Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Возрасти́в ю́же к Бо́гу любо́вь твою́, о́тче Авксе́нтие, и мирску́ю любо́вь оста́вив, богоно́се, сосу́д вмести́телен Ду́ха дарова́ний показа́лся еси́.

Подвше́л еси́ твои́ми хоте́ньми, о́тче Авксе́нтие, ты́ под и́го Госпо́дне благо́е и зе́млю новоде́лал еси́, доброде́телей слеза́ми умаща́я, досточу́дне.

Устрани́вся жите́йския молвы́, твою́ ду́шу и у́м к Бо́гу сочета́в усе́рдно, кре́пкими поще́ньми на земли́ я́ко безпло́тен пожи́л еси́, всеблаже́нне.

Богоро́дичен: В Тебе́ ны́не ви́деся, Влады́чице, непости́жное богому́жное соше́ствие Христо́во, я́ко Бо́г бо и Челове́к из Тебе́, Чи́стая, роди́ся, обновля́я существо́ мое́.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Вжиля́емь креста́ си́лою, упраздни́л еси́ де́монов стремле́ния и кова́рства разруши́л еси́, поще́нием побежда́я си́х наше́ствие.

А́нгельское житие́ на земли́ подража́я, чи́стое в моли́твах, во бде́ниих благомо́щное, усе́рдно проше́л еси́, о́тче Авксе́нтие.

Я́д сме́ртный, душа́м происхода́тающ, Авксе́нтие, поразуме́в сла́дость, воздержа́нием умертви́л еси́ тоя́ движе́ния, богому́дре преподо́бне.

Богоро́дичен: Созда́вый в нача́лех от пе́рсти мя́ челове́ка, зи́ждется мене́ ра́ди во чре́ве Твое́м, Всенепоро́чная, дре́внее паде́ние исправля́я.

Седа́лен, гла́с 8.

Земна́я вся́ оста́вив, и в ми́ре сы́й теле́сне, ду́хом бы́л еси́ а́нгелом собесе́дник, су́щия бо стра́сти умертви́в теле́сныя, Тро́ицы показа́лся еси́ уго́дник, блаже́нне. Те́мже неду́гующих исцеля́еши стра́сти и сло́вом ду́хи отго́ниши благода́тию, богоно́се Авксе́нтие. Моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, богоро́дичен: Со́лнца о́блаче разу́мнаго, Боже́ственнаго Све́та свети́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослепле́нием страсте́й, безстра́стия заре́ю просвети́, молю́ся, и оскверне́нное мое́ се́рдце омы́й пото́ки умиле́ния, покая́ния же слеза́ми, и от тиме́ния мя́ очи́сти де́л мои́х, да любо́вию зову́ Ти́: Богоро́дице Присноде́во, моли́ Христа́ Бо́га прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.

Крестобогоро́дичен: А́гнца, и Па́стыря и Изба́вителя, А́гница зря́щи на Кресте́, восклица́ше, пла́чущи, и го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим боже́ственныя Стра́сти Твоя́.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Победи́тель на ду́хи лука́вствия, Свята́го Ду́ха, о́тче, соде́йством яви́лся еси́ и благода́тию, зовы́й, Авксе́нтие: сла́ва си́ле Твое́й, Го́споди.

От пото́ков, богоно́сне, беззако́ния моли́твою, всеблаже́нне, себе́ утверди́в, убежа́л еси́ смуще́ния, сла́дости же пото́ка напи́лся еси́ досто́йно, всеблаже́нне.

Богоно́сец, ве́ру и любо́вь, ю́же к Бо́гу, возрасти́в, к го́рней высоте́ боже́ственнаго присвое́ния возвы́сился еси́, зовы́й: сла́ва си́ле Твое́й, Го́споди.

Богоро́дичен: Бо́га Сло́ва Тя́ ро́ждшую, я́ве зна́юще теле́сно, вои́стинну Богоро́дицу, ве́рнии вси́, имену́ем, зва́ние по коему́ждо естеству́ веще́й принося́ще.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Бли́з су́щия твоего́ пути́, о́тче, собла́зны о́стрым умо́м невре́дно преше́л еси́ и душе́вною чистото́ю.

Житие́ твое́ све́тло, и ве́ра правосла́вна, воздержа́ние чу́дно, растворе́нно сло́во благода́тию, Авксе́нтие.

Ре́вностию мы́слей жи́знь преше́л еси́, привре́менная претека́я, ве́чным же, о́тче, при́сно прилага́яся.

Богоро́дичен: У́м иму́ще пра́в, уче́ний испо́лнен, Тя́, Пречи́стая, Богоро́дицу имену́ем вси́ и любо́вию ублажа́ем.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Сы́на тя́ све́та и дне́ показа́ житие́ твое́, блаже́нне, благообра́зно вои́стинну ходя́ща и свети́льника в ми́ре жи́зни сло́во иму́ща.

