Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Страда́ния благоду́шно, блаже́нне, твоя́, Евпси́хие му́чениче, поя́, молю́ тя́: ко Го́споду име́я дерзнове́ние, ду́шу мою́ страсте́й мучи́тельства исхити́.

У́м тво́й, манове́нием е́же к Бо́гу, презре́ вся́ жития́ кра́сная, блаже́нне, и ве́сь красе́н яви́ся, над страстьми́ ца́рствовав Евпси́хие.

Бы́сть вои́стинну терпели́в, егда́ му́ками искуша́шеся и боле́зньми, вся́ удивля́я безбо́жныя, и страда́лец и́стинен познава́емь.

Богоро́дичен: Пло́ти подо́бием роди́вся из Тебе́, Влады́ка обнови́ на́ше обветша́вшее, Отрокови́це, естество́ и ме́ртвыя небе́сны соде́ла.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Разу́мна су́ща пове́дают безу́мнии тебе́, злочести́вому кня́зю, безу́мно де́моном служа́щему.

На высоту́ муче́ния твоего́ возне́сшу ти́ ся́, а́нгел я́влься, тебе́ дерзнове́нна устроя́ет, страстоте́рпче Евпси́хие.

Поя́, пребы́л еси́ в темни́це, Бо́га и Го́спода испове́дая, храни́тель же Сего́ повеле́нием показу́яся.

Богоро́дичен: Пе́ние благода́рственно страда́льческий ли́к пое́т Тебе́, Отрокови́це Чи́стая, Твои́ми хода́тайствы победоно́сец бы́в.

Седа́лен, гла́с 1.

Благоду́шно до́брый соверши́в по́двиг, победи́л еси́ врага́ супоста́та, му́чениче, по́чести и чудеса́ от Бо́га прие́м. Те́мже вся́ ве́рных Це́рковь ублажа́ет тя́, в настоя́щий де́нь благохва́льно почита́ющи.

Сла́ва, и ны́не: Наста́ви ны́ на пу́ть покая́ния, укло́ньшияся при́сно к безпу́тием зо́л и Преблага́го прогне́вавшия Го́спода, Неискусобра́чная Благослове́нная Мари́е, прибе́жище отча́янных челове́ков, Бо́жие жили́ще.

Крестобогоро́дичен: Зря́щи Тя́, Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Ра́дуяся, му́чениче, разда́л еси́ вся́ име́ния ни́щим, муче́ния бога́тство некра́домо и ра́дость нестаре́емую противостяжа́в.

Свяще́нно просвеща́емь, тму́ несвяще́нных ты́ обличи́л еси́, ну́дити искуша́ющих тя́, отвести́ ле́стию злоде́монскою.

И́же пре́лести прилежа́щии тебе́, неле́стными нра́вы украше́нному, дивля́хуся, источа́ющу живото́чныя словеса́, досточу́дне.

Богоро́дичен: Превы́шши си́л небе́сных Ты́ су́щи, плотски́х страсте́й вы́шший у́м мо́й, Де́во, покажи́.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Терпе́л еси́ плотски́я я́звы терпели́вно, обе́шен бы́в, блаже́нне Евпси́хие, прии́скренно Влады́це всея́ тва́ри.

Пое́ши Христу́, по ре́бром, му́чениче, стру́жемь и ко́жи одира́емь, му́жественным по́мыслом терпели́внейший.

Пою́щу Бо́гу, явля́ется тебе́ а́нгел, к подвиго́м обуча́я тя́, я́же, о Го́споде возмога́емь, соверши́л еси́.

Богоро́дичен: О и́же на Тя́ наде́жды все́х, Влады́чице, возложи́вших при́сно моли́ся, я́ко да бу́дущаго осужде́ния изба́вимся.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Обурева́ет у́бо муче́ний тягота́, не мо́жет же погрузи́ти тя́, му́чениче: Христа́ бо и Бо́га Помо́щника име́л еси́ и Ко́рмчия, направля́юща тя́ ко приста́нищу ти́хому Своего́ Ца́рствия, Евпси́хие.

