Канон святому мученику Агапию и с ним семи мученикам

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

В небе́сных, му́ченицы, су́ще жили́щах, ва́с хва́лящия на земли́ просвеще́ния сподо́бите.

Столпы́ Це́ркве яви́стеся, сте́ны разоря́юще идолонеи́стовства, страстоте́рпцы Христо́вы предо́блии.

Уязви́лся еси́ любо́вию, му́чениче досточу́дне Ага́пие, Влады́ки все́х и умре́ти Его́ ра́ди предусе́рдствовал.

Богоро́дичен: Заре́ю пресветле́йшею, из Тебе́, Де́во, возсия́вшею, души́ моея́ зе́ницы просвети́, я́ко да прославля́ю Тя́.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че Тебе́, Го́споди.

Огне́м разжига́яся любве́ Христо́вы, огни́ще погаси́л еси́, му́чениче Ага́пие, идолонеи́стовства тече́ньми крове́й твои́х, те́мже восхваля́ем тя́.

Ору́жия яви́стеся, посека́юще тмы́, блаже́ннии, де́монов благода́тию, и ны́не тма́м совокупи́стеся, ра́дующеся, мы́сленных си́л.

Пу́ть соверши́вше муче́ния му́жески, отложе́нием те́ла Вы́шнее постиго́сте Ца́рство, в не́мже стяжа́сте, му́ченицы боже́ственнии, житие́.

Богоро́дичен: Подо́бием пло́ти я́вльшагося из Твоего́ светоно́снаго чре́ва, Зижди́теля позна́хом, за милосе́рдие ми́лости, на́м, пою́щим Тя́, Ма́ти Присноде́во.

Седа́лен, гла́с 8.

Седмочи́сленный ли́к святы́х му́ченик пострада́ кре́пко за Боже́ственную Тро́ицу, погуби́ мно́жества мы́сленных вра́г благода́тию и совокупи́шася тма́м небе́сных умо́в ду́хом. Те́х моли́твами уще́дри на́с, Человеколю́бче.

Сла́ва, и ны́не, богоро́дичен: От вся́каго преще́ния и зло́бы челове́ческия спаси́ на́с, Пресвята́я Де́во, Тя́ бо и́мамы покро́в и заступле́ние, прибега́ющии к Тебе́, Богома́ти, и рожде́нному из Тебе́ Бо́гу на́шему, Его́же моли́ изба́вити на́с бе́д и скорбе́й.

Крестобогоро́дичен: Нескве́рная А́гница, А́гнца и Па́стыря, ви́сяща на Кресте́, зря́щи, вопия́ше: Ча́до Мое́, что́ стра́нное у́бо и ненаде́жное сие́ зре́ние? ка́ко Жи́знь все́х сме́ртию осужда́ется земны́м подо́бне? Но воскресни́ тридне́вно из ме́ртвых, Сло́ве, я́коже ре́кл еси́, да, ра́дующися, сла́влю Тя́.

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Вельми́ Христа́, Ага́пие, возлюби́в, страсте́м Того́ му́жески уподо́бился еси́, заколе́н бы́в, я́ко а́гнец, во́лею, великому́чениче досточу́дне.

Мечу́ себе́ са́ми вда́вше вседу́шно, му́ченицы му́дрии, кропле́нии крове́й обагри́сте ри́зу, в ню́же оде́явшеся, на небесе́х живе́те.

О, ва́шея к Бо́гу те́плыя любве́! Ея́же ра́ди себе́ са́мых отверго́стеся до конца́ и, ну́жднейшую сме́рть подъе́мше, безсме́ртия сподо́бистеся.

Богоро́дичен: Ми́ро во чре́ве Сло́ва прия́ла еси́, нескве́рная Чи́стая, ве́сь ми́р от злосмра́дия очи́стившаго вся́ких согреше́ний. Те́м ве́рно Тя́ ублажа́ем.

Пе́снь 5.

Ирмо́с: От но́щи неве́дения богове́дением просвети́вый концы́, просвети́ мя́ у́тром человеколю́бия Твоего́, Го́споди.

Любо́вен дея́нием, я́коже и зва́нием бы́в, сла́вне, пострада́л еси́ за любо́вь Всецаря́, Христа́ Бо́га на́шего.

Глаго́л лю́таго мучи́теля попра́сте, святи́и му́ченицы, и, Христу́ вво́инившеся, полки́ де́монския погуби́сте.

