Канон святителю Евстафию, архиепископу Антиохийскому

Припев: Святи́телю, о́тче Евста́фие, моли́ Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 05 марта (21 февраля ст. ст.)

Глас 7.

Пе́снь 1.

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, Тому́ Еди́ному пои́м, я́ко просла́вися.

И́же отце́в ве́рх, я́ко Сло́ва благода́тию оде́янна, вели́каго Евста́фия пе́сньми восхваля́ем.

Побо́рник ве́ры я́влься, Христо́ву Це́рковь неплене́ну боре́нием е́реси сохрани́л еси́, преподо́бне.

Уста́ Словесе́ бы́в, отры́гнул еси́ уче́ния пучи́ну, преподо́бне, в не́йже потопи́л еси́ А́риево злоче́стие.

Богоро́дичен: И́же сло́вом пло́тию па́че сло́ва ро́ждши Нача́льника Жи́зни, непреста́нно моли́ спасти́ся душа́м на́шим.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Ты́, ору́жие извле́к и́стинное, яви́лся еси́ благоче́стия первонача́льник, сопроти́вныя ве́ре пробо́д, Евста́фие.

Ты́, любоболе́зненно возде́лав Це́рковь серпо́м уче́ний твои́х, блаже́нне, из ко́рене вся́ посе́кл еси́ те́м пле́велы.

Старе́йшинствуя со сла́вою И́стинному, су́щаго вои́стинну нача́льника лжи́ А́рия, богоблаже́нне, порази́л еси́ ка́мением слове́с твои́х.

Богоро́дичен: Роди́лся еси́ несказа́нно, яви́лся еси́, я́коже благоволи́л еси́, Спа́се на́ш, и ми́р обнови́л еси́, Го́споди.

Седа́лен, гла́с 3.

Единосу́щнаго Отцу́ и Ду́ху Сло́ва пропове́дал еси́, о́тче Евста́фие, и безу́мнаго тве́рдо жи́лами уче́ний твои́х А́рия удави́л еси́, ху́лящаго на пра́вое уче́ние. Те́мже спричте́ся лико́м, ра́дуяся, боже́ственных пропове́дник оте́ц, с ни́миже на́с помина́й.

Богоро́дичен: Я́ко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже я́ко вину́ Тя́ до́брых блажа́ще при́сно, со а́нгелом вопие́м Ти́: ра́дуйся, Благода́тная.

Крестобогоро́дичен: Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Кресте́, ма́терски пла́чущи, глаго́лаше: что́ Тебе́ воздаде́ евре́йский беззако́нный собо́р и неблагода́рный, и́же мно́гих и вели́ких Твои́х, Сы́не Мо́й, даро́в наслади́выйся? Пою́ Твое́ Боже́ственное снизхожде́ние.

Пе́снь 4.

Ирмо́с: Небеса́ покры́ла е́сть доброде́тель Твоя́, Го́споди, и Твоего́ хвале́ния вся́ испо́лнил еси́. Сла́ва си́ле Твое́й, Человеколю́бче.

Ве́ры собира́я победи́тельная, стрела́ми слове́сными нечести́ваго богому́дренно низложи́л еси́, о́тче, А́рия.

Слове́с твои́х све́тлость, я́коже мо́лния, изше́дши, А́риево злосла́вие попаля́ет, Евста́фие прему́дре.

Огражде́ние положи́в словесы́ твои́ми, я́коже виногра́ду Госпо́дню, Це́ркви, преподо́бне.

Богоро́дичен: Родила́ еси́ пло́тию, Де́во Чи́стая, И́же пре́жде Тебе́ Безнача́льнаго Сло́ва и по Тебе́ па́че Сло́ва, из Тебе́ вочелове́чшася.

Пе́снь 5.

Ирмо́с: У́тренюет ду́х мо́й к Тебе́, Бо́же, зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Мра́к разори́л еси́ ересе́й и возсия́л еси́ конце́м все́м зари́ уче́ний твои́х, Евста́фие блаже́нне.

