Пе́снь 1.

Ирмо́с: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, Препросла́вленный Госпо́дь, сла́вно бо просла́вися.

Я́коже Самуи́л иногда́, от вы́шних повеле́ний избра́н яви́лся еси́, му́чениче Алекса́ндре, со Христо́м во́инствовати во утвержде́нии Це́ркве Его́ святы́я, в не́йже порфи́ра естества́ на́шего в пакибытии́ обновля́ется, моли́твами твои́ми.

Ви́дяще, ка́ко возлюби́ Госпо́дь души́ твоея́ добро́ту, ве́рный во́ине Христо́в Алекса́ндре, егда́ сла́ву ми́ра сего́ презре́в, венце́м му́ченическим возжеле́л еси́ украси́тися. Мо́лимтися, воспламени́ и сердца́ на́ша горе́нием любве́ твоея́ ко Го́споду.

Си́лою Вы́шняго озаря́емь, изше́л еси́, боголюби́ве Алекса́ндре, в сре́тение во́инов по тебе́ гряду́щих, си́хже, к нога́м твои́м па́дших, воздви́гл и возвести́л еси́ и́м тебе́ предрече́нная страда́ния, в ни́хже от Ри́ма до Византи́и всеусе́рдно Христа́ пропове́дал еси́, моли́твенниче преди́вне.

Богоро́дичен: Све́том на́с Твоего́ милосе́рдия во тьме́ неразу́мия лежа́щих озари́, Ма́ти Бо́жия, Еди́на, Царя́ Светода́вца ро́ждшая, Его́же, пресла́дкаго Сы́на Твоего́ и Бо́га на́шего, моли́ спасти́ся от бе́д и скорбе́й все́м на́м, на по́мощь Тя́ призыва́ющих.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Облагода́тствован бы́в кре́постию Боже́ственною, гряде́ши к подвиго́м муче́ния усе́рдно, всеблаже́нне Алекса́ндре, и, я́ко а́гнец безгла́сен, терпи́ши ноготьми́ желе́зными струже́ние, возжже́н любо́вию до конца́ за Христа́ страда́ти, да Сего́ возлю́бленна приобря́щеши.

Муче́ньми мно́гими тщи́тся злочести́вый Тиве́риан разлучи́ти тя́ от любви́ Христо́вы, но посра́млен бы́сть окая́нный, обре́те бо тя́ на ка́мене ве́ры си́лою Боже́ственнаго Ду́ха утвержде́нна, страстоте́рпче Христо́в до́блественнейше.

Я́ко жени́х церко́вный, у́зами желе́зными связу́емь, в посте́ и моли́тве ше́ствовал еси́ от Ри́ма до Византи́и венце́м му́ченическим венча́тися, да ве́рнии восто́ка и за́пада, у́зами любве́ Христо́вы связу́еши, в сою́зе любви́ изнемога́ющих.

Богоро́дичен: Глаго́лом Твои́м после́дующе, ро́ди родо́в при́сно Тя́ ублажа́ют, Ма́ти Бо́жия, Бо́га бо и́стинно родила́ еси́, Де́во Чи́стая, Его́же, я́ко Ма́ти Све́та, усе́рдно моли́ дарова́ти Це́рквам единомы́слие, в сою́зе ми́ра Боже́ственна.

Седа́лен, гла́с 4.

Дне́сь Це́рковь Христо́ва весели́тся, / Ри́м же да ра́дуется, Византи́я ликовству́ет, / ви́дяще тя́, му́чениче Алекса́ндре, / за И́стину Христо́ву стра́ждуща, / я́ко а́нгел све́тлый, в четыредесятодне́внем посте́ моли́твою насыща́емый, / ко́зни вра́жия ве́рою победи́в, / сла́ву Це́ркве Христо́вы утвержда́я. / Во́ини же сему́ дивля́хуся, глаго́лаху: / Вели́к Бо́г Христиа́нский, за его́же муче́ния сия́ подъя́л еси́, во́ине Христо́в преди́вный. / Мы́ же, па́мять твою́ пра́зднующе, взыва́ем ти́: / сопряжи́ ны́ у́зами любве́ твоея́, / да не стра́ждет Те́ло Христо́во в ра́спрех на́ших, / я́коже на ко́лех растерза́емо.

