Пе́снь 1.

Ирмо́с: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

И́стинную любо́вь име́ла еси́ к Бо́гу, боголюби́вая Елисаве́то, за́поведи Его́ храня́. Се́й бо и́стинно лю́бит Бо́га, и́же за́поведи Его́ соблюда́ет, — боголюби́вую у́бо тя́ хвала́ми возвели́чим.

Благода́тию спасе́ни, доброде́тельми угожда́ти и́мамы Бо́гу, я́коже и Елисаве́ть во все́х за́поведех Госпо́дних ходи́ без поро́ка, ю́же досто́йно пе́сньми да ублажи́м.

Де́йствуяй вся́ во все́х, Бо́же, и в блаже́нной Елисаве́ти всеси́льную ми́лость Твою́ явля́л еси́: о все́х де́лех Твои́х благодаре́ние Тебе́ прино́сим.

Богоро́дичен: Исаа́ка Са́рра ро́ждши непло́ды, ра́довашеся: Тебе́, де́вствующей и ро́ждшей Го́спода Иису́са, па́че ра́доватися подоба́ет, Пречи́стая.

Пе́снь 3.

Ирмо́с: Утверди́ся се́рдце мое́ в Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Пра́ведну тя́ с Заха́рием, блаже́нная Елисаве́то, Ду́х Святы́й в Писа́нии нарече́: бе́ста пра́ведна пред Бо́гом, глаго́ля. Месси́я же Пра́вда на́м е́сть от Бо́га, Месси́ею у́бо оправда́на была́ еси́. Кто́ похва́льными пе́сньми тя́ не возвели́чит?

Не оправди́тся пред Го́сподем вся́к живы́й, ты́ же пра́ведна была́ еси́, приснопа́мятная Елисаве́то; Госпо́дь Иису́с освяще́ние все́м е́сть, свя́ту тя́ да восхваля́ет вся́к.

Ди́вен во святы́х, Бо́же, пресла́вными и в блаже́нной Елисаве́ти удиви́лся еси́, пе́снь благода́рственную прино́сим Тебе́, Всеще́дрому.

Богоро́дичен: Непло́ды в ста́рости ро́ждши Са́рра, ма́терь су́щи, ублажа́шеся. Тя́, Ма́терь и Де́ву, Пречи́стая, досто́йно восхвали́ти недоуме́ем.

Седа́лен, гла́с 4:

Воплоти́вшуся уже́ Месси́и, пе́рвую тя́ благове́стницу слы́шим, егда́ к целова́вшей тя́ богоизбра́нной Отрокови́це со у́жасом глаго́лала еси́: отку́ду мне́ се́, да прии́де Ма́ти Го́спода Моего́ ко мне́? Восхваля́юще у́бо тя́, вопие́м: ра́дуйся, зерца́ло, та́йны Бо́жия на́м явля́ющее.

Богоро́дичен: Богоро́дицу Тя́ испове́дуем, Влады́чице, Сы́ном Твои́м, ро́ждшимся от Тебе́, спа́сшиися гре́шнии раби́, Бо́га бо непостижи́мо родила́ еси́, Кро́вию Свое́ю очища́ющаго на́с от вся́каго греха́ и в ра́йское весе́лие приводя́щаго, Его́же с Тобо́ю восхваля́ем, веселя́щеся.

Пе́снь 4.

Ирмо́с: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Жена́ су́щи Заха́риина, во все́х за́поведех без поро́ка ходи́ла еси́; и́нии же де́вы бы́ша, и еле́я доброде́телей не име́яху: лу́чше зва́ние твое́ па́че де́вства о́нех, вся́к во́зраст да сла́вит тя́.

Па́вел, ве́рных обруча́я Христо́ви, и бра́чных де́вою чи́стою нарече́, глаго́ля: обручи́х ва́с еди́ному Му́жу, де́ву чи́сту; кольми́ па́че, во все́х за́поведех ходи́вшую, тя́ к му́дрым де́вам Бо́г сочета́, богому́драя Елисаве́то, досто́йно у́бо тя́ восхваля́ем.

Я́ко сто́лп о́гненный и о́блак путьше́ствующему к земле́ обетова́нней Изра́илю, та́ко ходи́вшую в за́поведех Госпо́дних дво́ицу, блаже́ннаго Заха́рия и Елисаве́ту, во о́браз богоугожде́ния на́м предъяви́л еси́, Бо́же; неизрече́нное человеколю́бие Твое́ е́сть, Всеси́льный Влады́ко.