Ору́жии огражда́еми, Евста́фие, уче́ний твои́х, настоя́щия Боже́ственней ве́ре е́реси побежда́ем.

Богоро́дичен: Де́во, не преста́й моля́щи Бо́га, из Тебе́ ро́ждшагося пло́тию, изба́витися рабо́м Твои́м от вся́каго обстоя́ния.

Пе́снь 6.

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с.

Слове́с твои́х богодохнове́нных ве́тром утиши́л еси́ бу́рю ерети́чествующих, в приста́нище благоче́стия Це́рковь направля́я, преблаже́нне.

В доброде́тели непоро́чен сы́й, преподо́бне, сла́вен яви́лся еси́ сло́вом и житие́м, Це́ркве Христо́вы удобре́ние.

Богоро́дичен: Его́же родила́ еси́, Богоро́дице, несказа́нно, Бо́га на́шего, моля́щи не преста́й, изба́витися от бе́д пою́щим Тя́, Чи́стая Присноде́во.

Конда́к, гла́с 4.

Я́ко звезда́ многосве́тлая, от восто́ка возсия́в, озари́л еси́ в сердца́х ве́рных доброде́тели чуде́с твои́х, чудотво́рче всеблаже́нне Тимофе́е.

Пе́снь 7.

Ирмо́с: В пещи́ су́ще халде́йстей, авраа́мстии о́троцы ликова́ху со а́нгелом, глаго́люще: оте́ц на́ших Бо́же, благослове́н еси́.

Ерети́чествующих бра́нь ору́жием Ду́ха, му́дре, победи́в, по́чести нетле́нныя прия́л еси́, от Христа́ венча́емь.

Ме́чь обоюдуо́стр уста́ твоя́ на нечести́вых, о́тче, показа́шася, под руко́ю Сло́ва покрыва́ема, я́ко си́х бра́нь посе́к.

Уче́ния лопа́тою разве́ял еси́ А́риеву ле́сть, я́ко пле́вы, во одушевле́нную, о́тче, жи́тницу собира́я пшени́цу ве́ры.

Богоро́дичен: Богоро́дицу вси́ почти́м, я́ко Спа́са родила́ е́сть, ве́рою взыва́юще: ра́дуйся, Рабо́ и Ма́ти Христа́ Бо́га на́шего.

Пе́снь 8.

Ирмо́с: Еди́наго Безнача́льнаго Царя́ сла́вы, Его́же благословя́т небе́сныя си́лы и трепе́щут чи́ни а́нгельстии, по́йте, свяще́нницы, лю́дие, превозноси́те Его́ во ве́ки.

Жезло́м прему́дрости твоея́ писа́ний раздели́в боже́ственную пучи́ну, Христо́в святи́телю, и преложи́л еси́ к земли́ правосла́вия но́ваго Изра́иля, ариани́ты же, я́ко еги́птяны, удави́л еси́.

Небе́снаго ты́ сше́д виде́ния на сто́лп хала́нский, А́риев, размеси́л еси́ язы́ки ерети́чествующих, Евста́фие му́дре, единогла́сную ве́ру пропове́дуя во ве́ки.

Испове́даньми твои́ми, и́же по и́стине, на за́паде жи́знь сконча́л еси́; возсия́л еси́ па́ки на восто́це ста́ду твоему́, му́дре, зарю́ благоче́стия испуща́я во ве́ки.

Богоро́дичен: Созда́вшаго Ада́ма по о́бразу, и от смеше́ния его́ проше́дша, и спа́сша челове́ческий ро́д, по́йте, свяще́ннии, лю́дие, превозноси́те Его́ во ве́ки.

Пе́снь 9.

Ирмо́с: Па́че естества́ Ма́терь и по естеству́ Де́ву, еди́ну в жена́х Благослове́нную, пе́сньми, ве́рнии, Богоро́дицу велича́ем.

И́же в писа́ниих, гро́зд, учи́тельно изгне́т, напои́л еси́ ве́рных вина́, о́тче, и́стины Христо́вы, сердца́ веселя́ща.