Сла́ва, и ны́не, богоро́дичен: Безневе́стная Чи́стая Де́во, Богоро́дице, / Еди́на ве́рных Предста́тельнице и Покро́ве, / бе́д и скорбе́й и лю́тых обстоя́ний вся́ изба́ви, / на Тя́ наде́жду, Отрокови́це, иму́щих: / Це́ркви в единомы́слии ве́ры утверди́, / и, я́коже ве́даеши челове́ческия ско́рби серде́чныя, / ча́д Свои́х во еди́но собери́, / и вся́ ны́ спаси́ Боже́ственными моли́твами Твои́ми.

Пе́снь 4.

Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Благода́тию Свята́го Ду́ха из мла́да в ве́ре чи́сте воспита́н, любо́вию Христу́ поже́рлся еси́, ве́рный во́ине Христо́в, Алекса́ндре, и, я́ко мно́гими скорбьми́ обурева́емь бы́л еси́, предвари́ моли́твою за ны́ ко Го́споду, в ско́рбех мно́зех изнемога́ющих.

Пропове́дник велегла́сен ве́ры Правосла́вныя, еще́ недели́мей су́щи, яви́лся еси́, ве́рный дру́же Христо́в Алекса́ндре, умягчи́ ка́плями крове́й твои́х, за Це́рковь Христо́ву пролия́нных, сердца́, ра́спри и нестрое́ния, и вражду́ во огра́де Ея́ се́ющих.

Ду́шу и помышле́ние к тебе́ простира́ем, страстоте́рпче Христо́в Алекса́ндре, согре́й на́шу ве́ру и любо́вь к Бо́гу, изнеможе́ния на́ша подкрепи́, да зако́ну Его́ усе́рдно после́дующе, по́прище спасе́ния на́шего пре́йдем непосра́мленно.

Богоро́дичен: С Бо́гом Тя́ Засту́пницу стяжа́хом, Пречи́стая Де́во Мари́е, Ты́ бо Ма́ти Бо́жия яви́лася еси́, Творца́ и Соде́теля на́шего во утро́бе прии́мши, Всенепоро́чная, все́х от сме́рти и тле́ния спасла́ еси́, Наде́ждо на́ша и Утеше́ние, и Покро́в теплоты́ сладча́йшия.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику Отцу́ Твоему́, от но́щи неве́дения приведе́ние и́мамы.

Свеща́ светоза́рная, пла́менем ве́ры неугаси́мо пламене́юща, яви́лся еси́, Алекса́ндре, ве́рныя во гра́дех и ве́сех ше́ствия твоего́ во огра́ду Це́ркве Святы́я созыва́я, пу́ть ко Христу́ освети́л еси́ и́м, к Воскресе́нию гряду́щему веду́щий.

Во́ду жи́ву, от ре́бр Христо́вых исте́кшу, моля́ся источи́ па́мять твою́ чту́щим, я́коже иногда́ во гра́де Карасу́рстем источи́л еси́ во́ду из ка́мене, е́юже напои́л еси́ жа́ждущих, к ме́сту усекнове́ния главы́ твоея́ поспеша́вших, всеблаже́нне.

Прииди́те, христолюби́выя ма́тери, со страстоте́рпца ма́терию Пи́мениею возра́дуемся, ви́дящия сы́на ея́ сла́вою и че́стию уве́нчана, его́же, я́ко кри́н неувяда́емый, она́, себе́ и Христу́ на ра́дость благода́тно возрасти́, и́же на́с тле́ния и сме́рти духо́вныя изба́ви.

Богоро́дичен: На́м лю́бящим тя́, и любо́вию чту́щим святу́ю па́мять твою́, ве́рный дру́же Христо́в, с Пречи́стою Богома́терию исправле́ние жития́, клеветы́ и зло́бы челове́ческия избавле́ние, и прегреше́ний проще́ние дарова́ти испроси́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Неосла́бными я́звами сокруша́емое те́ло твое́, Алекса́ндре, си́лою любви́ ко возлюби́вшему тя́ Го́споду, душе́вное благоро́дие непоколе́блемо соблю́л еси́, во Христе́ ра́дуяся, душе́ю и те́лом освяще́н яви́лся еси́, скорбя́щим утеше́ние ниспосыла́еши.

Дивя́щеся бога́тству доброде́телей твои́х, Алекса́ндре, мо́лим тя́ я́коже благослови́л еси́ дре́во, у него́же от мучи́телей истязу́емь бы́л еси́, и сие́ от того́ часа́ пло́д исцеле́ния ве́рным приноша́ше. Исцели́, боголюби́ве, сердца́ на́ша, да принесе́м пло́д покая́ния нелицеме́рна.

