Канон святому апостолу Кодрату

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Венценося́ Царю́ си́л предста́в, моли́ озари́ти соверша́ющия па́мять твою́ сию́ све́тло, блаже́нне апо́столе.

Назида́я на основа́нии ве́ры благочести́вых исполне́ние крепча́йшими твои́ми уче́нии, богоглаго́льниче, и́дольскую всю́ ле́сть низврати́л еси́.

Священноде́йствуя свяще́нное Ева́нгелие свяще́ннейшими словесы́ твои́ми, ду́ши Творцу́ твоему́ освяти́л еси́ ве́рою, приснопа́мятне Кодра́те, кре́постию Ду́ха.

Богоро́дичен: От Отрокови́цы пло́тию Неискусобра́чныя Творе́ц тва́ри ражда́емь, по рождестве́, я́ко пре́жде рождества́, Де́ву храни́т Ю́, я́коже благоволи́.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Соверша́я стра́шная, Кодра́те, чудеса́, неве́рных в ве́ру Боже́ственную приве́л еси́, я́ко апо́стол богоприя́тен, я́ко че́стен иера́рх, свяще́ннейше.

Боже́ственными уче́нии мно́гия просвети́л еси́, Све́та бо слуга́ яви́лся еси́, просвети́вшаго концы́, священнонача́льниче Кодра́те, боже́ственными сия́ньми.

Велича́йших благи́х хода́тай бы́л еси́ па́стве, изыма́я сию́ тмы́ неве́дения и просвеща́я ту́ пресла́вных чуде́с показа́ньми.

Богоро́дичен: Всели́ся в Тя́ О́гнь нестерпи́мый, не опали́в утро́бы Твоея́, Богоро́дице, и попали́ стра́сти на́ша, и ти́ну пре́лести испепели́.

Седа́лен, гла́с 3.

Красне́йшаго добро́тою су́ща па́че сыно́в челове́ческих, Сло́во Пребезнача́льное, воплоще́нное па́че ума́, Кодра́те, пропове́дал еси́, те́м просвети́л еси́ во тме́ су́щия, све́т язы́ком бы́в я́ко иера́рх боже́ствен. Те́м твое́ светоно́сное торжество́ ве́рою соверша́юще, пое́м тя́.

Богоро́дичен: Наде́ждо христиа́н, Пресвята́я Де́во, Его́же родила́ еси́ Бо́га па́че ума́ и сло́ва, непреста́нно моли́ с вы́шними си́лами, да́ти оставле́ние грехо́в на́м все́м и исправле́ние жития́, ве́рою и любо́вию при́сно Тя́ прославля́ющим.

Крестобогоро́дичен: Ви́дящи Тя́, Христе́, Всенепоро́чная Ма́ти ме́ртва на Кресте́ распросте́рта, вопия́ше: Сы́не мо́й, Собезнача́льне Отцу́ и Ду́ху, что́ неизрече́нное строе́ние сие́, и́мже спа́сл еси́ пречи́стых Твои́х ру́к, Ще́дре, созда́ние?

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Земледе́лав ни́ву серде́чную, серпо́м слове́с твои́х зло́бы те́рние все́ искорени́л еси́.

Исцеле́ний да́ры все́м на́м гро́б тво́й то́чит, свяще́нне Кодра́те, хва́лящим тя́.

Ми́лостивно преклоня́яся, от злолю́тых изыма́еши бе́д, свяще́нне Кодра́те, моля́щих тя́.

Свеща́ми слове́с твои́х просвеща́я пре́лестию омраче́нныя, и хвра́стную пре́лесть всю́ попали́л еси́.

Богоро́дичен: От чи́стых Твои́х воплоти́ся крове́й Соде́тель, Богоро́дице, и истле́вшая вся́ обнови́л е́сть.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Чи́стую твою́ ду́шу чисте́йший Бо́г селе́ние Своея́ сла́вы обре́т, очища́ет тобо́ю ду́ши, оскве́рншияся лю́тыми грехопаде́ньми.

Е́ллинстии мудрецы́, твои́ми побежде́ни му́дрыми догма́ты, испове́дати покори́шася, блаже́нне, Христа́ Соде́теля, Отца́ Безнача́льнаго Му́дрость и Си́лу.

Провозглаша́я свяще́нно су́щую челове́ком све́тлость от Отца́ све́тов, Кодра́те, просвети́л еси́ лю́ди чествова́ти и сла́вити Тро́ицу Неразде́льную.

Богоро́дичен: Воплоще́нна на́м во дву́ естества́х Сы́на родила́ еси́, из Отца́ пре́жде все́х веко́в, Чи́стая, рожде́ннаго безсе́менно, безле́тно, я́ко Еди́н ве́сть.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Высо́кое не́бо бы́л еси́, сла́ву пове́дающее Бо́жию спаси́тельную, я́ко иера́рх боже́ственный, я́ко сла́вен ты́, Кодра́те, апо́стол.

Еди́но естество́ Божества́ безнача́льное, еди́но Госпо́дство пропове́дуя, всему́дре, многобо́жия разруши́л еси́, Кодра́те, мра́чное безу́мие.

Зако́ном естества́ во гро́бе твое́ те́ло, блаже́нне, свяще́ннейше ны́не лежа́що, чудоде́йствует пресла́вная па́че естества́, Кодра́те приснопа́мятне.