Ору́жие обоюдуостро́, нося́, богосло́вный Тво́й язы́к, посе́кл еси́ лука́вый А́рия гне́в, непови́нную и душе́вную кро́вь, блаже́нне, излива́ющ.

Наро́читый святы́й де́нь всесвяты́я твоея́ па́мяти творя́ще духо́вно, тя́ мо́лим: моли́ приле́жно, святи́телю, спасти́ся на́м.

Богоро́дичен: Ю́же во чре́ве заче́ншую неопи́санное Сло́во и две́рь Боже́ственныя жи́зни на́м я́вльшую, Пречи́стую вои́стинну Богоро́дицу велича́ем.

Пѣ́снь а҃.

І҆рмо́съ: Поспѣ́шествовавшемꙋ бг҃ꙋ во є҆гѵ́птѣ мѡѷсе́ови, и҆звестѝ і҆и҃лѧ, томꙋ̀ є҆ди́номꙋ пои́мъ, ꙗ҆́кѡ просла́висѧ.

И҆́же ѻ҆тцє́въ ве́рхъ, ꙗ҆́кѡ сло́ва благода́тїю ѡ҆дѣ́ѧнна, вели́каго є҆ѵста́ѳїа пѣ́сньми восхвалѧ́емъ.

Побо́рникъ вѣ́ры ꙗ҆́вльсѧ, хрⷭ҇то́вꙋ цр҃ковь неплѣне́нꙋ боре́нїемъ є҆́реси сохрани́лъ є҆сѝ, преподо́бне.

Оу҆ста̀ словесѐ бы́въ, ѿры́гнꙋлъ є҆сѝ ᲂу҆че́нїѧ пꙋчи́нꙋ, преподо́бне, въ не́йже потопи́лъ є҆сѝ а҆́рїево ѕлоче́стїе.

Бг҃оро́диченъ: И҆́же сло́вомъ пло́тїю, па́че сло́ва ро́ждши нача́льника жи́зни, непреста́ннѡ молѝ спасти́сѧ дꙋша́мъ на́шымъ.

Пѣ́снь г҃.

І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.

Ты̀ ѻ҆рꙋ́жїе и҆звле́къ и҆́стинное, ꙗ҆ви́лсѧ є҆сѝ благоче́стїѧ первонача́льникъ, сопроти̑вныѧ вѣ́рѣ пробо́дъ, є҆ѵста́ѳїе.

Ты̀ любоболѣ́зненнѡ воздѣ́лавъ цр҃ковь серпо́мъ ᲂу҆че́нїй твои́хъ, бл҃же́нне, и҆зъ ко́рене всѧ̑ посѣ́клъ є҆сѝ тѣ́мъ пле́велы.

Старѣ́йшинствꙋѧ со сла́вою и҆́стинномꙋ, сꙋ́щаго вои́стиннꙋ нача́льника лжѝ а҆́рїа, бг҃облаже́нне, порази́лъ є҆сѝ ка́менїемъ слове́съ твои́хъ.

Бг҃оро́диченъ: Роди́лсѧ є҆сѝ несказа́ннѡ, ꙗ҆ви́лсѧ є҆сѝ ꙗ҆́коже благоволи́лъ є҆сѝ, сп҃се на́шъ: и҆ мі́ръ ѡ҆бнови́лъ є҆сѝ, гдⷭ҇и.

Сѣда́ленъ, гла́съ г҃.

Є҆диносꙋ́щнаго ѻ҆ц҃ꙋ̀ и҆ дх҃ꙋ сло́ва проповѣ́далъ є҆сѝ, ѻ҆́ч҃е є҆ѵста́ѳїе, и҆ безꙋ́мнаго тве́рдѡ жи́лами ᲂу҆че́нїй твои́хъ а҆́рїа ᲂу҆дави́лъ є҆сѝ, хꙋ́лѧщаго на пра́вое ᲂу҆че́нїе. тѣ́мже спричте́сѧ ликѡ́мъ ра́дꙋѧсѧ, бжⷭ҇твенныхъ проповѣ̑дникъ ѻ҆тє́цъ, съ ни́миже на́съ помина́й.

