Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Хвалу́ Бо́гу прино́сит в пресвяте́й, блаже́нне, па́мяти твое́й честна́я Це́рковь, по́двиги твоя́ ве́рою сла́вящи.

Напра́вил еси́ ума́ твоего́ вся́ движе́ния, свяще́нне, к Бо́жиим хоте́нием исполне́нию, ра́дуяся, Андрони́че.

Неду́ги очища́ти, ду́хи отгоня́ти лука́выя, от Бо́га Боже́ственную благода́ть прия́л еси́, Богому́дре Андрони́че.

Богоро́дичен: Одожди́ ми́, Де́во, все́х согреше́ний избавле́ние и исправле́ние жития́ Твои́м хода́тайством и благода́тию.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Умертви́в у́ды твоя́ по́двиги, жи́знь сподо́бился еси́ живу́щих зре́ти на земли́ пло́ть нося́ща Христа́ Бо́га на́шего, Андрони́че апо́столе.

Огнедохнове́нен бы́л еси́, Боже́ственнаго Ду́ха чи́стою мы́слию твое́ю теплоту́, апо́столе, обнося́ и попаля́я пре́лести те́рние, Андрони́че всехва́льне.

Глаго́л твои́х веща́ние и си́ла чуде́с обтече́ ми́ра концы́, учениче́ Госпо́день, Боже́ственныя Ду́ха благода́ти ве́рныя науча́ющи.

Богоро́дичен: Не́сть пречи́сты, па́че Тебе́, Влады́чице, и не́сть непоро́чны, ра́зве Тебе́, Всенепоро́чная, Бо́га бо все́х вмести́лище простра́нное еди́на была́ еси́.

Седа́лен, гла́с 4.

Боже́ственный Андрони́к, светови́ден бы́в, сердца́ просвети́ богоразу́мия све́том ко Го́споду приходи́ти. Те́мже и по кончи́не источа́ет исцеле́ния ве́рою приступа́ющим честно́му его́ хра́му и все́м испроша́ет ве́рным ве́лию ми́лость.

Богоро́дичен: Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

Крестобогоро́дичен: На Кресте́ Тя́ возвы́шена я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что́ но́вое и стра́нное сие́ чу́до, Сы́не Мо́й? Ка́ко, Жи́знь все́х, вкуша́еши сме́рти, оживи́ти ме́ртвыя хотя́, я́ко Милосе́рд?

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Тя́, я́ко сро́дника, целу́ет Па́вел, пред ве́рными боже́ственныя твоя́ похвалы́ пропове́дая, Андрони́че богоглаго́ливе, световоди́телю восхваля́ющим тя́.

До́м бы́в Тро́ицы Пресвяты́я, хра́мы и тре́бища разори́л еси́ бла́зненныя и созда́л еси́, прехва́льне, це́ркви во спасе́ние ду́ш на́ших.

Возмо́гл еси́, Бо́жиею мо́щию укрепи́вся, си́льнаго восхи́тити сосу́ды, блаже́нне, и соверши́ти Ду́ха Свята́го жили́ще, Андрони́че.

Богоро́дичен: Тя́ всегда́, Де́во Богоро́дице, вси́ ве́рнии, согла́сно воспева́ем, я́ко тве́рдое и побо́рное предста́тельство и спасе́ние ду́ш на́ших.

Пе́снь 5.

Ирмо́с: От но́щи неве́дения богове́дением просвети́вый концы́, просвети́ мя́ у́тром человеколю́бия Твоего́, Го́споди.

Я́ко сро́дника тя́ Па́влу и пре́жде его́ ученика́ бы́вша, с ни́мже тя́ почита́ем, ве́рою соше́дшеся, Андрони́че.

Светоза́рныя зве́зды, свяще́нныя апо́столы почти́м, Иуни́ю боже́ственную и богоно́снаго Андрони́ка.

Я́ко наро́читы су́ще во апо́столех, ва́с блаже́нный Па́вел пропове́дает в Це́ркви, блаже́ннии.

Богоро́дичен: Тя́, Пресвята́я Отрокови́це, проро́ческий ли́к проначерта́ свяще́нными о́бразы бы́ти Госпо́дню Роди́тельницу.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

До́м тво́й исцеле́ний исто́чники любо́вию притека́ющим источа́ет, апо́столе, омыва́я душе́вныя не́мощи.

