йца победи́ся властолю́бием и к за́висти уби́йство приплете́: закла́ тя́, я́ко а́гнца непоро́чна, му́чениче, отмще́ния же пра́веднаго не убежа́.

И́стинную ча́шу от твои́х крове́й страда́льческих поче́рпл еси́, прехва́льне му́чениче, и сию́ всегда́ предлага́еши Це́ркви, и пита́еши твои́ми чудесы́, Дими́трие, вопию́щия Христу́: от тли́, Бо́же, изба́ви на́с.

Я́ко пречестна́ же́ртва, та́йней трапе́зе принесе́н бы́в заколе́нием, му́чениче, в небе́сных оби́телех пресла́вно водворя́ешися, зря́ сла́ву Бо́жию и прие́мля боле́зней твои́х по́чести и страда́ния.

Богоро́дичен: На Тя́ соше́дши роса́ небе́сная и олядене́вшую зе́млю, Присноде́во, богоразу́мия вода́ми напои́вши, многопло́дну яви́.

И́н.

Ирмо́с: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю, и спаси́.

Чу́дно па́ки и ди́вно ви́дети, я́ко ра́б тво́й и уби́йца, седя́ на престо́ле оте́чествия твоего́ и слы́ша издале́ча благоро́дное твое́ и́мя, боя́знию обдержа́ся и сме́ртию сконча́ся, ты́ же при́сно живе́ши в Ца́рствии небе́снем.

А́ще и во еди́ном часе́, лю́тую сию́ сме́рть претерпе́л еси́, страда́льче Дими́трие, но со многострада́вшими му́ченики ве́чный живо́т приобре́л еси́, и ны́не с ни́ми наслажда́ешися ра́йския красоты́ и весе́лия.

Ди́вство ве́лие показа́ Бо́г тобо́ю, ка́ко по толи́цех ле́тех вопию́щи непови́нная кро́вь твоя́, а́ки А́велева на Ка́ина, на раба́ твоего́ и уби́йцу, и́же и ца́рь бы́сть, и прише́дши, зле́ погуби́ его́. Ты́ же при́сно ра́дуешися, пребыва́я у Христа́ Царя́ и Бо́га все́х.

Богоро́дичен: Из ко́рене Иессе́ева прозябла́ еси́, Влады́чице, и ко́рень породила́ еси́, все́х Царя́, Христа́ Бо́га на́шего, от Него́же вси́ спасе́ние получа́ем. Те́м непреста́нно моли́ Его́ дарова́ти на́м ве́лию ми́лость.

Конда́к, гла́с 8:

Возсия́ дне́сь в сла́вней па́мяти твое́й ве́рным весе́лие, я́ко бо доброра́сленный гре́зн, прозя́бл еси́ и Христу́ красе́н пло́д прине́сл еси́ себе́; те́мже и по убие́нии твое́м соблюде́ те́ло твое́ нетле́нно, страда́льчески обагре́ное кро́вию. Благоро́дне свя́те Дими́трие, соблюда́й оте́чество твое́ и гра́д тво́й невреди́м, тому́ бо еси́ утвержде́ние.

И́кос:

Я́ко а́гнец непоро́чен, кро́вь твою́ излия́л еси́, богому́дре Дими́трие, и от Благода́теля все́х Бо́га чуде́с да́р прия́л еси́, и вме́сто тле́ннаго обре́л еси́ бога́тство нетле́нное, предстои́ши бо престо́лу сла́вы все́х Царя́. Ему́же о на́с, му́чениче, моли́ся, да твои́ми моли́твами от бе́д свободи́вшеся, ра́достно возопие́м, глаго́люще: ра́дуйся, ве́рных прави́телю; ра́дуйся, ве́ры тве́рдое забра́ло; ра́дуйся, чу́до чуде́с пресла́вное и приста́нище ти́хое притека́ющих к тебе́; ра́дуйся, ко́реню ве́ры и моле́бниче о моля́щих ти́ ся́; ра́дуйся, оте́честву твоему́ похвала́ и во́инству на́шему на враги́ побо́рник. Сохраня́й гра́д тво́й невреди́м, тому́ бо еси́ утвержде́ние.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть, Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Собла́зн лука́ваго раба́ и того́ хи́тростей превы́ше, я́ко победи́тель изря́ден, му́чениче, бы́в, просла́вился еси́, зовы́й: Бо́же, благослове́н еси́.

