Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Боже́ственными укра́шена добро́тами и светоли́тии сия́ющи Боже́ственными, очерне́вшее мое́ се́рдце твои́ми моли́твами, Мари́е, озари́.

Освяти́ тя Сло́во О́тчее, от духо́в зло́бы изба́вив я́ве, Ему́же учени́ца бы́вши, дарова́ний Свята́го Ду́ха испо́лнилася еси́.

Во́д испо́лншися животво́рных от исто́чника незави́стнаго, за милосе́рдие на земли́ я́вльшагося Влады́ки, греха́ му́тныя изсуши́ла еси́ то́ки.

Богоро́дичен: Ма́терь естество́м Соде́теля, пое́м Тя́, Отрокови́це, примири́вшую Бо́гу отпа́дшее естество́ челове́ческое, Богороди́тельнице Всенепоро́чная Влады́чице.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Возлюби́вши пе́рвее благи́х Вино́вника, на́ше благосе́рдно естество́ обожи́вшаго, после́довала еси́ Ему́ усе́рдно, Мари́е, Того́ повину́вшися Боже́ственным веле́нием.

Рыда́ющи, гро́ба Изба́вителева дости́гла еси́, пе́рвее ви́девши Боже́ственное, отрокови́це, Воскресе́ние. Те́мже благове́стница яви́лася еси́, вопию́щи: Христо́с воста́, рука́ми восплещи́те.

Богоро́дичен: Спаса́ет мя́ Сло́во вопло́щшееся, Пречи́стая, от Твои́х пречи́стых крове́й, бога́тством бла́гости разреша́я осужде́ние пе́рваго паде́ния, Его́же непреста́нно моли́ спасти́ ста́до Твое́.

Седа́лен, гла́с 8.

Обнища́вшему Сло́ву премно́гим милосе́рдием, Мари́е Магдали́ни, я́ве я́ко учени́ца и́стинно послужи́ла еси́, зря́щи же Сего́, на Кресте́ вознесе́на и во гро́бе положе́на, рыда́ла еси́, слезя́щи. Те́мже тя́ почита́ем и твое́ соверша́ем ве́рою торжество́, мироно́сице сла́вная, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Богоро́дичен: Обнови́ла еси́, Чи́стая, Боже́ственным Рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во препросла́вленная, я́коже прорекла́ еси́.

Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́, Его́же, Благослове́нная, моля́щи не преста́й проще́ние прегреше́ний на́м дарова́ти.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Без смуще́ния иму́щи мирска́го су́етства мы́сль, Прише́дшему ми́р ве́сь спасти́ от ле́сти послужи́ла еси́.

Мы́ющися слеза́ми, гро́ба живоно́снаго дости́гши, а́нгела узре́ла еси́, возвеща́юща Христо́во, Мари́е, воскресе́ние.

Се́рдце твое́ непоро́чное во оправда́ниих Христо́вых бы́сть, и Того́ еди́наго вожделе́ла еси́, Кра́снаго добро́тою, достосла́вная.

Богоро́дичен: Дрема́нием ле́ности мя́ со́н грехо́вный, Отрокови́це, пости́же, бо́дренною моли́твою Твое́ю возста́ви мя́ к покая́нию.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Пра́баба, сию́ словесы́ прельсти́вшаго и изгна́вшаго от рая́ дре́вле, зря́щи нога́ми попира́ема чи́стых же́н, нра́в му́жеский стяжа́вших, с ни́ми ве́чно ра́дуется.

Уме́ршаго и во гро́бе Затворе́ннаго, все́м жи́знь Вдыха́ющаго, уязвля́ема любо́вию, сла́дцей Его́ любви́ приноша́еши ми́ро, Магдали́на, честна́я Мари́е, и сле́зныя пролива́еши арома́ты.

По стра́сти Боже́ственней, по стра́шнем Спа́сове Вознесе́нии, прехо́диши, сло́во всю́ду честно́е возвеща́ющи и мно́ги уловля́ющи прельща́ющияся неве́дением, я́ко Сло́ва учени́ца сла́вная.

Богоро́дичен: Избавля́ет мя́, па́дшаго к грехо́вным многоплете́нным паде́жем, И́же из Тебе́ роди́тися благоизво́ливый за безме́рную ми́лость, Пресвята́я Отрокови́це, Его́же умоли́ вся́каго вре́да изба́витися ве́рою пою́щим Тя́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Глаго́л твои́х ороше́ние и печа́ли ва́р отъя́т ученико́в, честна́я, я́коже возопи́ла еси́: Христо́с воста́, Живо́т яви́ся, я́сное облиста́ Со́лнце.

Се́ твоя́ светоза́рная па́мять возсия́, просвеща́ющи ве́рныя, в не́й пою́щия тя́, и тму́ отгоня́щи лука́вых бесо́в искуше́ния, досточу́дная.

Богоро́дичен: Свяще́нства мы́сленное и неприкоснове́нное очисти́лище, све́щник светови́ден яви́лася еси́, и мо́ст к Бо́гу преводя́й, испове́дающим Тя́, Богоро́дицу, Пренепоро́чная.

