Пе́снь 1.

Ирмо́с: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Любо́вию соверша́ющия твою́ светоно́сную и свяще́нную, сла́вную и всечестну́ю па́мять све́та Боже́ственнаго испо́лни, апо́столе, моли́твами твои́ми.

Ве́сь возложи́вся Влады́це, Сего́ зако́ны честны́я невре́дны соблю́л еси́, беззако́нныя же благозако́нию научи́л еси́, апо́столе.

У́м преу́мный возлюби́в в зре́нии та́йном, умо́м озари́вся, всеблаже́нне свяще́нне, све́т яви́лся еси́ вторы́й.

Богоро́дичен: Ро́ждши, Де́во, несказа́нно, есте́ственныя зако́ны обнови́ла еси́, те́мже Тя́ блажи́м, Мари́е Богоневе́сто.

Пе́снь 3.

Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Цевни́ца, бряца́ющая Ду́хом, бы́л еси́, всеблаже́нне, богодви́жимый язы́к тво́й, веща́ющь вели́чия Спа́са и Бо́га на́шего.

Име́я Сло́во пребезнача́льное, направля́ющее тя́ и я́ве укрепля́ющее, безбо́жным спаси́тельныя стези́, Ка́рпе, показа́л еси́.

Ка́рпе, спаси́тельное пропове́дание тва́ри, я́ко святи́тель богоприя́тен, возвести́в, мно́га подъя́л еси́ гоне́ния и ско́рби, сла́вне.

Богоро́дичен: Но́во я́ко Отроча́ родила́ еси́, пре́жде ве́к из Отца́ возсия́вшее неизглаго́ланно, Богороди́тельнице, сего́ ра́ди Тя́ сла́вим.

Седа́лен, гла́с 3.

Боже́ственное сия́ние восприи́м, Ка́рпе прему́дре, Уте́шителево, омраче́нныя неве́дением просвети́л еси́ и, преста́влься к Вы́шнему Ца́рствию, Царю́ все́х предстои́ши, моля́ Христа́ Бо́га всегда́ дарова́ти на́м ве́лию ми́лость.

Богоро́дичен: Боже́ственнаго естества́ не отлу́чся, пло́ть бы́в во чре́ве Твое́м, но Бо́г вочелове́чся и пребы́сть, И́же по рождестве́ Ма́терь Тя́ Де́ву, я́ко пре́жде рождества́, сохрани́в Всенепоро́чну, еди́н Госпо́дь. Того́ приле́жно моли́ дарова́ти на́м ве́лию ми́лость.

Крестобогоро́дичен: Нескве́рная А́гница Сло́ва, Нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмо́с: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Созда́в, я́ко ка́мение, ве́рных мно́жество на благоче́стии ка́мени, хра́мы соде́лал еси́ Свята́го Ду́ха, Богому́дре апо́столе.

Но́вы соде́лав Креще́нием, Богоблаже́нне, обетша́вшия нра́вом тле́нным, челове́ки спа́сл еси́, сла́вящия Христа́, Бо́га на́шего.

Явля́я та́инство Покры́вшаго доброде́телию, Богому́дре, Небеса́, привле́кл еси́ язы́ки к позна́нию Его́, тьму́ отгоня́.

С Па́влом, свети́льником вселе́нныя, пу́ть ше́ствуя мно́жицею, пути́, веду́щия, Ка́рпе, показа́л еси́ лю́дем ко благоче́стию.

Богоро́дичен: У́мно Богоно́сный, Богороди́тельнице, го́ру Тя́ ви́дев ве́лию и присе́нную, Отрокови́це, от нея́же прии́де пло́тию Бо́г на́ш.

Пе́снь 5.

Ирмо́с: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны́, Бла́же, Тво́й ми́р да́руяй.

Я́ко садоде́латель изря́ден, показа́л еси́ лю́дем живо́тное дре́во, от него́же яды́й жи́в бу́дет про́чее во ве́ки, Христопропове́дниче апо́столе.

Пропове́дник язы́ков, апо́стол и учи́тель че́стен, священнотаи́нник и священносло́в, Ка́рпе, бы́в, в весе́лии Влады́це предстои́ши.

От восто́ка прише́л еси́, я́ко незаходи́мая звезда́, вселе́нную заря́ми твои́х слове́с и свяще́нными просвеща́я о́бразы, иера́рше апо́столе.

Богоро́дичен: Скве́рну души́ и телесе́ очи́сти ми́ ны́не, Благослове́нная, милосе́рдым Твои́м воззре́нием, я́ко да Тя́ пою́ и велича́ю по до́лгу, Всепе́тая.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Источа́ет ра́ка твои́х моще́й тре́бующим исцеле́ния, святи́телю, то́ки благода́тию Боже́ственною, и отъе́млет стра́сти, и потопля́ет нечи́стыя ду́хи.