Бг҃оро́диченъ: Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, бл҃года́тнаѧ.

Крⷭ҇тобг҃оро́диченъ: Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва ви́сѧща на крⷭ҇тѣ̀, мт҃рски пла́чꙋщи гл҃го́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе.

Пѣ́снь д҃.

І҆рмо́съ: Нб҃са̀ покры́ла є҆́сть добродѣ́тель твоѧ̀, гдⷭ҇и, и҆ твоегѡ̀ хвале́нїѧ всѧ̑ и҆спо́лнилъ є҆сѝ: сла́ва си́лѣ твое́й, чл҃вѣколю́бче.

Вѣ́ры собира́ѧ побѣди́тєльнаѧ, стрѣла́ми слове́сными нечести́ваго бг҃омꙋ́дреннѡ низложи́лъ є҆сѝ, ѻ҆́ч҃е, а҆́рїа.

Слове́съ твои́хъ свѣ́тлость ꙗ҆́коже мо́лнїѧ и҆зше́дши, а҆́рїево ѕлосла́вїе попалѧ́етъ, є҆ѵста́ѳїе премꙋ́дре.

Ѡ҆гражде́нїе положи́въ словесы̀ твои́ми, ꙗ҆́коже вїногра́дꙋ гдⷭ҇ню, цр҃кви, прпⷣбне.

Бг҃оро́диченъ: Родила̀ є҆сѝ пло́тїю, дв҃о чⷭ҇таѧ, и҆́же пре́жде тебє̀ безнача́льнаго сло́ва, и҆ по тебѣ̀ па́че сло́ва, и҆зъ тебє̀ вочл҃вѣ́чшасѧ.

Пѣ́снь є҃.

І҆рмо́съ: Оу҆́тренюетъ дꙋ́хъ мо́й къ тебѣ̀, бж҃е, занѐ свѣ́тъ є҆сѝ, и҆ твоѧ̑ повелѣ̑нїѧ бы́ша и҆сцѣлє́нїѧ рабѡ́мъ твои̑мъ, чл҃вѣколю́бче.

Мра́къ разори́лъ є҆сѝ є҆ресе́й, и҆ возсїѧ́лъ є҆сѝ концє́мъ всѣ̑мъ зари̑ ᲂу҆че́нїй твои́хъ, є҆ѵста́ѳїе блаже́нне.

Ѡ҆рꙋ̑жїи ѡ҆гражда́еми, є҆ѵста́ѳїе, ᲂу҆че́нїй твои́хъ, настоѧ́щыѧ бжⷭ҇твеннѣй вѣ́рѣ є҆́рєси побѣжда́емъ.

Дв҃о, не преста́й молѧ́щи бг҃а, и҆зъ тебє̀ ро́ждшагосѧ пло́тїю, и҆зба́витисѧ рабѡ́мъ твои̑мъ ѿ всѧ́кагѡ ѡ҆бстоѧ́нїѧ.

Пѣ́снь ѕ҃.

І҆рмо́съ: І҆ѡ́на и҆зъ чре́ва а҆́дова вопїѧ́ше: возведѝ ѿ тлѝ живо́тъ мо́й. мы́ же тебѣ̀ вопїе́мъ: всеси́льне сп҃се, поми́лꙋй на́съ.

Слове́съ твои́хъ бг҃одохнове́нныхъ вѣ́тромъ ᲂу҆тиши́лъ є҆сѝ бꙋ́рю є҆реті́чествꙋющихъ, въ приста́нище благоче́стїѧ цр҃ковь направлѧ́ѧ, пребл҃же́нне.

Въ добродѣ́тели непоро́ченъ сы́й, преподо́бне, сла́венъ ꙗ҆ви́лсѧ є҆сѝ сло́вомъ и҆ житїе́мъ, цр҃кве хрⷭ҇то́вы ᲂу҆добре́нїе.

