Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

И́же сла́вы жела́юще страда́льческия, прииди́те, восхва́лим вели́каго во страда́льцех Евдокси́я вси́, в кимва́лех дави́дски торжеству́юще.

Изы́де повеле́ние нечести́вое в ве́сь ми́р, не служи́ти Живо́му Бо́гу, но и́долом, ты́ же, му́чениче, Небе́сному Бо́гу твоему́ служи́л еси́.

Тезоимени́те, сло́во благочести́вых, Евдокси́е му́чениче, испове́дал еси́ Христа́ Бо́га су́ща Безнача́льна посреде́ суде́й непра́ведных, уязвля́ющих тя́.

Богоро́дичен: Чи́ни Тя́ А́нгел и челове́к, Ма́ти Безневе́стная, хва́лят непреста́нно, Зижди́теля бо и́х, я́ко Младе́нца, на рука́х Твои́х носи́ла еси́.

Пе́снь 3.

Ирмо́с: Утвержде́й в нача́ле Небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Я́коже а́гнец, на заколе́ние приве́лся еси́, Евдокси́е му́чениче, не пререку́я, ни вопия́, всеблаже́нне, Учи́теля твоего́ Христа́ житие́ подража́я, и сего́ ра́ди сла́ву прия́л еси́ безконе́чную.

И́дольским служи́телем, страда́льче, возглаша́л еси́: Бо́г мо́й живе́т во ве́ки, ва́ши же бо́зи дела́ ру́к челове́ческих су́ть, па́дше не востаю́т, истука́нни су́ще, безду́шнии.

Хи́трости вра́жия низложи́л еси́, страда́льче, утве́рждь тво́й у́м на ка́мени Це́ркве Христо́вы. Те́м и взыва́л еси́: жи́знь тле́нную оставля́ю за су́щую ве́чную жи́знь.

Богоро́дичен: Соприсносу́щный Отцу́ и Сопресто́льный Бо́г Сло́во, обнови́ти восхоте́в родонача́льника, по Ипоста́си того́ из Тебе́, Чи́стая, восприя́ше, Святе́йшу все́х Тя́, Богома́ти, обре́т.

Седа́лен, гла́с 8.

Небе́сное бога́тство собра́в и ни́щим сие́ прине́с, расточи́л еси́, и да́л еси́ а́лчущим хле́б тво́й, и, сего́ ра́ди жи́знь нетле́нную стяжа́в, Христо́вым испове́данием просия́л еси́; те́мже, му́жествовав и зако́нно пострада́в, вене́ц прия́л еси́ от Бо́га трудо́в твои́х, страстоте́рпче Евдокси́е, моли́ Христа́ Бо́га, грехо́в оставле́ние дарова́ти честву́ющим любо́вию святу́ю па́мять твою́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Пре́лесть обличи́л еси́ ну́дящих тя́ отврещи́ся Жи́зни безконе́чныя и жи́знь су́етную возлюби́ти.

Ураня́емь, ра́довался еси́, закла́вшагося ра́ди Сло́ва пло́тию ра́ди на́с, мучи́телем же взыва́л еси́: я́ко недосто́йна су́ть моя́ страда́ния.

Бо́зи, и́мже слу́жите, уста́ иму́ще, не веща́ют, Евдокси́е, взыва́л еси́, и́мже подо́бни да бу́дут творя́щии ты́я.

Богоро́дичен: Очище́ние на́м да́руй неве́дений, я́ко Безгре́шен, и умири́ ми́р Тво́й, Бо́же, моли́твами Ро́ждшия Тя́.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Ты́ моя́ кре́пость, Евдокси́е, вопия́л еси́, пло́тию пострада́вый Христе́ Бо́же, утверди́ мене́, се́ бо стражду́ му́чимь.

Ты́ сокро́вище проше́ний еси́, Христе́ Бо́же, не пре́зри мене́, вопия́л еси́ в му́ках, Евдокси́е терпеливоду́шне.

Меча́ и огня́ не бою́ся, Евдокси́й вопия́ше к мучи́телю: се́ бо и́мам Бо́га, Кре́пость кре́пкую, Ему́же служу́.

Богоро́дичен: Исцели́, Чи́стая, страсте́й мои́х неможе́ние, посеще́ния Твоего́ удосто́ивши, и здра́вие мольба́ми Твои́ми пода́ждь ми́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Ни ме́чь, ниже́ о́гнь разлучи́т мя́ любве́ Христо́вы, ва́ша же преще́ния я́ко де́тская глумле́ния вменя́ю, Евдокси́е, вопия́л еси́ ве́рою, жре́ти принужда́ющим.