Богоро́дичен: Не́бо простры́й хоте́нием, ино́е не́бо на земли́ Тя́ показа́, Богороди́тельнице Влады́чице, и Тобо́ю су́щия во тме́ просвети́.

Конда́к, гла́с 8.

Я́ко священнонача́льника че́стна и страда́льца тверде́йша, вселе́нная прино́сит Тебе́, Го́споди, Кодра́та апо́стола и пе́сньми почита́ет честну́ю его́ па́мять, прося́щи всегда́ прегреше́ний оставле́ния те́м дарова́тися пою́щим его́, Благоутро́бне.

И́кос:

Му́драго иера́рха почти́м, я́ко па́стыря ве́рна и учи́теля, я́ко во цве́тнице страда́ния процвете́ шипо́к свяще́ннейший и ве́рныя ны́ облагово́ни, чуде́с же луча́ми и дея́нии доброде́тельными, просвеще́ния испо́лнив всю́ зе́млю исцеле́ний све́тлостьми, удиви́ бо его́ Бо́г все́м почита́ющим пе́сньми честну́ю его́ па́мять, я́ко Благоутро́бен.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Возвы́сив у́м к Пе́рвому Бла́гу, богови́днейший хра́м Тро́ицы бы́л еси́, и су́щия во глубине́ озлобле́ния возвы́сил еси́ высоча́йшими твои́ми уче́нии, зову́щия: благослове́н еси́, Бо́же отце́в на́ших.

Сокруши́в хра́мы и́дольския моли́тв раскопа́ньми, созда́л еси́ Боже́ственным Ду́хом хра́мы Бо́жия, свяще́ннейше о́тче, и спаса́емых мно́жества приве́л еси́, зову́щия: благослове́н еси́, Бо́же отце́в на́ших.

Огнедохнове́н сы́й, я́ко духо́вный о́гнь Боже́ственный, всему́дре, в се́рдцы твое́м име́я всегда́, свеща́ ви́делся еси́, паля́щая всю́ хвра́стную ле́сть и вопию́щия просвеща́ющая: благослове́н еси́, Бо́же отце́в на́ших.

Богоро́дичен: Изба́вльшеся Тобо́ю кля́твы пра́дедния, Богора́дованная, до́брых вину́ Тя́ ве́мы, я́ко всевино́вное ро́ждшую Сло́во, па́че ума́ же и чудесе́, и вопие́м Ти́, Пречи́стая, Благослове́нная, Бо́га пло́тию ро́ждшая.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Утвержде́ны на у́мнем Ка́мени душе́вныя име́я стопы́, запя́л еси́, блаже́нне, Госпо́дни враги́ и вся́, Кодра́те, утверди́л еси́ пою́щия и превознося́щия Христа́ во вся́ ве́ки.

Укра́шену доброде́тельми име́я ду́шу и се́рдце, украси́л еси́ сло́вом уче́ния ду́ши, избавля́я неле́поты вся́каго идолонеи́стовства, Кодра́те богоглаго́ливе.

Я́ко учени́к Иису́сов, я́ко апо́стол све́тел, я́ко Со́лнца пра́вды светови́дная мо́лния, Кодра́те, просвети́, освяти́ соверша́ющия святу́ю твою́ па́мять.

Богоро́дичен: Свяще́ннейшими Тя́ гла́сы свяще́ннейшии Бо́жии, Чи́стая, проро́цы бу́дущую Ма́терь провозгласи́ша я́сно все́ми Влады́чествующаго, Пречи́стая, Его́же благослови́м во вся́ ве́ки.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Укра́шен ра́зумом кра́сному Влады́це предстои́ши, светле́йш при́сно, я́ко иера́рх богоприя́тен, я́ко апо́стол боже́ствен, со все́ми апо́столы и́стинно ми́р ми́ру, Кодра́те, испроша́я.

Твои́х Магниси́я иму́щи ра́ку моще́й, я́ко боже́ственный киво́т, и от него́ вся́ку, Кодра́те, по́льзу исчерпа́ет любо́вию, оби́тели же небе́сныя, твою́ ду́шу име́ющия, со все́ми святы́ми веселя́тся.

Светоза́рный тво́й де́нь, светоно́сная твоя́ па́мять, и́стинно благосла́вный тво́й пра́здник все́м, я́ко со́лнце, возсия́, ю́же ве́рно соверша́ем, Кодра́те, очище́ние грехо́в моля́щеся моли́твами твои́ми обрести́ и ве́лию ми́лость.

Богоро́дичен: Пощади́ мя́, Го́споди, пощади́, егда́ хо́щеши суди́ти ми́, и не осуди́ мене́ во о́гнь, ни я́ростию Твое́ю обличи́ мене́: мо́лит Тя́ Де́ва, Тебе́ ро́ждшая, Христе́, апо́столов мно́жество и с проро́ки му́ченицы.

Свети́лен.

Тече́ние кра́сных твои́х но́г, Кодра́те апо́столе, возврати́в, к ше́ствию небе́сному возше́л еси́ ра́дуяся, и, Тро́ице предста́в, во Отце́ ви́диши Сы́на и Ду́ха Боже́ственнаго, сего́ ра́ди ве́рою пресвяще́нную твою́ и боже́ственную пра́зднуем па́мять.

Богоро́дичен: Тя́ предста́тельницу вси́ и́мамы, гре́шнии, о Всесвята́я Де́во! Ты́ благопреме́нна на́м сотвори́ Сы́на Твоего́ Ма́терними Твои́ми моли́твами.