Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Песносло́вии тя́ боже́ственными Христо́ва похвали́ти му́ченика и тве́рдаго подви́жника, мое́ помышле́ние све́том, и́же в тебе́ прея́вственно, му́чениче, озари́.

Науче́н боже́ственным, а́нгельским, блаже́нне, наказа́нием, я́коже а́нгел на земли́ вои́стинну преизя́ществовал еси́ пло́тию, по́хоти обуздова́я и удобря́яся.

Зако́ны Боже́ственныя соблю́д, е́ллинскаго беззако́ния, преподо́бне, возгнуша́лся еси́ проявле́нно и мно́ги приве́л еси́ к Бо́гу уче́ньми и свяще́нными уве́рив чудесы́.

Богоро́дичен: Украси́вшися добро́тою доброде́телей, Кра́снаго родила́ еси́ па́че все́х челове́ков, Свои́ми, Всенепоро́чная, на́с красота́ми му́дре украша́ющаго.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Украси́в Боже́ственными доброде́тельми, преподо́бне, ду́шу твою́, жили́ще сию́ Отца́, и Сы́на, и Ду́ха, вои́стинну Свята́го, му́чениче, соверши́л еси́.

И́же дре́вле пре́лести во глубину́ впа́дшии окая́нне, в явле́нную высоту́ высо́кими твои́ми уче́нии возво́дятся далечесия́тельно, му́чениче Ко́ноне, воспева́юще тя́.

Хра́м бы́в Бо́жий, призыва́нии боже́ственными низложи́л еси́, всеблаже́нне, предста́в во хра́ме истука́ннаго, наставля́я заблу́ждшия к боже́ственному разуме́нию.

Богоро́дичен: Еди́н Святы́й из Тебе́ ражда́ется, Пресвята́я, па́че ума́ же и сло́ва, освяща́я земна́я, скве́рным врага́ сове́том страсте́м рабо́тающия.

Седа́лен, гла́с 8.

Христо́вым всеору́жием вооружи́вся, де́монов яви́лся еси́ всегуби́тель и бы́л еси́ же́ртва ве́рных неразру́шна, непристу́пен име́я сто́лп ве́ры, к высоте́ взима́еши на́с чуде́с твои́х. Отню́дуже и побе́ды от Бо́га венцы́ досто́йно прия́л еси́, му́чениче Ко́ноне многострада́льне. Сего́ ра́ди вопие́м ти́: моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.

Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти́ ся́, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Хра́мы низложи́л еси́ безбо́жных, свя́те, и бо́ги поги́бели коне́чней, му́чениче, пре́дал еси́, чудоде́йствуя и соверша́я досточу́дная зна́мения.

Свя́то, преподо́бне, ше́ствующу тебе́, де́монский ро́д Бо́жие Сло́во покори́ тебе́ и тя́ чуде́с мно́гими показа́ньми просла́ви.

Вельми́ любя́ тя́ Преблаги́й, Михаи́ла тебе́, вели́каго наказа́теля, даде́, науча́юща тя́, велича́йший Ко́ноне, я́ве превели́ким та́йнам.

Богоро́дичен: Свята́я Влады́чице, Всесвято́е воплоти́вшая Сло́во, освяще́ние души́ мое́й да́руй, руководя́щи мо́й у́м, безпу́тиями порева́емый.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Тече́нием крове́й твои́х свяще́нных хлами́ду тебе́ самому́ му́ченическую прея́вственно обагри́в, му́чениче доблему́дренне, и живе́ши, ра́дуяся, в вы́шних жили́щах и све́тлостех.

Просте́р тя́, блаже́нне, злоу́мный, ве́сь просте́рт к Бо́гу у́м, приснопа́мятне, иму́щаго, ра́нами ссеца́ет, призыва́ющаго и́мя вели́кое Вседержи́теля.

Благода́тию вжили́вся, терпе́л еси́ ка́пли я́звенныя, му́ченически украша́яся, и безбо́жие, Ко́ноне, побежда́я, и безсме́ртия сподобля́емь.

Богоро́дичен: Изба́вльшеся вся́кия прароди́тельныя, Пречи́стая, кля́твы, Тобо́ю благослове́ние получи́хом. Те́мже благослови́м, и велича́ем, и любо́вию Тя́ чти́м, и ублажа́ем.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Облиста́в, я́ко со́лнце, светолу́чными доброде́тельми и пресла́вными чудесы́, терпе́нием же страда́ний вельми́ украша́яся, просвеща́еши концы́, великоимени́тый му́чениче, хва́лящия тя́.