О́наго ужаса́юся огня́ негаси́маго му́чащаго, жи́зни же жела́ю неотъе́млемыя, мучи́телю, Евдокси́е, взыва́л еси́: се́ те́ло уязвля́й, не служу́ и́долом твои́м.

Бо́зи, и́мже ты́ кла́няешися, сребро́ и зла́то су́ть, уста́ и́мут, и не глаго́лют, у́ши не слы́шат, но́ги не хо́дят, мо́й же Бо́г Вседе́тель е́сть, взыва́л еси́.

Богоро́дичен: Да изба́вимся лю́тых прегреше́ний моли́твами Твои́ми, Богороди́тельнице Чи́стая, и да улучи́м, Пресвята́я, Боже́ственное сия́ние из Тебе́ неизрече́нно воплоще́ннаго Сы́на Бо́жия.

Пе́снь 7.

Ирмо́с: От Иуде́и доше́дше о́троцы, в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Отроко́в поревнова́в терпе́нию, Евдокси́е прему́дре, о́бразу ле́стному не поклони́л еси́ коле́н, но взыва́л еси́ ве́рою те́плою: отце́в на́ших Бо́же, благослове́н еси́.

По́мощь стяжа́в непобе́дную благода́ти, му́чениче Евдокси́е, тве́рдо ополче́ния вра́жия низложи́л еси́ и, победи́в, взыва́л еси́: отце́в на́ших Бо́же, благослове́н еси́.

Распала́емь, му́чениче, любо́вию Боже́ственнаго жела́ния, Евдокси́е, пристра́стия привре́меннаго я́ве возгнуша́лся еси́, возме́здие прие́мля, и взыва́л еси́: отце́в на́ших Бо́же, благослове́н еси́.

Богоро́дичен: Ле́стию па́дшаго восхоте́в обнови́ти, Преблаги́й Бо́г от Де́вы воплоща́ется и ражда́ется и обожа́ет челове́чество.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Я́зв пучи́ну преплы́л еси́, сла́вне, и в приста́нище жи́зни дости́гл еси́, Евдокси́е, вене́ц терпе́ния прие́м, и со А́нгелы немо́лчно зове́ши: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Сквозе́ о́гнь и во́ду проше́дша, блаже́нне, в поко́й тя́ Христо́с изведе́, в не́мже, ра́дуяся, со А́нгелы, му́чениче му́дре, пое́ши немо́лчно Тро́ице пе́снь: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Ты́ мы́сленнаго погуби́л еси́ зми́я, по́мощию Небе́снаго Царя́, сла́вне, и, побе́ды вене́ц терпе́ния прие́м, со безпло́тными немо́лчно взыва́еши: де́ти, благослови́те, свяще́нницы, воспо́йте, лю́дие, превозноси́те во вся́ ве́ки.

Тро́ичен: Трисве́тлое Божество́, во Еди́ной сия́ющее зари́, от Еди́наго Триипоста́снаго Естества́, Роди́теля Безнача́льна, Единоесте́ственна же Сло́ва Отцу́ и Сца́рствующаго Единосу́щнаго Ду́ха, о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Пе́снь 9.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.

Устраши́шася а́нгельская во́инства, и челове́честии собо́ри удиви́шася, я́ко, тле́нно естество́, страда́льче, име́я и те́чное, безпло́тныя де́моны показа́л еси́ окая́нны и не́мощны и ве́рою Тро́ице взыва́л еси́, служа́: Трисия́нный Све́те, Ты́ еси́ сла́ва моя́.

Блаже́н ты́, му́чениче, в ро́ды родо́в просла́вився, Евдокси́е, я́ко, пло́ти ника́коже пощаде́в Христа́ ра́ди, но му́ки претерпе́л еси́ и не поклони́лся еси́ истука́нным. Те́мже тя́ чи́ни а́нгельстии, оде́ждею нетле́ния оде́явше, венча́ша.

Ве́рою соверша́ющих, му́чениче, страда́ний твои́х па́мять, Евдокси́е, к Бо́гу твои́ми моли́твами от вся́каго наве́та вра́жия исхити́, да не похва́лится на ны́, я́ко му́ченик бо мо́жеши, прие́м от Вы́шняго страда́ний воздая́ние.

Богоро́дичен: Яви́лася еси́, о Де́во, Ма́ти Бо́жия, па́че естества́ ро́ждши пло́тию Бо́га Сло́ва, Его́же Оте́ц от се́рдца Своего́ отры́гне пре́жде все́х веко́в, я́ко Бла́г, Его́же ны́не и теле́с превы́шша разумева́ем, а́ще и в те́ло облече́ся.