Терпе́нием и душе́вным му́жеством, и кре́постию по́мысла превозше́л еси́ всю́ гони́телей го́рькую я́рость, во́ине Христо́в Алекса́ндре. Да и мы́, в испыта́ниих лю́тых, на твоя́ страда́ния взира́юще, не посрами́м малоду́шне Возлюби́вшаго на́с до Кро́ве.

Богоро́дичен: Упра́ви и освяти́ у́м на́ш, Ма́ти Бо́жия, обурева́емый наше́ствием скорбе́й и тлетво́рных страсте́й, спаси́ к Тебе́ прибега́ющих, ины́я бо по́мощи, Чи́стая, ра́зве Тебе́, не и́мамы, помози́ Влады́чице, да не поги́бнем в пучи́не отча́яния.

Конда́к, гла́с 4:

Я́ко звезда́ многосве́тлая, / возсия́л еси́ от Ри́ма, / му́чениче Алекса́ндре, / и, я́ко би́сер многоце́нный, / в земли́ Византи́йстей ра́достно под ме́ч / за Христа́ главу́ твою́ преклони́л еси́, / и сию́ в непоро́чное благоуха́ние Бо́гу прине́сл еси́, / да красу́ется Це́рковь земна́я и Небе́сная / во сла́ве испове́дников Христо́вых.

И́кос:

Светоза́рный свети́льник яви́лся еси́, богому́дре Алекса́ндре, благода́ти Боже́ственныя испо́лнен сы́й в телеси́ твое́м, его́же спекула́торы вверго́ша в реку́ по многострада́льней кончи́не твое́й. Смотре́нием же Бо́жиим, дво́ица псо́в извлеко́ша честны́я мо́щи твоя́, приседя́ху стрегу́ще я́ от пти́ц и звере́й ди́виих, доко́ле же блаже́нная ма́ти твоя́ Пи́мения, прише́дши, со слеза́ми, псало́мски, пома́за сия́ ми́ром, погре́бши тя́ при о́ней реце́ Ерги́не, иде́же исцеле́ния мно́га соверши́шася боля́щим, с ве́рою ко гро́бу страстоте́рпца Бо́жия приходя́щих, да красу́ется Це́рковь земна́я и Небе́сная во сла́ве испове́дников Христо́вых.

Пе́снь 7.

Ирмо́с: Богопроти́вное веле́ние беззако́ннующаго мучи́теля, высо́к пла́мень вознесло́ е́сть. Христо́с же простре́ Благочести́вым отроко́м ро́су духо́вную, сы́й благослове́н и препросла́влен.

Я́ко кра́сное и свяще́ннейшее заколе́ние са́м себе́ прине́сл еси́ Пастыренача́льнику Христу́, за все́х Боже́ственне закла́вшагося, и огне́м муче́ний всесоже́глся еси́, сла́вне Алекса́ндре, в сла́дости А́нгельстей побе́дно вопию́ще: оте́ц на́ших Бо́же, благослове́н еси́.

Мольбы́ на́ша услы́ши, всеблаже́нне, и приити́ на́м на по́мощь потщи́ся, лю́те обурева́емых скорбьми́, и ну́ждами жите́йскими, и бесо́вскими озлобле́нии, я́ко да спаса́еми тобо́ю, и мы́ вопие́м: оте́ц на́ших Бо́же, благослове́н еси́.

Моли́твы твоя́ проле́й за ны́ ко Го́споду, боголюби́ве Алекса́ндре, и скве́рну сту́дных де́л на́ших ка́плями честны́х крове́й твои́х омы́й, наде́жду же укрепи́, во е́же чи́стым се́рдцем и сокруше́нною душе́ю воззове́м: оте́ц на́ших Бо́же, благослове́н еси́.

Богоро́дичен: Наде́жда ненаде́жных Ты́ еси́, Богоро́дице, ве́си бо, Цари́це, я́ко неизлечи́мыми ра́нами страсте́й грехо́вных изнуря́еми, ко врато́м поги́бели доспе́хом. Не отри́ни во́пль ду́ш на́ших, Всеблага́я, да спаса́еми, уте́шне зове́м: оте́ц на́ших Бо́же, благослове́н еси́.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Украше́ние му́чеников показа́лся еси́ и в жили́щах нерукотво́рных Це́ркве Небе́сныя ве́чный поко́й обре́л еси́, любвеоби́льне Алекса́ндре. На́с же, во мно́гих обурева́ний испыту́емых, в ти́хое приста́нище приведи́, во е́же во Христе́ ра́дующеся, взыва́ти: благослови́те, вся́ дела́ Госпо́дня, Го́спода.

