Канон священномученику Памфилу Кесарийскому

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Си́лою Всесвята́го Ду́ха дванадесяточи́сленный собра́вся по́лк, кре́пко злочести́вых безбо́жное и лука́вое ополче́ние я́ко победоно́сец победи́.

Посрами́ся, страстоте́рпцем му́чеником вра́г прирази́вся, сво́й бо ту́л льсти́вый испраздни́в горча́йше, низложи́ти не возмо́же до́блейших кре́пости.

Гне́в е́ллинскаго шата́ния попра́сте Боже́ственным ра́зумом му́ченицы Христо́вы и му́дростию укра́шени, е́йже проти́витися не возмого́ша благоче́стию проти́вницы.

Богоро́дичен: О́блак, пра́вды Со́лнце на́м возсия́вшую, О́тча Сы́на Единоро́днаго, Богоро́дице Всепе́тая, всеблагоче́стно сла́вяще, вы́ну Тя́ блажи́м.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Просия́л еси́ благоче́стно де́лом, и сло́вом, и честны́м пома́занием, му́чениче Христо́в Памфи́ле, свяще́нства, богому́дре.

Я́коже цевни́ца всеблаголе́пна, испове́данием устро́ена, пою́щи веща́ния, Христо́вы му́ченицы со́брани бы́сте.

Теку́ще к ра́зуму небе́снаго и честна́го зва́ния, я́ко победи́телие вене́ц от Влады́ки прия́сте.

Богоро́дичен: Всели́ся в ны́ в вы́шних Живы́й, Пречи́стая, вы́ше естества́, пло́ть бо из Тебе́ прие́м, облече́ся.

Седа́лен, гла́с 4.

Дванадеся́тный ли́к боже́ственных му́ченик, вои́стинну проти́ву мучи́телей враго́в ополчи́вся тве́рдо, си́х ору́жии ве́ры победи́ и, венце́м от Бо́га оде́явся, а́нгельским же лико́м причте́ся. С ни́миже мо́лит всегда́ изба́витися от напа́стей же, и скорбе́й, и ве́чных му́к того́ блажа́щим.

Сла́ва, и ны́не, богоро́дичен: Удиви́ся Ио́сиф, е́же па́че естества́ зря́ и внима́ше мы́слию, и́же на руно́ до́ждь, в безсе́менном зача́тии Твое́м, Богоро́дице, купину́, огне́м неопали́мую, же́зл Ааро́нов прозя́бший, и, свиде́тельствуя, обру́чник Тво́й и храни́тель свяще́нником взыва́ше: Де́ва ражда́ет и по Рождестве́ па́ки Де́ва пребыва́ет.

Крестобогоро́дичен: Де́ва и А́гница, ви́девши на Кресте́, без се́мене из Нея́ А́гнца ро́ждшагося и копие́м прободе́на, печа́ли уя́звена стрела́ми, вопия́ше боле́зненно, восклица́ющи: что́ но́вое та́инство? Ка́ко умира́еши, И́же живота́ еди́н Госпо́дь? Те́мже воскресни́, па́дшаго воздвиза́я пра́отца.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Укра́шено Боже́ственными апо́стол и проро́к дарова́ньми, ликостоя́ние яви́ся му́ченик Твои́х, си́х равночи́сленно, Влады́ко, я́вльшееся промышле́нием Твои́м.

От разли́чных собра́вшеся жи́тельств, я́ко вма́ле всеце́л о́браз Це́ркве спаса́ти сподо́бистеся, согла́сно зову́ще: сла́ва си́ле Твое́й, Го́споди.

Направля́емь дла́нию Влады́ки, и́же Того́ ра́ди во́льную сме́рть подъя́т собо́р прехва́льный му́чеников, взыва́юще: сла́ва си́ле Твое́й, Го́споди.

Богоро́дичен: Богоглаго́ланьми оглаша́еми, Богоро́дице, и́же о Тебе́, и ви́дяще си́х сбы́тия, — ра́дуйся, — Тебе́ вопие́м, — Де́во Всенепоро́чная, изба́вленнии Рождество́м Твои́м.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Не терпя́ су́щим на земли́ послужи́ти, о Памфи́ле, боже́ственное житие́, е́же от младе́нства име́яше, страда́нием уясни́л еси́.

Боже́ственною седи́ною и му́дростию укра́шен, ко гра́ду свято́му устреми́вся Уа́л, я́ко му́ченик венча́ся.

У́м име́я Христо́в, я́ко Па́влу тезоимени́т прехва́льне, му́ченическим венце́м, зако́нно пострада́в, украси́лся еси́.

