Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Свиде́тель и́стины, Горди́е всеблаже́нне, познава́емь, светоно́сную мне́ благода́ть с небесе́ пода́ждь моли́твами твои́ми.

Пои́м Го́сподеви, страстоте́рпца укре́пльшему на противобо́рныя и венце́м побе́ды украси́вшему.

Си́лою и всеору́жием все́х Царя́ укрепля́емь, мучи́телей низложи́л еси́ вражду́, всесла́вный Горди́е.

Богоро́дичен: Воды́, теку́щия в безсме́ртие, яви́лася еси́ селе́ние, источа́ющаго все́м челове́ком жи́знь, Богоневе́сто.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че, Тебе́, Го́споди.

Теку́щих нестоя́тельное помышля́я и пребыва́ющих состоя́ние, му́чениче сла́вне, воспомина́я, блаже́нне, без стра́ха в суди́лище вше́л еси́ страда́ния.

Отступи́л еси́ привре́меннаго су́етства, и приложи́лся еси́, всебога́тне, при́сно пребыва́ющим, и, бе́гая от челове́к, а́нгелом единокро́вник, богому́дре, бы́л еси́.

Земна́я мудрова́ния оста́вив, жи́тельство небе́сное, му́чениче, обре́л еси́, зре́ти бо не терпя́ пре́лести шата́ния, в пусты́ню удали́лся еси́.

Богоро́дичен: Не́сть непоро́чны, я́коже Ты́, Влады́чице, и не́сть пречи́сты, па́че Тебе́, Всенепоро́чная: во утро́бе бо Зижди́теля все́х вмести́ла еси́, Еди́наго Многоми́лостиваго.

Седа́лен, гла́с 8.

Разже́гся любо́вию Иису́совою, самово́льным хоте́нием, му́чениче му́дре, усе́рдно на сме́рть себе́ преда́л еси́ и посреди́ суди́ща самозва́н ста́л еси́, вопия́ мучи́телем: се́ а́з приидо́х. Те́мже и ле́сть дерзнове́нием обличи́в, мече́м во главу́ усе́чен еси́, сла́вне, и к жи́зни безконе́чней преста́вился еси́, всехва́льне. Моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не: Ли́к проро́ческий, пропове́дуя, ра́дуется, креще́ние Христо́во, живо́т источа́ющее. Зове́т Иса́ия: почерпи́те во́ду чисти́тельную. Пи́шет богооте́ц: ка́ко от лица́ бежи́т мо́ре благоволе́нием спаса́ющаго Бо́га ро́д челове́ческий?

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяще си́лу Твою́.

Рече́ния Христо́ва, всеблаже́нне, услы́шав, ра́дуяся, тле́нное оста́вил еси́ во́инство и Царю́ вво́инился еси́ Небе́сному, венцено́сче му́чениче Горди́е.

Сокруши́шася, му́чениче, го́ры мучи́телей, раста́яшася же хо́лми и́дольстии терпели́вным твои́м страда́нием, и со дерзнове́нием, венцено́сче, прибли́жившася.

Укрепи́лся еси́ креста́ Боже́ственною си́лою, собо́ру злочести́вому вопи́ти велегла́сно: не и́щущим обрето́хся, не вопроша́ющим, ны́не упова́в, явля́юся.

Ве́сь на тя́, богому́дре, мучи́теля воздви́гл еси́ неудержи́мый гне́в, уди́вльшася, всеблаже́нне, умышле́нию и души́ твоея́ воста́нию.

Богоро́дичен: Неве́сто Бо́жия, Мари́е Богоро́дице, изба́ви мя́ лю́тых прегреше́ний и бе́д и к ти́хому приста́нищу и спаси́тельному Твои́ми моли́твами наста́ви.

Пе́снь 5.

Ирмо́с: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Вше́д без стра́ха и до́блественне, я́ко ле́в, в позо́рище, я́коже ка́мение безду́шное, блаже́нне, вмени́л еси́ безу́мныя.

Нака́зан, му́чениче, богодохнове́ннаго писа́ния уче́нием, вся́ ко спасе́нию обре́л еси́ веду́щая, Горди́е.

Разуме́в, богому́дре, тве́рдое твое́ мучи́тель противле́ние, я́коже о ка́мень волна́, твое́ю разсе́деся тве́рдостию.

