Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Благи́х пе́рвую вину́ возжела́вши, благоимени́таго зва́ния, му́ченице, сподо́билася еси́, несказа́ннаго промышле́ния, нра́вов твои́х проразуме́вши благосты́ню.

Взяла́ся еси́, чи́стая, к житию́ пресве́тлому, плотско́е мудрова́ние презре́вши и к жела́ннейшему Жениху́ твоему́ кре́пко взира́ющи.

Неве́ста Христо́ва, Боже́ственною бла́гостию украси́лася еси́, и де́вства добро́тами, и боже́ственными кровьми́ честна́го муче́ния, сугу́быми венцы́ венча́ема, сла́вная.

Богоро́дичен: Боголе́пное селе́ние, Чи́стая, Ты́ была́ еси́, небе́с простра́ннейшее и чисте́йшее, Богоро́дице Де́во, и ны́не о Тебе́ ра́дуется де́вственный ли́к.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Ага́фие, я́сный и красне́йший боже́ственных му́ченик цве́т и сла́ва, души́ моея́ ты́ озлобле́ние исцели́вши, му́ченице, удобри́.

Ро́дными доброде́тельми себе́ уясни́ла еси́, Ага́фие, и му́ченица пронарекла́ся еси́, о привре́менных небре́гши и Бо́жие Ца́рство возлюби́вши.

Все́х кра́сных Христа́ предпочла́ еси́, Ага́фие, привлечена́ боже́ственным жела́нием, и мучи́телей свире́пства благоде́рзостно и му́жески попра́ла еси́.

Богоро́дичен: Богоневе́сто Чи́стая, Бо́га, Его́же родила́ еси́, моли́ изба́вити Тя́ пою́щия от искуше́ний, и обстоя́ний, и страсте́й, и бе́д, Всеблаже́нная.

Седа́лен, гла́с 3.

Сла́вою ве́ры и благоче́стием, преподо́бством, и де́вством, и усе́рдием укра́шена страда́ния, нарекла́ся еси́ у́м преподо́бен, самоизво́лен, вои́стинну че́сть к Бо́гу, оте́честву избавле́ние, Христу́ я́ко неве́ста моля́щися дарова́ти на́м ве́лию ми́лость.

Богоро́дичен: Боже́ственнаго естества́ не отлу́чься, пло́ть бы́в во чре́ве Твое́м, но Бо́г вочелове́чься и пребы́сть, И́же по Рождестве́ Ма́терь Тя́ Де́ву, я́ко пре́жде Рождества́, сохрани́в Всенепоро́чну, Еди́н Госпо́дь, Того́ приле́жно моли́ дарова́ти на́м ве́лию ми́лость.

Крестобогоро́дичен: Нескве́рная А́гница, Сло́ва нетле́нная Де́во Ма́ти, на Кресте́ зря́щи пове́шена, из Нея́ без боле́зни прозя́бшаго, матероле́пно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмо́с: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Посрами́ся льсти́ваго зми́я безу́мие и обличи́ся, де́вы бо сего́ ны́не свире́пство попира́ют, Христу́, от Де́вы возсия́вшу на земли́ и все́х озари́вшу.

Зако́нно целому́дрие нескве́рно удержа́вши, страстоте́рпице, ду́хи, ра́дующися, низложи́ла еси́ лука́вствия, Христо́вою вооружи́вшися благода́тию и кре́ст Сего́ на ра́мех взе́мши.

Бу́ди ми́ предста́тельница всему́драя, лю́тых мя́ изыма́ющи и напа́стей, бу́ри же, и ско́рби, и наси́лия изба́ви вра́жия, я́ко да изба́влься, воспою́ тя, я́ко благу́ю предста́тельницу, благоимени́тая.

Богоро́дичен: Неизме́рно а́нгельския, Пречи́стая, све́тлости превозшла́ еси́, мы́сленнаго Со́лнца ро́ждши несказа́нно, Христа́, заря́ми Божества́ ве́рных мы́сли озаря́ющаго.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Боже́ственными веле́нии пра́вима сла́вная, обра́зно плотска́го пристра́стия разреши́ла еси́ ю́з Ага́фие, ма́слина я́вльшися плодови́та.

Все́ю любо́вию Христо́вою светле́йшая, блиста́ния зря́щи, я́же на земли́ до́лу влеку́щия презре́ла еси́ сла́сти, О́наго и Еди́наго жела́ющи красоты́.

Да неизрече́нную сподо́бишися жи́знь, сла́вная, избра́нных ви́дети, му́ки претерпе́ла еси́ кре́пко, ра́дующися Ага́фие всехва́льная.

Богоро́дичен: Тебе́, ро́ждшей Христа́, все́х Соде́теля, зове́м: ра́дуйся, Чи́стая, ра́дуйся, Све́т возсия́вшая на́м; ра́дуйся, вмести́вшая Бо́га Невмести́маго.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Суему́дрен сы́й мучи́тель тя́, до́брую де́ву, укра́сти наде́яшеся, но безсту́ден обличи́ся, прирази́вся тве́рдому твоему́ ра́зуму.

Излия́ся благода́ть во устна́х твои́х, му́ченице благоимени́тая, я́сно бо обличи́ла еси́ я́ве безсту́днаго, богонауче́нным сло́вом обогати́вшися.

