Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

С пресла́вными чи́нми а́нгельскими, пресла́вне, сы́й, непреста́нно па́мять твою́ сла́вящия спаса́й.

Хра́м Уте́шителев освяще́нный тво́й у́м, страстоте́рпче, показа́ся, сего́ ра́ди тя́ ве́рою почита́ем.

Умерщвле́ние живоно́сно пло́тию Пострада́вшаго изобрази́л еси́ пло́тию твое́ю, преблаже́нне, и и́стинней жи́зни сподо́бился еси́.

Держа́ву беззако́ннующих, укре́плься Ду́хом, низложи́л еси́ и зако́ны Госпо́дни, пресла́вне му́чениче, удержа́л еси́.

Богоро́дичен: Разреши́ся кля́тва, преста́ же печа́ль Рождество́м Твои́м, Всеблагослове́нная Отрокови́це, ве́рных весе́лие, Пренепоро́чная.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Ста́л еси́ пред суди́щем, испове́дуя Бо́га Царя́, му́чениче му́дре, пло́ть взе́мшаго, и челове́ки назда́вшаго.

Же́ртва непоро́чна, всесожже́на у́гльми му́ченическими, и́же от Де́вы принесе́ся У́глю.

Вода́ми духо́вными наводня́емь, сла́вне, му́тныя многобо́жия изсуши́л еси́ струи́.

Богоро́дичен: Все́ мое́ жела́ние к Тебе́ дви́жу, Чи́стая Влады́чице, плотски́х похоте́й мя́ вско́ре премени́.

Седа́лен, гла́с 4.

Му́ченика Евсигни́я похва́лим, я́ко всю́ упраздни́вшаго ле́сть си́лою Христо́вою и ве́ру уясни́вшаго: претерпе́ бо му́ки пои́стинне, и обличи́ мучи́телей суровство́ все́, и вене́ц побе́ды десни́цею Бо́жиею прия́т.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Дрема́ние отри́нув уны́ния, му́чениче Евсигни́е, бо́дренно к страда́нию несумне́нною ве́рою дерзну́л еси́.

О Го́споде Спа́се твое́м, му́чениче, ра́дуяся, досточу́дне, му́ки теле́сныя, я́ко пи́щу сла́дку, ты́ вмени́л еси́.

Го́рдое шата́ние за зло́бу попо́лзшагося, страстоте́рпче, низве́ргл еси́, боже́ственными нра́вы смиря́яся.

Во́ин непобеди́мь яви́лся еси́, во бране́х подвиза́яся, сконча́в же муче́ние, враги́ безпло́тныя потреби́л еси́.

Богоро́дичен: Равноси́льна, сопресто́льна родила́ еси́ Сло́ва Отцу́ и Ду́ху, Его́же моли́ спасти́ мя, Пресвята́я Отрокови́це, Присноде́во.

Пе́снь 5.

Ирмо́с: У́тренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

И́скренно прилепля́яся, прему́дре, Влады́це, себе́ удали́л еси́ от лука́вствия, Евсигни́е.

Ме́ртвым ка́пищем че́сти не прине́сл еси́, богоно́се, Бо́га жи́ва, Го́спода на небесе́х ве́дый.

На дре́ве воздви́жен, му́чениче доблему́дренне, стра́сть изобрази́л еси́ Безстра́стнаго ве́рою.

Богоро́дичен: Сло́во во утро́бе Твое́й, Чи́стая, воплоща́ется, безслове́сных плотски́х страсте́й ми́р избавля́я.

Пе́снь 6.

Ирмо́с: Моли́тву пролию́ ко Го́споду, и Тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Разуме́ния и́стинная в се́рдцы благоро́дными поло́ж о́бразы, не неве́дый разуме́ния, блаже́нне, вра́жия, на суди́ще поте́кл еси́ и погуби́л еси́ кре́стным всеору́жием сего́ во́инство.

Де́монов служи́телие, служи́теля тя́ Тро́ице разуме́вше, му́кам, и темни́цам, и непра́ведней сме́рти предаю́т, му́чениче Евсигни́е, но побежда́ются твои́м непобеди́мым сопротивле́нием, пребога́те.

Пото́цы крове́й твои́х, му́чениче, му́тныя беззако́ния пото́ки, и ре́ки безбо́жия ле́стныя, и лука́выя изсуши́ша струи́ исцеле́ний же ве́рным неизчерпа́емая пучи́на яви́шася.

