Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Светолу́чными блиста́нии Ду́ха просвеща́емь, преесте́ственными страда́нии и тве́рдаго терпе́ния, тя́ пою́щия просвети́, предстоя́ Влады́це, венцено́сче пребога́те Стефа́не, му́чеников венча́ние.

Подвиготеку́щим нача́ток бы́в и верхо́вник му́ченическаго собо́ра, зре́ти сподо́бился еси́ Страстополо́жника, сла́вне, десни́цею живоно́сною богоплете́нный тебе́ простира́юща вене́ц, чу́дный Стефа́не.

Еди́н сы́й сокро́вище бла́гости, Спа́се, показа́л еси́ от земны́х не́др сокро́вище многоце́нное, бога́тство неиждива́емое, неотъе́млемо име́ние, коры́сть неги́блему, Стефа́на Твоего́ первому́ченика.

Ангелозра́чною я́ве све́тлостию озаря́емь, а́нгельскими пе́сньми, первому́чениче Стефа́не и диа́конов перволу́чший, сокрове́н я́ко яви́лся еси́, досто́йно вои́стинну почти́лся еси́, испо́лнен благово́ния духо́внаго.

Богоро́дичен: Воплоще́ннаго на́с ра́ди, Пренепоро́чная, пре́жде Безпло́тнаго, Богонача́льнаго Сло́ва О́тча родила́ еси́. О, де́вства селе́ние, и прия́телище чистоты́, и хра́м свяще́ния, Влады́чице ми́ра Богоневе́сто!

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Священносло́в свяще́нный и богосло́в показа́лся еси́, сплета́яся с евре́йскими собо́ры, облича́я кре́пко си́х безбо́жие и богобо́рный нра́в, Стефа́не, му́чениче всеизря́дне.

Первому́ченика Христо́ва и служи́телей пе́рваго, му́чеником тече́ния степе́нь показа́вша све́тло, а́нгелов собесе́дника, прииди́те согла́сно вси́, пе́сньми боже́ственными почти́м.

Сокрове́нное сокро́вище в земли́ явля́ется, и ми́р благово́ния боже́ственнаго и бога́тых даро́в Це́рковь испо́лни му́чеников пе́рвый и служи́телей первоизбра́нный.

Умерщвле́нный мо́й у́м жи́зни де́йством, тобо́ю пропове́давшимся, му́дре, возста́ви пе́ти твое́ честно́е торжество́ и твои́м стопа́м после́довати, Стефа́не блаже́нне, сподо́би.

Богоро́дичен: Две́рь яви́лася еси́ мы́сленна восто́ка Вы́шняго, на земли́ я́вльшагося, Де́во: Тобо́ю бо к на́м Сло́во привни́де спасти́ все́х от безслове́сия, Пречи́стая.

Седа́лен, гла́с 1.

Апо́столе Христо́в, диа́конов пе́рвый, первому́чениче му́дре, му́чеников ве́рх, мирски́я концы́ освяти́в страда́нии твои́ми и чудесы́ ду́ши челове́ков просвети́л еси́, чту́щия тя́ изба́ви вся́ческих бе́д, всехва́льне Стефа́не.

Богоро́дичен: Упова́ние христиа́н, Пресвята́я Де́во, Его́же родила́ еси́ Бо́га, па́че ума́ же и сло́ва, непреста́нно моли́ с вы́шними си́лами пода́ти оставле́ние грехо́в на́ших все́х и исправле́ние жития́, ве́рою и любо́вию при́сно Тя́ сла́вящим.

Крестобогоро́дичен: Нескве́рная А́гница, А́гнца и Па́стыря, пове́шена на дре́ве, ме́ртва зря́щи, пла́чущи, веща́ше, ма́терски восклица́ющи: ка́ко претерплю́ Твое́ е́же па́че сло́ва, Сы́не Мо́й, сни́тие и во́льныя стра́сти, Бо́же Преблаги́й?

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Струи́ на́м дне́сь ми́ра источи́ благово́ния, исто́чник исхо́дит и река́ Боже́ственных бла́г, и пи́щный пото́к отве́рзе сла́вный, пе́рвый му́чеников, и́же ве́ры испо́лнен, и си́лы Боже́ственныя, и благода́ти.

Я́ко свяще́н и све́тел и благонаро́чит де́нь первому́ченика, испо́лнен све́та и духо́внаго вои́стинну весе́лия, Ца́рскому гра́ду яви́ся, сохраня́я держа́ву честны́я Це́ркве и ва́рварскую де́рзость отгоня́я.