Свяще́нными по́двиги низлага́юще беззако́нных де́рзость, венце́м безсме́ртия, му́ченицы Христо́вы, увязо́стеся.

Богоро́дичен: Песносло́вии боже́ственными Богоро́дицу, ве́рнии, ублажи́м, ра́дуйся, — глаго́люще, — две́рь, е́юже еди́н про́йде Госпо́дь.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Со Алекса́ндрома двема́, Диони́сия два́ воспои́м, Ага́пия сла́внаго, Тимола́я и Роми́ла, кре́пко пострада́вшия и тмы́ вра́жия пора́товавшия.

Исцеле́ний ре́ки источа́юще, му́ченицы, стра́сти земноро́дных боже́ственне очища́ете. Сего́ ра́ди, ра́дующеся, ва́ша ве́рою восхваля́ем до́блести.

Зако́нно свяще́нный по́двиг соверши́вше, зако́нно вседе́тельною дла́нию венча́стеся, седмочи́сленнии му́ченицы, небе́снии гра́ждане, а́нгелом равностоя́телие.

Богоро́дичен: Увяди́вшая сады́ безбо́жия, Всенепоро́чная, Твои́м святы́м прозябе́нием, прозя́бающую во мне́ вы́ну вра́жию зло́бу искорени́, Богоневе́сто.

Пе́снь 7.

Ирмо́с: От Иуде́и доше́дше, о́троцы в Вавило́не иногда́, ве́рою тро́ическою пла́мень пе́щный попра́ша, пою́ще: отце́в Бо́же, благослове́н еси́.

Са́ми себе́ во́льно к заколе́нию, я́ко а́гнцы, преда́сте, не убоя́вшеся му́к, всехва́льнии ору́жницы, но благоду́шно взыва́юще: оте́ц на́ших Бо́же, благослове́н еси́.

Просве́щся любо́вию все́х Влады́ки, му́чениче Ага́пие, подклони́л еси́ вы́ю мечу́ и му́чеников счи́слился еси́ во́инству, взыва́я: оте́ц на́ших Бо́же, благослове́н еси́.

Я́ко свети́льник, зрите́ся в дому́ Госпо́дни, му́ченицы сла́внии, седмосте́бленный, ми́р просвеща́ющий, вопию́ще, сия́нием благода́ти: оте́ц на́ших Бо́же, благослове́н еси́.

Богоро́дичен: Свя́зана мя́ плени́цами несказа́нных прегреше́ний, разреши́, Всенепоро́чная, подаю́щи ми́ ту́чи сле́з, песнопою́щу из Тебе́ Возсия́вшему: оте́ц на́ших Бо́же, благослове́н еси́.

Пе́снь 8.

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Вра́чеве разли́чных неду́гов рукоде́йством Ду́ха показа́вшеся, вся́ на́ша неду́ги исцели́те, я́ко да восхваля́ем и славосло́вим ва́шу боже́ственную па́мять.

Возлюби́л еси́ Бо́га, от Того́, му́чениче, возлюби́лся еси́. Те́мже тя́, по́двиг боже́ственный соверши́вша, приве́д со единоревни́тели в небе́сныя, Ага́пие, черто́ги.

Укре́пльшеся любо́вию Влады́ки, наси́лование низложи́сте преле́стника и, благосла́вно побе́дами украша́еми, в небе́сных, му́ченицы Госпо́дни, живете́ поко́ищах.

Богоро́дичен: Исцели́ стра́сти се́рдца моего́, безстра́стия исто́чника ро́ждшая, и к животу́ мя́ Боже́ственному наста́ви, да Тя́ сла́влю, Ма́терь Спа́сову, во вся́ ве́ки.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Кра́сни бы́вше боже́ственными благоле́потами муче́ния, Го́сподеви предстоите́ и с Ни́м, страстоте́рпцы, при́сно веселите́ся.

Во́инство а́нгельское ва́с прие́млет, распря́гшияся теле́с, му́ченицы, к небе́сному гра́ду, к Све́ту невече́рнему.

На́с, соверша́ющих дне́сь па́мять свяще́нную ва́шу, му́ченицы сла́внии, к Бо́гу помина́ти не преста́ните.

Богоро́дичен: Све́том мя́ покая́ния, помраче́ннаго небреже́нием, Всенепоро́чная, просвети́, я́ко да пою́ и сла́влю вели́чия Твоя́.