Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Твои́х чуде́с во мне́, Григо́рие, боже́ственное де́йство све́тло, о́тче, и ны́не покажи́, из глубины́ избавля́я мя́ прегреше́ний, блаже́нне, и твое́ю просвеща́я све́тлостию, да досто́йно воспою́ тя.

Я́ко опа́сный, и умоиме́телен, и му́др души́ благоро́дное плотски́х сласте́й, блаже́нне, предсуди́л еси́, му́дрости догма́ты трудолю́бно собира́я, и́миже она́ пита́ется, Григо́рие, Бо́гу приближа́ющися.

Целому́дрие сестру́ стяжа́в, я́ко споспе́шницу благу́ю, тя́ ви́дев, лю́тый зми́й, Григо́рие, на тя́ за́висть воздви́же, его́же посрами́л еси́, о́тче, долготерпе́нием, жену́, стра́стию объя́ту, исцели́в.

На чужде́й стране́ жи́тельствуя, преподо́бне, все́м че́стен ра́ди доброде́тели яви́лся еси́, благочести́в и боголюби́в, чудоде́йства да́р от Бо́га прие́м, и́мже позна́н бы́л еси́, богоглаго́ливе, просия́ в ми́ре, я́ко со́лнце.

Богоро́дичен: Из ко́рене, Чи́стая, ца́рскаго прозябла́ еси́ и Царя́ Христа́, Бо́жие Сло́во, па́че ума́ и мы́сли воплоще́нно родила́ еси́ из чи́стых Твои́х крове́й, сугу́ба естество́м су́ща и еди́нственна Ипоста́сию.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Очи́стив тво́й у́м стра́стнаго треволне́ния и любому́драго виде́ния испо́лнен, яви́лся еси́ благоле́пен, му́дрости оби́телище, и проро́чества да́ром обогати́лся еси́, Григо́рие.

Богодохнове́нному списа́нию прибесе́довав, всеблаже́нне, и разли́чнаго жития́ ви́ды избра́в я́ве, еди́н доброде́тели о́браз в себе́, богому́дре, утверди́л еси́, Григо́рие.

Богоявле́нне навы́к боже́ственным тайново́дством та́инство богосло́вия, просвети́ на́с Тро́ицу Единосу́щную, Единоесте́ственну же почита́ти, Несозда́нну и Соприсносу́щну.

Бо́гом наста́влен, я́ко любо́вию Того́ взыска́в, Чи́стую и Богоро́дицу Мари́ю и сы́на Гро́мова тайноучи́тели име́л еси́, Тро́ицы Све́ту тя́, богоглаго́ливе, науча́ющия.

Богоро́дичен: Же́зл, прозя́бший Христа́, цве́т нетле́ния и злату́ю кади́льницу, вси́ Тя ве́мы, Чи́стая, Боже́ственнаго существа́ нося́щу на объя́тиих, Отрокови́це, Угль, Богоблаже́нная.

Седа́лен, гла́с 3.

Но́в бы́л еси́ Моисе́й де́лы, скрижа́ли ве́ры на горе́ та́инственнаго богоявле́ния прии́м, законоположи́в лю́дем благоче́стие Тро́ичныя та́йны, Григо́рие. Те́мже, вси́ ве́рнии, чти́м па́мять твою́, прося́ще тобо́ю ве́лию ми́лость.

Богоро́дичен: Боже́ственная ски́ния была́ еси́ Сло́ва, еди́на Пречи́стая Ма́ти Де́во, чистото́ю а́нгелы превозше́дшая; па́че все́х мене́, пе́рсть бы́вша, оскверне́нна плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

Крестобогоро́дичен: Нескве́рная А́гница, Сло́ва нетле́нная Де́во Ма́ти, на Кресте́ зря́щи пове́шена из Нея́ безболе́зненно Прозя́бшаго, матероле́пно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Зе́млю до́брую, о́тче богому́дре, взора́в, сло́ва се́мя прие́м, во сто́ ева́нгельски многосугу́биши, еще́ и ны́не, Григо́рие, приводя́ уче́нии твои́ми Бо́гу песнопою́щия: си́ле Твое́й сла́ва, Человеколю́бче.

Я́ко мо́лния, о́тче, возсия́в, житие́ твое́ де́монскую ле́сть отгна́, све́ту бо твоея́ доброде́тели о́ных тма́ прикосну́тися не возмо́же. Те́мже неоко́рос душетле́нныя льсти́, валя́вся, я́коже ка́мень, све́тится.

