Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Вся́кими дарова́ньми обогати́вши тя́ благода́ть Ду́ха, пропове́дника боже́ственна апо́стола, в концы́ пропове́дающа, посла́ Сло́ва воплоще́ние, Ти́те пресла́вне.

Зарю́ боже́ственныя благода́ти прие́мь, облиста́л еси́, я́ко со́лнце, прему́дре, су́щим во тме́ душа́м, я́же просвети́л еси́, изыма́я неве́дения, пре́лести рабо́ты избавля́я, блаже́нне.

Сы́й испо́лнен даро́в духо́вных, Па́вел прему́дрый на тя́ рукоположе́ние возлага́ет и служи́теля, и боже́ственна ученика́, и ве́ры пропове́дника устроя́ет, Ти́те пречу́дне.

Богоро́дичен: Избавля́я мирски́я концы́ пре́лести, возсия́ от Твоего́ чре́ва Госпо́дь, Богоневе́сто, Его́же моли́ всегда́ спасти́ ве́рою Тя́, Де́во, чту́щия.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Не му́дростию объюро́ди то́й внима́ющия, но ра́зумом и́стины ослепле́ние, блаже́нне, ду́ш отгна́л еси́, притека́ющих к тебе́.

Олядене́вшую безбо́жия те́рнием бразду́, всенасле́дие язы́к, серпо́м боже́ственным очи́стил еси́, ра́зума се́мена насе́яв.

Еди́но пропове́дая в Тре́х Ли́цах Божество́, отгна́л еси́ мглу́ многобо́жия, блаже́нне, к боже́ственному ра́зуму приводя́ концы́.

Богоро́дичен: Святе́йшу а́нгелов и всея́ тва́ри вы́шшу, из Тебе́ пло́тию Роди́выйся Тя́ соде́ла, те́мже Тя́, я́ко Влады́чицу все́х, почита́ем.

Седа́лен, гла́с 8.

Я́коже звезда́ с со́лнцем, ходи́л еси́, пресла́вне Ти́те, с Па́влом, я́ве зе́млю просвети́сте и тму́ разори́сте, в Кри́тстем же о́строве заше́д, блаже́нне, сме́ртию, все́м незаходи́мы оста́вил еси́, я́ко зари́, богому́дре, твоя́ боле́зни и словеса́, и́миже просве́щшеся, благоче́стно тя́ чти́м и согла́сно вопие́м ти́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Богоро́дичен: Я́ко Всенепоро́чная Неве́сто Творцу́, я́ко неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й и Вы́шняго прича́стия сподо́би и Све́та невече́рняго моли́твами Твои́ми.

Крестобогоро́дичен: А́гнца и Па́стыря и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

От сокро́вищ неистощи́мых поче́рп, всему́дре, жа́дныя ра́зумы бога́тства и́стиннаго насы́тил еси́ и умерщвле́нная сердца́ оживи́л еси́, неразу́мия отгоня́я мглу́, всесла́вне.

Па́влова тя́ мре́жа промышле́нием благода́ти уловля́ет, Ти́те, хотя́ща усе́рдно по́слежде твое́ю у́дицею сло́ва язы́ки премно́гия извлещи́ от ле́стныя глубины́ ко благоче́стию.

Сла́вному, я́коже а́гня, боже́ственному Па́влу после́дуя, тя́жкия от среды́ во́лки, богогла́се, отгна́л еси́, и́дольския же хра́мы на зе́млю низве́ргл еси́ и хра́мы Бо́гу земноро́дныя сотвори́л еси́.

Богоро́дичен: Свята́я Богоро́дица, се́нь нескве́рная, Све́та две́рь, трапе́за и ру́чка всезлата́я, несеко́мая гора́ и присе́нная, я́ко вмести́вшая Соде́теля, ублажа́ется.

Пе́снь 5.

Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Смердя́щую уста́вил еси́ зло́бы я́зву язы́ком, блаже́нне, ду́ш, сла́дкою со́лию боже́ственных слове́с твои́х, я́коже вра́чь изря́ден и я́ко благода́ти служи́тель.

Па́вла веле́нием повину́яся кро́тко, с ни́м поднебе́сную обхо́диши, прему́дре, сло́во ра́зума благовеству́я, богопропове́дниче всече́стне.

Равноде́тельна, Единопресто́льна Сло́ва Отцу́ науча́я, я́коже му́др, богогла́се, повину́л еси́ суему́дрыя и́дольскую всю́ ле́сть отри́нути.

Богоро́дичен: Чи́стую чи́стым почти́м умо́м, добро́ту Иа́ковлю, Боже́ственными дея́ньми удобря́еми, благоче́стно воспое́м, я́ко Ма́терь Бо́га на́шего.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Па́вел, ми́ра невече́рнее со́лнце, тя́, я́коже зарю́, испуща́ет светолу́чну, блаже́нне, я́же во тме́ неразу́мия седя́щая сердца́ просвеща́юща.