Є҆го́же родила̀ є҆сѝ, бцⷣе, несказа́ннѡ бг҃а на́шего, молѧ́щи не преста́й, и҆зба́витисѧ ѿ бѣ́дъ, пою́щымъ тѧ̀, чⷭ҇таѧ приснодв҃о.

Конда́къ, гла́съ д҃.

Ꙗ҆́кѡ ѕвѣзда̀ многосвѣ́тлаѧ ѿ восто́ка возсїѧ́въ, ѡ҆зари́лъ є҆сѝ въ сердца́хъ вѣ́рныхъ добродѣ́тєли чꙋде́съ твои́хъ, чꙋдотво́рче всебл҃же́нне тїмоѳе́е.

Пѣ́снь з҃.

І҆рмо́съ: Въ пещѝ сꙋ́ще халде́йстѣй, а҆враа́мстїи ѻ҆́троцы ликова́хꙋ со а҆́гг҃ломъ, глаго́люще: ѻ҆тє́цъ на́шихъ бж҃е, бл҃гослове́нъ є҆сѝ.

Є҆реті́чествꙋющихъ бра́нь ѻ҆рꙋ́жїемъ дх҃а, мꙋ́дре, побѣди́въ, по́чєсти нетлѣ̑нныѧ прїѧ́лъ є҆сѝ ѿ хрⷭ҇та̀ вѣнча́емь.

Ме́чь ѻ҆боюдꙋѻ́стръ ᲂу҆ста̀ твоѧ̑, на нечести́выхъ, ѻ҆́ч҃е, показа́шасѧ, подъ рꙋко́ю сло́ва покрыва́ема, ꙗ҆́кѡ си́хъ бра́нь посѣ́къ.

Оу҆че́нїѧ лопа́тою развѣ́ѧлъ є҆сѝ а҆́рїевꙋ ле́сть ꙗ҆́кѡ пле́вы, во ѡ҆дꙋшевле́ннꙋю, ѻ҆́ч҃е, жи́тницꙋ собира́ѧ пшени́цꙋ вѣ́ры.

Бг҃оро́диченъ: Бцⷣꙋ всѝ почти́мъ, ꙗ҆́кѡ сп҃са родила̀ є҆́сть, вѣ́рою взыва́юще: ра́дꙋйсѧ, рабо̀ и҆ мт҃и хрⷭ҇та̀ бг҃а на́шегѡ.

Пѣ́снь и҃.

І҆рмо́съ: Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте, свѧще́нницы, лю́дїе, превозноси́те є҆го̀ во вѣ́ки.

Жезло́мъ премꙋ́дрости твоеѧ̀ писа́нїй раздѣли́въ бж҃е́ственнꙋю пꙋчи́нꙋ, хрⷭ҇то́въ ст҃и́телю, и҆ преложи́лъ є҆сѝ къ землѝ правосла́вїѧ но́ваго і҆и҃лѧ: а҆рїани́ты же ꙗ҆́кѡ є҆гѵ́птѧны ᲂу҆дави́лъ є҆сѝ.

Нбⷭ҇нагѡ ты̀ сше́дъ видѣ́нїѧ, на сто́лпъ хала́нскїй, а҆́рїевъ, размѣси́лъ є҆сѝ ѧ҆зы́ки є҆реті́чествꙋющихъ, є҆ѵста́ѳїе мꙋ́дре, є҆диногла́снꙋю вѣ́рꙋ проповѣ́дꙋѧ во вѣ́ки.

И҆сповѣ́даньми твои́ми, и҆̀же по и҆́стинѣ, на за́падѣ жи́знь сконча́лъ є҆сѝ: возсїѧ́лъ є҆сѝ па́ки на восто́цѣ ста́дꙋ твоемꙋ̀, мꙋ́дре, зарю̀ бл҃гоче́стїѧ и҆спꙋща́ѧ во вѣ́ки.

Бг҃оро́диченъ: Созда́вшаго а҆да́ма по ѻ҆́бразꙋ, и҆ ѿ смѣше́нїѧ є҆гѡ̀ проше́дша, и҆ спа́сша человѣ́ческїй ро́дъ, по́йте, свѧще́ннїи, лю́дїе, превозноси́те є҆го̀ во вѣ́ки.