Богоро́дичен: Исаа́ка рожде́ние от безча́дныя ма́тере поноше́ние отъя́т и возвели́чи сла́вою, Ро́ждшееся от Тебе́ Свя́то пе́рвейшую сла́ву принесе́ Тебе́, Пречи́стая Де́во и Ма́ти: вся́к земноро́дный да сла́вит Тя́.

Пе́снь 5.

Ирмо́с: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны́, Го́споди, ра́зве Тебе́ ино́го не ве́мы, и́мя Твое́ имену́ем.

Его́же Бо́г а́нгелом у Малахи́и нарече́, глаго́ля: се́ А́з посыла́ю а́нгела Моего́ пред лице́м Твои́м, — сего́ ты́, непло́дная, родила́ еси́, Елисаве́ть, досто́йными у́бо тя́ венча́ем похвала́ми.

Гла́с вопию́щаго Бо́га рожде́нное от тебе́, всечестна́я Елисаве́то, е́сть, те́м, я́ко уста́ Бо́жия, кто́ не восхва́лит тя́?

Я́ко от ка́мене иногда́ непло́дна во́ду лю́дем Твои́м источи́л еси́, Бо́же, та́ко от непло́дныя Елисаве́ти покая́нию пропове́дателя дарова́л еси́: вся́ пресла́вная Твоя́, Всеси́льный Влады́ко.

Богоро́дичен: Сугу́б пло́д — Ио́сифа и Вениами́на, Рахи́ль непло́ды име́, почита́ется плодоро́дием, Ты́ же еди́наго ипоста́сию, сугу́ба естество́м родила́ еси́, Де́во. Неизрече́нная сла́ва Твоя́, Ма́ти Емману́илева!

Пе́снь 6.

Ирмо́с: Я́ко во́ды морски́я, Человеколю́бче, волна́ми жите́йскими обурева́юся, те́мже, я́ко Ио́на, та́ко вопию́ Ти́: возведи́ от тли́ живо́т мо́й, благоутро́бне Го́споди.

Во утро́бе твое́й сы́й Иоа́нн, Елисаве́то свята́я, ви́дев Спа́са своего́, и взыгра́ся младе́нец. Блаже́нна су́ть ложесна́ твоя́, я́вльшая младе́нца, позна́вшаго спасе́ние свое́ — Иису́са.

Ду́хом Святы́м укрепля́ема проти́во все́х хоте́ний, сы́на своего́ Иоа́нном именова́ла еси́, преблаже́нная Елисаве́то, вся́к да хва́лит тя́, орга́н Свята́го Ду́ха.

Твоему́ от Де́вы рождеству́ недомы́слимому от непло́дныя Елисаве́ти зача́тие, а́ки подо́бие, яви́л еси́, Бо́же: сла́ва держа́вной прему́дрости Твое́й!

Богоро́дичен: Вениами́н, рожде́нный Рахи́лиею, ма́терь свою́ умертви́ в рожде́нии, рожде́нное от Тебе́ Сло́во — Живо́т е́сть все́м и́стинный: Его́же умоли́, да наде́ющиися На́нь, живо́т и́мамы ве́чный.

Конда́к, гла́с 4:

Я́ко луна́ полна́, све́т пра́вды от мы́сленнаго Со́лнца, Месси́и, прия́ла еси́ и во все́х за́поведех Госпо́дних с Заха́рием ходи́ла еси́, боговозлю́бленная Елисаве́то. Досто́йными у́бо тя́ пе́сньми ублажа́юще, всеще́драго Све́та, просвеща́ющаго все́х, Го́спода велича́ем.

И́кос:

Я́коже на двои́х скрижа́лех иногда́ за́поведи Своя́ изобрази́ Бо́г, та́ко благода́тию Свое́ю ва́с просвети́, блаже́нный Заха́рие со Елисаве́тою, я́ко в за́поведех Его́ ходи́ти ва́м без поро́ка: досто́йне у́бо восхваля́юще ва́с, всеще́драго Све́та, просвеща́ющаго все́х, Го́спода велича́ем.

Пе́снь 7.

