Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Твои́ми моли́твами, му́чениче Христо́в, Иси́доре блаже́нне, с небесе́ просвеще́ние пода́ждь мне́ и благода́ть восхвали́ти пра́здник тво́й честны́й.

Соверше́нно име́я к Бо́гу, Иси́доре му́чениче, се́рдце и ду́шу и непоро́чно стяжа́в житие́, с му́ченики подвиза́лся еси́ до́бре.

Зако́нно устро́ив твою́ жи́знь, Иси́доре му́чениче, я́коже некра́домо сокро́вище, ве́ру удержа́л еси́ непрело́жну спасе́ния, всеблаже́нне.

Богоро́дичен: Вои́стинну ро́ждши естество́м Бо́га, и́стинно слы́шишися Богоро́дица, вои́стинну зва́ние по коему́ждо Боже́ственным рождество́м, Чи́стая, нося́щи.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Сло́вом направля́емь, стра́стная стремле́ния, сла́вне му́чениче Христо́в, доброде́тельми по́стными, страстоте́рпче, увяди́л еси́.

Име́я непосты́дное душе́вное стремле́ние, сла́вне, всеблагоче́стно испове́дание невре́дно соблю́л еси́.

Ми́лостива моли́твами твои́ми все́х Судию́ сотвори́ благоче́стно твое́ восхваля́ющим, страстоте́рпче, торжество́.

Богоро́дичен: Умертви́ мудрова́ние пло́ти на́шея, Влады́чице, и ду́ши оживи́, Де́во, ве́рою пою́щих Тя́.

Седа́лен, гла́с 3.

Подви́гся на зми́я, поста́вил еси́ побе́ду, му́чениче Иси́доре, от Еги́пта свети́льник, озаря́я подсо́лнечную, все́м возсия́л еси́, движе́ния творя́ к возсия́вшему из Де́вы Богоотрокови́цы, Его́же ра́ди закла́н бы́в, страстоте́рпче, же́ртва благово́нна бы́л еси́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Всего́ в тебе́ Сло́ва все́льшася име́я, я́коже во́ин непобеди́мый, мучи́тельскую посрами́л еси́ горды́ню и, победоно́сец Того́ ра́ди, блаже́нне, бы́в, вене́ц неувяда́емый от Бо́га прия́л еси́, всесла́вне му́чениче Иси́доре.

Ю́ношески погна́л еси́, Иси́доре, враги́ твоя́, си́х истни́л еси́, стра́шным ору́жием Креста́ огражде́н, кре́постию же препоя́сан, и возненави́девших тя́ потреби́л еси́, зовы́й: си́ле Твое́й сла́ва, Человеколю́бче.

После́дуя сме́рти Влады́чней, Того́ ра́ди стра́сти терпе́л еси́, те́мже нетле́нней тя́ жи́зни, му́чениче, сподо́би Госпо́дь сла́вы, Ему́же в ру́це пре́дал еси́ ду́шу твою́, преблаже́нне Иси́доре.

Богоро́дичен: Вопло́щся, обновля́ет всего́ челове́ка, Пречи́стая, сему́ соедини́вся, О́тчих не́др не оста́вль, во Твою́ утро́бу всели́тися изво́ли и бога́тством милосе́рдия, во́лею обнища́в, обогати́ ми́р Божество́м.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся.

Же́ртва принесе́ся непоро́чная и соверше́на твоему́ Влады́це Христу́, и, закла́н бы́в, усе́рдно кро́вь твою́ пролия́л еси́, Иси́доре, приобщи́вся страсте́й Его́ и Ца́рствия Его́ досто́ин насле́дник бы́в.

Укрепля́емь, Спа́се, всеси́льною Твое́ю кре́постию, погаси́л е́сть мглу́ пре́лести, добропобе́дный му́ченик Иси́дор, усече́н бо во главу́, Тебе́ ду́шу Жизнода́вцу благохва́льно предаде́, Влады́ко.

Украша́ется, блаже́нне, твои́ми честны́ми кровьми́ Це́рковь Христо́ва и уясня́ется твои́х страда́ний сопротивле́нием, сла́вне: проти́ву греха́ бо ты́ кре́пко, да́же до кро́ве, противоста́л еси́, Иси́доре.

Богоро́дичен: Оскве́рншееся естество́ челове́ческое преступле́нием пе́рвым, и лю́те истле́вшее, и мертво́ бы́вшее возста́вила еси́, исто́чник ро́ждшая па́че ума́ безсме́ртия, Богоро́дице Пренепоро́чная Влады́чице.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Соверше́нную любо́вь к Бо́гу стяжа́в, страстоте́рпче преблаже́нне, бла́г ра́ди нетле́нных вои́стинну земны́х любо́вь оста́вил еси́ и восте́кл еси́, вопия́: прилепи́хся во сле́д Тебе́, Влады́ко.