Поуче́ние сме́рти житие́ твое́ положи́в, преизя́щно преде́л му́дрости, о́тче, поразуме́в, преложи́лся еси́ к Прему́дрости Ипоста́сней.

Богоро́дичен: Хра́м Тя́ Бо́жий и черто́г зна́ем, ста́мну, и све́щник, и скрижа́ль, иму́щую вну́трь напи́сано за милосе́рдие вопло́щшееся Сло́во, Всенепоро́чная.

Конда́к, гла́с 2.

Наслади́вся, богому́дре, воздержа́ния и жела́ния пло́ти твоея́ обузда́в, яви́лся еси́, ве́рою сия́я, я́коже са́д посреди́ рая́, процве́л еси́, Авксе́нтие о́тче свяще́нне.

И́кос:

Кто́ по́двиги твоя́ ны́не изрече́т или́ боле́зни твоя́, о́тче, и́хже подъя́л еси́ на земли́? за Боже́ственное наслажде́ние зако́ном Госпо́дним после́довав и повеле́нием Сего́ послужи́в, но́в на́м показа́лся еси́ И́ов боре́ньми; ми́рови яви́ся пришле́ц и земли́ все́й, я́ко стра́нен, поще́нием ве́рою процве́л еси́, бде́ние и чистоту́ изобучи́л еси́, Авксе́нтие о́тче свяще́нне.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Я́ко уя́звлен Влады́чнею, о́тче, Боже́ственною любо́вию, все́ к Нему́ неосла́бное жела́ние се́рдца твоего́ преложи́л еси́, зовы́й: благослове́н еси́ в хра́ме сла́вы Твоея́, Го́споди.

Просвеще́н Спа́совою заре́ю, всему́дре, тмы́ предста́теля обличи́л еси́ терпели́вно, мироде́ржца же низложи́л еси́, — благослове́н еси́, — зовы́й, — в хра́ме сла́вы Твоея́, Го́споди.

Богоро́дичен: Истле́вшее дре́вле, е́же к лу́чшему возведе́нию, естество́ челове́ческое, Пречи́стая, восхоте́в обнови́ти, всели́ся Соде́тель Бо́г во утро́бу Твою́, Еди́на Всепе́тая.

Пе́снь 8.

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Ве́сь к Бо́гу преложе́н, оттря́сл еси́ плотско́е удобостра́стие и чуде́с прия́л еси́ де́йство, поя́: благослови́те, вся́ дела́ Госпо́дня, Го́спода.

Стра́шен яви́лся еси́ де́моном, Христа́ стяжа́в помо́щника, Его́же кре́ст взе́м, после́довал еси́, поя́: благослови́те, вся́ дела́ Госпо́дня, Го́спода.

Богоро́дичен: Вити́йствует, я́влься, арха́нгел и возвеща́ет Рождества́ Твоего́, Пречи́стая, е́же па́че сло́ва, зача́тие и спаси́тельное ми́ру: вся́ дела́, благослови́те, по́йте Го́спода.

Пе́снь 9.

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Всему́ Божеству́, о́тче, креще́нием твои́м обеща́лся еси́ и соблю́л еси́ чи́сте о́браза, блаже́нне, досто́инство, к Трисия́нней Све́тлости с весе́лием вмести́лся еси́.

Ны́не не в гада́нии, о́тче, ниже́ в зерца́ле зри́ши богонача́лия просвеще́ние, лице́м же, всему́дре, к лицу́, па́че ума́ све́тлости и боговиде́ния сподобля́емь.

Я́ко име́я мно́го дерзнове́ние ко все́х Царю́, о́тче, изба́витися моли́ся твою́ па́мять соверша́ющим ны́не от вся́каго обстоя́ния, да тя́ вси́ ублажа́ем.

Богоро́дичен: Плени́цы мои́х прегреше́ний разреши́, Де́во Богоро́дице, Я́же благоутро́бия исто́чник ро́ждши, еди́на Богоблаже́нная, и утеше́ния испо́лни, я́ко да досто́йно Тя́ велича́ю.

Свети́лен.

Мирска́го благостра́стия, я́ко от скве́рны, уклони́лся еси́, и, неяде́нием пло́ть увяди́в, обнови́л еси́ душе́вную кре́пость, преподо́бне, и сла́вою обогати́лся еси́ небе́сною, сла́вне. Те́мже моля́ся не преста́й о все́х на́с Го́сподеви.

Богоро́дичен: Соединя́ется по Ипоста́си пло́тию Пресу́щное Сло́во души́ посреде́ и мы́сленне и соверше́нне, и Еди́н от двою́ прохо́дит из Тебе́ несме́сно, Пречи́стая, обожи́в, е́же прия́т. Те́мже Тя́ прославля́ет, вои́стинну Богоро́дицу.