Пѣ́снь ѳ҃.

І҆рмо́съ: Па́че є҆стества̀ мт҃рь, и҆ по є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю, пѣ́сньми, вѣ́рнїи, бцⷣꙋ велича́емъ.

И҆́же въ писа́нїихъ гро́здъ ᲂу҆чи́тельнѡ и҆згне́тъ, напои́лъ є҆сѝ вѣ́рныхъ вїна̀, ѻ҆́ч҃е, и҆́стины хрⷭ҇то́вы, сердца̀ веселѧ́ща.

Ѻ҆рꙋ́жїе ѻ҆боюдꙋѻстро̀ носѧ̀ бг҃осло́вный тво́й ѧ҆зы́къ, посѣ́клъ є҆сѝ лꙋка́вый а҆́рїа гнѣ́въ, непови́ннꙋю и҆ дꙋше́внꙋю кро́вь, бл҃же́нне, и҆злива́ющъ.

Наро́читый свѧты́й де́нь всесвѧты́ѧ твоеѧ̀ па́мѧти творѧ́ще дꙋхо́внѡ, тѧ̀ мо́лимъ: молѝ прилѣ́жнѡ, ст҃и́телю спасти́сѧ на́мъ.

Бг҃оро́диченъ: Ю҆́же во чре́вѣ заче́ншꙋю неѡпи́санное сло́во, и҆ две́рь бжⷭ҇твенныѧ жи́зни на́мъ ꙗ҆́вльшꙋю, пречⷭ҇тꙋю вои́стиннꙋ бцⷣꙋ велича́емъ.

Житие святителя Евстафия, архиепископа Антиохийского

Свя­ти­тель Ев­ста­фий, ар­хи­епи­скоп Ан­тио­хий­ский (323–331) ро­дил­ся в Си­де Пам­фи­лий­ском во вто­рой по­ло­вине III ве­ка. Он был епи­ско­пом го­ро­да Бе­рии, поль­зо­вал­ся лю­бо­вью и ува­же­ни­ем на­ро­да и по хо­да­тай­ству паст­вы был воз­ве­ден от­ца­ми I Все­лен­ско­го Со­бо­ра (325) на Ан­тио­хий­скую ка­фед­ру.

