Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Боже́ственным безпло́тным чино́м ны́не слику́ющи у все́х вино́внаго Бо́га и я́сно наслажда́ющися богонача́льнаго осия́ния, пою́щия тя́ просвети́.

Ра́бий сподо́бивыйся прия́ти зра́к Христо́с Бо́г, свободи́ти сего́ восхоте́в от тли́ и сме́ртных у́з, от и́га рабо́тнаго тя́, му́ченице, неве́сту обручи́.

Же́нский по́л су́щи, вмужи́вшися благода́тию, вознесе́нную горды́ню и хва́лящуюся безме́рно пре́жде истреби́ти мо́ре, не́мощию те́ла Боже́ственною си́лою низложи́.

Богоро́дичен: Две́рь, я́же к на́м Твоего́, Го́споди, соше́ствия, восто́к, и со́лнце, и све́т, та́инственно Тя́ нарица́емаго преесте́ственно облиста́, сугу́ба естество́м Человеколю́бца.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Тве́рдостию по́мысла пребеззако́нную и лю́тую претерпе́ла еси́ тя́жкую му́ку, сла́вная Матро́но всеблаже́нная.

Ра́ны боле́зненныя ощуща́ющи, кре́пко терпе́ла еси́, осужде́нием же тмы́ Боже́ственную све́тлость восприя́ла еси́.

Крове́й твои́х то́ки нече́стия огни́ще угаси́ша, ве́рныя же напои́ша Богоче́стия вода́ми.

Богоро́дичен: Скрижа́ль, ковче́г, прие́мшу во утро́бе, Пречи́стая, Сло́во Бо́жие безнача́льное, богогла́сно восхваля́ем Тя́.

Седа́лен:

Благоче́стно порабо́тившися Вседержи́телю, злоче́стием влады́чицы не порабо́тилася еси́, честна́я, но претерпе́ла еси́ тве́рдо те́мное заключе́ние и ра́н разжже́ние и преста́вилася еси́ к Бо́гу, богому́драя му́ченице Матро́но, моли́ся о на́с, соверша́ющих па́мять твою́.

Богоро́дичен: Те́плая предста́тельнице и непобеди́мая, упова́ние изве́стное и непосты́дное, стено́, и покро́ве, и приста́нище прибега́ющим к Тебе́, Присноде́во Чи́стая, Сы́на Твоего́ и Бо́га моли́ со а́нгелы ми́р да́ти ми́ру, и спасе́ние, и ве́лию ми́лость.

Крестобогоро́дичен: На Кресте́ зря́щи Тя́, Христе́, Ма́ти Твоя́, во́лею посреде́ разбо́йнику ви́сяща, растерза́ющися утро́бою, ма́терски глаго́лаше: безгре́шный Сы́не, ка́ко непра́ведно на Кресте́, я́коже злоде́й, пригвожде́н еси́, челове́ческий ро́д хотя́ оживи́ти, я́ко Благоутро́бен?

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Си́лою Боже́ственною, Матро́но, укрепля́ема, го́рькия влады́чицы избе́гла еси́ рабо́ты, нра́в бо смире́н души́ стяжа́ла еси́, еди́ному Влады́це рабо́тающи.

Рыка́ющи, и пия́нством неи́стовствующи, и я́ростию терза́ющися, злочести́вейшая ра́нами ссеца́ше, евре́йским суровство́м, му́ченице страстоте́рпице, те́ло твое́.

Ю́ношеское показа́ла еси́ терпе́ние, в несве́тлых ме́стех заключа́ема, му́ченице, и гла́дом томи́ма, но обрела́ еси́ воздая́ние безсме́ртия трапе́зу.

Богоро́дичен: Златокова́нный све́щник прообразова́ше Бо́га носи́вшую воплоще́нна, заре́ю Божества́ вся́ просвеща́юща, Тя́, и́стинную Богома́терь.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Тя вене́ц све́тел богому́драя похвалы́ стяжа́, Жизнода́вче, и от тмы́ к сия́нию Боже́ственному изы́де.