Луча́ми, я́ко звезда́, собо́рную це́рковь чудесы́ просвети́л еси́, ве́рою же притека́ющим к ра́це моще́й твои́х исцеле́ние неоску́дно подае́ши, преблаже́нне, и зову́щим: Бо́же, благослове́н еси́.

А́ки а́гнец непоро́чен и кади́ло благоприя́тно, А́гнцу и́стинному и Па́стырю, му́чениче, прине́слся еси́ в приноше́ние всебога́тно и прия́тно всесожже́ние, Ему́же пое́м: благослове́н Бо́г оте́ц на́ших.

Богоро́дичен: Невеще́ственнаго Све́та вселе́ние Твое́ чре́во бы́сть, светлостьми́ Боже́ственнаго ра́зума безбо́жие отгна́вшаго, Пречи́стая Богоневе́сто Отрокови́це. Ему́же пое́м, взыва́юще: благослове́н Бо́г оте́ц на́ших.

И́н.

Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Мно́ги ко́зни умышля́ше на тя́ ра́б тво́й и уби́йца, да преда́ст тя́ непови́нней и лю́тей сме́рти, я́коже и бы́сть; по́слежде же са́м живота́ своего́ гонза́ет и ца́рства отбыва́ет, ты́ же, страда́льче, во ве́ки ца́рствуеши.

Из чре́ва ма́терня изы́де, и не во мно́зе вре́мени настоя́щее се́ житие́ ви́де, и лю́тою и непови́нною сме́ртию от о́наго раба́ своего́ и уби́йцы ко Го́споду оты́де, и в кро́вы небе́сныя всели́ся.

Тече́т сла́ва, а́ки река́, в Росси́йстей земли́, пове́дающи и непови́нную сме́рть твою́: ка́ко повеле́нием о́наго раба́ твоего́ таково́ю сме́ртию ве́чный живо́т себе́ получи́л еси́.

Богоро́дичен: Ро́д земны́х по достоя́нию воспе́ти Тя́ не мо́жет, Влады́чице, а́з же, окая́нный и скве́рный, ка́ко могу́ простре́ти недосто́йнии устне́ мои́ и воспе́ти Тя́, Де́во Всепе́тая?

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Вше́д, му́чениче, в небе́снаго кру́га тече́ния, на доброде́тельный возду́х, страда́ньми препоя́сан, кре́ст за ски́петр в десну́ю ру́ку име́я, сца́рствовати Христу́ сподо́бился еси́, Дими́трие царе́виче. Моли́ спасти́ся на́м, пою́щим: благослови́те, вся́ дела́ Госпо́дня, Го́спода.

Укра́шен ра́зумом, кра́сному Влады́це предстои́ши, све́тел при́сно, я́ко победоно́сец богоприя́тен, укроти́ моли́твами твои́ми ва́рварская нахожде́ния и низложи́ му́чащее на́с искуше́ние, согнета́ющее зло́м во глубину́ поги́бели, страстоте́рпче Дими́трие, пою́щих: благослови́те, вся́ дела́ Госпо́дня, Го́спода.

Пречестна́я твоя́ па́мять, освяща́ющи ми́р, приспе́, всехва́льне страстоно́сче, в ню́же мо́лимся получи́ти тобо́ю заступле́ние, Дими́трие, пою́щим сла́ву блага́го уго́дника: благослови́те, вся́ дела́ Госпо́дня, Го́спода.

Богоро́дичен: Свяще́нных проро́к честны́й ли́к Тя́ пропису́ет, киво́т и несеко́мую го́ру, же́зл и две́рь, е́юже, я́ко ве́сть, про́йде Вы́шний и па́ки затворе́ну оста́ви Тя́ Де́ву.

И́н.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Из отца́, благочести́ва царя́, благода́ти тезоиме́нна, ма́тере же цари́цы, госпожи́ нарече́нныя, произше́л еси́, благоро́дне Дими́трие, и самаго́, ма́тере градово́м, Го́рняго Иерусали́ма, дости́гл еси́. Того́ ра́ди мо́лим тя́: не преста́й моли́ти о душа́х на́ших.

Я́ко а́гнец незло́бив, ничи́мже проти́вися рабу́ твоему́ и уби́йце, о́н же за́вистию диа́волею я́т бы́сть и предаде́ тя́ непови́нней сме́рти, того́ ра́ди живота́ своего́ зле́ гонза́ет, ты́ же при́сно пребыва́еши во Ца́рствии небе́снем.