Красно́ твое́ воста́ние, му́чениче, душе́вное сопроти́вным показу́я, яви́лся еси́ те́м стра́шен, удивля́я терпе́нием о́нех зломы́слие, и прия́т от Христа́ подвиго́в побе́ды возме́здие.

Без пра́вды пролия́нною кро́вию погрузи́л еси́ ве́сь де́монский по́лк и злочести́вых мно́жество истопе́; ве́рных же напои́ся собо́р, Евпси́хие, бога́тно, святы́х му́ченик украше́ние.

Богоро́дичен: Испра́ви спа́дша мя́ всего́, я́ко страсте́м отве́рзшаго две́рь, и Твои́м благи́м хода́тайством к покая́ния вхо́дом введи́, и спаси́ мя́, все́х Спа́са ро́ждшая и Го́спода.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Собо́ром му́чеников причи́слился еси́ и лико́м боже́ственных безпло́тных, от безслове́сия страсте́й те́ло удержа́в, хра́бровал еси́ изря́дно, страда́льче Христо́в треблаже́нне.

О, до́брыя твоея́ ку́пли! Го́рстию бо кро́ве измени́л еси́ вы́шнее Ца́рство, му́дре, в не́мже и воспева́еши: благослове́н еси́, Го́споди Бо́же, во ве́ки.

Па́даеши, уязви́вся мече́м, му́чениче, и без ме́ры хва́лящагося велиа́ра спопира́еши и я́звами ссека́еши неисце́льно, твоему́ кре́пкому уму́ злообра́зно прирази́вшася.

Богоро́дичен: Го́ру Тя́ проро́к Дании́л Боже́ственным Ду́хом нарече́, Де́во, из нея́же ка́мень — Христо́с — без руку́ отсече́ся и сокруше́ние соде́ла истука́нных пре́лести.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Победи́тель мучи́телей и духо́в бы́л еси́ нечи́стых, ве́рных же челове́ков, страда́льче Евпси́хие, сла́ва и похвала́, тя́ восхваля́ющих свяще́нными пе́сньми и превознося́щих Христа́ во вся́ ве́ки.

Кесари́йстии свяще́ннии воспева́ют тя́ лю́дие, преблаже́нне: в то́м бо, му́чениче, лежа́, те́ло твое́ источа́ет исцеле́ний струи́, стра́сти потопля́ющия и ве́рных сердца́ ороша́ющия боже́ственно.

Вше́д му́жески в подвиго́в суди́ще, му́чениче, стро́ган бы́л еси́ да́же до члено́в и до самаго́ вну́тренняго строе́ния, но яви́лся еси́ ве́сь непрекло́нен, непоколеби́мь, те́м венцы́ прия́л еси́ побе́ды.

Богоро́дичен: Ми́лостивая Де́во, Я́же ми́лостиваго Сло́ва ро́ждши, немилосе́рдаго мя́ ту́не уще́дри, отча́яннаго прегреше́ньми безме́рными и не обраща́ющася, но в ле́ности житие́ ижди́вша.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

На дре́во воздви́жен бы́л еси́, стра́сть вообража́я Безстра́стнаго и стра́сти ума́лившаго благочести́вых за милосе́рдие, му́чениче Евпси́хие.

Ви́дено бы́сть чу́до ве́лие в твое́й кончи́не: вме́сто бо кро́ве млеко́ с водо́ю главе́ твое́й, отсе́чене бы́вшей, му́чениче, истече́.

Твои́ми удесы́, всеблаже́нне, Препросла́вленный еди́н Бо́г просла́вися в прославле́нии всесвяты́я твоея́ па́мяти, я́коже проре́кл еси́.

Дне́сь весе́лие в твое́й боже́ственней па́мяти Це́рковь познава́ет, Евпси́хие, в ню́же пою́щия тя́ вся́ спаса́й моли́твами твои́ми.

Богоро́дичен: Све́том мя́ покая́ния озари́, Де́во, греха́ но́щию омраче́ннаго и уны́ния мгло́ю спокрове́ннаго.