Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Ве́чнаго Ца́рствия, сла́вне, чисте́йшую проходя́ широту́, от вся́кия ско́рби и напа́стей тесноты́, пою́щия тя́ спаси́, невозвра́тно ше́ствующия к небе́сней стези́ вводя́.

Огражде́н благоче́стия ору́жием, сто́лп незы́блен яви́вся, Плато́не, все́ свире́пство ра́н претерпе́л еси́ и боле́зней тесноты́ подъя́л еси́, Боже́ственною благода́тию простира́яся.

Ю́ношеское показа́в противле́ние, ме́ртвенную и тле́нную дебе́лость страда́нием отве́ргл еси́, всему́дре, и в нетле́нную ри́зу оде́явся, ра́дуяся, Влады́це предстои́ши.

Богоро́дичен: Воплоще́нна, Отцу́ Собезнача́льна и Соприсносу́щна, Единоро́дна Сло́ва па́че ума́ родила́ еси́, Благослове́нная Пречи́стая Богоро́дице. Сего́ ра́ди пра́во му́дрствующе, пропове́даем Тя́ и всече́стно сла́вим.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Я́коже нетле́нная и́скра, в пла́мень лю́тый терпели́во, всеблаже́нне, вше́л еси́, благоче́стия я́вственно ре́вностию распала́емь и огне́м Боже́ственным озаря́емь ве́ры.

Победи́в па́че естества́ де́монския слуги́, терпе́нием же кре́пких му́к боле́зни подъе́м, а́нгелов все́льник и венцено́сец яви́лся еси́, Плато́не богому́дре блаже́нне.

На земли́ за Христа́, всеблаже́нне, подвиза́вся, небе́сныя да́ры прие́м и венцы́, от Него́ приснопребыва́ющия, в чи́сте ме́сте рая́ вселя́ешися.

Богоро́дичен: Две́ре Све́та, све́тлыми Ду́ха заря́ми укра́шена Богома́ти су́щи, Тобо́ю бо к на́м Сло́во сни́де, просвеща́ющее вся́ Боже́ственным све́том пою́щия Тя́.

Седа́лен, гла́с 8.

Подвиго́в широто́ю, му́чениче му́дре, простира́яся ве́рою, всесла́вне, вра́жия, утесни́в, ко́зни погуби́л еси́ и, до́бре соверши́в тече́ние боже́ственное, ра́йскую широту́, ра́дуяся, дости́гл еси́. Те́мже Це́рковь, простра́нством благоче́стия сия́ющи дне́сь, пра́зднует па́мять твою́ и вопие́т ти́, блаже́нне: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Богоро́дичен: По Бо́зе в Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.

Крестобогоро́дичен: Из Безнача́льнаго Отца́ Рожде́ннаго, напосле́док Тя́ пло́тию Ро́ждшая, на Кресте́ ви́сяща зря́щи, Христе́, — увы́ Мне́, любе́знейший Иису́се! — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя, Долготерпели́ве.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Раствори́вся ве́сь любо́вию Созда́теля твоего́, не чу́вствовал еси́ боле́зней теле́сных, стра́стныя пло́ти ме́ртвенныя и ко́жныя ри́зы совле́кся и целому́дрия и спасе́ния оде́явся, Плато́не, ри́зою.

Священноде́латель Боже́ственный яви́лся еси́, я́ко непоро́чно овча́, му́жеский по́л и соверше́нное всесожже́ние, му́чениче, тебе́ сама́го за все́х закала́емому Христу́ прине́с, Изба́вителю, ду́шу бо разже́г Влады́чнею любо́вию, о сожига́емей пло́ти небре́гл еси́.

Ю́ноши три́, су́щия в Вавило́не, подража́я, всея́дца огня́ не убоя́лся еси́, но кре́пко и ю́ношески того́ претерпе́в пла́мень несте́рпный. Те́мже тя́ Росода́вец со о́неми досто́йно прия́т в черто́г сла́вы.