Яви́ся пе́рвый вра́г в Росси́йстей земли́ по сме́рти твое́й, и́же пре́жде нося́й на себе́ о́браз и́ноческ, последи́ же све́рже его́ с себе́, и возложи́ на ся́ тезоимени́тство твое́, и бы́сть ца́рь, Бо́г же моли́тв ра́ди твои́х до конца́ сего́ погуби́.

Богоро́дичен: И́стинная еси́ Ма́ти небе́снаго Царя́ и Бо́га все́х, Влады́чице: Тобо́ю ве́сь ро́д челове́чь обнови́ся и от дре́вния кля́твы свободи́ся. Те́мже и а́з, недосто́йный, молю́ Ти́ ся́: свободи́ и мене́, непотре́бнаго раба́ Твоего́, от содержа́щаго греха́ моего́.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Обре́л еси́ от Христа́ возме́здие, му́дре му́чениче, пра́вды вене́ц прии́м и ра́дость неконча́емую, и, небе́снаго селе́ния во дво́рех пребыва́я, держа́ву оте́чества твоего́ помина́й, му́чениче Дими́трие.

Егда́ принесе́ни бы́ша честны́я твоя́ мо́щи, страстоте́рпче Дими́трие, тогда́ святи́тели, обстоя́ще о́др, ца́рь же, и кня́зи, и вси́ росси́йстии наро́ди воскли́кнуша ку́пно па́мять ве́чную, Христа́ велича́юще.

Му́ченик дне́сь сосло́вие, святы́х и пра́ведных ду́ши, я́ко победоно́сца тя́ и слико́вника прия́ша, му́чениче Дими́трие, с ни́миже пое́ши, ра́дуяся, Бо́га в Тро́ице, спаса́ющаго ду́ши на́ша.

Богоро́дичен: Разуме́вше издале́ча прозорли́выми очи́ма, проро́цы Тя́ я́ве провозвести́ша, хотя́щую Ма́терь бы́ти Вседе́телю и все́х Влады́це. Те́м Тя́ пое́м, Всепе́тая Богоро́дице, и испове́дуем, я́ко вои́стинну су́щую Богоро́дицу.

И́н.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Тезоимени́т еси́, страда́льче, дре́внему великому́ченику Дими́трию Селу́нскому, его́же у́бо моли́твами сла́вный му́ченик Не́стор Ли́я уби́, ты́ же и́менем твои́м раба́ твоего́ и уби́йцу зле́ погуби́л еси́.

А́ще, а́ки кла́с незре́л, и пожа́лся еси́ теле́сне, благове́рне царе́виче Дими́трие, но благоро́дною твое́ю душе́ю невреди́м пребы́л еси́, и ны́не пребыва́еши в небе́сных селе́ниих, ра́дуяся, и весели́шися, поя́ и славосло́вя Го́спода.

Во осмоле́тном во́зрасте ко Го́споду отше́д и со многому́чившимися му́ченики в ра́дость и весе́лие вше́д, ра́дуешися с ни́ми и весели́шися у Христа́ и Бо́га все́х, Его́же поя́, моли́ся о на́с.

А́ще и не во мно́зем вре́мени пострада́л еси́, но во еди́ном часе́, сию́ лю́тую и непови́нную сме́рть претерпе́л еси́, страда́льче Дими́трие, сего́ ра́ди введе́ Бо́г тя́ в ве́чное весе́лие и неконча́емую ра́дость.

Богоро́дичен: Соприсносу́щное Сло́во Отцу́ и Ду́ху, во чре́ве Твое́м заче́нши и без се́мене поро́ждши, Ма́ти Де́во Чи́стая, от Него́же, ве́рнии, спасе́ние и просвеще́ние прие́млем душа́м и те́лом на́шим, Того́ моли́, да спасе́т ду́ши на́ша, я́ко Бла́г и Человеколю́бец.

Свети́лен:

Я́ко цве́т красне́йший, от ца́рска прозя́бл еси́ ко́рене, прекра́сне Дими́трие, и обагре́нием страда́ния твоего́, я́ко ца́рскою порфи́рою, обагри́лся еси́ кро́вию. Те́м всечестну́ю твою́ па́мять любо́вию творя́щия от бе́д спаса́й.

Богоро́дичен: Стоя́ще о́крест Тебе́ де́вы богому́дрыя, Богороди́тельнице Мари́е, я́коже царе́вы дще́ре, Сы́ну Твоему́ приведо́шася невестоле́пно, Пречи́стая, я́ко Царю́ вся́ческих, Его́же, Ма́ти Де́во Отрокови́це, о на́с моли́.