Богоро́дичен: Испра́вила еси́, Богоро́дице Чи́стая, Е́вино поползнове́ние, ро́ждши Бо́га Сло́ва, низве́рженных паде́ние испра́вльшаго.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Наде́ждами ве́чныя жи́зни утвержда́еми, теле́с раздробле́ния, ра́дующеся, терпя́ху до́блии, боже́ственных проро́к Твои́х, Спа́се, купноиме́ннии.

Сме́ртию жи́знь лу́чшую купи́ша, Самуи́л и Илия́, Дании́л и боже́ственный Иереми́я, и к си́м Иса́ия великоимени́тый.

Свети́льники све́тлы Бо́гу ны́не Еги́пет возсиява́ет, и́же дре́вле глубо́кою тмо́ю покрыва́емый неве́дения, богоразу́мия све́том обогати́вся.

Богоро́дичен: Го́ру Тя́ Дании́л зря́ше, Всенепоро́чная, из нея́же отсече́ся Ка́мень, сокруши́вый вся́кий пре́лести о́браз и испо́лнив богоразу́мия вся́ концы́.

Конда́к, гла́с 4.

Муче́нием стра́шным предлежа́щим Госпо́дни страда́льцы до́блии в небоя́зненном ра́дующеся мудрова́нии, си́м собесе́доваша, о пло́ти неради́вше, те́мже насле́дствоваша ве́чнующую сла́ву, о на́с моля́щеся при́сно, восхваля́ющих и́х по́двиги.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Све́тлым лице́м и ума́ чистото́ю, му́чениче, предзря́ бу́дущую ра́дость, му́ки преоби́дел еси́, стру́жемь неми́лостивно, всеблаже́нне Порфи́рие.

Ю́ноши три́ в пещи́ спасы́й Бо́г, Се́й, страстоте́рпче блаже́нне, тя́, Его́ ра́ди во огни́ жего́ма, я́ве прие́млет, благово́нну же́ртву, Порфи́рие.

Кре́постию души́ твоея́ укра́шен и телесе́, всю́ мучи́теля, Селевки́е, кре́пость низложи́л еси́, всехва́льне, — благослове́н еси́, Бо́же мо́й, — зовы́й, — и Го́споди.

Богоро́дичен: Я́ко Богоро́дица, Красне́йшаго всея́ тва́ри родила́ еси́, Бо́жие бо была́ еси́ и́стинно оби́телище всесвято́е: благослове́на Ты́ в жена́х, Всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Зако́ном ты́ повину́яся Христо́вым, отве́ргл еси́ вся́, всему́дре Селевки́е, я́ко во́ин же бы́л еси́ и благоче́стия учи́тель, о сирота́х и вдова́х попече́ние име́я и взыва́я: благослови́те, вся́ дела́ Госпо́дня, Го́спода.

Заре́ю сия́я мы́сленною, ста́рче сла́вный и му́чениче Феоду́ле, и ра́б и́скренний бы́л еси́ Влады́це, подо́бяся, Его́же Кре́ст жела́я, ра́дуяся, претерпе́л еси́, — благослови́те, — поя́, — вся́ дела́ Госпо́дня, Го́спода.

Хра́м яви́вся, Иулиа́не, Боже́ственнаго Ду́ха, нра́вов бла́гостию украси́лся еси́, испо́лнь у́бо благогове́ния и све́тлости, испо́лнь же ве́ры яви́вся, сожига́емь ве́сь, — благослови́те, — вопия́, — вся́ дела́ Госпо́дня, Го́спода.

Богоро́дичен: Безма́терне Сло́во, из Отца́ Сы́й, пе́рвее, безо́тчее же бы́сть из Тебе́, второ́е, Всечи́стая, вопло́щься пе́рвее Безпло́тный, за милосе́рдие восхоте́в спасти́ пою́щия: благослови́те, вся́ дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Еди́ну небе́сную име́ти жи́знь жела́юще, страстоте́рпцы, привре́менную и тле́нную велему́дренно преоби́десте и ны́не сла́дости лу́чшия и блаже́нныя наслажда́етеся.

Вну́трь ны́не Боже́ственнаго рая́ лику́ете усе́рдно, озаре́ний Исто́чнику предстоя́ще, му́ченицы сла́внии, от Него́же почерпа́юще, заря́ми просвеща́етеся.

Все́х ве́рою творя́щих пресве́тлую твою́ па́мять, дванадеся́тный ли́че, ны́не помина́я ко Влады́це Христу́, с тобо́ю, жили́ща сподо́битися помоли́ся.

Богоро́дичен: Я́ко Ма́ти Еди́наго Влады́ки, все́х тва́рей превы́шши была́ еси́, Де́во Мари́е. Те́мже, ве́рнии, Тя́ вси́, Всенепоро́чная, ны́не ра́дующеся и веселя́щеся, велича́ем.