Благо́е насле́дие восприя́л еси́ досто́йно, Стефа́не блаже́нне, иде́же Христо́с Ца́рь все́х, ты́ всели́лся еси́, Того́ бо яви́лся еси́ служи́тель, зна́мений и чуде́с творя́ си́лы и подая́ боля́щим исцеле́ния.

Непрекло́нен Це́ркве и непоколеби́мь и водруже́н сто́лп простре́ся от земли́ да́же до небе́с, заре́ю благоче́стия просвеща́я вся́ концы́, Стефа́н, вели́кий и́стины пропове́дник, страда́ния и́стинный побо́рник.

Богоро́дичен: Но́в Ада́м за пе́рваго Ты́ бы́л еси́, от Де́вы за прама́терь, Изба́витель все́х и Спа́с, за сме́рть и́стинна жи́знь безсме́ртная. Те́мже, Тя́ ро́ждшую Богоро́дицу ве́дуще, по достоя́нию, вси́ ве́рнии, ублажа́ем.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Беззако́нных евре́ев су́етный вои́стинну собо́р терпели́вно обличи́л еси́, от те́х, богогла́се, покрыва́емь мета́нии ка́менными, на небеса́ я́ко победоно́сец возне́слся еси́ ду́хом, Стефа́не.

Я́ко красе́н, я́ко у́тро, ми́ру яви́лся еси́, сла́вне Стефа́не, мглу́ отгоня́, и де́монов прогоня́ мечта́ния и неду́гующих стра́сти, и душе́вных не́мощей целя́ гное́ния, богодохнове́нне.

Мы́сленно со а́нгелы, блаже́нне, ра́дуяся, ми́ра концы́ освяща́еши вои́стинну твои́м прише́ствием и благода́тию, благово́ния ми́ры духо́вными благоуха́я и бе́д и бу́ри избавля́я.

Богоро́дичен: Ма́тернее дерзнове́ние е́же к Сы́ну Твоему́ иму́щи, Всечи́стая, сро́днаго промышле́ния, е́же о на́с, не пре́зри, мо́лимся: я́ко Тебе́ и еди́ну христиа́не ко Влады́це очище́ние ми́лостивно предлага́ем.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

А́нгелом я́ко подо́бник произволе́нием бы́в, ви́д а́нгельский стяжа́л еси́, блаже́нне, с ни́миже ра́дуяся и обходя́, пою́щия тя́ спаса́й.

Глаго́л, блаже́нне, твои́х богодохнове́нных си́ла, я́ко шу́м гро́мный, во у́ши, богоприя́тне, я́ве возгреме́ беззако́нных и ли́ца и́х помрачи́.

Сла́ву Оте́ческую узре́ти сподо́бился еси́ и сея́ соесте́ственное сия́ние, Стефа́не, страда́нии возвеща́я тебе́ све́тлыя венцы́, богогла́се всече́стне.

Богоро́дичен: Сы́н Единоро́дный и пре́жде ве́к неви́димый напосле́док дне́й Пе́рвенец бы́сть, ви́димь пло́тию из Тебе́, Богома́ти, Бо́г спасе́ния моего́.

Конда́к, гла́с 6:

Пе́рвый се́ялся еси́ на земли́ небе́сным де́лателем, всехва́льне Стефа́не, пе́рвый на земли́ за Христа́ кро́вь излия́л еси́, блаже́нне, пе́рвый от Него́ побе́ды венце́м увя́злся еси́ на небесе́х, страда́льцев нача́ло, вене́чниче, му́чеников первострада́льне.

И́кос:

Ра́йския цве́ты зря́, благово́нием свои́м кра́сным исполня́ющия всю́ вселе́нную, стра́нному и́х дивлю́ся зре́нию: в ле́де зи́мнем мно́жае цвету́т па́че, е́же стра́нно во цве́тех. И му́ченик Христо́в, процветы́й пе́рвее, и две́рь бы́в стра́ждущим зако́нно, и цвету́щим зимо́ю муче́ния, пу́ть показа́ все́м неле́стный, хотя́щим страда́ти, до́брый подвигонача́льник, и́же боле́зньми просия́в, вене́чниче, му́чеников первострада́льне.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Тече́ние крове́й твои́х небе́сныя две́ри отве́рзе и Подвигополо́жника, предстоя́ща и простира́юща тебе́ вене́ц, показа́, зову́щу: благослове́н Бо́г оте́ц на́ших.