Конда́к, гла́с 3.

Предстоя́щи, пресла́вная, у Креста́ Спа́сова со ины́ми мно́гими, и Ма́тери Госпо́дни состра́ждущи, и сле́зы точа́щи, сие́ в похвалу́ приноша́ше, глаго́лющи: что́ сие́ е́сть стра́нное чу́до? Содержа́й всю́ тва́рь, пострада́ти изво́ли. Сла́ва держа́ве Твое́й.

И́кос:

Влады́ка Христо́с и Ца́рь созда́ния, не оста́вль небеса́, сни́де, я́коже изво́ли, и пло́ть тле́нную восприя́т во́лею. Его́же ви́девши Ма́ти Непоро́чная, на Кресте́ пригвожда́ема, с де́вами честны́ми предстоя́щи и Магдали́на Мари́я, пла́чущи. То́й бо, та́мо су́щей и тепле́йшую ве́ру показу́ющей при́сно, после́доваше Христу́ и гро́б зря́ше, ожида́ющи и вопию́щи: пострада́ти изво́лил еси́, сла́ва держа́ве Твое́й.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Неду́ги отгна́ла еси́ разли́чныя, споспешеству́ющаго тебе́ Сло́ва иму́щи, Ему́же предстои́ши ны́не, вопию́щи, мироно́сице: благослове́н еси́, Го́споди Бо́же, во ве́ки.

Еди́на ви́дела еси́ пре́жде ине́х, живота́ на́шего Христа́ воста́вша, вертогра́даря же Того́ непщева́ла еси́, вопию́щи: благослове́н еси́, Го́споди Бо́же, во ве́ки.

Богоро́дичен: Уста́вила еси́ тече́ние сме́ртное, Безсме́ртнаго Бо́га я́ко заче́нши и ро́ждши, Чи́стая, Ему́же вси́ пои́м: благослове́н еси́, Го́споди Бо́же, во ве́ки.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Све́тло яви́ся житие́ твое́, заря́ми облиста́, о Магдали́но! Доброде́тельных дея́ний, боже́ственнаго пропове́дания, е́же к Бо́жию манове́нию, и луча́ми я́же к Зижди́телю любве́, Ему́же пое́ши со а́нгелы: свяще́нницы, по́йте, лю́дие, превозноси́те Его́ во ве́ки.

У Креста́ предстоя́ла еси́, зря́щи непра́ведное, сла́вная, заколе́ние Себе́ излия́вшаго за неизрече́нную ми́лость, и, стена́нии и слеза́ми облива́ема, — что́ стра́нное, — вопия́ла еси́, Мари́е, — чу́до? Ка́ко умерщвля́ется и умира́ет сме́рть умертви́вый, Живо́т сы́й естество́м?

Богоро́дичен: Я́ко Бо́жию Ма́терь Тя́ единому́дренно сла́вим и тва́ри вы́шшую, Чи́стая, о Тебе́ бо осужде́ние, е́же от Ада́ма, потреби́ся и отсту́пльшее присво́ися челове́ков существо́, пою́щее: свяще́нницы, благослови́те, лю́дие, превозноси́те Его́ во ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

К Боже́ственней преложи́лася еси́ ны́не ра́дости, к ра́йстей широте́ простра́нней, к мы́сленным и преми́рным оби́телем, иде́же преподо́бных чи́нове, иде́же е́сть гла́с чи́ст све́тло пра́зднующих, Мари́е богоно́сная. Те́мже тя́ вси́ ублажа́ем.

Ничто́же предпочла́ еси́ су́щих на земли́ па́че любве́ Христа́ Бо́га, но Того́ еди́наго снеда́ема добро́тами и непосре́дственно, всечестна́я, посыла́емыми луча́ми, стопа́м Сего́, вопия́ла еси́, после́дующи: Тя́ велича́ю, Многоми́лостиве.

Обоже́ние получи́вши боготво́рное, и пото́ка напи́вшися благода́ти, и мзды́ боле́зней прие́мши богонача́льно, и апо́стольским чино́м счета́ема, Магдали́но, учени́ца Сло́ва, любо́вию чту́щия тя́ твои́ми моли́твами сохрани́.

Богоро́дичен: Я́ко Ма́ти пострада́вшаго за ны́, душетле́нных страсте́й мя́ изба́ви; я́ко Ми́лостива, разреши́ согреше́ний мои́х плени́цы; я́ко Блага́, ублажи́ ны́не озло́бленную мою́ ду́шу бесо́вскими искуше́нии, Де́во Богоро́дице, да пою́ Тя, Всепе́тую.

Свети́лен.

Со́лнце незаходи́мое, отрокови́це, е́же от Отца́ пре́жде ве́к возсия́вшее, во гро́бе евре́йский со́нм запеча́та, но воскре́сшаго ви́дела еси́ пе́рвее, Мари́е, и ученико́м возвести́ла еси́.

Богоро́дичен: Дании́л преднапису́ет Тя́ несеко́мую го́ру, из нея́же честны́й Ка́мень отсече́ся и истни́ и́дольския хра́мы, Богороди́тельнице Мари́е.