Богоро́дичен: Я́ко из ко́рене ца́рскаго су́щи, все́ми влады́чествующаго, Сло́во Бо́жие родила́ еси́ на́м, пло́ть бы́вша и пребы́вша непреме́нна. Те́мже Тя́, Богоро́дицу, и́стинно и госпо́дьственно, Всесвята́я Де́во, сла́вим.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Дрема́ния твои́м ве́ждом и сна́ твои́м очесе́м не да́л еси́, му́чениче, до́ндеже сно́м блаже́нным и подо́бным, Бо́га лю́бящим, любе́зным усну́л еси́, блаже́нне, мече́м во главу́ усека́емь.

Я́коже в чужде́м телеси́, всеблаже́нне, стражда́, подвиза́лся еси́, я́ко стра́ждущим ины́м ви́дец бы́в, ты́ пострада́л еси́, Боже́ственным бо раче́нием разже́гся, предлежа́щих му́к не убоя́лся еси́, сла́вне.

Бога́тство обре́л еси́ неотъе́млемо и сла́ву неувя́дную, в небе́сных оби́телех со а́нгелы ликовству́я и нетле́ннаго безсме́ртия в причаще́нии бы́в, всеизя́щнейше.

Богоро́дичен: Разреше́ние грехо́в Твои́ми моли́твами пода́ждь рабо́м Твои́м, избавля́ющи ты́я искуше́ний, и бе́д, и скорбе́й, и ху́льных еретико́в одержа́ния, Де́во Богоро́дице Всепе́тая.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Вы́шши страсте́й и му́к бы́в, пло́ти отсече́ния претерпе́л еси́, сла́вне, Христа́ бо помо́щника и соде́теля име́л еси́ и споспе́шника.

Душе́вным ра́зумом благоле́пие Созда́теля взира́я всегда́ и созерца́я добро́ту неизрече́нную, ви́димых ху́дость небре́гл еси́.

Богоро́дичен: Я́ко одушевле́нный киво́т, Законода́вца вмести́ла еси́, я́коже хра́м святы́й, прия́ла еси́ Свята́го, бы́вша Челове́ка, на благодея́ния челове́ков, Всеблаже́нная.

Конда́к, гла́с 3.

Свята́я твоя́ па́мять вселе́нную весели́т, созыва́ющи ве́рныя вся́ в пречестны́й хра́м тво́й, иде́же ны́не, ра́достию совоку́пльшеся, пое́м в пе́снех и све́тлостех. Сего́ ра́ди, Плато́не, вопие́м ти́: язы́ческаго наше́ствия изба́ви гра́д тво́й, свя́те.

И́кос:

Е́ллинское оста́вив все́ су́етство, Христо́вых ученико́в душеполе́зная уче́ния возлюби́ зело́ Плато́н богому́дрый. Те́м и яви́ся все́м че́стен, я́ко анки́ра ве́ры во оте́честве, его́же и зва́ние я́ве Анки́ра имену́ется. До́бре бо того́ воспита́вшее изве́стен покро́в на враги́ и засту́пника те́пла в ра́тех обрета́ет всегда́, вопию́щи: язы́ческаго наше́ствия изба́ви гра́д тво́й, свя́те.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Зако́нно пострада́вша и враги́ твоя́ попра́вша, побе́ды венце́м Законополо́жник тебе́ венча́, велегла́сно вопию́ща и глаго́люща: благослове́н еси́, Бо́же оте́ц на́ших.

Преста́вился еси́, ра́дуяся, к присножела́нному тебе́ дре́вле, Его́же пречи́стей стра́сти, спасе́ния челове́ком вине́ бы́вшей, подража́я, пе́л еси́: благослове́н еси́, Бо́же оте́ц на́ших.

Удиви́шася вся́ небе́сныя си́лы терпе́нию твоего́ страда́ния и челове́цы, тогда́ зря́щии. Преесте́ственно бо вопия́л еси́, секо́мый: благослове́н еси́, Бо́же оте́ц на́ших.