Мра́к све́та Боже́ственнейшаго ви́дети сподо́бился еси́, зако́н же богопи́санный, я́ко Моисе́й, о́тче, прие́м, богосло́вия изве́стное навы́кл еси́: отсю́ду законополо́жник Христо́вы Це́ркве показа́лся еси́, богому́дре Григо́рие.

Ри́торскаго буесло́вия уклони́вся и сло́вом, о́тче, благода́ти озари́вся, апо́стольскую и́стинно вла́сть на де́моны прия́т, твоея́ бо отбега́ет светя́щияся зари́ тмы́ предста́тель, Григо́рие.

Богоро́дичен: Киво́т Тя́ издале́ча прообрази́, прие́мши зако́н богопи́санный, во чре́ве Живонача́льное Сло́во заче́ншую несказа́нно, Всенепоро́чная, пита́ющаго бога́тно ду́ши вопию́щих: си́ле Твое́й сла́ва, Человеколю́бче.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Де́ланием твои́х слове́с олядене́вшая сердца́ угла́див, и боже́ственное се́мя в ня́, иера́рше, вве́ргл еси́, и пло́д многокла́сный Изба́вителю, спасе́ние ве́рных, богоглаго́ливе, прине́сл еси́.

Бо́жий предста́тель, ре́вностию распаля́емь, пома́за тя Фе́дим не прише́дша, о́тче, Бо́гу вся́ческая ве́дящему благоче́стно упова́в и честно́му твоему́ житию́ наде́явся, богоглаго́ливе Григо́рие.

Струя́ми твои́х повеле́ний и́дольская разжже́ния угаси́л еси́ и уче́ньми твои́ми ве́рныя утверди́л еси́, всему́дре, возше́д на го́ру, я́ко Самуи́л, виде́нии и, я́ко ду́б, бы́в тве́рдостию.

Святи́телю богому́дре, твои́ми моли́твами лю́тых мя́ избавля́й, мои́х прегреше́ний рукописа́ние, о́тче, расто́ргни, я́ко свяще́нник сы́й, от Бо́га вла́сть прии́м оставля́ти прегреше́ния.

Богоро́дичен: Украси́лася еси́, Де́во, де́вственными Твои́ми пречи́стыми добро́тами, и пе́рвыя Е́вы покры́ла еси́ сту́д злообра́зный, Христа́ ро́ждши, одея́ние безсме́ртия да́рующаго Тебе́ чту́щим.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Е́зеро, чудоде́йствуя, братоуби́йственное изсуши́л еси́, и реки́ стремле́ния уста́вил еси́, всему́дре, же́зл водрузи́в, и́же вскорени́ся а́бие и возрасте́ Боже́ственным манове́нием, Григо́рие.

Ре́вность Бо́жия пояда́ше тя́, всебога́те, не терпя́ бо зре́ти Бо́га досажда́ема, лю́ди суему́дренныя твои́ми моли́твами, богоглаго́ливе, погуби́л еси́.

Умертви́ся, восхоте́вый уничижи́ти тя́ окая́нный евре́ин злочести́вый, Бо́гу тя́ прославля́ющему, богому́дре Григо́рие, Того́ догма́тов испо́лнителя показу́я.

Богоро́дичен: На́йде Вседе́тельный на Тя́ Ду́х, Всенепоро́чная, и Сло́во Бо́жие в Тя́ всели́ся и пло́ть бы́сть неизрече́нно, пребы́в неизме́нен.

Конда́к, гла́с 2.

Чуде́с мно́гих прие́м де́йство, зна́меньми ужа́сными де́моны устраши́л еси́ и неду́ги отгна́л еси́ челове́ческия, всему́дре Григо́рие, чудотво́рец же имену́ешися, зва́ние от де́л прие́м.

И́кос:

Отку́ду начну́ похвалы́ тка́ти, окая́нный, зря́ мно́гия и пречу́дныя ве́щи? А́ще от жития́ преподо́бнаго начну́, отню́д не возмогу́, вся́каго бо ума́ превосхо́дит житие́ его́ боже́ственное. А́ще от чуде́с, и в се́м про́чее постыжду́ся, па́че песка́ бо су́ще, сего́ ра́ди нарече́ся чудотво́рец, зва́ние от де́л прие́м.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Отце́в похвала́ и учи́телей честносло́вие, свети́льник Це́ркве, благоче́стия сто́лп неколе́бленный ты́ яви́лся еси́, Григо́рие, зовы́й: благослове́н Бо́г оте́ц на́ших.