Богоро́дичен: И́же из Твоея́ утро́бы пресу́щественно, Де́во, Воплоща́яйся ми́р богоразу́мия заре́ю просвети́, Пречи́стая.

Пе́снь 6.

Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.

Священноде́йствуется же́ртва, и прия́тно приноше́ние Тебе́ прино́сится, иска́пая кро́вию, Горди́й, Влады́ко, во́льней стра́сти Твое́й подо́бяся.

Несмы́сленный умо́м тебе́ тле́нную обещава́ет сла́вицу, сла́вою нетле́нною, Горди́е, обога́щшемуся и безсме́ртное бога́тство сокры́вшему.

Напра́влена упова́ния к Бо́гу име́я, прете́кл еси́ жития́ нестоя́тельное и, мече́м посека́емь, к простра́нней широте́ преше́л еси́.

Богоро́дичен: Умерщвле́нный у́м мо́й страсте́й треволне́ньми возста́ви, Жи́знь Ве́чную, Христа́, Ро́ждшая, подаю́щаго все́м исцеле́ния.

Конда́к, гла́с 8.

Твоя́ по́ты, пресла́вне, всю́ зе́млю напои́ша, и честны́ми кровьми́, Горди́е, ми́р ве́сь возвесели́л еси́. Моли́твами твои́ми, богому́дре, спаса́й вся́, ве́рою тя́ воспева́ющия и ублажа́ющия, вопию́щия пе́снь досто́йную, всехва́льне, я́ко многострада́лец.

Пе́снь 7.

Ирмо́с: О́троки ороси́вый в пещи́ и Де́ву сохрани́вый, ро́ждшую Тя́, по рождестве́, благослове́н еси́, Бо́же оте́ц на́ших.

Муче́ния сла́ву стяжа́в, со а́нгелы лику́еши, венцено́сче, Христу́ взыва́я: благослове́н еси́, Го́споди Бо́же оте́ц на́ших.

Благочести́вое дерзнове́ние име́я, злочести́выя облича́еши, воспева́я велегла́сно: благослове́н еси́, Го́споди Бо́же оте́ц на́ших.

Изба́витися прегреше́ний ны́не моли́ ве́рою чту́щим твою́ честну́ю па́мять и пою́щим велегла́сно: благослове́н Бо́г оте́ц на́ших.

Богоро́дичен: Ядоме́тное те́рние греха́ исцеле́ний одожде́нием Твои́х отмыва́еши, Богороди́тельнице Благослове́нная Всечи́стая, Бо́га безсе́менно ро́ждшая.

Пе́снь 8.

Ирмо́с: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Возсле́дующая тебе́ благода́ть, неви́димо просве́щши, му́чениче, до́блести испо́лни, — благослови́те, — вопию́ща, — вся́ дела́ Госпо́дня, Го́спода.

Тече́нием ско́рым гоня́, страда́льче, к жела́емому концу́, Ца́рствия дости́гл еси́, зовы́й: благослови́те, дела́ Госпо́дня, Го́спода.

В непроходи́мыя ве́ки пребыва́ет му́чеников Твои́х сла́ва и безсме́ртное благохвале́ние: благослови́м Тя́, вся́ дела́, я́ко Го́спода.

Богоро́дичен: Воплоще́нно Сло́во заче́нши, пе́рвее безпло́тное, Е́вину кля́тву дре́внюю отврати́ла еси́, Благослове́ние, Де́во, ми́ру ро́ждши.

Пе́снь 9.

Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Ми́лостива бы́ти моли́ Влады́ку ве́рою тя́ чту́щим и тво́й светоно́сный и честны́й пра́здник соверша́ющим, Горди́е, му́чеников украше́ние.

Ны́не нетле́нныя пи́щи и боговиде́ния насыща́яся, Горди́е, и Све́та Невече́рняго, в жили́щах ве́чных прие́млеши припло́дия по́двигов твои́х.

Сла́ву мимотеку́щую, и тле́нную, и попира́емую презре́в, богому́дре му́чениче, присносу́щныя ны́не сла́вы и ра́дости вои́стинну наслажда́ешися, престо́лу Влады́чнему предстоя́.

Богоро́дичен: Я́ко спа́сшеся, Де́во, пе́рвыя кля́твы Твои́м Боже́ственным Рождество́м, досто́йно пою́ще, гла́сы немо́лчными вопие́м: ра́дуйся, Богоро́дице, наде́жда на́ша.