Пе́снь 1.

Ирмо́с: Посече́нный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль; пе́снь же воспева́шеся: Го́сподеви пои́м, сла́вно бо просла́вися.

Сострада́нием ума́ просвеща́емь и любо́вию Христо́вою, о́тче, озаря́емь, ми́лостыней блиста́я сия́ньми, Еди́наго ми́лостиваго Бо́га прия́телище чисте́йшее, Иоа́нне, бы́л еси́: те́м тя́ ублажа́ем.

Во ве́к при́сно пребыва́ющая смотря́я, му́дрым смы́слом, о́тче свяще́ннейше, измени́л еси́ тле́нная све́тло нетле́нными и ны́не на небесе́х жи́тельствуеши, вопия́ со безпло́тными ли́ки: Го́споду воспои́м, сла́вно бо просла́вися.

Ми́лости Да́тель, одари́в ми́лостивное, преподо́бне, твое́ помышле́ние, поми́лова мно́гия боже́ственным твои́м хода́тайством, бы́л еси́ во утеше́ние ду́ш, ни́щих же промышле́ние, Иоа́нне всему́дре, богоблаже́нне свяще́ннейший.

Богоро́дичен: Благослове́нная, Чи́стая и Всепе́тая, еди́на ро́ждшая воплоще́ннаго Бо́га, приснотеку́щий исто́чник, на́м, наде́ющимся на Тя́, исцеле́ния излива́юща, ве́рным: моли́, Его́же родила́ еси́, дарова́ти ми́ру ве́лию ми́лость.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Боголе́пна, я́коже отрокови́ца, от ма́слин вене́ц нося́щи, яви́ся тебе́, досточу́дне, Ми́лостиваго благосострада́тельная благода́ть, привлача́щи тя́ к Боже́ственней ми́лости.

На престо́ле свяще́ннем судо́м Бо́жиим, сла́вне о́тче Иоа́нне, се́л еси́, я́коже а́нгел, ты́ пожи́л еси́, ми́рныя вознося́ свяще́нныя же́ртвы Всеще́дрому.

Мно́гое милосе́рдие милосе́рдаго Го́спода, о́тче, подража́я, за милосе́рдие Обнища́вшаго пло́тию ни́щия удово́лил еси́, стра́нныя и безпокро́вныя собира́я, испо́лнитель повеле́ний Боже́ственных бы́в.

Богоро́дичен: Всели́вся в Де́ву теле́сне, Го́споди, яви́лся еси́ челове́ком, я́коже подоба́ше ви́дети Тя́: Ю́же и показа́л еси́, я́ко и́стинную Богоро́дицу, ве́рным по́мощь, еди́не Человеколю́бче.

Седа́лен, гла́с 8.

Ми́лостивен нра́в прии́м, благосе́рд яви́лся еси́ и пода́телен ни́щим и тре́бующим, Иоа́нне богодухнове́нне. Сего́ ра́ди зва́нием дея́нию подо́бно, па́че все́х святы́х, блаже́нне, обогати́ тя зело́ Пода́тель благи́х — Христо́с. Ему́же, богому́дре иера́рше пребога́те, моли́ся грехо́в оставле́ние пода́ти пра́зднующим любо́вию святу́ю па́мять твою́.

Богоро́дичен: Я́же непреме́ннаго Бо́га поро́ждшая, пременя́емое при́сно се́рдце мое́ грехо́м и ле́ностию, прило́гми льсти́ваго, утверди́, Блага́я, моли́твами ма́терними Твои́ми: я́ко да и а́з благода́рно сла́влю Тя́, Богороди́тельнице Мари́е, поми́луй ста́до Твое́, е́же стяжа́ла еси́, Всенепоро́чная.