Богоро́дичен: Изсуши́вши сады́ зло́бы в Тебе́ прозябе́нием Сло́ва, Ма́ти Чи́стая, из ко́рене души́ моея́ лука́выя мы́сли отсецы́ и насади́ доброде́телей кра́сная, Де́во, прозябе́ния.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Кровьми́, му́чениче, излия́нными любве́ ра́ди Христа́ вопло́щшагося, просвети́в твою́ ду́шу, к Сему́ преста́вился еси́, вопия́, ра́дуяся: Бо́же, благослове́н еси́.

Горя́ любо́вию Спа́са, избежа́л еси́ про́пасти нече́стия и зи́му лю́тых претерпе́л еси́ му́к, взыва́я, Евсигни́е: Бо́же, благослове́н еси́.

Еще́ теку́щим ка́плям, пресла́вне, боже́ственных твои́х крове́й, Влады́це Христу́ предста́л еси́, воспева́я: благослове́н еси́, Го́споди Бо́же, во ве́ки.

Да боже́ственнаго Ца́рствия ве́чную жи́знь насле́диши, вре́меннаго живота́ сла́вы возгнуша́лся еси́, вопия́, Евсигни́е: Бо́же, благослове́н еси́.

Богоро́дичен: Но́во родила́ еси́ Отроча́, Его́же роди́ Оте́ц пре́жде ве́к, Богоро́дице Чи́стая. Ему́же вси́ воспева́ем: Бо́же, благослове́н еси́.

Пе́снь 8.

Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Щито́м, всеблаже́нне, благоче́стия всю́ду огражда́емь, беззако́ннующия победи́л еси́ благода́тию, поя́ непреста́нно: благослови́те, вся́ дела́ Госпо́дня, Го́спода.

Внегда́ скорбе́ти тебе́, к Бо́гу воззва́л еси́ Благоде́телю, и услы́ша тебе́, и от лю́тых изба́ви тя́, вопию́ща: благослови́те, вся́ дела́ Госпо́дня, Го́спода.

Не бого́м безду́шным че́сть безслове́снейшу, му́чениче, прине́с, чиста́ же́ртва Бо́гу прине́слся еси́, поя́ непреста́нно: благослови́те, вся́ дела́ Госпо́дня, Го́спода.

Да бу́дущую получи́ши, прему́дре, жи́знь и сла́ву, умертви́лся еси́ ми́рови, и вопия́, Евсигни́е, уморе́н бы́л еси́: благослови́те, вся́ дела́ Госпо́дня, Го́спода.

Богоро́дичен: Ми́лостивая Де́во, Бо́га Преми́лостиваго поро́ждшая, ми́лости Боже́ственныя вся́ сподо́би, пою́щия: благослови́те, вся́ дела́ Госпо́дня, Го́спода.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Кре́постию, му́чениче, Христо́вою некре́пкаго врага́ умертви́л еси́, вознося́щагося и су́етно вои́стинну ны́не шата́ющагося, и ме́чному усече́нию главу́ преклони́л еси́, и освяти́л еси́ кро́вным тече́нием зе́млю всю́.

Я́ко украше́ние все́х страда́льцев, я́ко му́чеников красота́, Евсигни́е, я́ко сто́лп непоколеби́мь Це́ркве, я́ко огражде́ние благочести́вых прея́вственно, я́ко боже́ственная ле́пота притека́ющих к тебе́, я́ко всесве́тлая звезда́, ублажи́лся еси́.

Иска́пают ми́ро па́ры по́тов твои́х благово́нное, Евсигни́е, и сердца́ на́ша, тя́ чту́щих, благоуха́ют, и смра́д страсте́й, бе́д и скорбе́й отгоня́ют, страстоте́рпче Христо́в до́блий.

Со́лнце сла́вы, Иису́се, уясни́вый па́мять дне́сь страда́льца Твоего́, того́ моли́твами просвети́, молю́ся, омрачи́вшуюся мою́ ду́шу пре́лестию змии́ною, да сла́влю Тя́, я́ко Бо́га и́стинна и Человеколю́бца.

Богоро́дичен: Просвети́, две́ре Све́та, се́рдца моего́ о́чи, молю́ся, тмо́ю грехо́вною осле́пшия, и прия́тны Боже́ственным покажи́ сия́нием, да почита́ю Тя́, да боже́ственными гла́сы велича́ю Тя́.