Истле́вшее безбо́жием мно́жество язы́к обнови́л еси́ но́выми твои́ми уче́нии, нетле́ннаго Иису́са дру́же и́скренний.

Я́ко со́лнце, обте́кл еси́ зе́млю, Андрони́че прему́дре, трисо́лнечный и несозда́нный возвеща́я ве́рным све́т Божества́.

Богоро́дичен: Боже́ственная ше́ствия на Тебе́ Влады́ки позна́шася, пло́тию обнища́вшаго и обогати́вша ве́рныя, Неискусобра́чная.

Конда́к, гла́с 2.

Звезду́ пресве́тлую, богоразу́мия све́том просве́щшаго язы́ки апо́стола Христо́ва Андрони́ка восхва́лим и с ни́м во благове́стии потруди́вшуюся Иуни́ю прему́друю, вопию́ще: моли́те Христа́ Бо́га непреста́нно о все́х на́с.

Пе́снь 7.

Ирмо́с: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.

Неду́ги лю́тыя и вся́ку боле́знь от ду́ш вку́пе же и теле́с отго́ниши притека́ющих в до́м тво́й, му́дре учениче́ Христо́в.

Де́монская наи́тия отгоня́еши и стра́сти лю́тыя очища́еши челове́ком, спострада́льчеством Христо́в самови́дче, сего́ ра́ди тя́ ве́рно ублажа́ем.

Ри́торское, му́дре, глумле́ние низложи́в простото́ю уче́ний, Бо́га пропове́дуеши в виде́нии пло́тсте пожи́вша со земны́ми бла́гости ра́ди.

Богоро́дичен: Во утро́бу Де́вы всели́выйся и в не́й Ада́ма назда́вый, благослове́н еси́, Го́споди, Бо́же оте́ц на́ших.

Пе́снь 8.

Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Объюроде́вшая злы́м гно́ем челове́ческая, Андрони́че, сердца́ со́лию боже́ственною стягну́в, уче́нии твои́ми, излия́вшемуся Сло́ву спаса́емы предста́вил еси́, треблаже́нне.

Свяще́нник же, и жре́ц, и же́ртва Поже́ршемуся за милосе́рдие позна́лся еси́ и к Нему́ восте́кл еси́, Андрони́че, вене́ц нетле́ния и пра́вды от Него́ прие́м.

Пропове́дник Боже́ственный и апо́стол Богови́дец, разори́тель истука́нных ги́бельных и богати́тель ни́щих яви́лся еси́, сла́вне, и Сио́на вы́шняго вели́кий жи́тель, Андрони́че Богому́дре.

Богоро́дичен: Я́ко клеща́ми, рука́ми у́гль но́сиши, ро́су боже́ственную источа́ющаго, Де́во, пла́менем ле́сти бе́дствующим, попаля́юща же стра́сти песносло́вящих Того́ ца́рствие.

Пе́снь 9.

Ирмо́с: Проявле́нное на горе́ законополо́жнику во огни́ и купине́, рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Да о́ныя жи́зни яви́шися насле́дник, умерщвле́нныя пре́жде де́монскими прило́ги оживи́л еси́ живоно́сным твои́м сло́вом, достоблаже́нне Андрони́че.

Я́ко и́стиннаго бы́в виногра́да, преблаже́нне, лоза́ благора́сленна, вино́ безсме́ртия иска́пал еси́ и челове́ков сердца́ возвесели́л еси́, прехва́льне Андрони́че.

Ты́, я́ко мо́лния, попали́в ве́щь многобо́жия, я́ве показа́л еси́ све́т богоразу́мия су́щим во тме́ жития́, те́м тя́ прославля́ем вси́, Андрони́че.

Свяще́нная твоя́ па́мять, простира́ема в концы́, дне́сь просвеща́ет сердца́ в не́й тя́ свяще́нно восхваля́ющих, достоблаже́нне Андрони́че.

Богоро́дичен: Просвеще́ние на́м испроси́, Я́же Све́т ро́ждшая, и согреше́ний оставле́ние и душа́м спасе́ние, ве́дущим Тя́, и́стинную Богоро́дицу, Чи́стая Де́во Всенепоро́чная.