Во́д живото́чных сы́й испо́лнен, струя́ми Боже́ственных уче́ний пото́ки, блаже́нне, неразу́мия потопля́еши, напоя́я язы́ков совокупле́ния.

Богоро́дичен: Пою́т ро́ди родо́в Тя́, Всепе́тая: препе́тое бо Сло́во Бо́жие родила́ еси́ па́че сло́ва, Его́же сла́вят и челове́честии и а́нгельстии чи́ни.

Конда́к, гла́с 2.

Па́влов яви́вся собесе́дник, апо́столе, с ни́м на́м сло́во предвозвести́л еси́ Боже́ственныя благода́ти, тайноглаго́льниче Ти́те приснопа́мятне. Сего́ ра́ди вопие́м ти́: не преста́й моля́ся о все́х на́с.

Пе́снь 7.

Ирмо́с: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Еди́но Божество́ пе́ти, Еди́но Госпо́дьство чти́ти Ти́т науча́я челове́ки, многобо́жнаго неи́стовства измени́ благоче́стно взыва́ющия: благослове́н Бо́г оте́ц на́ших.

Умерщвле́нныя душе́ю, безду́шную чту́щия ве́щь, умерщвле́ннаго на́с ра́ди Животода́вца Бо́га позна́ша, тобо́ю наказу́еми, учениче́ и тайновеща́телю неизрече́нных.

Я́ко и́стины служи́тель, лжи́ отгони́тель яви́лся еси́ и, я́ко Па́влов учени́к, гоне́ния и беды́ претерпе́л еси́, с ни́м поя́, сла́вне: благослове́н Бо́г оте́ц на́ших.

Богоро́дичен: Испещре́на доброде́тельми, Всецарю́ предста́ла еси́ одесну́ю, от Твои́х воплоще́на крове́й, Безневе́стная, приле́жно моля́щи изба́витися на́м от вся́кия ну́жды.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Кропле́нием крове́й твои́х угасе́ о́гнь пре́лести чужди́й, неду́зи отгна́шася, де́мони исчезо́ша к Бо́гу мольбо́ю твое́ю, Ти́те апо́столе. Те́м тя́, я́ко уго́дника боже́ственна Всецаря́ Христа́, восхваля́ем.

Ве́сь Бо́гу освяще́н и Боже́ственными укра́шен, Ти́те, благода́тьми, сло́во спаси́тельное все́м уясни́л еси́, безслове́сия, всему́дре, на́с изба́вльшее, ве́рою и́стинною благосло́вящих и превознося́щих Христа́ во ве́ки.

Све́та чисте́йшее прия́телище бы́в, просвети́л еси́ подсо́лнечную Боже́ственными сия́ньми, Ти́те досточу́дне, и омрачи́л еси́ сопротивле́ния беззако́ннующих вра́г, Го́спода поя́ и превознося́ во вся́ ве́ки.

Богоро́дичен: Ору́жие, дре́вле обраща́емое, плещи́, Де́во, ны́не мне́ дае́т, я́ко Сло́во родила́ еси́, пло́тию обложе́но и во двою́ естеству́ разумева́емо, Его́же трепе́щут а́нгельстии чи́ни и славосло́вят земни́и во ве́ки.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Всю́ твою́ ко Изба́вителю нося́ и любо́вь и наде́жду, влече́т спу́тника Па́вел, с тобо́ю свяще́нное Ева́нгелие язы́ком пропове́дуя, апо́столе. Те́мже с ни́м тя́ почита́ем.

Неду́ги отго́ниши ве́рных, де́моны прогоня́еши Боже́ственною благода́тию. Кри́т, вели́кий гра́д, первопресто́льника тя́ стяжа́ боже́ственна, свети́льника же и зарю́ небе́сную, Ти́те богому́дре и достохва́льне.

Я́ко со́лнце, возсия́ на́м па́мять твоя́, заря́ми духо́вными всесве́тло укра́шена, о́блаки ду́ш отгоня́щи, ю́же ве́рою творя́щия на́с сохраня́й, Ти́те всеблаже́нне и достохва́льне.

Богоро́дичен: Плени́цы прегреше́ний мои́х, Чи́стая, разреши́ хода́тайством Твои́м, Всенепоро́чная, разори́ тму́ души́ моея́, бу́рю страсте́й мои́х ути́ши, всу́е борю́щия мя́ сокруши́ и спаси́ мя, Влады́чице Присноде́во.

Свети́лен.

Све́та прия́телища, непреме́нныя зари́ невече́рняго дне́, светолу́чныя мо́лнии, Варфоломе́я и Ти́та, ве́рнии, сла́вим вси́.

Богоро́дичен: Кре́пким Твои́м покро́вом от наве́та вра́жия на́с, Чи́стая, Твоя́ рабы́, сохрани́ вся́ невре́дны: Тя́ бо и́мамы еди́ну прибе́жище в напа́стех.