Свя­ти­тель Ев­ста­фий был глу­бо­ко об­ра­зо­ван­ным бо­го­сло­вом, а так­же от­ли­чал­ся об­шир­ны­ми по­зна­ни­я­ми в на­у­ках свет­ских. Ко­гда на Во­сто­ке ста­ла рас­про­стра­нять­ся ересь Ария, не при­зна­вав­ше­го Еди­но­су­щия Сы­на Бо­жия со От­цом, свя­ти­тель Ев­ста­фий рев­ност­но бо­рол­ся – уст­но и пись­мен­но – за чи­сто­ту Пра­во­слав­ной ве­ры. В 325 го­ду свя­тым рав­ноап­о­столь­ным ца­рем Кон­стан­ти­ном Ве­ли­ким (306–337) был со­зван I Все­лен­ский Ни­кей­ский Со­бор. Пер­вым пред­се­да­те­лем на этом Со­бо­ре был свя­ти­тель Ев­ста­фий. Со­бор осу­дил уче­ние Ария и из­ло­жил пра­во­слав­ное ис­по­ве­да­ние в Сим­во­ле ве­ры. Неисто­во­го Ария, как на­звал его свя­ти­тель Ев­ста­фий, не по­же­лав­ше­го от­ка­зать­ся от сво­е­го за­блуж­де­ния, и его еди­но­мыш­лен­ни­ков Со­бор, ли­шив са­на, от­лу­чил от Церк­ви. Од­на­ко сре­ди епи­ско­пов, под­пи­сав­ших Ни­кей­ский Сим­вол, бы­ли и та­кие, ко­то­рые со­чув­ство­ва­ли ере­си Ария и под­пи­са­ли ак­ты Со­бо­ра не по убеж­де­нию, а бо­ясь от­лу­че­ния. По­сле Со­бо­ра на­ча­лись их про­ис­ки про­тив свя­ти­те­ля Ев­ста­фия. С ве­ли­кой хит­ро­стью они до­би­лись его со­гла­сия на со­зыв в Ан­тио­хии По­мест­но­го Со­бо­ра. Под­ку­пив од­ну блуд­ни­цу, они под­го­во­ри­ли ее явить­ся на Со­бор с груд­ным мла­ден­цем и лже­сви­де­тель­ство­вать о том, что от­цом мла­ден­ца яв­ля­ет­ся свя­ти­тель Ев­ста­фий. На­ру­шая апо­столь­ские пра­ви­ла о том, что об­ви­не­ние на свя­щен­но­слу­жи­те­ля сле­ду­ет при­ни­мать при под­твер­жде­нии двух сви­де­те­лей, ари­ане объ­яви­ли свя­ти­те­ля Ев­ста­фия низ­ло­жен­ным. Он без су­да был от­прав­лен в ссыл­ку во Фра­кию. Но лож­ность об­ви­не­ния вско­ре от­кры­лась: тяж­ко за­болев по­сле кле­ве­ты, жен­щи­на рас­ка­я­лась, при­зва­ла кли­ри­ков и в при­сут­ствии мно­гих лю­дей ис­по­ве­да­ла свой грех. Од­на­ко к это­му вре­ме­ни свя­той Кон­стан­тин Ве­ли­кий умер, и на пре­стол всту­пил его сын Кон­стан­ций (337–361), раз­де­ляв­ший ере­ти­че­ские взгля­ды Ария и по­кро­ви­тель­ство­вав­ший ари­ан­ству­ю­щим епи­ско­пам. Свя­ти­тель Ев­ста­фий и в ссыл­ке всё так же рев­ност­но бо­рол­ся за пра­во­сла­вие. Скон­чал­ся в ссыл­ке, в го­ро­де Филип­пах или Тра­я­но­по­ле, в 337 го­ду.

Со­сто­яв­ший­ся в 381 г. в Кон­стан­ти­но­по­ле II Все­лен­ский Со­бор под­твер­дил Пра­во­слав­ный Сим­вол ве­ры, ко­то­рый так рев­ност­но за­щи­щал свя­ти­тель Ев­ста­фий. Ари­ан­ское лже­уче­ние бы­ло еще раз пре­да­но ана­фе­ме как ересь.

В 482 г. мо­щи свя­ти­те­ля Ев­ста­фия с че­стью бы­ли пе­ре­не­се­ны из Филипп в Ан­тио­хию к ве­ли­кой ра­до­сти ан­тио­хий­цев, не пе­ре­ста­вав­ших по­чи­тать и лю­бить сво­е­го пат­ри­ар­ха-ис­по­вед­ни­ка.

Свя­ти­те­ля Ев­ста­фия чти­ли ве­ли­кие свя­ти­те­ли IV ве­ка Ва­си­лий Ве­ли­кий, Иоанн Зла­то­уст, Афа­на­сий Алек­сан­дрий­ский, Епи­фа­ний Кипр­ский, Ана­ста­сий Си­на­ит и Иеро­ним Стри­дон­ский. Из­вест­ный цер­ков­ный ис­то­рик епи­скоп Фе­о­до­рит Кир­ский на­зы­ва­ет свя­ти­те­ля Ев­ста­фия стол­пом Церк­ви и бла­го­че­стия на­равне со свя­ти­те­лем Афа­на­си­ем Алек­сан­дрий­ским и дру­ги­ми епи­ско­па­ми, глав­ны­ми по­бор­ни­ка­ми пра­во­сла­вия.

См. так­же: "Жи­тие свя­то­го от­ца на­ше­го Ев­ста­фия, епи­ско­па Ан­тио­хий­ско­го" в из­ло­же­нии свт. Ди­мит­рия Ро­стов­ско­го.