Акафистник

Помочь сайту
·
·
·
·

Канон святому преподобному Феодору Освященному, игумену

Память: 29 (16) мая

Глас 2.

Припев: Преподо́бне о́тче Фео́доре, моли́ Бо́га о на́с.

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Песнопе́нии хотя́щему твое́ пе́ти ны́не торжество́, боже́ственных даро́в я́ко сы́й тезоимени́т, да́р пода́ждь ми́ светоно́сен, от сокро́вищ почерпа́я неиздае́мых благода́ть боже́ственную, всеприснопа́мятне.

Поуча́яся зако́ну приле́жно, о́тче, чи́стому, ве́сь чи́ст и пречи́ст бы́л еси́, Всечи́стому же Сло́ву совокупля́яся, чистоты́ све́тел сосу́д показа́лся еси́ и освяще́н, всеблаже́нне.

Богоро́дичен: Умертви́в себе́ ми́ру, жи́знь, о́тче, равноа́нгельну на земли́ благоче́стно проходя́, Возсия́вшему от ложе́сн деви́ческих после́довал еси́, кре́ст тво́й на ра́мо взе́м, богому́дре преблаже́нне.

Пе́снь 3.

Ирмо́с: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Я́ко да́р люби́мь, Влады́це, преподо́бне, твою́ ду́шу, Фео́доре, спаса́ему и воздержа́нием от страсте́й измене́нну прине́сл еси́.

Бо́гу освяще́н, превозше́л еси́, всему́дре, зри́мых чу́вство, чи́стым же умо́м бесе́довал еси́ Уму́ превы́спреннему, преблаже́нне.

Богоро́дичен: Удали́лся еси́ в пусты́ни, бе́гая, сла́вне, И́же от Де́вы просия́вшаго Бо́га Сло́ва ты́ прии́м, о Не́мже и спа́слся еси́, досточу́дне.

Седа́лен, гла́с 3.

Боже́ственною си́лою оде́ян, обнажи́л еси́ полки́ супроти́вных си́л, богоно́се, и, доброде́телей просия́в све́тлостию, исцеле́ний зари́ облиста́л еси́, о́тче преподо́бне: Христа́ Бо́га моли́ дарова́ти на́м ве́лию ми́лость.

Богоро́дичен: Боже́ственная ски́ния была́ еси́ Сло́ва, еди́на Пречи́стая Ма́ти Де́во, чистото́ю а́нгелы превозше́дшая, па́че все́х мене́, пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

Крестобогоро́дичен: Нескве́рная А́гница Сло́ва, нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно, рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмо́с: Прише́л еси́ от Де́вы не хода́тай, ни А́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди.

Купносе́льник Пахо́мию Боже́ственному бы́в, нра́вы подража́л еси́, о́тче Богому́дре Фео́доре, того́ воздержа́нию и правосла́вней ве́ре подо́бяся.

Пева́емаго Ца́рства и Боже́ственнаго сия́ния, досто́йно получи́л еси́, я́ко бы́в худо́г, о́тче, чистото́ю, к прича́стию неизрече́нныя красоты́.

Се́ла ефио́пская, де́монская со́нмища твоего́ ужасо́шася терпе́ния, и смире́ния, и непреста́ннаго во бде́ниих твоего́ стоя́ния, досточу́дне.

Богоро́дичен: Во изступле́нии главы́ си́льных ссеко́шася стра́хом рождества́ Твоего́, Богороди́тельнице Всенепоро́чная, собо́р же преподо́бных удиви́ся досто́йно Боже́ственною благода́тию.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Уче́ния те́пле честна́я име́в, разори́л еси́ все́х ересе́й преле́стная прия́тия, му́дре, Тро́ическою ве́рою огражда́я ста́до твое́.

Я́ко све́т вои́стинну на земли́ бы́л еси́, Фео́доре, житие́ непоро́чно пожи́в, всеприснопа́мятне, по́стников украше́ние, мона́шествующих похвала́.