Сло́во твое́, от безслове́сия избавля́я челове́ки, и чуде́с вели́кое показа́ние, сла́вне, заблу́ждших ко благоче́стию, Ка́рпе, наста́ви.

Вжиля́емь си́лою Боже́ственною, зми́я, на высоту́ хулу́ глаго́лавшаго, погуби́в, от о́наго поглоще́нныя, апо́столе, спа́сл еси́.

Богоро́дичен: Родила́ еси́ без боле́зни Зижди́теля, Всенепоро́чная, боле́зни и труды́ на́ша отъе́млющаго и неболе́зненней сподобля́юща пи́щи челове́чество.

Конда́к, гла́с 4.

Я́ко звезду́ пресве́тлую, Це́рковь всегда́ стяжа́ тя́, апо́столе Ка́рпе, чуде́с твои́х многоподава́нием просвеща́ема, спаси́ ве́рою чту́щих па́мять твою́.

Пе́снь 7.

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Неду́ги отгоня́ веща́нием, исцеля́я стра́сти зна́мением то́кмо еди́ным, спаси́тельное возвести́л еси́ пропове́дание, священнотаи́нниче Ка́рпе, просвеща́я су́щия во тме́.

Я́рости князе́й, му́дре, ника́коже убоя́вся, до́блественне отлучи́лся еси́ к страда́нию боле́зненных трудо́в, взыва́я: оте́ц на́ших Бо́же, благослове́н еси́.

Посети́вый тя́ Госпо́дь, Ка́рпе, Ве́ррии Боже́ственна поста́ви посети́теля, изря́дно посеща́юща сию́ посеще́нии Боже́ственными.

Богоро́дичен: Я́ко простра́ннейши су́щи небе́с, в ложесна́ прия́т Сло́во Невмести́мое, Де́во, избавля́ющаго тесноты́ вся́кия ро́д челове́ческий.

Пе́снь 8.

Ирмо́с: На Кресте́ пло́тию пригвожде́ннаго и показа́вшаго на́м ору́жие во спасе́ние, о́троцы, превозноси́те Христа́ Бо́га на́шего во ве́ки.

Па́влу, му́дрому наста́внику, в посла́ниих служа́ Боже́ственных, святи́телю, спаси́тельная уче́ния все́м разда́л еси́ спаса́емым.

У́тро све́тлое, озаря́яй вселе́нную све́том, пропове́дник показа́лся еси́, и неразу́мия тму́ глубо́кую отгна́л еси́, досточу́дне.

Чудеса́ соверша́я призыва́нием Отца́ и Ду́ха, му́дре, и Сло́ва воплоще́ннаго, уве́рил еси́ е́ллины му́дрыя Триипоста́сное Существо́ чти́ти.

Богоро́дичен: Яви́лася еси́ Не́бо, Богороди́тельнице, возсия́вшее на́м пра́вды Со́лнце, просвеща́ющи вся́ ны́ в ра́зум Богоразу́мия.

Пе́снь 9.

Ирмо́с: Рождество́ Твое́ нетле́нно яви́ся: Бо́г из боку́ Твое́ю про́йде, я́ко Плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.

Ви́дев со сла́вою Бо́га, восходя́ща с пло́тию в Вы́шняя, седми́десятим, Ка́рпе, ученико́м соприче́лся еси́, изше́л еси́ вку́пе с ни́ми, пропове́дник Боже́ствен явля́яся.

Я́ко овча́ посреди́ волко́в, по́слан бы́л еси́, претворя́я те́х, Ка́рпе, к разуме́нию, сло́вом и́стинным на спасе́ние, и прелага́я си́х нра́в, Богоглаго́ливе, ко благоче́стию.

Собесе́дник яви́лся еси́ а́нгелом, апо́столе Ка́рпе Богоглаго́ливе, апо́столом же и му́чеником, ди́вно во благоче́стии сконча́вшимся, с ни́миже лику́я ве́село, и на́с помина́й.

Освяти́л еси́, Ка́рпе, ше́ствуя, зе́млю, и свято́е пропове́дал еси́ Ева́нгелие ве́рою, и ду́ши Живода́тельному Сло́ву приве́л еси́. Те́мже тебе́ да́рует насле́дие Небе́сное.

Богоро́дичен: Гла́с Ти́ прино́сим, Де́во, Гаврии́лов, вопию́ще: ра́дуйся, ле́гкий о́блаче, ра́дуйся, земле́ неде́ланная, кла́с красе́н плодонося́щи, Пита́теля все́й тва́ри.