Богоро́дичен: Избавля́емии, Пречи́стая, Боже́ственным Рождество́м де́вства Твоего́ у́з сме́ртных и кля́твы первозда́ннаго Ада́ма, Тя́, Богоро́дицу, му́дрствующе, зове́м: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Све́тлыми по́двиги у́бо подвиза́лся еси́, всехва́льне, светле́йше же мно́го благосла́вие Христо́с тебе́ дарова́ и ве́чно пребыва́ющее, в небе́сныя тя́ оби́тели всели́в, усе́рдно песнопою́ща: свяще́нницы, воспо́йте, лю́дие, превозноси́те Христа́ во ве́ки.

Я́ко моле́бника ве́рнейша, я́ко предста́теля тепле́йша Всецарю́ и Творцу́ тва́ри, тя́ ны́не предлага́ем; за ны́ моли́ся, му́ченическим твои́м дерзнове́нием хода́тайствуя о хва́лящих тя́ и ве́рно песнопою́щих: лю́дие, превозноси́те Христа́ во ве́ки.

Прия́ти сподо́бился еси́ Ца́рство недви́жимое твое́ю де́тельною ве́рою, я́ко тебе́ да́ти обеща́ нелжи́вый Бо́г, за Него́же те́ло и огню́ и му́кам пре́дал еси́, зовы́й: свяще́нницы, воспо́йте, лю́дие, превозноси́те Христа́ во ве́ки.

Богоро́дичен: Сло́ва Бо́жия, безнача́льнаго и Отцу́ сразумева́емаго, из не су́щаго О́тчим сове́том все́ соста́вившаго, боголе́пно родила́ еси́, пло́ть бы́вша ра́ди на́с, челове́ков. Те́м Тя́, Богоро́дицу, правосла́вно му́дрствующе, Христа́ превозно́сим во ве́ки.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Прииди́те у́бо, боговенча́ннаго, мучениколю́бцы, воспои́м му́ченика, просте́ршаго благоче́стие своего́ ро́ждия: и́бо лозы́ жи́зни са́д бы́в, пло́д изно́сит, умиле́ния на́м вино́ точа́щий.

Честна́ пред Бо́гом му́ченическая яви́ся сме́рть, присносу́щныя бо и неги́блемыя быва́ет Хода́тай и́стинныя жи́зни и жре́бий нетле́нный, и сла́ву безсме́ртную, и бога́тное подае́т воздая́ние.

Всю́ твою́ жи́знь, му́чениче, Вседержи́телю Бо́гу освяти́л еси́ и, я́ко благоуго́дну, жи́ву же́ртву, тебе́ сама́го, ра́дуяся, прине́сл еси́. Те́м сла́дости су́щия па́че ума́ я́ве сподо́бился еси́, но моли́ изба́витися искуше́ний пою́щим тя́.

Богоро́дичен: Спаси́ мя, Ма́ти Бо́жия, ро́ждшая Христа́ Спа́са моего́, Бо́га и Челове́ка, сугу́ба естество́м, но не ипоста́сию: Единоро́дна у́бо из Отца́, из Тебе́ же перворожде́на всея́ тва́ри. Те́мже Тя́ вси́ при́сно велича́ем.

Свети́лен.

Жесто́кую ше́ствовал еси́ в путе́х боже́ственную стезю́, к широте́ возше́л еси́ небе́снаго Ца́рствия, Плато́не, му́чеников сла́во, све́том сия́я нетле́нныя Тро́ицы. Те́мже, сла́ве непрестаю́щей прича́щся, чту́щия тя́ помяни́.

Богоро́дичен: Я́ко Засту́пницу нера́тну и предгра́дие вои́стинну предлага́ю покро́в Тво́й, Богоро́дице Де́во, Хода́таицу Бо́гу, изба́витися, Влады́чице, му́ки ве́чныя и в жи́зни нетле́нней Тобо́ю причасти́тися небе́снаго Ца́рствия.