Богоро́дичен: Тече́нием по́стнических сле́з напая́я се́рдце твое́, плодоно́сно показа́л еси́ возсия́вшему Влады́це Христу́ от Де́вы Святы́я, Фео́доре пребога́те.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Све́тлое и богоуго́дное житие́ твое́ тебе́ небе́сную, о́тче, све́тлость святы́х показа́, в се́лех небе́сных, Фео́доре.

Победи́тель, одолева́я, Фео́доре, лука́вствия духо́в, бы́л еси́, Уте́шителя Ду́ха помо́щника стяжа́в, Богоприя́тне.

Богоро́дичен: О́блак ле́гкий еси́, Чи́стая, на не́мже седя́, прии́де во Еги́пет Вседержи́тель Госпо́дь и свети́льники преподо́бныя соде́ла.

Конда́к, гла́с 2.

В дому́ Бо́жии, я́ко фи́никс, процве́л еси́, плоды́ же доброде́телей Го́сподеви прине́сл поще́нием изря́дным, о́тче преподо́бне, те́мже и ублажа́ешися, я́ко безпло́тных равностоя́телен.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Разу́мно возжела́л еси́, я́коже богови́дец, боже́ственную све́тлость ви́дети, Фео́доре, те́мже ви́димая вся́ оста́вил еси́, во мра́к же вше́д, зре́ти сподо́бился еси́ Непостижи́маго.

Я́да ты́ змии́на душетле́ннаго, преблаже́нне Фео́доре, ника́коже прии́м, сего́ па́мять, о́тче, погуби́л еси́, па́мять непреста́нно Бо́жию в се́рдцы, блаже́нне, стяжа́в.

Богоро́дичен: Святы́х Свята́го, во святы́х почива́ющаго, свя́то породила́ еси́, Де́во Всенепоро́чная, за милосе́рдие мно́гое Челове́ка бы́вша, из Тебе́ воплоще́нна, пре́жде Безпло́тнаго.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Ты́ светови́ден, Све́ту пресве́тлому бесе́довав, яви́лся еси́, преблаже́нне Фео́доре, едине́нием же лу́чшим па́че естества́ обожа́емь, зовы́й ны́не: благослови́те, вся́ дела́ Госпо́дня, Го́спода.

Му́ченик бы́в тве́рд ко греху́, да́же до кро́ве проти́влься, богому́дре Фео́доре, венце́м страда́ния твою́ главу́ украси́л еси́, зовы́й ны́не: благослови́те, вся́ дела́ Госпо́дня, Го́спода.

Богоро́дичен: Яви́ся на́м из Тебе́, Богороди́тельнице, пра́вды све́тлое Со́лнце, просвеща́я вся́ческая заре́ю Божества́, вопло́щся Вы́шний, Его́же ны́не воспева́ем: благослови́те, вся́ дела́ Госпо́дня, Го́спода.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Ны́не не в гада́ниих тебе́ Христо́с ви́димь е́сть, к лицу́ же па́че ви́дится лице́м, и́стинным явле́нием, и́же сено́вным разре́шшимся зерца́лом, даро́в тезоимени́те, Спа́са и Бо́га на́шего.

Жела́ние боже́ственное твое́ испо́лнися, Фео́доре, я́ко дости́г кончи́ну, е́же поще́нием издале́ча зря́ше со умиле́нием, его́же и получи́в, жела́ния уста́вил еси́, по́стников похвало́, мона́шествующих благоле́пие.

Богоро́дичен: Неду́говав растле́тися преслуша́нием, пе́рвый Ада́м Тобо́ю, Богома́ти, обнови́ся: Ты́ бо, воплоще́нна Сло́ва ро́ждши без истле́ния неизрече́нно, тлю́ искорени́вши, нетле́ние процвела́ еси́.

Yandex Metrika