Я́ко жени́х благоле́пен, Иси́доре, добро́тами му́ченическими укра́шен, к небесе́м возше́л еси́, ра́дуяся, добротво́рному сия́нию предстоя́ти, моля́ся всегда́ о творя́щих па́мять твою́.

Претерпе́л еси́, страда́льче, закла́ние, прозря́ тебе́ ве́чное наслажде́ние и пи́щу присноживо́тную вои́стинну с му́ченики, я́ко му́ченик непобеди́м, восприя́л еси́ и́стинно вене́ц, преблаже́нне Иси́доре.

Богоро́дичен: Мари́е, Влады́чнее селе́ние, све́тлыми де́вства заря́ми светови́дно, я́ко кри́н, сия́ющи посреди́ терно́внаго смуще́ния, Тебе́ молю́ся, Благо́й, согреше́ний пода́ждь ми́ проще́ние.

Конда́к, гла́с 4.

Упра́витель превели́кий вселе́нней ты́ яви́лся еси́, свя́те, твои́ми к Бо́гу моли́твами, те́мже воспева́ем тя́ дне́сь, му́чениче богому́дре, Иси́доре пресла́вне.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Ны́не осия́емь, треблаже́нне, духо́вною заре́ю, тя́ пою́щим осия́тися с тобо́ю благоволи́, вопию́щим: благослове́н еси́, Го́споди Бо́же, во ве́ки.

О, предо́брых твои́х подвиго́в! и́миже разруши́л еси́ пре́лесть и́дольскую и мучи́тели лю́тыя посрами́л еси́, зовы́й: благослове́н еси́, Го́споди Бо́же, во ве́ки.

Богоро́дичен: Всесвята́я Влады́чице Де́во, согреше́ний мои́х ра́ны еле́ем милосе́рдия Твоего́ исцели́, вопию́щаго: благослове́н, Пречи́стая, Пло́д Твоего́ чре́ва.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Ласка́ньми покуша́шеся окра́сти мучи́тель твоего́ терпе́ния кре́пость и си́лу, всеблаже́нне Иси́доре, ко своему́ злоразу́мию, но ты́, богому́дре, — Христа́ бою́ся, — вопия́л еси́, — Ему́же и служу́: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Всесве́тло, я́ко со́лнце, ти́хое твое́ лице́, муче́ния ра́дованием я́вльшееся, я́ко а́гнец бо непоро́чен, закла́н бы́в, прине́слся еси́ Бо́гу, Ему́же, я́ко Соде́телю, пе́сньми вопия́л еси́: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Светови́дно те́ло твое́ лю́бящим явля́шеся, а́нгельским доринося́щим чино́м, блиста́яся, Иси́доре, чуде́с све́тлостьми и благода́тьми чудотворе́ния разли́чными, оби́льная подава́еши исцеле́ния вопию́щим: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Богоро́дичен: Вети́йстии язы́цы Тя́ восхвали́ти не мо́гут, о Богороди́тельнице, Мари́е Богоневе́сто! Бо́га бо родила́ еси́, над все́ми су́щаго, Отрокови́це Чи́стая, от деви́ческия неискусобра́чныя утро́бы, Его́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют.

Бога́тством милосе́рдия соше́дый с небе́с, кре́ст же и сме́рть на́с ра́ди во́лею претерпе́л еси́, я́ко Бла́г. Сего́ ра́ди Иси́дор, на Тя́ взира́я, вопия́ше: соумру́ Тебе́, да жи́в бу́ду, сраспну́ся, да ца́рствую с Тобо́ю.

Зако́нно твои́х крове́й на земли́ ка́пли излия́вшияся, Иси́доре, на небесе́х оде́жду тебе́ обагри́ша благоле́пно, истка́ну благода́тию, в ню́же ны́не оде́ян, Христу́ предстои́ши, в черто́зех, преблаже́нне, небе́сных, вене́ц нося́, му́чениче сла́вне.

Я́ко име́я дерзнове́ние ко Христу́, моли́тися не преста́й, Иси́доре, от напа́стей, бу́ри же, и скорбе́й, и страсте́й изба́вити творя́щих па́мять твою́ досто́йно свяще́нную, душе́внаго же спасе́ния прося́, треблаже́нне, твоего́ жре́бия сподо́би.

Богоро́дичен: Я́ко Спа́са ро́ждшая и Изба́вителя, спасе́ние мне́, Отрокови́це, сподо́би получи́ти, Пречи́стая, прегреше́ний мои́х плени́цы Твои́ми моли́твами разреша́ющи: вся́ бо, я́ко хо́щеши, Ты́ исправля́еши, я́ко носи́ла еси́ в не́дрех все́х Царя́ бла́гостию несравне́нною.