Возсия́в чудесы́, вселе́нную просвети́л еси́, сего́ ра́ди, богому́дре, совоку́пльшеся, тебе́ блажи́м, твои́ми словесы́ пита́ющеся, Григо́рие, и пою́ще: благослове́н Бо́г оте́ц на́ших.

Врачева́ния, всему́дре, немощны́м все́м источи́л еси́, излия́ся бо благода́ть оби́льнейшая во устна́х твои́х чудоде́йственная, е́юже взыва́л еси́: благослове́н Бо́г оте́ц на́ших.

Богоро́дичен: Ны́не вся́ испо́лнишася све́та Боже́ственнаго Тобо́ю, Пречи́стая, Ты́ бо две́рь яви́лася еси́, е́юже ми́ру Бо́г приобщи́ся, просвеща́я ве́рою зову́щия: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Тобо́ю обогати́вшеся Тро́ицы сия́нием, Единосу́щныя и Честны́я, Григо́рие, твое́ ны́не торжество́ соверша́юще, благода́тию чудоде́йственною озари́тися про́сим, вопию́ще Влады́це: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Я́ко новоявле́нно зерца́ло, прие́м, всебога́те, сия́ния нача́льнаго Божества́, ми́р просвети́л еси́, лучи́ посыла́я све́та песнопе́сненно правосла́вие пою́щим: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Бо́гом покрыва́емь, благоче́стия вина́, богочести́вым соблю́лся еси́, всему́дре, в горе́ сокрыва́емь, я́ко законополо́жник ины́й Моисе́й, Соде́теля и Изба́вителя пе́ти науча́я: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Богоро́дичен: Све́та Незаходи́маго была́ еси́ оби́тель, Пречи́стая, де́вства добро́тами светя́щи и вся́ озаря́ющи, Богоро́дицу Тя́ и́стинную испове́дающия от души́ и вопию́щия: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Изя́щнейшаго жи́тельства сия́я све́том, ны́не Све́ту вели́кому предстои́ши богоде́ятельными чудоде́йствы, я́ко победи́тель венча́емь, преподо́бне, о́тче иера́рше, чудотво́рче Григо́рие богому́дре, свети́ло Це́ркве, правосла́вных удобре́ние.

Напра́вити моли́ твои́ми моли́твами церко́вное ны́не свяще́нство, избра́нное и освяще́нное, чудоде́лателю, и ве́рно ны́не па́мять твою́ соверша́ющим получи́ти го́рняго Ца́рства и боже́ственнаго весе́лия сподо́битися умоли́.

Победи́в де́монския прило́ги, и плотско́е покори́в мудрова́ние, и архиере́й незло́бив и преподо́бен бы́в, пра́вды одея́нием облече́н, чудотво́рче, предстои́ши престо́лу все́х Царя́ со дерзнове́нием, всеблаже́нне.

Богоро́дичен: Яви́лася еси́, о Де́во, Ма́ти Бо́жия, па́че естества́ ро́ждши пло́тию Благо́е Сло́во, Его́же Оте́ц от се́рдца Своего́ отры́гну, пре́жде все́х ве́к я́ко Бла́г, Его́же ны́не и теле́с вы́шша разумева́ем, а́ще и в те́ло облече́ся.

Свети́лен.

Чудесы́ возсия́л еси́, чудотво́рче Григо́рие, служи́теля и́дольскаго изба́вил еси́ от тли́ и пре́лести де́монския, ка́мень подви́гнув повеле́нием, е́зеро же изсуши́в, и реку́ уста́вил еси́. Те́мже тя́ вси́ согла́сно похваля́ем, треблаже́нне.

Богоро́дичен: Ра́дуйся, ве́рных похвало́; ра́дуйся, преподо́бных утвержде́ние; ра́дуйся, пра́ведных сла́во; ра́дуйся, све́те су́щих во тме́; ра́дуйся, хра́ме пресвяты́й; ра́дуйся, Бо́жий раю́; ра́дуйся, кля́твы разреше́ние, Благослове́нная Мари́е.