Я́ко зве́рие, похи́тивше богоуби́йцы богоявле́ннаго, скверноуби́йственными дла́ньми сего́ убива́ху, моля́щася о убива́ющих приле́жно и пою́ща: благослове́н Бо́г оте́ц на́ших.

Зако́нно обличи́л еси́ беззако́нныя, зако́нный подо́бник Спа́сов, и богобо́рны си́х показа́л еси́, от ни́хже ка́мением побива́емь, пе́л еси́: благослове́н Бо́г оте́ц на́ших.

Богоро́дичен: В ле́то Безле́тнаго неискусобра́чно, Чи́стая, заче́нши, и́же пе́рвее Безпло́тное Сло́во, пло́ти прия́тием, Де́во, родила́ еси́. Ему́же пое́м, согла́сно зову́ще: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Преесте́ственным сия́я светозаре́нием, преизря́дне, и лица́ твоего́ зра́к равноа́нгелен пока́зовал еси́, благода́ти изда́вшися, Стефа́не, я́же в души́ твое́й, сокрове́нне бога́тно. Те́мже вопия́л еси́: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Венцено́сче Стефа́не, души́ моея́ я́звы и грехо́вныя стру́пы очи́сти кропле́нием крове́й твои́х, к твоему́ бо заступле́нию ми́лостивному и христоподо́бному нра́ву прибего́х, зовы́й: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Благода́ти, сла́вне, тебе́ тезоимени́тый вене́ц твоему́ честно́му верху́ положи́ Судия́ нелицеме́рный, Его́же благоче́стно пропове́дал еси́, Зижди́теля, и Бо́га, и Царя́ все́х, вопия́ непреста́нно: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

В ру́ку Соде́теля пре́дал еси́ ду́х тво́й, и небе́сная во́инства собесе́дника прия́ша тя́, ра́дующеся, пе́рвее на земли́ равноа́нгельна, ны́не же те́х причте́на лико́м, непреста́нно пою́ща: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Богоро́дичен: Све́та незаходи́маго была́ еси́ сосу́д, Всечи́стая, Све́т бо су́щим во тме́ и се́ни родила́ еси́, просвеща́ющ вся́ческая богоразу́мия благода́тию. Ему́же непреста́нно, ве́рнии, пое́м: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Страда́ния му́чеников нача́ло, све́тло показа́вый муче́ния неле́стную стезю́, наставля́ющу к небеси́, первому́ченик Стефа́н вся́ призыва́ет духо́вне к боже́ственному весе́лию и к прича́стию све́та, ко обще́нию святы́ни.

Вжиля́емь любо́вию Христо́вою и Сего́ поревнова́в кро́тости и гла́су, глаго́лаше: не поста́ви уби́йцам греха́, Го́споди, приими́ же ду́х мо́й, Бла́же, и Боже́ственнаго Ца́рствия, пи́щи же неизрече́нныя, су́щия у Тебе́, сподо́би мя́.

Красе́н, и ви́да а́нгельскаго, и прему́дрости, и ве́ры испо́лнен, и Боже́ственныя зари́ сия́я луча́ми, и богогла́сными усты́ богоглаго́лал еси́, я́ко река́, боже́ственне вети́йствуя, вы́шнее насле́дие, богоблаже́нне, улучи́л еси́.

Венце́м благода́тей венча́лся еси́, и ли́ки му́ченическими окруже́н, и Христу́ Подвигополо́жнику предстоя́, о на́с моли́ся, творя́щих све́тло вои́стинну светоно́сное твое́ торжество́, блаже́нне, и от бе́д на́с изба́ви.

Богоро́дичен: Я́ко все́х Предста́тельнице христиа́н, Богома́ти Всенепоро́чная Влады́чице, я́ко Ми́лостива, изба́ви от бе́д и искуше́ний стра́ждущия рабы́ Твоя́ и неду́гующия лю́тых прегреше́ний ра́нами и боле́зньми тя́жкими одержи́мыя изврачу́й.

Свети́лен.

Ка́менная мета́ния преми́рный исплето́ша тебе́ нетле́ния вене́ц, и кро́вныя ка́пли — багряни́цу ца́рску, нача́льниче му́чеников, изря́дный Стефа́не.

Богоро́дичен: Свята́я Влады́чице Пречи́стая и еди́на Неискусобра́чная, спасе́ние и упова́ние, Ты́ умоли́ из Тебе́ рожде́ннаго Изба́вителя на́шего спасти́ ми́р от ле́сти, и бе́д, и скорбе́й.