Ра́н добро́тами красне́йший показа́вся, чудоде́йствуеши изря́дная, и у́мер, па́ки по погребе́нии прогоня́я неду́ги и отгоня́ пре́лести, блаже́нне, ду́хи.

Стра́сти уврачу́й ду́ш на́ших, му́дре, и пло́ти отжени́ неможе́ния, изря́днейший вра́чь на́м, чту́щим тя́, от Бо́га да́н еси́, Ко́ноне сла́вне.

Богоро́дичен: Призре́ Госпо́дь на Тя́ и Тобо́ю посеще́ние соде́ла уда́льшимся, Пречи́стая, от Него́. Те́мже, я́коже рекла́ еси́, ро́ди спаса́емых ублажа́ют Тя́.

Конда́к, гла́с 3:

Чистото́ю я́ко а́нгел на земли́ пожи́в, отону́дуже собесе́дник а́нгелом бы́ти сподо́бился еси́, и роди́тели ко Христо́ву позна́нию приве́л еси́, и, еди́наго Бо́га в Тро́ице испове́дав, пострада́л еси́ до кро́ве, му́чениче Ко́ноне, моли́ Его́ непреста́нно о все́х на́с.

Пе́снь 7.

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Све́т тебе́ незаходи́мый возсия́, возненави́девшему страсте́й тму́, преподо́бне, весе́лие же прия́т тя́, до́брый по́двиг сконча́вша тща́нием. Те́мже помина́й на́с, предстоя́ Христу́.

Се́рдце твое́ кро́тко и мудрова́ние смире́нно яви́ся, преподо́бне, и́мже погуби́л еси́ возноше́ния вся́ врага́, возвыша́емь Боже́ственными доброде́тельми и чудесы́ стра́шными, Ко́ноне, му́чеников основа́ние.

Стра́шен все́м де́моном бы́л еси́, си́м повелева́я повинова́тися твои́м свяще́нным, богому́дре, веле́нием, Бо́гу тя́ просла́вльшу, Того́ де́лы до́брыми на земли́, Ко́ноне, просла́вльшаго.

Богоро́дичен: Во́лею вся́ соде́ловаяй, во Твою́ восхоте́в всели́тися пренепоро́чную, Богоро́дице, утро́бу вои́стинну, еди́н во святы́х сове́тех прославля́емый Бо́г, я́ко вели́кий и стра́шный.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Тве́рдо сопроти́вился еси́ суему́дренному, мня́щу тебе́ повину́ти, че́сти чужди́м принести́, страда́льче, о́нем ме́рзостным. Те́м, я́ко зако́нно пострада́в, просла́вился еси́.

Де́монскими уязви́вшиися прило́ги уче́нии боже́ственными твои́ми исцелева́ются и ско́рбных избавле́ние прие́млют, воспева́юще благода́ть твою́, богому́дре.

Неду́гов вся́ких здра́вие почерпи́те, к ра́це преподо́бнаго ве́рою приступа́ющии: источа́ет бо я́ве Ду́ха благода́тию и пото́ки страсте́й изсуша́ет.

Богоро́дичен: Мольбу́ Зижди́телю Бо́гу принеси́ ду́ши на́ша спасти́, Богора́дованная, и страсте́й одержа́ния на́с изба́вити и злоде́йственных челове́к искуше́ния.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Я́ко кора́бль, ви́ден бы́л еси́, препла́вающь мирску́ю немо́кренно, богоно́се, бу́рю, до́брых бре́мя спаса́ющь к кра́сным приста́нищем поко́я, и Ца́рствия Бо́жия, и све́тлости.

Кресто́м, я́ко броня́ми, оде́явся, вра́жия, всеблаже́нне, обнажи́л еси́ полки́ и нога́м твои́м кра́сным порабо́тил еси́, ра́б же Влады́це и́скренний бы́в, порабоще́нныя враго́м избавля́я.

О на́с, любо́вию восхваля́ющих тя́, па́мять сотвори́, Христу́, венцено́сец, предстоя́ с вы́шними безчи́сленными си́лами, я́ко да моли́твами твои́ми обря́щем ми́лость и злолю́тых измене́ние, Ко́ноне всехва́льне.

Богоро́дичен: Све́том Твои́м мя́, Де́во, просвети́, но́щию при́сно уны́ния одержи́ма, и к земли́ погорбле́на, и де́юща вся́к гре́х ра́зума развраще́нием, я́ко да, Тобо́ю спаса́емь, пою́ Тя́, Многопе́тую.