Крестобогоро́дичен: И́же от крове́й Твои́х чи́стых Вопло́щшагося и па́че ума́ из Тебе́, Чи́стая, Роди́вшагося, на дре́ве ви́сяща среди́ злоде́ев зря́щи, утро́бою боле́зновала еси́ и, ма́терски пла́чущи, вопия́ла еси́: увы́ Мне́, Ча́до Мое́, что́ Боже́ственное и неизрече́нное строе́ние Твое́, и́мже оживи́л еси́ созда́ние Твое́? Воспева́ю Твое́ благоутро́бие.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Чи́стая оби́тель яви́лся еси́ Святы́я Тро́ицы, преподо́бне, и хра́ма Боже́ственнаго сокро́вище, и иера́рхов нача́ток.

Мно́гое милосе́рдие твое́ Госпо́дь внима́я Благосе́рдый, ду́шу твою́ освяти́, Иоа́нне, о́тче свяще́ннейше.

За́поведей непосты́ден бы́л еси́ де́латель Всеще́драго и испо́лнился еси́ благи́х Его́, в се́лех святы́х водворя́яся.

Богоро́дичен: Очище́ние на́ших да́руй неве́дений я́ко Безгре́шен и умири́ ми́р Тво́й, Бо́же, моли́твами Ро́ждшия Тя́.

Пе́снь 5.

Ирмо́с: От но́щи неве́дения по душелови́тельному пути́ при́сно блудя́щаго, све́том ра́зума Твоего́, Го́споди, преднаставля́я мя́, на стезю́ за́поведей Твои́х напра́ви.

Умертви́вшемуся за ми́лость ме́ртвостию во́льною, о́тче му́дре, подо́бяся, распя́лся еси́ ми́ру и страсте́м, и жи́зни преми́рныя сподо́бился еси́, достосла́вне.

Блаже́нства удосто́ился еси́, кро́ток, сострада́тельнейший, и мири́телен бы́в, и а́лчущих хле́б неижди́вный и ни́щим пода́тель, одея́ние же наготству́ющим.

Боже́ственными причаще́ньми, о́тче, удобря́емь, я́коже а́нгел, Бо́гу непоро́чно свяще́нствовал еси́, ве́рныя просвеща́я свяще́нными уче́нии твои́ми.

Богоро́дичен: Все́х Бо́га без се́мене в Свои́х ложесна́х поне́сшую, Плотоно́сца же на́м ро́ждшую, Пречи́стую Богоро́дицу воспева́ем, я́ко спасе́ние ду́ш на́ших.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Моли́твами и посто́м упражня́яся и бде́нно Бо́га моля́, открове́ний и зре́ний Боже́ственных сподо́бился еси́, богому́дре всебога́те, науча́емь су́щим па́че ума́ и по́мысла, му́дре, чистото́ю.

Я́ко а́нгел с пло́тию, на земли́, о́тче, пожи́л еси́, же́ртвы ми́рныя, безкро́вныя ве́рою, и сокруше́нным се́рдцем, и ду́хом, блаже́нне, Творцу́ принося́, Иоа́нне, ра́достно.

Житие́ твое́, па́че со́лнца возсия́вшее, милосе́рдия испусти́ лучи́ тре́бующим, отгоня́щия те́мный о́блак нищеты́, всебога́те, гре́ющия же мра́зом лю́тых держи́мыя, богодухнове́нне.

Богоро́дичен: Не преста́й о на́с моля́щися, Пресвята́я Богоро́дице Де́во, я́ко ве́рных утвержде́ние Ты́ еси́, и наде́ждею Твое́ю крепи́мся и любо́вию Тя́ и из Тебе́ Вопло́щшагося непреста́нно сла́вим.

Конда́к, гла́с 2.

Бога́тство твое́ расточи́л еси́ убо́гим и небе́сное бога́тство ны́не восприя́л еси́, Иоа́нне всему́дре, сего́ ра́ди вси́ тя почита́ем, соверша́юще па́мять твою́, ми́лостыни о тезоимени́те!