Утверди́ Христо́с на ка́мени ве́ры но́ги твоя́, блаже́нная, к Нему́же испра́вила еси́ му́дре твоя́ стопы́.

Ум боже́ствен вои́стинну, и му́др, и Богомы́слен ты́ иму́щи, сия́еши в ли́це му́ченик, Матро́но всеблаже́нная.

Богоро́дичен: Божества́ зра́к и зра́к челове́чества родила́ еси́, Богома́ти, соедине́ние несме́сно по соедине́нию неслия́нному.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Е́вы ны́не, страстоно́сице, жела́ние объя́ла еси́ смы́сленно, Матро́но, обожа́ема манове́нием непреста́нным, и пра́ведно присносу́щныя сла́вы сподо́билася еси́.

Ни ра́б во Христе́, ни свобо́дный су́дится, но доброде́тели благообра́зие, благоче́стия нра́вы укра́шена, ея́же показа́лася еси́ твори́тельница, страстоте́рпице непобеди́мая.

Богоро́дичен: Хра́м Тя́ Бо́жий и черто́г зна́ем, ста́мну, све́щник и скрижа́ль, стяжа́вшую вну́трь написа́ние за милосе́рдие вопло́щшася Сло́ва, Всенепоро́чная.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

С любо́вию и дерзнове́нием отлучи́лася еси́ вои́стинну ко твоему́, всехва́льная, Рачи́телю, благода́рно взыва́ющи: благослове́н еси́ в хра́ме сла́вы Твоея́, Го́споди.

С весе́лием и ра́достию прешла́ еси́, испо́лнь доброде́телей всеразли́чных, Матро́но, от земли́ к небе́сным лико́м, сла́вная, насле́дие получи́вши безсме́ртное.

Богоро́дичен: Просвеще́нна, преиспещре́на все́ми доброде́тельми, Сло́во О́тчее па́че сло́ва родила́ еси́ воплоще́нное, Ма́ти Де́во, благослове́нна Ты́ в жена́х, Всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Бога́таго Све́та лучи́ сподо́билася еси́ ви́дети, измени́вшися пло́ти, и в небе́сней ски́нии жи́ти вме́сто ски́нии те́мныя и мра́чныя, иде́же заключена́ была́ еси́, сла́вная: благослови́те, вся́ дела́, вопию́щи, Госпо́дня Го́спода.

Красе́н вене́ц, и́мже ны́не венча́лася еси́, сла́вная, живонача́льною десни́цею Вседержи́теля, неве́сту бо ви́дя, очервле́ну тя́ крове́й твои́х то́ки, ра́дуяся, уясни́, Ему́же пое́м: вся́ дела́, благослови́те Госпо́дня Го́спода.

Богоро́дичен: Вои́стинну ро́ждши Бо́га, вои́стинну Всечи́стая яви́лася еси́, Ма́ти Бо́жия, и́стинствующее нося́щи, по ко́емждо рожде́нии, богоиме́нство ве́рным. Те́мже сла́вим Богоро́дицу Тя́ богому́дренно, Всенепоро́чная Влады́чице.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Сия́ет мы́сленными светозаре́нии светоно́сный тво́й де́нь, светле́йшими блиста́нии трисо́лнечнаго, му́ченице, сия́ния, в не́мже ны́не моли́ озари́ти пою́щия тя́.

Обрела́ еси́ воздая́ния, страстоно́сице, за ра́ны боле́зненныя, небе́сное насле́дие в Це́ркви перворо́дных, сла́вная, в не́йже торжеству́ющи, твои́ми моли́твами на́с соблюди́.

Вои́стинну Христу́ ны́не сочта́лася еси́, безсме́ртному твоему́ Жениху́, процве́тши све́тло боже́ственными Сего́, всему́драя, я́звами и честно́ю кро́вию муче́ния сия́ющи.

Богоро́дичен: Плени́цы мои́х ны́не прегреше́ний разреши́, Де́во Богоро́дице, Я́же милосе́рдия Исто́чник ро́ждши, еди́на Богоблаже́нная, и душесла́дости испо́лни, я́ко да досто́йно Тя́ велича́ю.