Ума́ красото́ю увенча́ тя Госпо́дь, Алекса́ндре, и се́рдце любви́ преиспо́лненное дарова́ ти, во е́же подъя́ти о́браз страда́ний Его́ непосты́дно, и́миже возве́л еси́ челове́ческое немощно́е естество́ к чи́ну А́нгельскому, да и мы́ в наде́жде спасе́ния вопие́м: благослови́те, вся́ дела́ Госпо́дня, Го́спода.

О́гнь моли́твы непоро́чныя проле́й за ны́ ко Го́споду, ве́рный му́чениче Христо́в, да не пожре́т на́с зло́ба грехо́вная, враждо́ю снеда́ющая, но, я́ко предста́тель ве́рный, вся́ ны́ к братолю́бию приведи́ и утвержде́нию Це́ркве Христо́вы ве́рно служи́ти уцелому́дри, во е́же любо́вию связу́емым, взыва́ти: благослови́те, вся́ дела́ Госпо́дня, Го́спода.

Богоро́дичен: Я́ко Ма́терь Све́та, трапе́зу Хле́ба Живо́тнаго и руно́, прохла́дою Свята́го Ду́ха ороше́нное, и сла́дость ра́йскую, ве́рных наде́ждою спасе́ния услажда́ющую, почита́ем Тя́, Чи́стая Де́во Ма́ти, и веселя́щеся о Тебе́, вопие́м: благослови́те, вся́ дела́ Госпо́дня, Го́спода.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Пою́ще многоразли́чная страда́ния твоя́, Христа́ ра́ди распе́ншагося, восхваля́ем тя́, я́ко одушевле́нный сосу́д, исцеле́ния изоби́льно излива́ющий. Ублажа́ем ма́терь твою́ Пи́мению, я́же пло́д чре́ва своего́ Бо́гу в да́р благоприя́тен принесе́, с не́ю же, достохва́льне, моли́ся ми́р ниспосла́ти душа́м на́шим.

Хра́м Свята́го Ду́ха вои́стинну бы́л еси́, Алекса́ндре, Сего́ преиспо́лнен не боя́тися убива́ющих те́ло ве́рных науча́еши, но в животе́ и сме́рти прославля́ти смотре́ние Бо́жие о на́с, страда́ньми воспева́еши пресла́вно. Подви́гни и на́с си́х не устраша́тися, лю́те напа́дающих на на́с.

О преди́вне му́чениче Алекса́ндре, приими́ от на́с сие́ убо́гое славосло́вие, я́ко да́нь моли́твы, дале́ких по вре́мени чти́телей страда́ний твои́х, и прииди́ на́м на по́мощь, егда́ изнемога́ет ду́х на́ш, ду́хом зло́бы поднебе́сныя томи́мь, да не па́дше поги́бнем пред Лице́м Бо́жиим.

Богоро́дичен: Кре́пкое Твое́ предста́тельство, Богоукра́шенная Мари́е, и све́тлая Твоя́ сла́ва по все́й земли́ показа́ся, о Тебе́ ны́не хва́лимся, иму́ще Тя́ к Сы́ну и Бо́гу Твоему́ Хода́таицу неусы́пную, в ско́рбех и печа́лех, и в ча́с сме́ртный упова́ние непосты́дное.

Свети́лен:

Све́тятся лучи́ све́тло страда́ний твои́х, / я́коже со́лнце, / и всю́ жития́ твоего́ явля́ют све́тлость, / пресла́вне му́чениче Алекса́ндре, / и сия́ющую в тебе́ ве́ру Боже́ственную, / Це́ркве Святы́я неме́ркнущее украше́ние, / в не́мже на́шего упова́ния наде́жда све́тлая, / Венцеда́тель Христо́с.

Сла́ва, и ны́не, богоро́дичен: Ви́дети, Богоро́дице, сла́ву Твою́ неизрече́нную / дре́вле возжеле́ша Боже́ственнии проро́цы вси́, / но на после́док на́м яви́лася еси́, лю́бящим Тя́, / Херуви́мов Честне́йша и Серафи́мов Сла́внейша су́ща, / Боже́ственныя сла́вы преиспо́лненная.