Ирмо́с: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Благодари́ти Бо́га учи́ши на́с, богому́драя Елисаве́то, глаго́лющи о рожде́нии твое́м: та́ко ми́ сотвори́ Госпо́дь; Бо́гом науче́нна еси́ учи́тельница.

Его́же а́нгел вну́трь олтаря́ Иоа́нном бы́ти объяви́ Заха́рии, того́ ты́, рожде́ннаго от тебе́, все́м лю́дем, Бо́гом наставля́ема, та́кожде именова́ла еси́: а́нгелом подо́бен язы́к тво́й, приснопа́мятная Елисаве́то.

Я́ко не́бо ма́нною обремени́в Бо́г, о́ную лю́дем в пусты́ни низпусти́, та́ко от блаже́нныя Елисаве́ти Иоа́нна, благода́ти веща́теля, на́м дарова́: ве́лия ми́лость Твоя́ к челове́ком, Бо́же.

Богоро́дичен: Са́рра, ро́ждши Исаа́ка, о́браз Иису́сов, — ра́дость ми́ сотвори́ Госпо́дь, — глаго́лаше; Образова́ннаго Исаа́ком ро́ждшая и де́вствующая, па́че — ра́дуйся, — Всепе́тая Ма́ти Де́во.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Я́коже о Це́ркви Свое́й рече́ Бо́г: вся́ кра́сная, бли́жняя моя́, и поро́ка не́сть в тебе́, та́ко без поро́ка ты́ еси́, пра́ведная Елисаве́то; Госпо́дь бо Иису́с освяще́ние ве́рным Свои́м е́сть, всю́ кра́сную тя́ велича́ем.

Во все́х за́поведех Госпо́дних ходи́вшую зря́ху тя́ лю́дие, ту́не благода́тию Бо́жиею оправда́нную, достоблаже́нная Елисаве́то: досто́йно у́бо е́сть ми́лость Бо́жию сла́вити в тебе́.

Пе́рвая пропове́дница соверша́емаго та́инства Твоего́ Елисаве́ть бы́сть, Иису́се, егда́ рече́, я́ко Госпо́дь Сы́й и Бо́г, благослове́н Пло́д чре́ва деви́ческаго еси́, де́ло се́ Прему́дрости Твое́й, сла́ва человеколю́бию Твоему́!

Богоро́дичен: Самуи́лово рожде́ние непло́дной ма́тери свое́й сле́зы от о́чию отре́ и ра́дость принесе́; ро́ждшийся от Тебе́ Госпо́дь всему́ ми́ру ра́дость сотвори́. Пе́сньми Тя́ непреста́нно, о Де́во Ма́ти, велича́ем.

Пе́снь 9.

Ирмо́с: Чу́жде ма́терем де́вство, и стра́нно де́вам деторожде́ние; на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем.

Ве́руяй прише́дшаго Месси́ю бы́ти Го́спода своего́ и за́поведи Госпо́дня храня́, благоугоди́ла еси́ Ему́, Елисаве́то. Моли́ у́бо Всеблага́го Влады́ку все́х восхваля́ющих Тя́ спасти́ся душа́м.

И́же за́поведи Бо́жия сохраня́ет, того́ возлюби́ти и яви́тися ему́ обещава́ется Бо́г; в за́поведех Его́ ходи́вшая, те́мже Бо́гом возлю́блена еси́, Елисаве́то, моли́ Всеблага́го о Тезоимени́той, да и возлю́бит Бо́га, и возлю́блена бу́дет благоутро́бием Его́.

И непло́дна, и заматоре́вшая Елисаве́ть, ю́жика Мари́ина, роди́: Ты́ возвели́чил еси́ ми́лость Твою́ с не́ю, Бо́же, от Тебе́ вся́ко дая́ние бла́го, сла́ва неизрече́нным щедро́там Твои́м.

Богоро́дичен: От ю́ности кре́пок явля́яся Сампсо́н, сла́ва непло́дней ма́тери свое́й бы́сть; в ро́ждшемся от Тебе́ Иису́се все́ исполне́ние е́сть Божества́ теле́сне: сла́внейшую Тя́ все́х святы́х велича́ем, Де́во Пречи́стая.

Свети́лен.

Ма́терей непло́дных сла́ва, гре́шником о́браз доброде́телей ты́ была́ еси́, за́поведи Госпо́дня храня́щи, блаже́нная Елисаве́ть: сла́вим бла́гость Бо́жию, на тебе́ явля́емую.