Ка́мень всече́стен яви́лася еси́, всехва́льная, у́м самоизво́лен преподо́бен иму́щи и оте́честву избавле́ние тве́рдо бы́вши, Ага́фие честна́я.

Богоро́дичен: Псало́мски, восхваля́юще, вопие́м Ти́: ра́дуйся, ту́чнейшая горо́ Христа́ Бо́га, в ню́же всели́тися благоволи́ за на́ше спасе́ние, Богоневе́сто.

Конда́к, гла́с 4.

Да украси́тся дне́сь Це́рковь порфи́рою сла́вною, омоче́ною от чи́стых крове́й Ага́фии му́ченицы, — ра́дуйся, — вопию́щи, — Ката́нская похвало́.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Я́ко зело́ све́тло веща́ющи и я́ве мучи́теля устраши́ла еси́ сло́вом прему́дрости и благода́ти, терпе́нием же му́к у́глие о́гненное неболе́зненно терпя́щи, взыва́ла еси́: благослове́н еси́, Бо́же оте́ц на́ших.

Неи́стовством лю́тым содержи́мь, злосе́рдый недоумева́ше лю́те, твою́ ви́дя ю́ность и сосце́в твои́х прозябе́ние, ра́дующи бо ся, му́ченице, вопия́ла еси́ твоему́ Жениху́, взыва́ющи: благослове́н еси́, Бо́же оте́ц на́ших.

Предста́ све́тло Христо́в учени́к тебе́, стрего́мей, твоя́ исцеля́я лю́тыя ра́ны, я́же подъя́ла еси́, непобеди́мая му́ченице, Спа́сова деви́це, ра́дующися и глаго́лющи: благослове́н еси́, Бо́же оте́ц на́ших.

Богоро́дичен: Умерщвля́ется Ада́м, преступи́в за́поведь Вседержи́теля, Ты́ же, ро́ждши ве́чную Жи́знь, Де́во Всенепоро́чная, сего́ изба́вила еси́ от сме́рти, Сы́ну Твоему́ взыва́юща: благослове́н еси́, Бо́же оте́ц на́ших.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

В весе́лии и ра́дости преве́чней жи́ти сподо́бившися, неизрече́нною твое́ю сла́вою озари́тися чту́щим тя́, Ага́фие, Го́сподеви помоли́ся и нетле́нныя жи́зни наслади́тися.

Умо́м, и се́рдцем, и душе́ю возлю́бльши Христа́ па́че сло́ва, Многорачи́тельнаго, Еди́наго, впери́лася еси́ Тому́, вопию́щи: теку́ в сле́д Тебе́ и вселю́ся с Тобо́ю во ве́ки.

Преесте́ственными ря́снами и кра́сною оде́ждею укра́шена, я́ко царе́ва дщи́, в че́сти Христо́ве предстои́ши, Ага́фие, взыва́ющи: Тя́ превозно́сим, Го́спода, во ве́ки.

Богоро́дичен: Ми́ро излия́нное на́м, Богоро́дице, Христа́ во чре́ве нося́щи, облагоуха́ла еси́ ми́р богодохнове́нными воня́ми. Те́мже Тебе́, Де́во, взыва́ем: ра́дуйся, мирополо́жнице мирово́ннаго ми́ра.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Победи́тельными венцы́ украси́вшися, богому́драя Ага́фие, десни́цею живонача́льною ны́не изба́витися помоли́ся, я́коже оте́честву твоему́, от бу́ри, я́ко пе́рвее огня́ уста́вила еси́ стремле́ние, да вси́ тя́ пе́сньми непреста́нно велича́ем.

Боже́ственным про́мыслом снабдева́я вся́ческая, Христо́с, ны́не воздая́ твое́й, му́ченице, до́блести, вселя́ет тя́ в се́лех небе́сных я́ко неве́сту всенепоро́чную Свою́ и ра́доватися со а́нгелы и с му́ченики сподо́бил е́сть.

Ми́лостивна, о страстоте́рпице, Судию́ вся́ческих — Христа́ сотвори́ мне́, честна́я, мольба́ми твои́ми, пресла́вная, и прегреше́ний мои́х мно́жество очи́стити Благоутро́бнаго при́сно моля́щи не преста́й, му́чеников удобре́ние.

Богоро́дичен: Вопло́щься неизрече́нно от чи́стых Твои́х крове́й, я́ко со́лнце, яви́ся на́м, Пречи́стая Ма́ти безневе́стная, пре́жде ве́к все́х Отцу́ Собезнача́льный Сы́н и, тму́ отгна́в, просвети́ вся́ческая.

Свети́лен.

Сосце́в твои́х отъя́тия претерпе́ла еси́, до́брая деви́це, и вся́ки ины́я му́ки Христа́ ра́ди, страстоте́рпице, те́м и в черто́г тя́ кра́сный всели́ тво́й Жени́х, сла́вная, лику́ющу со а́нгелы, де́во му́ченице Ага́фие.

Сла́ва, и ны́не: Ду́хом во святи́лищи предста́в, ста́рец на ру́ки восприя́т зако́на Влады́ку, вопия́: ны́не соу́з мя́ плотски́х разреши́, я́коже ре́кл еси́, с ми́ром: ви́дех бо очи́ма открове́ние язы́ков и Изра́илю спасе́ние.