И́кос:

На ми́лость упова́в Бо́жию, Иоа́нне, щедро́тами от Того́ и дарми́ обогати́вся, отону́дуже яви́лся еси́ и ми́лостив, я́ко О́н, вся́ ущедря́я. Те́мже, мою́ нищету́ уще́дрив, пода́ждь мне́ бога́тство твоея́ моли́твы и а́лчущее се́рдце мое́ испо́лни глаго́л Боже́ственных, богому́дре, я́коже пре́жде а́лчущия пита́л еси́, ми́лостыни о тезоимени́те!

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Де́лы словеса́ Спа́сова извести́л еси́ и ублажа́емых сочта́лся еси́ ли́ку, ми́лостив бы́в и чи́ст ду́хом, Иоа́нне богоно́се.

Ме́да вку́с сладча́йший преложи́ся во искуше́но зла́то тебе́: бога́тному бо твоему́ внима́я произволе́нию, Творе́ц бога́тная тебе́ даде́ воздая́ния.

Све́том Тро́ицы невече́рним просвеща́емь, уго́дниче Тро́ицы, чту́щия тя́ ны́не просвеща́еши и пою́щия: благослове́н еси́, Го́споди Бо́же, во ве́ки.

Богоро́дичен: Тя́, ра́дость апо́столов, страстоте́рпцев же сла́ву, Богоро́дице, мо́лим ве́рно: ра́дости ве́чныя сподо́би ны́, пою́щия Тя́ непреста́нно.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Светоза́рную звезду́ Христо́с на высоте́ тя́ церко́вней яви́в, о́тче, чрез тебе́ пою́щия ве́рою просвеща́ет: благослови́те вся́ дела́ Го́спода и превозноси́те Его́ во ве́ки.

Ми́лостив яви́лся еси́, кро́ток, благосострада́тельнейш, незло́бив, о́тче, бога́тство ни́щих, у́тварь и одея́ние наги́х, поя́ ве́рно: благослови́те вся́ дела́ Го́спода и превозноси́те Его́ во ве́ки.

Ма́рков престо́л свяще́нно украси́л еси́ де́лы боже́ственными изря́дно, о́тче, ми́лостынею же и милосе́рдием па́че все́х наре́клся еси́ ми́лостив, милосе́рдием возсия́вших святы́х.

Богоро́дичен: Ада́ма, Де́во, па́дшаго у́бо, яви́лася еси́ Дщи́, Бо́га же Ма́ти, обно́вльшаго мое́ существо́. Его́же пои́м вся́ дела́ Го́спода и превозно́сим во вся́ ве́ки.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Се́ тя по сконча́нии сре́дняго прие́млет дво́ица святы́х отце́в, в гро́бе свяще́ннейшую че́сть тебе́, о́тче, даю́щи.

Я́ко у́тро, я́ко де́нь, о́тче Иоа́нне, светоза́рное твое́ возсия́ успе́ние, просвеща́ющее ве́рою тя́ блажа́щия.

Совокупи́лся еси́ лико́м архиере́ев, проро́ков, апо́столов и му́чеников: с ни́миже помина́й, о́тче, восхваля́ющия тя́.

Ра́ка, иде́же лежа́т, о́тче Иоа́нне, свяще́нныя твоя́ и святы́я мо́щи, исто́чник чуде́с су́ть к тебе́ приходя́щим.

Богоро́дичен: Благоле́пная Де́во, озло́бленную ду́шу мою́ грехо́м ублагости́, блага́го ро́ждшая Бо́га и Го́спода.

Свети́лен.

Ми́лость подража́я Бо́га любоще́драго, тре́бующим бога́тство расточи́л еси́, Иоа́нне, те́м и бога́тство прия́л еси́ на небесе́х неистощи́мое. Того́ ра́ди ны́не мо́лимся: моли́ся непреста́нно о хва́лящих тя́.

Богоро́дичен: И́же от Бо́га ми́ру да́нных бла́г Ты́ вина́ еси́, Богоро́дице, но и ны́не ми́лостива сотвори́ за о́бщее спасе́ние благоуве́тливаго Бо́га.